Zãms-y neb a taabã buud-gomd sẽn yaa yɩlemdã
1 Ba a Zeova Kaset rãmbã sẽn yit ‘soolem la buud’ wʋsg pʋsẽ ‘n gomd goam toɛy-toɛyã,’ b yaa saam-biis sẽn vɩ lagem-n-taar pʋgẽ dũniyã gill zugu. (Wil. 7:9) Rũndã-rũndã dũniyã sẽn be welsg pʋgẽ wã, woto sɩd yaa bũmb sẽn lingd wʋsgo. Maana wãn tɩ tõog n yɩ woto? Yaa Wẽnnaam sẽn kõ-b ‘buud gomd sẽn yaa yɩlemdã’ yĩnga.—Sof. 3:9, NW.
2 Biis sẽn be yamleoogo: Buud-gomd sẽn yaa yɩlemdã yaa bõe? Yaa sɩd ning sẽn tɩ loe ne a Zeova la a raabã sẽn be a Gomdã pʋgẽ wã võor-wʋmb sẽn segdã, sẽn yɩɩd fãa sɩd ning sẽn tɩ loe ne Wẽnnaam Rĩungã. Wa a Zezi sẽn da reng n togsã, sɩd kãnga a taasd-a-la ne ‘tʋm-tʋmd sẽn tũud sɩd la sẽn tar yamã’ maasem, tɩ rẽ kɩt tɩ neb ‘sẽn gomd goam toɛy-toɛyã fãa’ sakd sɩd balengã.—Mat. 24:45; Zak. 8:23, Sebr Sõngo.
3 Neba sã n zãmsd buud-gomd sẽn yaa yɩlemdã, kɩtdame tɩ b toeem b vɩɩmã tɩ zems ne a Zeova noyã. B zãmsdame n yaa ‘neb sẽn lagem taab sõma n paam tagsg la yam a yembre.’ (1 Kor. 1:10) Wẽnnaam zãmsgã me leb n kɩtdame tɩ b tar manesem sẽn be burkĩnd, la b gomd goam sẽn yaa sɩd la sõma, sẽn yɩɩd fãa sẽn tɩ loe ne koe-noogã b sẽn moond neb a taabã. (Tɩt 2:7, 8; Heb. 13:15) Toeeng-kãensã sẽn be yamleoog woto wã waoogda a Zeova.
4 Wala makre, rao a yembr la b moon koe-noogã t’a maan sogsg wʋsgo, la koe-moondã rɩka Biiblã n leok a sogsgã fãa. Rao wã sẽn wʋm bũmb ningã kẽe a sũuri, t’a sɩng n zãmsd Biiblã naoor a yiib semen fãa la a rabd tigissã. Rĩungã Roogẽ, nebã sẽn deeg-a ne sũ-noog to-to wã ling-a lame, bala wʋsg ra pa yẽ buudã neb ye. Pa kaoos la yẽ ne a pagã maan toeeng b vɩɩmã pʋgẽ n deeg lisg ye. Rẽ tɛka, nin-kãng sõnga sẽn zems neb 40 tɩ b lebg a Zeova sõgen dãmba, t’a roagdb wʋsg be nin-kãens sʋka. Ne a sẽn yaa koamsã fãa, sẽn pa kaoos pʋgẽ, a lebga so-pakda.
5 Zãms-y neb a taabã: Dũniyã yɛl kɩtame tɩ wʋsg sẽn yaa pʋ-peen neb lebs n dems b tagsgã la b vɩɩmã. D segd n tʋll n sõng-b-la wa a Zezi sẽn maanã. D sã n maan lebg-n-tɩ-ges rãmb la Biibl zãmsg sẽn yaa sõma ne nin-kãensã sẽn yaa pʋ-peen nebã, d na n sõng-b lame tɩ b bãng buud gomd sẽn yaa yɩlemdã.
6 Manesem sẽn yaa sõma ne neb nins sẽn ka tar sẽkã yaa d sẽn na n maan Biibl zãmsg ne-b koɛɛg-koɛɛg d sã n seg-b yir bala. (km 5/02 s.n. a 1) Yãmb zoe n maka woto maaneg bɩ? Yãmb sã n segend n na n lebg n tɩ ges neda, bɩ y yãk saglg ning sẽn zems ne a soabã yʋʋmd 2002, yʋʋm-vẽkr kiuug Rĩungã Tʋʋmd seb-paasdmã pʋgẽ. B kõo sagls nins sẽn be seb-paasdem kãngã pʋgẽ wã wʋsg sẽn na yɩl n sõng-d tɩ d sõasgã kell n kẽng taoor Baood seb-bilã bɩ Bãngr sebrã pʋgẽ. Tʋm-y ne gom-kãensã n minim, sẽn na yɩl tɩ y tʋɩɩsgã kell n kɩt tɩ y sõs sull a yembr zugu. Yãk-y sullã verse a ye bɩ a yiib n karem la y sõs b zutu, la y segl sokre, sẽn na yɩl n sok a soabã baasgẽ wã. Rẽ na n sõnga yãmb tɩ y kell n sõs sull ning y sẽn geend n na n maan y nindaar waoongã wakatã zugu.
7 A Zeova nin-buiidã paamda bark wʋsg b sẽn zãmsd buud-gomd sẽn yaa yɩlemdã yĩnga. Bɩ d modg n sõng neb a taabã tɩ b wa naag-d n ‘pʋʋs ne a Zeova yʋʋrã’ la d ‘sak-a ne yam a yembre.’—Sof. 3:9.