D paas d moonegã tʋʋmd Tẽegrã wakate
1. Pãn-tusd-bʋg la Israɛll yʋʋmd-yʋʋmd kibs rãmbã ra tar wẽn-zoɛtbã zutu?
1 Pĩnd wẽndẽ Israɛllã neb ra maanda kibs rãmb wakat nins a Zeova sẽn yãk yʋʋmdã pʋgẽ wã. (Maan. 23:2) B sẽn da yãkd wakat n tags sõmblem ning b Wẽnnaamã sẽn tar ne-bã zugã ra kɩtdame tɩ b kɩdemd sũ-noog wʋsg la b paasd b yẽesmã baleng sẽn yaa yɩlemdã pʋgẽ.—2 Kɩb. 30:21–31:2.
2, 3. Bõe yĩng tɩ zems tɩ d paas d tẽebã tʋʋm sẽn deng Tẽegrã la a poore, la rabʋr la d na n maan Tẽegrã?
2 Rũndã-rũndã, wakat ning sẽn deng Tẽegrã la a poorã, d moonda koe-noogã sẽn kõt sũ-noogã wʋsg n paasdẽ. Yaa wakat d sẽn bʋgsd kũun ning a Zeova sẽn kõ-d t’a yõodã pa tõe n bãng n sɩfã zug sõmb-sõmbo. (Zã 3:16; 1 Pɩɛ. 1:18, 19) D sã n bʋgsd nonglem ning Wẽnnaam ne a Biriblã sẽn tall ne-dã zugu, tusd-d lame tɩ d pẽgd a Zeova la d modgd n maand a raabã.—2 Kor. 5:14, 15.
3 Rõndã, d na n maana Soaalã kũuma Tẽegr tʋʋlg kiuugã rasem 24 sẽn yaa lamus daarã zaabre, wĩndgã lʋɩɩs poore. Wãn-wãn la d tõe n moon koɛɛgã n paas tʋʋlgo, tʋʋl-nif la sig-noy kiisã pʋsẽ?
4, 5. a) Bõe n sõng neb kẽer tɩ b tõog n moon neb wʋsg koe-noogã? b) Manesem bʋg la y ne y sẽn tõe n tũnug n moon sõma yãmb babgẽ wã?
4 D moon neb wʋsg n paase: Y sã n wa yi koe-moonegã bɩ y bao soay sẽn na yɩl n moon neb wʋsg wa y sẽn tõe tɛka. Rẽ yĩnga y tõe n sigla y sẽkã n naag n moon koɛɛgã zak-zak neb wʋsg sẽn wat n be yir wala wĩnd-kaoorã wall zĩ-sobdã bɩ? Sã n mik tɩ yãmb sebrã zãmsg sullẽ neb kẽer n dat n yi n moon tɩ zãmsgã nan pa ta, sebrã zãmsg yel-gɛt tõe n maana tigisg rẽ yĩng koɛɛg-koɛɛg sẽn na yɩl tɩ b tɩ moon zĩig a yembr sẽn be yambẽ.
5 Manesem a to me d sẽn tõe n tũnug n moon neb wʋsg yaa d sẽn na n moond zĩis nins zãma wã sẽn beẽ. Zapõ, saam-bi-poak n da rat n dɩk sõngr so-pakrã baa ne a sẽn da tar nug-tʋʋmd a sẽn tʋmd be-vẽerã tõrã. Kãsem soab a yembr sagl-a lame tɩ daar fãa, nand t’a kẽng a tʋʋmã, a tõe n tɩ moona sor noor tẽr gaar sɛɛgẽ. Sãam-bi-poakã maoome, n pa zoe rabeem bɩ sẽn dɩkd-b tẽrã yaalg ye. Rẽ poore, a paama neb 40 tɩ b reegd zʋrno rãmbã wakat fãa, tɩ tẽrã gaarẽ tʋm-tʋmdba, neb sẽn dɩkd tẽrã la te-koaasdbã sẽn pẽ ne gaarã be nin-kãens sʋka. A basda sẽn na ta zʋrno rãmbã 235 zĩigẽ wã kiuug pʋgẽ. A sẽn dɩk sẽk bilf n sõs verse rãmb zug ne nebã daar fãa wã, a tõog n sɩnga Biiblã zãmsg ne neb a yoobe.
6. Wãn-wãn la kom-bɩɩsã tõe n maan n paas b tẽebã tʋʋmã?
6 D bao soay n moone: Koe-moondb wʋsg sẽn yaa lekoll karen-biis tara vakãas rãmb yʋʋmdã pʋgẽ. Rẽ kɩtame tɩ b tõe n dɩk sõngr so-pakrã. Sẽn paase, kom-bɩɩs nins sẽn yaa kiris-nebã tõe n paasa b koe-moonegã b sẽn na n kõt kasetã lekollẽ wã. Y karen-bi-taasã sẽn na n tʋlg hal wʋsg n bãng bũmb nins y sẽn tẽedã tõe n ling-y lame. Bõe yĩng tɩ y pa na n tũnug ne y karen-doogã pʋgẽ sõssã wall ne y devoaar dãmbã n kõ kasetã? Neb a taab tũnuga ne a Zeova Kaset rãmbã kasɛt video rãmb n tõog n maan rẽ. Sãnda sɩnga Biiblã zãmsg ne b karen-bi-taas hal n sõng tɩ b bɩ n wa rɩk b mens n kõ Wẽnnaam n deeg lisgu. Woto yaa soay sẽn zems y sẽn tõe n tũnug n ‘pẽg a Zeova yʋʋrã.’—Yɩɩl 148:12, 13.
7. a) Wãn-wãn la saam-biig a yembr tũnug ne segb a sẽn paam n kõ neb a taab kasetã? b) Yãmb zoe n paama segb kãng buud n kõ kasetã bɩ?
7 Y daar fãa tʋʋmã pʋgẽ bɩ y bao soay n sõs ne nebã tõnd Wẽnnaamã la a kãabsã sẽn be yamleoogã zugu. Saam-biig sẽn da rɩkd tẽr yɛng daar fãa n togd sor da paama segb sẽn zems n moond neb a taabã tẽrã pʋgẽ. Wala makre, a sẽn da wat n gũud tẽr ning sẽn pʋgdã sasa, a ra kõtã rao a yembr kasetã minit a nu. Rẽ wa n kɩtame tɩ raoã ne a tʋmd-n-taag sak n na n zãms Biiblã. Zãmsgã ra maanda tẽrã pʋgẽ bala. Kaoosg zugẽ, pʋg-yãang a yembr sẽn da nong n kelgd b sõsgã kolga saam-biigã n kos-a t’a zãms-a Biiblã. Saam-biigã zãmsda Biiblã ne yẽ me ray nins b sẽn segd taab tẽrã pʋgẽ wã. Ne manesem kãngã, saam-biigã zãmsa neb piig Biiblã tẽrã pʋgẽ.
8. Koe-moonegã manesem bʋg n tõe n sõng neb nins sẽn kʋʋlã wall sẽn ka-b laafɩ wã tɩ b kõ kasetã n paase?
8 La yaa wãn masã, sã n mikame tɩ kʋʋlem bɩ bãag n kɩt tɩ y pa tõe n moon wʋsgo? Ne rẽ fãa, soay bee y sẽn tõe n tũnug n pẽg a Zeova wʋsgo. Yãmb zoe n maka kasetã kũun ne telefõnnã bɩ? Y sã n pa mi rẽ sẽn maand to-to bɩ y yeel y sebrã zãmsg yel-gɛta. A tõe n yãa koe-moondb sẽn kõt kasetã ne manesem kãnga n kɩt tɩ y naag-b n tʋme. Y sã n lagem taab n tʋme, ned kam fãa tõe n zãmsa bũmb a to wã nengẽ la y na n sõnga taab n kõ kasetã sõmbo. Kasetã kũun ne telefõnnã wɛɛngẽ, y tõe n yãa sagls sẽn yaa sõma yʋʋmd 2001 wao-fugdg kiuug Rĩungã Tʋʋmd ne farendã seb-neng a 5-6 pʋgẽ.
9. Wãn-to la d tõe n sõng d sẽn zãmsd Biiblã ne neb ninsã tɩ b wa tõog n naag tigingã n yi koe-moonegã?
9 Tẽegrã sõsg kelgr tõe n kɩtame tɩ nin-paalsã tʋlg n pẽg a Zeova n paase. Sẽn na yɩl n sõng-b tɩ koɛɛgã mooneg rabeem sã n da tar-b bɩ a sa, y tõe n togs-b-la yel-sõma toor-toor y sẽn seg koe-moonegã wakate, la y wilgd-b bilf-bilf tɩ b bãng b sẽn tõe n zãms neb Biiblã la b gom to-to n teel b tẽebã. (1 Pɩɛ. 3:15) Ned sẽn zãmsd Biiblã sã n wilg t’a rat n sɩnga koe-noogã mooneg bɩ y tɩ togs yel-gɛt taoor soabã. A na n segla a meng n tɩ yã-a n bãng a sã n pidsda yɛl nins b sẽn baood tɩ ned sẽn zãmsd Biiblã pids n yaool n sɩng koe-moonegã yiib ne tigingã nebã. Ad a Zeova sã n ne nin-paalsã sẽn yãkd yam n na n teel a naam sẽn ka to wã, a sũur sɩd yaa noog wʋsgo!—Yel. 27:11.
10. a) Wãn-wãn la tʋʋm na-kẽndr sẽn sigl sõma tõe n sõng-d tɩ d rɩk sõngr so-pakrã? b) Yãmb tõog n dɩka sõngr so-pakrã rɩẽ Tẽegrã wakat bɩ? Wãn-wãn la y tõog n maan dẽ?
10 Y tõe n dɩka sõngr so-pakrã bɩ? D pa segd n ges lɛɛr 50 wã b sẽn baood tɩ sõngr so-pakd fãa moonã ne reem ye. (Mat. 5:37) Y segd n segla y meng n moon koɛɛgã sẽn na ta lɛɛr 12 semen fãa. Rẽ yĩnga sõngr so-pakrã tʋʋmd na-kẽndɩ toor-toorã sẽn be seb-neng a 5 wã a yembr zemsa ne yãmb bɩ? Sã n pa zems ne-yã, y tõe n maana tʋʋmd na-kẽndr sẽn na sõng-y tɩ y tõog n yɩ sõngr so-pakd tʋʋlgo, tʋʋl-nif wall sig-noy kiuugã pʋgẽ bɩ? Kos-y a Zeova t’a ning modgr ning y sẽn maand n dat n paas y tʋʋmdã barka.—Yel. 16:3.
11. Wãn-wãn la kãsem dãmbã la kãsemb sõngdbã tõe n teel sẽn na n dɩk-b sõngr so-pakrã?
11 Kãsem dãmbã la kãsemb sõngdbã na n teel-y-la y modgrã pʋgẽ ne b sũur fãa Tẽegrã wakat sẽn na yɩl t’a yɩ sasa d sẽn na n pẽg a Zeova ne manesem sẽn pa wõnd a taaba. Tõe tɩ b wʋsg na n dɩka sõngr so-pakrã. Kãsem dãmba na n sigla tʋʋmd tigiss a taab n paas koe-moonegã yiib yĩnga. Wala makre, zaaba wã la wɩkɛn dãmbã tɩ sã n tõeyã. Sẽn na yɩl n yãk tigis-kãens sẽn na n zĩnd zĩig ning la sasa ningã la ned ning sẽn na n lʋɩ taoorã, kãsem dãmbã segd n deng n yẽsa ne neb nins sẽn zoe n segl b mens n na n yɩ sõngr so-pakdbã la sẽn nan dat-b n maan dẽ wã. Kãsem dãmbã na n modg n sigla tʋʋmdã ne manesem sẽn na n kɩt tɩ daar la wakat nins y sẽn na n yi wã bɩ y paam tɩ koe-moondb a taab yãag-yã. Rẽ na n sõngame tɩ d tõog n pids tʋʋmdã sõma.—Yel. 20:18.
12. Bõe n kɩt tɩ d pẽgd a Zeova wakat fãa?
12 Maan-y y sẽn tõe tɛka: Y yɛlã sã n pa kõt-y sor tɩ y rɩk sõngr so-pakrã bɩ y tẽeg t’a Zeova nanda modgr nins fãa d sẽn maand tɩ ‘zems ne d sẽn tarã, la pa ne d sẽn pa tarã’ ye. (2 Kor. 8:12) Segb wʋsg bee d sẽn tõe n tũnug n pẽg a Zeova. A Davɩɩd sɩd ra bee bʋʋm a sẽn gʋls woto wã: “Mam na n waooga [a Zeova] daar fãa. Mam noor pẽgda bãmba n ka basdẽ ye.” (Yɩɩl 34:2 ) Bɩ d modg n maan woto Tẽegrã wakate.
[Zĩ-gũbri, seb-neng a 3]
Wãn-to la y na n paas y koe-moonegã?
◼ Moon-y nebã sẽn wat n be b yiyã
◼ Moon-y zĩis nins zãma wã sẽn beẽ fãa
◼ Sã n tõe bɩ y moon y tʋʋmã zĩigẽ bɩ y lekollẽ wã
◼ Kõ-y kasetã ne telefõnne
◼ Rɩk-y sõngr so-pakrã
[Taablo, seb-neng a 5]
Sõngr so-pakrã tʋʋmd na-kẽndɩ: D sẽn tõe n maan to-to n tõog n moon lɛɛr 12 semen fãa
Yibeoog fãa—Tẽne n tãag sibri
Y tõe n ledga hatã ne daar ning y sẽn date.
Daarã Wakatã Lɛɛrã
Tẽne Yibeoogo 2
Talaato Yibeoogo 2
Arba Yibeoogo 2
Lamusa Yibeoogo 2
Arzũma Yibeoogo 2
Sibri Yibeoogo 2
Hato Yibeoogo 2
Lɛɛr dãmbã zãnga: 12
Rasem a yiib tõre
Y tõe n tũusa rasem a yiib semen fãa. (Sẽn zems ne ray nins y sẽn yãkã, na-kẽnd-kãngã lɛɛr sõor zãng tõe n yaa lɛɛr 48 kiuug bala.)
Daarã Wakatã Lɛɛrã
Arba Daarã tõre 6
Sibri Daarã tõre 6
Lɛɛr dãmbã zãnga: 12
Zaaba a yiib la wɩkɛn
Y tõe n tũusa semen a yiib fãa zaabre.
Daarã Wakatã Lɛɛrã
Tẽne Zaabre 1 1/2
Arba Zaabre 1 1/2
Sibri Daarã tõre 6
Hato Daarã pʋɩ-sʋka 3
Lɛɛr dãmbã zãnga: 12
Zaaba a tãab la sibri
Y tõe n ledga hatã ne daar a to.
Daarã Wakatã Lɛɛrã
Tẽne Wi̇̃nd-kaoore 2
Arba Wi̇̃nd-kaoore 2
Arzũma Wi̇̃nd-kaoore 2
Sibri Daarã tõre 6
Lɛɛr dãmbã zãnga: 12
M meng koe-mooneg na-kẽndre
Yãk-y lɛɛr dãmb sõor y sẽn na n moond daar fãa.
Daarã Wakatã Lɛɛrã
Tẽne
Talaato
Arba
Lamusa
Arzũma
Sibri
Hato
Lɛɛr dãmbã zãnga: 12