D sõng nebã tɩ b yã “dũniyã vẽenem”
1. Vẽenem kãseng bʋg yell la b ra reng n gom Wẽnnaam Gomdã pʋgẽ, la sasa bʋg la d sõngd nebã tɩ b yãt vẽenem kãngã n yɩɩda?
1 A Zeova ra tũnuga ne no-rɛɛs a Ezai n deng n togs woto: “Neb nins sẽn da kẽnd lik pʋgẽ wã yãa vẽenem kãsenga. Vẽenem yãgame n gũbg neb nins sẽn da zĩ lik bida pʋgẽ wã.” (Ezai 9:1) “Vẽenem kãseng” kãng puka ne Wẽnnaam Biribl a Zezi Kirist tʋʋmã maasem. A tẽng zug koe-moonegã la a maoongã nafa vẽnega neb nins sẽn da be lik pʋgẽ tẽebã wɛɛngẽ wã. Rũndã-rũndã nebã sẽn be lik pʋgẽ wã, yaa vẽenem kãng la b rata. A Zezi kũumã Tẽegr yaa sasa takɩ d sẽn tũnugd n sõngd nebã tɩ b yãt “dũniyã vẽenem.” (Zã 8:12) Rɩẽ, neb milyõ rãmb n wilg b tẽebo, b sẽn naag tõnd n sak a Zezi no-kãngã wã: ‘Bɩ y maand bõn-kãngã n tẽegd mam yelle.’ (Luk 22:19) A Zezi kũumã Tẽegr sẽn kolgdã, wãn-wãn la d tõe n sõng nebã tɩ b yã vẽenem kãseng ning a Zeova sẽn kɩt tɩ yãgã?—Fil. 2:15.
2. Bõe n tõe n kɩt tɩ d tall naneb ne maoong ning sẽn yɩ rondã n paase, la rẽ na n kɩtame tɩ d maan bõe?
2 D sõng nebã tɩ b tall naneb ne-a: Tẽegrã wakat yaa sasa sẽn zems tɩ d bʋgs nonglem kãseng ning a Zeova ne a Zezi sẽn tall ne ãdem-biisã n kõ maoong ning sẽn yɩ rondã zugu. (Zã 3:16; 2 Kor. 5:14, 15) D sã n bʋgs Tẽegrã võor sẽn yaa kãsengã zugu, sãmbg sẽn ka be, na n kɩtame tɩ d tall naneb ne-a n paase. Wẽnnaam nin-buiidã fãa tog n dɩka sẽk n karem la b bʋgs Biiblã verse nins b sẽn yãk Tẽegrã yĩng tɩ be D vaees Gʋlsg Sõamyã daar fãa wã pʋgã. D sã n tagsd a Zeova zʋg-kãsemsã sẽn pukd wʋsg rondã a sẽn kõ wã pʋgẽ wã zugu, kɩtdame tɩ d sũy noom d sẽn paam t’a yaa d Wẽnnaamã yĩnga. D sã n bʋgsd rondã sẽn tar yõod ning ne tõnd yembr-yembrã zugu, kɩtdame tɩ d nonglem ne Wẽnnaam la ne a Biriblã paasdẽ, la kɩtdẽ tɩ d wɩngd ne Wẽnnaam daabã maanego.—Gal. 2:20.
3. Wãn-wãn la d tõe n wilg d naneb ne Tẽegrã?
3 D sã n paas d mi-beoog ne segls nins a Zeova sẽn dɩk n na n fãag-dã, d Biiblã karen-biisi, neb nins d sẽn lebgd n tʋgd n kaagdẽ wã, d roagdba, d yagse, d karen-bi-taase, d tʋmd-n-taas la neb a taab d sẽn bool tɩ b wa Tẽegrã na n tʋlg n waame. (Luk 6:45) Woto yĩng bɩ d modg wʋsg n bool b ned kam fãa ne Tẽegrẽ wã waoong boolg sebr sẽn na yɩl tɩ b ra yĩm daarã ye. Sẽn na yɩl n da yĩm neb kẽer yelle, wʋsg tara sebr n gʋlsd b sẽn boond neb nins Tẽegrẽ wã wakat fãa wã yʋya, tɩ yʋʋmd fãa bɩ b gʋlsd b sẽn na n bool-b rãmbã yʋy be n paasdẽ. D sã n tũ sagl-kãens la d maan d sẽn tõe tɛk n bool nebã, wilgdame tɩ d tara mi-beoog ne kũun-kãseng ning Wẽnnaam a Zeova sẽn kõ-dã.—2 Kor. 9:15.
4. Bõe n tõe n sõng-d tɩ d moon n paas tʋʋlg la tʋʋl-nif kiisã pʋgẽ?
4 D moon n paase: Y tõe n dɩka sẽk n moon koɛɛgã tʋʋlg la tʋʋl-nif kiisã pʋgẽ n paas bɩ? D sã n maan modgr n moon “koe-nooga vẽenem sẽn pukd Kirist ziirã,” Wẽnnaam na n ning-d-la barka. A Zeova sẽn yaa tẽeb vẽenemã yẽgrã kõo noor n “yeel tɩ vẽenem na yãg lik pʋgẽ.” (2 Kor. 4:4-6) Sã n segda, kãsem dãmbã na n sigla koe-moonegã yiib tigiss wakat rãmb la zĩis a taab n paase, la b lʋɩ taoor n teel koe-moondb nins sẽn dat n moond n kaoosdẽ wã. Tõe n yɩɩ wala soayã noy mooneg yi-beoog pĩndã, pa rẽ bɩ segls sẽn na yɩl n moon koosem zĩisẽ. Sẽn na yɩl n tõog n moon wʋsgo, y tõe n yãka lɛɛr dãmb sõor takɩ y sẽn mi tɩ y tõe n pidsame, la y moon sõma n pids-ba. Saam-biis wʋsg getame tɩ sõngr so-pakrã me yaa sor b sẽn tõe n tũnug n tʋm ne b sũy fãa a Zeova yĩnga.—Kol. 3:23, 24.
5. B sẽn boog lɛɛr sõor ning b sẽn baood tɩ sõngr so-pakdbã moonã, wãn-wãn la sõngd koe-moondb wʋsgo?
5 Y tõe n yɩɩ sõngr so-pakd bɩ? Sẽn yɩɩd yʋʋm a yopoe la woto, b booga lɛɛr dãmb sõor ning b sẽn baood tɩ sõngr so-pakdbã moonã. Woto kɩtame tɩ neb wʋsg tõe n yɩ sõngr so-pakdb n paam bark nins tʋʋm-kãng sẽn wat ne wã. Yãmb zoe n dɩka sõngr so-pakrã bɩ? Neb kẽer minim n dɩkd-a-la yʋʋmd fãa. Tigims wʋsg pʋsẽ, saam-biis wʋsg naagda taab n dɩkd sõngr so-pakrã, tɩ wakat kãng kõt tigingã neb sũ-noog n yɩɩd yʋʋmdã fãa pʋgẽ. Y tõe n segla y meng n yɩ sõngr so-pakd Tẽegrã sasa kiuug a ye pʋgẽ n paam sũ-noog bɩ? Sẽn yɩɩd fãa, tʋʋl-nif kiuugã sẽn tar wɩkɛn dãmb a nu wã, a zemsa ne sõngr so-pakrã rɩkre.
6. Segl-bʋs sẽn be yamleoog la b maan-yã?
6 Yãmb tigingã na n paama tigims sull yel-gɛta kaagr tʋʋlg la tʋʋl-nif kiisã pʋgẽ bɩ? Segb sẽn yaa toor zall la y tõe n paame. Wala b sẽn da zoe n togsã, rõndã, neb nins fãa sẽn yaa sõngr so-pakdb tigims sull yel-gɛtã kaagr sasa wã na n paama sor n kẽng tigisg ning a sẽn na n maan ne so-pakdbã, n kelg tigisgã pipi babgo. Sãmbg sẽn ka be, bũmb nins sẽn kengd tẽebã b sẽn na n kelg tigis-kãng sasa wã na n sõnga sõngr so-pakdb wʋsg tɩ b wa tõog n lebg wakat fãa so-pakdba. Sẽn paase, tʋʋlg kiuugã pʋgẽ, ne zãmsg seb-paallã gom-zug sẽn yaa Biiblã sɩd yetame tɩ bõe wã maasem, d na n sõnga nebã ne sũ-noog tɩ wa tẽebã vẽenemẽ. Y tõe n talla seb-paal-kãngã n sɩng Biiblã zãmsg ne nebã.
7, 8. a) Bõe n tõe n sõng-d tɩ d segl d mens n dɩk sõngr so-pakrã? b) Zakã rãmb sã n teel taaba wãn-wãn la rẽ tõe n sõnge, la wãn-wãn la tõe n naf zakã neb fãa?
7 B sẽn baood tɩ sõngr so-pakd fãa moon lɛɛr 50 wã yĩnga, yãk-y mooneg na-kẽndr sẽn na n sõng-y tɩ y tõog n kɩt tɩ sɩdã yãg lɛɛr 12 pʋgẽ semen fãa. Gom-y rẽ yell ne neb nins sẽn zoe n tõog n dɩk sõngr so-pakrã la ne neb a taaba, tɩ tõe n kɩtame tɩ b tʋlg n naag-y n dɩk-a. Koe-moondb nins sẽn deeg lisgã, kom-bɩɩs la b kãsemb fãa sẽn segl b mens sõma, yãame tɩ sõngr so-pakrã sẽn yaa tʋʋmd sẽn be waoogrã rɩkr pa toe ye. Reng-y n pʋʋs-y-yã. Rẽ poore, sã n tõe bɩ y segl y mens n dɩk-a.—Mal. 3:10.
8 Zags wʋsg neb yãame tɩ b fãa sã n teel taaba, tõe n kɩtame tɩ baa na yɩ zakã nin-yend tõog n dɩk sõngr so-pakrã. Zak a yembr neb ra rɩka sard tɩ b neb a nu sẽn deeg lisgã fãa na n yɩ sõngr so-pakdba. B kamb a yiib sẽn da nan pa reeg lisg modgame n moon wʋsg n paase. Nafa bʋs la zag-kãngã rãmb paam b sẽn maan modgr woto wã? B gʋlsame: “Yɩɩ kiuug sẽn tall yamleoogo, la d sɩd yãame tɩ d zakã neb zems-n-taar paasame. D pʋʋsda a Zeova barka, a sẽn ning d bark wʋsg woto wã!”
9. Wãn to la d tõe n kɩt tɩ d vẽenemã yãg tʋʋlg la tʋʋl-nif kiisã pʋgẽ?
9 Rẽ yĩnga, d koe-moonegã tʋʋlg la tʋʋl-nif kiisã pʋgẽ wã na n kenga d tẽeb la kɩt tɩ d pẽneg d saasẽ Ba wã n paas bɩ? Rẽ bee ne tõnd ned kam fãa sẽn na n mao to-to n paas a nonglem ne Wẽnnaam la ne a Biriblã n moon wa a pãng sẽn tõe tɛka. Bɩ d yãk yam n maan wala yɩɩl gʋlsdã, a sẽn yɩɩl woto wã: “Mam na n pʋʋsa Zusoaba bark wʋsg ne m noore, la mam na n pẽga bãmb neb wʋsg sʋka.” (Yɩɩl 109:30) A Zeova na n ning-d-la bark d sẽn na n moon koɛɛgã ne yẽesem tʋʋlg la tʋʋl-nif kiisã pʋgẽ wã yĩnga. Bɩ d kɩt tɩ vẽenem kãseng yãg n paas sẽn na yɩl tɩ neb wʋsg yi likẽ wã n ‘paam vɩɩmã vẽenem.’—Zã 8:12.