D na n yãka daar n kãabd nebã Biibl zãmsgo
1 Yʋʋm-vẽkr kiuugã tɛka, kiuug fãa, tigingã na n yãkda raar a ye wɩkɛn a ye pʋgẽ n kãabd nebã Biibl zãmsgo. Tõe n yɩɩ sibr bɩ hat daare, sẽn zems ne koe-moondbã yɛl sẽn yaa to-to wã. Ra-kãngã, kɛlgdbã sã n pa rat n sak Biibl zãmsgo, koe-moondbã tõe n kell n kãab-b-la Biiblã yetame sebrã, bɩ yaoolem Gũusg Gasgã la Réveillez-vous ! wã. Kãsem dãmbã la kãsemb sõngdbã fãa segd n kẽesa b mens zãng tʋʋm-kãngã pʋgẽ, la b sõng koe-moondbã tɩ b sɩng Biiblã zãmsg ne nebã.
2 Tigingã tʋʋmd sullã na n yãka raar ning b sẽn dat n kãab nebã Biibl zãmsgã wɩkɛna pʋgẽ. B segd n tẽegda koe-moondbã rẽ, sẽn na yɩl tɩ b tõog n segl b mens la b modg n kãab nebã Biibl zãmsg zak-zak moonegã sasa, la b sã n wa lebg n na n tɩ ges ned sẽn da wilg t’a rat n bãng n paasame.
3 D sẽn na n segl d mens to-to: Sagls sẽn tõe n sõng tõnd tɩ d tõog n segl d mens n be yʋʋmd 2006 wao-fugdg kiuugã Rĩungã Tʋʋmd seb-paasdmã pʋgẽ, la Comment raisonner sebrã neng 12 zĩigẽ. Koe-moondb kẽer tõe n tũnuga ne seb-vãoog n segl b mense. Wala makre, Yãmb dat n bãnga sɩdã bɩ? seb-vãoogã. Sẽn paase, yʋʋmd 2007 sa-sik kiuugã Rĩungã Tʋʋmd sebrã neng a 3 wilgda d sẽn tõe n maan to-to n sɩng Biibl zãmsgo, d sã n wa kẽng n na n tɩ ges ned d sẽn da kõ sebre. B na n yãkda kãsem dãmbã la kãsemb sõngdbã tɩ b lʋɩt taoor n maand moonegã tigsgã minit 10 n tar n dabd 15. B segd n kõo koe-moondbã sagls bɩ n maan mak-n-wilg a ye bɩ a yiib n wilg b sẽn tõe n sɩng Biibl zãmsg ne nebã to-to.
4 Yaa sɩd tɩ pa nebã fãa n na n sak Biibl zãmsgo, bɩ n sak n zãms la b ra bas ye. La rẽ pa segd n kɩt tɩ d pa kãab nebã Biibl zãmsg ye. Bala yaa a Zeova n boond neb nins sẽn yaa sakdb wa piisã a siglgã pʋgẽ. (Zã 6:44) Tõnd tʋʋmd pa koɛɛgã mooneg bal ye. D segdame n lebg n tɩ get neb nins sẽn sakd n kelgd koɛɛgã, la d zãmsd-b Biiblã. D sã n zãmsd Biiblã ne-ba, d wilgdame tɩ d yaa Wẽnnaam tʋmd-n-taase.—1 Kor. 3:9.