Sa-sik kiuugã na n yɩɩ kiuug sẽn pa wõnd a taaba!

D na n pʋɩya seb-vã-paall dũniyã gill zugu

1. Bõe la d na n maan dũniyã gill zug sa-sik kiuugã?

¹ Ka la bilfu, Wẽnnaam Rĩungã sẽn lugl saasẽ wã na n paama yʋʋm koabga. Woto yĩnga, zemsame tɩ d pʋɩ seb-vãoog dũniyã gill zug n pẽg a Zeova. Sa-sik kiuugã, d na n pʋɩya seb-vã-paall t’a gom-zugã yaa: “Yɛ la d tõe n paam sogsg nins sẽn pak nebã leoore?” Seb-vãoogã pʋgẽ, b sagenda nebã tɩ b bao sogs-kãens leoorã Biiblã pʋgẽ, la b wilgd tõnd sitã (jw.org) sẽn tõe n sõng-b to-to.

2. Bõe la d tõe n maan n paam n naag d taabã n ‘pẽg a Zeova’ sa-sik kiuugã?

² D naag taab n pẽg a Zeova: Sẽn na yɩl n sõng koe-moondbã tɩ b moon koɛɛgã n paase, b kõo sor tɩ sẽn dat-a fãa tõe n yɩ sõngr so-pakd sa-sik kiuugã, n moon lɛɛr 30. Sa-sik kiuugã sẽn tar arzũm a nu, sibr a nu, la hat a nu wã, tʋm-tʋmdb la karen-biis kẽer tõe n yɩɩ sõngr so-pakdba. Y sã n zãmsda ned Biiblã t’a tũud noyã sõma, pa rẽ bɩ y tara biig sẽn maood n dat n lebg koe-moonda, bɩ y togs tigingã kãsem-dãmbã sull taoor lʋɩtã tao-tao. Ad b sã n paam n na n naag tõnd n pʋɩ seb-vãoogã, na n kenga tigingã neb fãa raoodo! Naoor wʋsgo, wakat fãa so-pakdbã sã n paam b lɛɛr-dãmbã, sa-sik kiuugã, b mi n vʋʋsdame. La sã n tõe, bɩ b sigl b sẽkã n naag n pʋɩ seb-vãoogã sõma. Yaa masã la zagsã rãmb segd n yẽs n bãng b sẽn na n maan to-to n naag “n pẽg a Zeova” sa-sik kiuugã pʋgẽ.—Ɛs. 3:11; Yel. 15:22.

3. Sa-sik kiuugã, d saagda bõe?

³ Yaa sɩd tɩ d zoe n naag n pʋɩya seb-vãado. La d saagdame tɩ so-kãngã, seb-vãoogã pʋɩɩbã pa na n wõneg a taab ye. Rẽ yĩnga, d pa tõe n mao tɩ d koe-moonegã lɛɛr-dãmb paase, tɩ d koe-moondbã wall d sõngr so-pakdbã sõor paas sɩda? D tʋʋmdã yʋʋmd sẽn kolg saabã, bɩ a Zeova ning a nin-buiidã modgrã barka, la a sõng tɩ d koe-moonegã paam pãng sa-sik kiuugã n yɩɩg kiis a taabã.—Mat. 24:14.