Y SẼN TÕE N MAAN N DA LE KISG Y TAABÃ

1 | Da tũusd-y neb ye

Biiblã sẽn yete:

“Wẽnnaam pa tũusd neda, la tɩ buud fãa pʋgẽ, ned ning sẽn zoet bãmb la a maand sẽn yaa tɩrg tata bãmb yam.”—TƲƲMA 10:34, 35.

Rẽ sẽn dat n yɛɛlga:

Wẽnnaam a Zeovaa pa get d sẽn yit tẽng ninga, d yĩn-kõbgo, wall d buudã n kao d bʋʋd ye. A tikda bũmb ning sẽn tar yõod n yɩɩdã, rat n yeel tɩ d tagsa wã, la sẽn be d sũurẽ wã. Biiblã yeelame me tɩ “ninsaal geta sẽn be ra-sãnde, la Sẽn-Ka-Saab geta sũuri.”—1 Sãmwɛll 16:7.

Y sẽn tõe n maane:

Yaa sɩd tɩ d pa tõe n bãng sẽn be ned sũurẽ ye. La d tõe n dɩka Wẽnnaam togs-n-taare, n pa bakd ned ye. Modg-y n ges-y ned fãa wa a sẽn sɩd yaa ned ningã, la y ra get a sẽn yaa buud ning ned n kao a bʋʋd ye. Y sã n wa getẽ tɩ y tara tags-kɛg neb a taab zugu, wala makre, ned sẽn yaa bu-zẽnga, wall ned yĩn-kõbg sẽn yaa toor ne-yã, bɩ y pʋʋs Wẽnnaam n kos-a t’a sõng-y tɩ y bas tags-kɛg a woto. (Yɩɩn-sõamyã 139:23, 24) Y sã n pelg y pʋg n kos a Zeova t’a sõng-y tɩ y ra bakd neda, y tõe n basa y yam t’a na n kelga y pʋʋsgã n sɩd sõng-yã.—1 Pɩyɛɛr 3:12.

a Zeova wã yaa Wẽnnaam yʋ-peelle.—Yɩɩn-sõamyã 83:18, MN.

“M da nan zɩ n zĩnd ne nasaara tɩ rok bãan ye . . . Rũndã-rũndã, m naaga a Zeova nin-buiidã sẽn be dũniyã gill zug n yaa wa zak a ye nebã.”—A TƖT

Ned vɩɩm kibare—A TƖT

A tõogame n bas neb kisgri

A Tɩt yaa rao sẽn da naag bi-bees sulli. B ra zabda ne noy nins tẽngã taoor dãmb sẽn da lugl bu-welsgã yĩngã. No-kãensã ra weoogda nebã. Ad a sẽn yeele: “D ra mi n kẽnda zĩis nins b sẽn pa nong nin-sablsã, n na n tɩ bao zabre. Wala makre, lotɛl-dãmbẽ wã la baar-dãmbẽ wã.” A Tɩt yeelame t’a ra tugda beem ne neb wʋsgo, tɩ kɩt t’a ra yaa ned sũur sẽn yikd tao-tao, la nen-kɛglem soaba. A paasame: “Ned sã n da bao mam noore, a yaa pag t’a yaa raoa, m da yɩta pipi n wẽ a soabã.”

A Tɩt sẽn wa n sɩng Biiblã zãmsg ne a Zeova Kaset rãmbã, a sɩnga toeengo. Biiblã karengã sõng-a lame t’a toeem a tagsa wã. Bũmb ning sẽn sõng-a n tɩ yɩɩd yaa Biiblã sẽn pʋlem tɩ dũni-paalgã pʋgẽ, “kũum pa na n le zĩndi, sũ-sãanga, yãbr wall toog pa na n le zĩnd ye.”—Vẽnegre 21:3, 4.

Sɩngrẽ wã, ra yaa toog ne a Tɩt t’a bas nebã kisgri. A yeelame yaa: “Ra yaa toog ne-m tɩ m toeem m tagsa wã la m manesmã.” La a sẽn bãng tɩ Tʋʋm 10:34, 35 wã wilgdame tɩ Wẽnnaam pa bakd nedã sõng-a lame.

Baasa wãna. Ad a Tɩt sẽn yeele: “Mam sẽn yã nonglem ning sẽn be a Zeova Kaset rãmbã sʋkã, baa ne b sẽn yaa buud toor-toor neb tɩ b yĩn-kõbgã me pa yembrã, mam kɩsa sɩd tɩ b tũudmã la tũudum hakɩɩkã. Nand meng tɩ m deeg lisg n lebg a Zeova Kaset soaba, tigingã ned a ye sẽn yaa nasaar n bool maam a zakẽ tɩ m wa naag-a n dɩ. Ra yaa wa zãmsdo. M da nan zɩ n zĩnd ne nasaara tɩ rok bãane, tɩ b sokd m kẽng a zakẽ n tɩ naag-a n dɩ ye. Rũndã-rũndã, m naaga a Zeova nin-buiidã sẽn be dũniyã gill zug n yaa wa zak a ye nebã.”