D kẽn wa yam dãmba
1 A Zezi sẽn yeel zĩm-yẽedb a naas tɩ b yɩ a karen-biisã, “tao-tao bala . . . b tũu a Zezi.” (Mat. 4:18-22) A Soll sẽn yit Tarsã me sẽn tuub n lebg kiris-ned t’a ninã pukã, a pa bas tɩ kaoos ye. “Tao-tao bala, yẽ moona koɛɛgã karen-dot pʋsẽ n yeel t’a Zezi yaa Wẽnnaam Biiga.” (Tʋʋ. 9:20) Wakatã loogdame, la sã n loog n sa saame. Yaa rẽ n so tɩ tar yõod tɩ d wilg ne d sẽn tʋmd ne d sẽka to-to wã tɩ d ‘kẽnda wa yam dãmba.’—Ef. 5:15, 16.
2 Yel-lingdem tõe n waame: D tõe n tara zu-noog n tʋmd a Zeova tʋʋmdã rũndã, tɩ beoog bɩ bũmb kɩt tɩ d pa ye tõe n tʋm wa pĩndã ye. (Zak 4:14) Ned baa a ye pa põsd yel-lingdem ye. (Koɛ. 9:11) Sẽn paase, d fãa kʋʋndame, la d pa tõe n põs kʋʋlmã sẽn wat ne zu-loees nins sẽn kɩtd tɩ d pa tõe n tʋm a Zeova tʋʋmã wa pĩndã ye. (Koɛ. 12:1) Dẽnd tõnd sã n kaoosd n pa rat n dɩk d mens n kõ Wẽnnaam bɩ n gũudẽ tɩ d yɛlã manes wa tõnd sẽn dat to-to wã n yaool n moon koɛɛgã n paase, rẽ pa yam tʋʋmd ye. (Luk 9:59-62) A Abrahaam kʋʋlmã wakate a yamã ra gãee bãane. A sẽn wa n kiidẽ wã t’a tara sũ-noogo, bala a vɩɩmã tõre a bãnga yam n tʋm a Zeova tʋʋmdã ne a sũur fãa.—Sɩng. 25:8.
3 Wakatã sẽn ketã pa waoog ye: D ratame me n tʋm ne d sẽkã sõma, bala “wakatã lebga bilfu.” (1 Kor. 7:29-31) Dũni kãngã na n saa ka la bilfu. Rẽ poore, d ye pa na n paam zu-noog n tigim neb nins b sẽn mak ne piisã yɛs ye. (Wil. 14:15) D segd n gũusame n da wa bas tɩ vɩɩmã yɩɩr la yɛl a taab tiis-d tɩ d pa tõog n dɩk d sẽkã n moon koɛɛgã ye. (Luk 21:34, 35) Dũni paalgã pʋgẽ, d sã n wa lebg n tẽeg tɩ d moona koɛɛgã ne d sũur fãa, d sũur na n yɩɩ noog wʋsgo.
4 D segd n gũusa wakat fãa n da wa kong zu-noog ning d sẽn tar n tõe n tʋm Wẽnnaam tʋʋmdã ne sũ-noogã ye. Bɩ d kell n maan d sẽn tõe fãa n tʋm a Zeova tʋʋmdã masã. (Heb. 3:13) D sã n maand woto, d wilgdame tɩ d sɩd yaa yam dãmba, bala “ned ninga sẽn maand Wẽnnaam daab paada wakat sẽn ka sɛta.”—1 Zã 2:17.