Y tõe n moonda koɛɛgã zaabr-zaabr bɩ?
1. Bõe la sebr a yembr wilg tʋm-tʋmd a Poll koe-moonegã wɛɛngẽ?
1 Sebr a ye (La vie quotidienne dans les temps bibliques) wilgame tɩ tʋm-tʋmd a Poll moona koɛɛgã zak-zaka, la t’a ra mi n sɩnga zaabr wakat a naas hal n tãag yʋngo. D pa mi a sã n da maanda woto wakat fãa ye. D sẽn mi bal yaa t’a ra “maanda bũmb fãa Koe-noogã yĩnga.” (1 Kor. 9:19-23) Woto wilgdame t’a ra siginda a sẽkã, t’a sã n na n tɩ moon koɛɛgã bɩ yɩ wakat ning a sẽn tõe n paam neb wʋsgo.
2. Bõe yĩng tɩ d tõe n yeel tɩ zaabr yaa sõma ne koɛɛgã moonego?
2 Zĩis wʋsgo, nong n yaa yibeoog la koe-moondbã moond zak-zaka. La yãmb moonegã zĩisẽ, yaa yibeoog fãa la y tõe n paam neb wʋsg bɩ? So-pakd a ye yeela woto: “Mam sẽn moond zĩig ningã, yaa toog tɩ m paam neb wʋsg yibeoogo. La zaabre, wʋsg bee b zagsẽ.” D sã n moond koɛɛgã zaabre, d paamda neb wʋsg n taas koe-noogã, sẽn yɩɩd fãa rapã. Yaa wakat kãng la zagsã rãmb be yir n vʋʋsdẽ, tɩ rẽ kɩt tɩ b tõe n sak n sõs ne-do. Kãsem-dãmbã sã n ges n mik tɩ sakdame, b tõe n sigla koɛɛgã mooneg zaabr-zaabre.
3. D sã n wa moond koɛɛgã zaabre, bõe la d tõe n maan n wilg tɩ d tʋmda ne yam?
3 D tʋm ne yam: D sã n moond koɛɛgã zaabre, yaa sõma tɩ d tall yam. Wala makre, d sã n kẽ zak pʋgẽ n mik tɩ b rɩtame, bɩ d yeel-b tɩ d na n lebg n pɩʋʋgame. Zĩigã sã n sobgame me, d sã n wẽ kʋɩleng bɩ d yals zĩig zakã rãmb sẽn tõe yã-do, la d yɩ tao-tao n togs d sẽn yaa ned ningã, la d waoongã võore. Yaa sõma me tɩ d tũud taab yiib-yiibu, wall d tũ taab wʋsgo, tɩ koe-moondb a yiib sã n kẽ zak pʋgẽ, bɩ a taabã yals yambẽ n gũ-ba. Segdame tɩ d nong n yas zĩig ning vẽenem sẽn beẽ, tɩ b tõe n yã-do. Zĩigã sã n wa sobg wʋsg bɩ d ra kẽ nebã zagsẽ, bala tõe tɩ b rat n kẽe gãaga. (2 Kor. 6:3) Sã n mik tɩ d moonegã zĩis kẽere pa sõma tɩ d moon yʋngo, bɩ d moond beenẽ yibeoog bala.—Yel. 22:3.
4. Nafa bʋs la d paamda, d sã n moond koɛɛgã zaabre?
4 Nafa wã: D sã n tõog n paamd nebã n taasd koɛɛgã, d paamda sũ-noogo. La d sã n paamd neb wʋsgo, d na n tõog n sõnga neb wʋsg tɩ b wa “paam fãagre, la b bãng sẽn yaa sɩda.” (1 Tɩm. 2:3, 4) Bɩ d modg n sigl d sẽkã sõma, n tõog n moond koɛɛgã zaabr-zaabre.