D paas d koe-moonegã minim: D wilg tɩ d kɛlgdbã yell pak-d lame

Saglgã yõodo: A Zezi ra sõngda a kɛlgdbã tɩ zemsd ne b yɛlã sẽn yaa to-to wã. Makre, daar a yembre, b talla rao sẽn yaa wʋng la bidga, n wa a Zezi nengẽ. La tõe t’a Zezi bãngame tɩ raoã yam da pa gãe bãane, t’a peeg-a n yi kɛɛng n tɩ sãoog-a. (Mark 7:31-35) A Zezi wilgame me t’a mi a karen-biisã tõog sẽn tek zĩig ninga, n pa togs-b bũmb kẽer b sẽn da nan pa tõe n wʋm b võor ye. (Zã 16:12) Baa a sẽn wa n leb saasẽ wã, a ra ket n wilgdame tɩ nebã yell pak-a lame. (2 Tɩm. 4:17) Tõnd me sẽn yaa a Zezi karen-biisã, d segd n dɩka a togs-n-taare. (1 Pɩɛ. 2:21; 1 Zã 3:16, 18) Sẽn paase, d sã n ning d kɛlgdã yɛl sẽn yaa to-to wã d yamẽ, n bao n bãng yɛl nins sẽn pak-a wã, la d wilg tɩ d tʋll n sõng-a lame, d koe-moonegã na n woma bi-sõma. Bala, kɛlgdã sã n mik tɩ d pa wa n na n taas-a koɛɛg wall d kõ-a sɛb bala, la tɩ d tʋll n sɩd sõng-a lame, tõe t’a sak n kelg-do.

Ad y sẽn tõe n maan dẽ to-to:

Segend-y y meng sõma. Y sã n seg ned bɩ y bas-y y yam, n la ne a soaba, la y ra gãnem y neng ye.
Yɩ-y gũusdba. Ges-y-yã a soabã sã n tara kamba, pa rẽ bɩ a sã n tara zĩig a sẽn sel zẽed a zakã pʋgẽ, wall a sã n tara rũnga. Y leb n tõe n gũus n gesa a sẽn yaa tũudum ning neda, n tik rẽ n sɩng y sõsgã.
Sok-y-yã-a t’a togs a tagsgo. A sã n sɩng goam bɩ y ra kʋʋg-a ye. Mi n zẽk-y y neng n ges-a t’a bãng tɩ y kelgd-a lame. A sã n gom n sa, bɩ y pʋʋs-a barka, t’a sẽn yeelã sã n sek pẽgr bɩ y pẽg-a. Ra wẽ-y no-koɛɛm ne-a ye.
Toeemd-y y sɩngr-goama. Sã n wa yaa tɩlae bɩ y toeem y sɩngr-goamã tɩ zems ne a soabã yɛl sẽn yaa to-to wã. Woto maneg pa toog ye. Bala, d tara seb-vãado, seb-bi la periodik-rãmb sẽn tar gom-zut toor-toore. Y sã n taame n mik tɩ kɛlgdã pa tar sẽka, bɩ y kʋʋg sõsgã.

Mak-y woto ki-kãngã:

Y zak pʋgẽ Biibl zãmsgã sasa bɩ y mak y sẽn tõe n tik bũmb y kɛlgd sẽn yeel n taas-a koɛɛgã. Y leb n tõe n maana rẽ koe-moonegã sasa.
Koe-moonegã tigsg sasa, saam-biig ning sẽn na n lʋɩ taoorã tõe n wilga d sẽn tõe n maan to-to tɩ d kɛlgd bãng t’a yell pak-d lame, wall a kos koe-moond t’a mak rẽ n wilgi.