Jiswa Iktar mill-​Flus

MINN KORRISPONDENT TAʼ STENBAĦ! FIL-​KANADA

“Lil bintha tatha rigal li jiswa ħafna iktar minn kwalunkwe ammont taʼ flus,” irrikonoxxa kumment editorjali fil-​gazzetta The Monitor taʼ Bridgetown, ġewwa Nova Scotia. X’kien ir-​rigal? Kien “l-​eżempju t’onestà taʼ l-​għaġeb” li tat.

Anna u bintha Tanya waqfu f’dar fejn kienu qed jinbiegħu oġġetti wżati taʼ ftit valur u xtraw basket abjad għall-​Bibbja taʼ Tanya. Meta waslu lura d-​dar, Tanya fetħet żipp ġol-​basket u b’sorpriża kbira sabet 1,000 dollaru [Lm278]. Immedjatament, l-​omm u l-​bint irritornaw lura minfejn xtraw il-​basket u taw il-​flus lis-​sinjura li kienet begħtithulhom. Mid-​dehra, dak il-​basket, li ftit li xejn kien intuża, kien taʼ ommha li kienet mietet ftit qabel bil-​marda t’Alzheimer, u ma kienx ġie eżaminat sew qabel ma nbigħ. Is-​sinjura kienet grata ħafna u rrimarkat: “Dan jirrestawra l-​fiduċja tiegħi fin-​nies . . . Hi ħaġa sabiħa li tkun taf li għadhom jeżistu nies onesti.”

Fil-gazzetta lokali, artiklu fl-​ewwel paġna dwar din il-​ġrajja kkwota lil Anna bħala li qalet: “Aħna, bħala Xhieda taʼ Jehovah, qatt ma jgħaddilna minn moħħna li nagħmlu mod ieħor. Għandna [kuxjenza] bbażata fuq il-​Bibbja. Irridu wkoll ngħallmu lil Tanya dak li huwa sewwa.” Għal Tanya, il-​basket ġdid abjad se jkun tfakkira speċjali taʼ lezzjoni fl-​onestà.