L-​Ispiritiżmu Għala Jinteressa Lil Ħafna Nies mad-​Dinja Kollha?

L-​ispiritiżmu ġie mfisser bħala “t-​twemmin li parti mill-​bniedem li hija spirtu tibqaʼ ħajja wara l-​mewt tal-​ġisem fiżiku u tistaʼ tikkomunika mal-​ħajjin, ġeneralment permezz taʼ persuna li taqdi bħala mezz taʼ komunikazzjoni bejniethom.”

FIS-​SENA 1998 ċertu ktieb, li kien jispjega kif wieħed jikkomunika mal-​mejtin, sar popolari ħafna fl-​Istati Uniti. Fil-​fatt dan malajr telaʼ fl-​ogħla post tal-​lista taʼ l-​iktar kotba li jinbiegħu li għamlet in-​New York Times.

Ftit tas-​snin ilu f’Moska, il-​politikanti u n-​negozjanti ffissaw fuq il-​fenomeni soprannaturali u s-​seduti fejn jiġu msejħin l-​ispirti, u ħallsu flejjes kbar biex jikkonsultaw xi medjum, jew persuni li jgħidu li jikkomunikaw maʼ l-​ispirti.

Fil-Brażil, jekk serje televiżiva tkun tittratta dwar l-​ispiritiżmu din tiġbed għadd kbir taʼ telespettaturi.

Għal ħafna nies li jgħixu fl-​Afrika jew fl-​Asja, li jipprattikaw l-​ispiritiżmu hu komuni daqskemm hu komuni li jpartu oġġett m’ieħor fis-​suq.

Għala Ħafna Nies Ifittxu l-​Ispiritiżmu

Ħafna nies ifittxu l-​ispiritiżmu biex jiksbu faraġ wara li jkun mitilhom xi ħadd maħbub. Permezz taʼ xi medjum taʼ l-​ispirti huma jistgħu jirċievu informazzjoni speċjali li tkun qisha ġejja mill-​mejjet. Ir-​riżultat taʼ spiss huwa li dawn l-​uħud imnikktin jikkonvinċu ruħhom li l-​maħbubin mejtin tagħhom huma ħajjin. Jaħsbu wkoll li l-​fatt li jikkomunikaw mal-​mejtin se jgħinhom ikampaw mat-​telfa.

Oħrajn jiġu mħajrin għall-​ispiritiżmu għax ikun intqalilhom li l-​ispirti se jgħinuhom isibu l-​kura għall-​mard, jeħilsu mill-​faqar, ikollhom suċċess fl-​imħabba romantika, isolvu problemi fiż-​żwieġ, jew isibu xogħol. U ħafna oħrajn ifittxu l-​ispiritiżmu sempliċement għall-​kurżità.

Iżda, hemm raġuni oħra għala miljuni taʼ nies fittxew l-​ispiritiżmu. Dawn tgħallmu li l-​ispiritiżmu hu bħalma jiddeskrivih ċertu espert f’dan il-​qasam, “reliġjon supplimentarja” li teżisti “flimkien mal-​Kristjanità.” Is-​sitwazzjoni reliġjuża fil-​Brażil hija eżempju klassiku taʼ dan.

Il-Brażil għandu l-​akbar popolazzjoni fid-​dinja taʼ Kattoliċi Rumani. Imma bħalma qal l-​awtur Sol Biderman, miljuni taʼ fidili jixegħlu x-​xemaʼ sew fil-​knisja Kattolika u sew f’ċentri spiritistiċi, bla ma jħossu li qed jagħmlu xi ħaġa ħażina. Fil-​fatt, ir-​rivista Veja rrapportat li 80 fil-​mija taʼ dawk li huma membri taʼ xi ċentri spiritistiċi fil-​Brażil huma Kattoliċi mgħammdin li jmorru l-​quddies ukoll. Iżjed minn hekk, fost dawk li jieħdu sehem f’laqgħat spiritistiċi hemm saħansitra xi qassisin. Għalhekk wieħed jistaʼ jifhem għala ħafna li għandhom dan it-​twemmin jaħsbu li Alla japprovah il-​fatt li huma jikkomunikaw maʼ l-​ispirti għall-​faraġ u l-​gwida. Imma hekk hu?

[Kaxxa/Stampi f’paġna 3]

Diversi Għamliet taʼ Spiritiżmu

Wieħed jistaʼ jipprattika l-​ispiritiżmu billi jikkonsulta xi medjum taʼ l-​ispirti, isejjaħ lill-​mejtin, jew billi jfittex sinjali dwar il-​ġejjieni. It-​tbassir huwa għamla popolari ħafna taʼ l-​ispiritiżmu. Dan hu meta wieħed jipprova jkun jaf il-​ġejjieni jew dak li hu mistur bl-​għajnuna taʼ l-​ispirti. Xi għamliet taʼ tbassir huma l-​astroloġija, l-​iċċassar fil-​boċċa tal-​kristall, it-​tifsir tal-​ħolm, il-​qari taʼ l-​idejn, u l-​qari tax-​xorti permezz tal-​karti tat-​tarot.