Dalwaqt—Dinja Mingħajr Drogi

Tistaʼ timmaġina dinja mingħajr abbuż tad-​drogi?

IS-​SEGRETARJU ĠENERALI tal-​Ġnus Magħquda Kofi Annan ħeġġeġ lin-​nazzjonijiet kollha biex jaħdmu għal dinja bħal din. Hu ddikjara: “Għandna bżonn nieħdu passi ġodda u kuraġġużi biex niġġieldu lil dan il-​ħażen; din is-​saħta li qabdet fin-​nassa lil ħafna minn uliedna.”

Għalkemm hemm mnejn li l-​mexxejja jaqblu li jnaqqsu l-​produzzjoni u t-​tqassim tad-​drogi illegali mad-​dinja kollha, l-​isfida hija kbira ħafna. Hennadiy Udovenko mill-​Ukraina, il-​president taʼ sessjoni speċjali fl-​Assemblea Ġenerali tal-​Ġnus Magħquda, qal li “b’total taʼ iktar minn 400 biljun dollaru [41 biljun lira Maltija] it-​traffikar tan-​narkotiċi huwa wieħed min-​negozji li jsiru fil-​moħbi u li l-​iktar irendu l-​flus, . . . kapaċi li jikkorrompi jew jagħmel l-​ekonomija globali instabbli.” U żied li l-​problema tad-​droga “saret fenomenu globali u li l-​ebda nazzjon ma jistaʼ jħossu li huwa ħieles minn din it-​theddida.”

Huwa diffiċli li timmaġina dinja mingħajr drogi perikolużi. Bla dubju, il-​gvernijiet umani ma kinux kapaċi jneħħuhom għalkollox. Madankollu, ħadd ma jistaʼ jwaqqaf lil Alla li Jistaʼ Kollox milli jwettaq l-​iskop tiegħu biex iġib ġenna taʼ l-​art fejn kull ħtieġa emozzjonali, fiżika, u spiritwali se tiġi sodisfata. (Salm 145:16; Luqa 23:43; 2 Pietru 3:13) Skond il-​profeta Isaija, il-​kelma t’Alla ‘ma terġax lura vojta, imma tagħmel dak li jogħġob lilu, u ttemm dak li jkun bagħatha tagħmel.’—Isaija 55:11.

It-tama f’dawn il-​wegħdiet tistaʼ ġġib benefiċċji drammatiċi saħansitra minn issa. Per eżempju, Edmundo, kien jabbuża mid-​drogi. Imma meta aċċetta l-​wegħda tal-​Bibbja dwar dinja ġdida ġusta, din ġagħlitu jerġaʼ janalizza ħajtu. Issa Edmundo jgħid: “Kemm kont iblah, ħlejt dan iż-​żmien kollu.” Xewqan li jibqaʼ jkollu l-​approvazzjoni t’Alla, issa hu motivat li ma jiħux iktar drogi. Iva, l-​għarfien dwar Alla u l-​wegħdi tiegħu jistgħu jimmotivawna biex ‘nilbsu l-​bniedem il-​ġdid, maħluq skond Alla, fil-​ġustizzja u l-​qdusija tassew.’—Efesin 4:24.

Numru kbir t’oħrajn li kienu involuti fl-​abbuż tad-​drogi issa huma wkoll qegħdin igawdu relazzjoni intima mal-​Ħallieq tagħhom. Għal dawn l-​uħud, il-​kliem tas-​salmista għandu tifsir speċjali: “Tiftakarx fil-​ħtijiet u d-​dnubiet taʼ żgħożiti: inti tajjeb, Mulej; ftakar fija skond it-​tjieba tiegħek. Tajjeb u sewwa l-​Mulej; għalhekk juri triqtu lill-​ħatja.” (Salm 25:​7, 8) Kemm huwa taʼ faraġ għal dawk il-​ġenituri li għandhom ulied ribellużi li jsiru jafu li dawn jistgħu jinbidlu! Bi sforz ħabrieki, il-​ġenituri jistgħu jgħinu lil uliedhom biex jiġġieldu lil din il-​pesta taʼ l-​abbuż tad-​drogi u biex “jiksbu l-​ħajja, il-​ħajja vera,” li se tkun tistaʼ ssir realtà fid-​dinja l-​ġdida t’Alla.—1 Timotju 6:19.

[Stampi f’paġna 10]

It-​tama li jgħixu fid-​dinja l-​ġdida t’Alla qanqlet lil ħafna wħud li kienu jabbużaw mid-​drogi biex ibiddlu ħajjithom