L-​Annimali—Gawdihom għal Dejjem

X’VARJETÀ kbira t’annimali teżisti, kollha kemm huma b’personalitajiet u attributi differenti! L-​imħabba u l-​mogħdrija lejhom tqanqal lill-​persuna biex tinġibed lejn il-​Ħallieq tagħhom. Dan jidher ċar f’dak li ġara lil Maria.

Madwar tliet snin ilu, meta Maria kienet tgħix Lisbona, il-​Portugall, il-​kelb maħbub tagħha ntilef, u hi xandret dan minn fuq ir-​radju. Waħda mix-​Xhieda taʼ Jehovah, li kienet ċerta li rat kelb li kien bħal dak li ddeskriviet Maria, ikkuntattjatha. Meta t-​tnejn li huma ltaqgħu, sabu l-​kelb, u x-​Xhud qaltilha li ladarba Maria kienet tħobb daqshekk l-​annimali, żgur li kienet tixtieq tgħix fid-​dinja l-​ġdida li wiegħed Alla. Ix-​Xhud spjegat li l-​bnedmin dakinhar se jgħixu fil-​paċi maʼ l-​annimali kollha.

Maria aċċettat stedina biex tattendi waħda mil-​laqgħat tax-​Xhieda. Dak li semgħet u rat qanqlilha l-​interess sal-​punt li riedet studju persunali tal-​Bibbja. Hekk kif kompla l-​istudju, Maria tqanqlet profondament b’dak li tgħallmet dwar Alla Jehovah u l-​wegħda tiegħu taʼ ħajja taʼ dejjem fuq l-​art f’dinja ġdida taʼ ġustizzja. (Salm 37:29; Ġwanni 17:3) Eventwalment, fis-​16 taʼ Frar 2002, hi ssimbolizzat id-​dedikazzjoni tagħha lil Jehovah bil-​magħmudija fl-​ilma.

L-​Iskop Oriġinali t’Alla

Bħal Marija, ħafna ferħu bil-​kbir minħabba l-​evidenza mill-​Bibbja li l-​iskop oriġinali t’Alla għall-​bnedmin biex jgħixu għal dejjem f’ġenna taʼ l-​art u jieħdu ħsieb l-​annimali kollha li jgħixu fuqha, fl-​aħħar mill-​aħħar se jsir realtà. (Ġenesi 1:28) Il-​Bibbja tgħid li Alla “ma ħalaqhiex [id-dinja] għall-​baħħ” iżda “sawwarha biex jgħammru fiha.” Milli jidher, il-​bnedmin kellhom igawdu l-​art u l-​annimali għal dejjem.—Isaija 45:18.

Il-Bibbja tkompli tenfasizza d-​determinazzjoni t’Alla li jwettaq l-​iskop oriġinali tiegħu biex l-​art jagħmilha ġenna. Hu jiddikjara: “Hekk tkellimt,” u jkompli: “U nagħmel hekk.” Għal darb’ oħra, Jehovah jiddikjara: “Hekk jiġri minn kelmti: hija toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.”—Isaija 46:11; 55:11.

Jidher ċar li l-​iskop oriġinali t’Alla kien li l-​bnedmin igawdu ġenna taʼ l-​art għal dejjem. Nistgħu nkunu assolutament ċerti li, fl-​aħħar mill-​aħħar, dan l-​iskop se jitwettaq. Ejja neżaminaw deskrizzjonijiet qosra li tagħti l-​Bibbja dwar kif se tkun il-​ħajja fid-​dinja l-​ġdida t’Alla. Tabilħaqq, se naraw li l-​annimali kollha, kemm dawk domestiċi u kemm dawk salvaġġi, se jgħixu fil-​paċi bejniethom u mal-​bnedmin.—Isaija 65:​17, 21-25; 2 Pietru 3:13.

L-​Annimali Domestiċi fid-​Dinja l-​Ġdida t’Alla

Fid-​dinja l-​ġdida taʼ Jehovah, in-​nies se jkunu jistgħu jmissu x-​xagħar twil fuq għonq l-​iljun, imellsu l-​pil taʼ tigra bl-​istrixxi, u iva, jorqdu fil-​foresta mingħajr biżaʼ li xi annimal se jagħmlilhom il-​ħsara. Innota din il-​wegħda t’Alla: “Neqred mill-​art il-​bhejjem selvaġġi. [Il-bnedmin] ikunu jistgħu jgħammru fid-​deżert bla biżaʼ u jorqdu fl-​imsaġar.”—Eżekjel 34:25; Hosegħa 2:18.

Tabilħaqq, imbagħad l-​annimali salvaġġi se jkunu sottomessi, saħansitra lejn it-​tfal żgħar! Il-​Bibbja tgħid: “Il-​lupu jibda jgħix mal-​ħaruf, il-​leopard mal-​gidi, u jirgħu flimkien l-​għoġol u ferħ l-​iljun, daqsxejn taʼ tfajjel isuqhom.”

Iżda dan m’huwiex kollox! L-​iskrittura tkompli: “Il-​baqra u l-​ors jirgħu flimkien, u l-​frieħ tagħhom flimkien jistrieħu. L-​iljun bħall-​gendus jiekol it-​tiben. It-​tarbija tal-​ħalib titliegħeb fil-​ħofra tas-​serp; u t-​tifel miftum idaħħal idu fil-​bejta tal-​lifgħa. Ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bl-​għarfien tal-​Mulej bħalma l-​baħar hu miksi bl-​ilmijiet.”—Isaija 11:​6-9.

Fid-dinja l-​ġdida taʼ Jehovah, mhux se jkun hemm iżjed il-​problema taʼ ħafna nies li joqogħdu kollha fl-​istess belt kbira, xi ħaġa li m’hijiex pjaċevoli la għalihom u lanqas għall-​annimali domestiċi tagħhom. Veru, anki llum ħafna wħud igawdu l-​kumpanija taʼ l-​annimali tagħhom, u ħafna huma bilanċjati fil-​mod kif iħarsu lejhom u kif jieħdu ħsiebhom. Iżda immaġina l-​prospett meraviljuż taʼ li tgawdi l-​annimali domestiċi għal dejjem f’dinja ġdida taʼ tjieba! L-​attenzjoni bl-​imħabba li se tingħatalhom żgur li se tonora lill-​Ħallieq il-​Kbir tal-​ħlejjaq ħajjin kollha.

Jekk għadek ma tgħallimtx dwar l-​iskopijiet meraviljużi t’Alla—l-​istess bħalma kienet għadha ma tafx Maria, li tħobb ħafna l-​annimali—nistidnuk kordjalment biex tikkuntattja lill-​pubblikaturi taʼ din ir-​rivista jew lil wieħed mix-​Xhieda taʼ Jehovah. Dawn se jkunu kuntenti jgħinuk titgħallem iktar dwarhom.

[Stampa f’paġna 10]

Fid-​dinja l-​ġdida t’Alla, l-​annimali se jitgawdew għal dejjem