‘Toqgħodx Tħabbel Rasek għall-​Għada’

Renée ma felħitx iktar. Żewġha Matthew kien ilu mingħajr xogħol fiss għal iktar minn tliet snin. Renée tiftakar u tgħid: “Ħassejtni mtertqa minn ġewwa. Il-​ħsieb li ma kontx naf x’inhu ġej għalina kissirni!” Matthew ipprova jtaffi l-​ansjetajiet taʼ martu billi fehemha li qatt ma kien naqashom xejn. Renée wieġbet: “Imma xorta għadek bla xogħol, u għandna bżonn il-​flus!”

BLA DUBJU, telf taʼ impjieg iġib miegħu ansjetà. Xi ħadd li jkun bla xogħol jistaʼ jgħid bejnu u bejn ruħu: ‘Kemm se ndum bla xogħol? Sadanittant, kif nistgħu nipprovdu l-​bżonnijiet tal-​familja tagħna?’

Filwaqt li tħassib bħal dan huwa normali, Ġesù Kristu ta parir prattiku li jistaʼ jtaffi l-​ansjetà. Hu stqarr: “Toqogħdux tħabblu raskom għall-​għada . . . Biżżejjed hu għall-​jum it-​taħbit tal-​ġurnata.”—Mattew 6:34, Għaqda Biblika Maltija.

Agħraf il-​Beżgħat Tiegħek

Ġesù ma riedx ifisser li għandna naġixxu bħallikieku l-​problema tagħna ma kinitx teżisti. Madankollu, jekk ninkwetaw fuq dak li għandu mnejn jiġri għada, it-​toqol emozzjonali tal-​ġurnata se jiżdied. Ngħiduha kif inhi, ftit li xejn għandna kontroll fuq dak li jistaʼ jinqalaʼ għada, sew jekk inhu tajjeb u sew jekk inhu ħażin. Imma nistgħu nieħdu xi passi biex inkampaw mal-​preżent.

Ċertament huwa iktar faċli tgħidha milli tagħmilha! Rebekah, li żewġha tilef l-​impjieg wara 12-​il sena, tgħid: “Meta l-​istress ikun daqstant qawwi, diffiċli taħseb dwar l-​affarijiet b’mod loġiku. Imma kellna nagħmlu dan. Għalhekk, ipprovajt nikkontrolla lili nnifsi. Meta l-​akbar beżgħat tiegħi ma seħħewx, irrealizzajt li għalxejn noqgħod ninkwieta. Bdejna niffokaw fuq il-​preżent u l-​problemi tal-​mument, u b’hekk ħlisna minn kull tip taʼ stress.”

Staqsi lilek innifsek: ‘X’inhuma l-​akbar beżgħat tiegħi? X’inhi l-​probabbiltà li dawn il-​beżgħat isiru realtà? Kemm naħli enerġija ninkwieta fuq dak li għandu mnejn iseħħ jew ma jseħħx?’

Tgħallem Kun Kuntent b’Dak li Għandek

Il-​ħarsa tagħna tistaʼ teffettwa l-​emozzjonijiet tagħna. B’hekk, il-​Bibbja tħeġġiġna biex ikollna din l-​attitudni mentali: “La għandna x’nieklu u biex nitgħattew, għandna nkunu kuntenti b’dawn l-​affarijiet.” (1 Timotju 6:8) Li nkunu kuntenti jfisser li nillimitaw ix-​xewqat tagħna u nkunu sodisfatti meta jkollna l-​bżonnijiet tagħna taʼ kuljum. L-​isforzi biex tissodisfa x-​xewqa li jkollok iktar affarijiet iservu biss biex iġibu fix-​xejn l-​isforzi li tagħmel biex tissimplifika ħajtek.—Marku 4:19.

Wara li ħarset b’mod realistiku lejn is-​sitwazzjoni tagħha, Renée rnexxielha titgħallem tkun kuntenta b’dak li għandha. Hi qalet li huma qatt ma spiċċaw mingħajr dawl jew ilma, u dejjem kellhom saqaf fuq rashom. Renée tgħid: “Il-​problema vera kienet li ma konniex imdorrijin nissikkaw iċ-​ċinturin. Ix-​xewqa mhix realistika tiegħi li nżommu l-​istess livell t’għajxien li kellna qabel ġegħlitni nħossni iktar stressata.”

Renée ma damitx ma ntebħet li kienet il-​ħarsa tagħha—u mhux iċ-​ċirkustanzi li kienet fihom—li ġegħlitha tħossha bħallikieku ma tiflaħx iktar. Hi tgħid: “Kelli niffaċċja r-​realtà tas-​sitwazzjoni li sibna ruħna fiha u mhux noqgħod nhewden fuq kif xtaqtha tkun. Hekk kif tgħallimt inkun kuntenta b’dak li jipprovdi Alla kuljum, bdejt inħossni ferm iktar ferħana.”

Staqsi lilek innifsek: ‘Il-​bżonnijiet tiegħi għal-​lum ġew provduti? Jekk iva, nistaʼ ngħix ġurnata b’ġurnata b’fiduċja li l-​bżonnijiet tiegħi se jiġu provduti għada wkoll?’

L-​ewwel pass biex tiffaċċja l-​isfida li tgħaddi b’inqas flus hu li jkollok ħarsa xierqa.a Imma liema passi prattiċi tistaʼ tieħu meta d-​dħul finanzjarju tiegħek jonqos minħabba li tispiċċa bla xogħol?

[Nota taʼ taħt]

[Kaxxa f’paġna 5]

Il-​Persistenza Trendi!

Fred dam bosta ġimgħat ifittex xogħol, imma bla ebda riżultat pożittiv. Hu ħass li l-​bibien kollha kienu ngħalqu għalih. Hu jgħid: “Kien bħallikieku qed nistenna tal-​linja biex nirkeb imma ma jiġi ħadd.” Fred iddeċieda li jikkontrolla l-​unika ħaġa li setaʼ jikkontrolla—l-​azzjonijiet tiegħu stess. Bagħat applikazzjonijiet għal xogħol lil kull kumpanija li dehret li għandha l-​iċken ħtieġa għall-​abbiltajiet tiegħu. Hu wieġeb kull ittra li rċieva u pprepara sew għal kull intervista, konvint li “l-​pjanijiet tal-​ħabrieki żgur li jkunu taʼ vantaġġ.” (Proverbji 21:5) Fred jgħid, “Kumpanija minnhom għamlitli żewġ intervisti li fihom il-​maniġers imlaħħqin ibbombardjawni b’xita taʼ mistoqsijiet.” Imma l-​persistenza taʼ Fred rendiet! Hu jgħid: “Fl-​aħħar impjegawni!”

[Kaxxa/Stampa f’paġna 6]

Xi Ħaġa Iktar Importanti mid-​Dħul Finanzjarju

X’inhu l-​iktar importanti—il-​karattru morali tiegħek jew id-​dħul finanzjarju tiegħek? Ikkunsidra żewġ proverbji li jinsabu fil-​Bibbja.

“Aħjar wieħed taʼ ftit mezzi li qed jimxi bl-​integrità tiegħu minn xi ħadd għani imma li għandu triqatu mgħawġin.”—Proverbji 28:6.

“Aħjar platt ħaxix fejn hemm l-​imħabba milli barri msemmen bil-​mibegħda miegħu.”—Proverbji 15:17.

B’mod ċar, in-​nuqqas taʼ dħul finanzjarju ma jnaqqasx l-​integrità morali u l-​valur taʼ individwu. Għalhekk, meta r-​raġel taʼ Renée tilef l-​impjieg, hi qalet lil uliedha: “Ħafna missirijiet abbandunaw lill-​familji tagħhom. Imma missierkom għadu hawn għalikom. Intom tafu kemm iħobbkom u kemm għenkom fil-​problemi kollha tagħkom. Ma jistax ikollkom missier aħjar!”