Jum il-Vendetta t’Alla

BĦALMA rajna fl-​artiklu taʼ qabel, hemm bosta raġunijiet għala huwa ħażin li nagħmlu vendetta. Huwa ħażin għax fl-​aħħar mill-​aħħar, ma ssolvi xejn. Huwa ħażin għax inħarrxu l-​mibgħeda minflok ma nibnu pontijiet taʼ ħbiberija. U huwa ħażin għax huwa taʼ dannu għal dak li jżomm ġo fih ħsibijiet taʼ vendetta.

L-iktar raġuni importanti, madankollu, għala l-​vendetta tal-​bniedem hija ħażina tidher mill-​kliem taʼ Mosè lill-​Iżrael: “Jehovah Alla tiegħek huwa Alla mimli ħniena.” (Dewteronomju 4:31) Ladarba Alla huwa mimli ħniena, għandna nkunu mimlijin bil-​ħniena bħalu. Ġesù qal lis-​segwaċi tiegħu: “Komplu siru mimlijin ħniena, bħalma Missierkom hu mimli ħniena.”−Luqa 6:36.

Minkejja dan, il-​Bibbja tiddeskrivi wkoll lil Jehovah bħala “Alla taʼ atti taʼ vendetta.” (Salm 94:1) Il-​profeta Isaija jitkellem dwar “is-​sena taʼ rieda tajba min-​naħa taʼ Jehovah” u wkoll dwar “jum il-​vendetta min-​naħa t’Alla tagħna.” (Isaija 61:2) Kif jistaʼ Alla jkun kemm ħanin kif ukoll li jagħmel vendetta? U jekk aħna rridu nimitaw il-​ħniena t’Alla, għala ma nistgħux nimitawh f’li nagħmlu vendetta?

Biex inwieġbu l-​ewwel mistoqsija, Alla huwa ħanin minħabba li hu jħobb lill-​umanità, u hu jaħfer kemm jistaʼ u jdum kemm jistaʼ sabiex jagħti lill-​bnedmin l-​opportunità biex jirranġaw mogħdijiethom. Ħafna, bħall-​appostlu Pawlu, ħadu vantaġġ minn din il-​ħniena. Imma Alla se jagħmel ukoll vendetta—fis-​sens taʼ li jesiġi l-​ġustizzja—għaliex ħniena bħal din għandha l-​limitu. Meta xi wħud ikunu wrew li huma qatt ma se jibdlu mogħdijiethom, Alla se jesegwixxi l-​ġudizzju f’dak li hu msejjaħ jum il-​vendetta tiegħu.

Bi tweġiba għat-​tieni mistoqsija, le, m’aħniex iġġustifikati f’li nagħmlu vendetta minħabba li Alla jesiġi vendetta. Jehovah huwa perfett fil-​ġustizzja. Il-​bnedmin m’humiex. Alla jħares lejn kwistjoni minn kull aspett u dejjem jieħu deċiżjoni taʼ tjieba. Aħna ma nistgħux niġu fdati biex nagħmlu hekk. Għalhekk Pawlu ta l-​parir: “Tivvendikawx erwieħkom, maħbubin, imma ċedu għall-​korla; għax hu miktub: ‘Il-​vendetta hi tiegħi; jien se nħallas lura, igħid Jehovah.’” (Rumani 12:19) Għall-​ġid tagħna stess, irridu nħallu l-​vendetta f’idejn Jehovah.

Għala Jum taʼ Vendetta?

Minkejja dan, il-​Bibbja f’ħafna bnadi tagħraf il-​ħtieġa għal kont maʼ dawk li jagħmlu l-​ħażen imma ma jindmux. Per eżempju, l-​appostlu Pawlu bassar li Alla, permezz taʼ Ġesù, kellu jġib “vendetta fuq dawk li ma jafux lil Alla u dawk li ma jobdux l-​aħbar tajba dwar il-​Mulej tagħna Ġesù.” (2 Tessalonkin 1:8) Aħna għandna raġunijiet tajbin biex nieħdu dawk il-​kelmiet bis-​serjetà. Għala?

L-ewwelnett, peress li l-​maġġoranza llum jippersistu f’li jisfidaw is-​sovranità tal-​Ħallieq, huma ma jikkalkolawx il-​liġijiet taʼ tjieba tiegħu. Kemm jekk isostnu li jemmnu b’Alla jew le, il-​kondotta tagħhom turi ċar li huma ma jħossux li jridu jagħtu kont lil Alla. Il-​kliem tas-​salmista japplika għal uħud bħal dawn: “Għala hu li l-​wieħed mill-​agħar wera diżrispett lejn Alla? Hu qal f’qalbu: ‘Int m’intix se titlob kont.’” (Salm 10:13) Żgur li Jehovah mhux se jħalli għal dejjem lilu nnifsu jiġi ttantat b’dan il-​mod. Għalkemm huwa Alla taʼ mħabba, huwa wkoll Alla taʼ ġustizzja. Hu se jismaʼ l-​għajjat taʼ dawk li verament huma kkonċernati bil-​ġustizzja: “Qum, O Jehovah. O Alla, erfaʼ idek. Tinsiehomx lill-​milqutin.”—Salm 10:12.

Barra minn hekk, nies li jħobbu jisfidaw il-​liġi qed jeqirdu lill-​istess art li qed ingħixu fuqha. Huma jħassru l-​arja, l-​art, u l-​ilma; jimlew l-​art bl-​inġustizzji u l-​krudeltà. U huma jiġimgħu biżżejjed armamenti kimiċi, nukleari, u oħrajn daqstant qattiela biex iheddu s-​salvazzjoni tal-​umanità. Intervent divin huwa imperattiv sabiex jiġi żgurat futur fiż-​żgur għall-​umanità ubbidjenti. (Rivelazzjoni 11:18) Dan l-​intervent hu dak li rrefera għalih Isaija bħala jum il-​vendetta.

Jum il-​Vendetta t’Alla x’Se Jwettaq?

Skond Vine’s Expository Dictionary of Old and New Testament Words, fl-​Iskrittura Griega, il-​kelma għal vendetta, meta tiġi wżata f’konnessjoni maʼ Alla, litteralment tfisser “‘dak li joħroġ mill-​ġustizzja,’ mhux, kif taʼ spiss bil-​vendetta umana, minħabba sens taʼ ħsara jew sempliċement għax wieħed ikun ħa għalih.” B’hekk, il-​vendetta t’Alla kontra l-​egħdewwa tiegħu mhix se tkun żmien taʼ tixrid taʼ demm bla kontroll, bħal xi vendetta persunali. “Jehovah jaf kif jeħles lil nies taʼ devozzjoni lejn Alla ’l barra mit-​tiġrib, imma jirriserva lil nies taʼ mingħajr tjieba għal jum il-​ġudizzju biex jiġu maqtugħin,” tgħidilna l-​Bibbja.—2 Pietru 2:9.

Il-qaddejja t’Alla jħarsu ’l quddiem lejn jum il-​vendetta t’Alla bħala żmien meta kondotta tajba se tiġi vvindikata u t-​twajjeb se jiġi meħlus mill-​oppressjoni tal-​wieħed mill-​agħar. Dan ma jfissirx li huma malizzjużi jew vendikattivi. “Dak li jifraħ bid-​diżastru taʼ ħaddieħor mhux se jkun ħieles mill-​kastig,” twissi l-​Bibbja. (Proverbji 17:5) Għall-​kuntrarju, huma jikkultivaw il-​ħniena u l-​mogħdrija, billi jħallu kull deċiżjoni taʼ vendetta f’idejn Alla.

Veru, mhux faċli għal individwi rrabjati li jaġixxu b’dan il-​mod. Imma huwa possibbli, u ħafna hekk għamlu. Per eżempju, Pedro ma kellux tfulija ferriħija u kien taʼ spiss jiġi msawwat minn ħuh il-​kbir. Għalhekk hu kiber u sar vjolenti, dejjem fl-​inkwiet mal-​pulizija u r-​rabja li kellu għal ħuh kien jiżżvogaha fuq martu u wliedu. Fl-​aħħar, hu samaʼ minn wieħed mix-​Xhieda taʼ Jehovah u iktar tard beda studju tal-​Bibbja. “Bil-​għajnuna taʼ Jehovah,” hu jirrakkonta, “jien inbdilt, u issa, minflok ma niġġieled man-​nies, ingħinhom bħala anzjan Kristjan.” Bil-​għajnuna tal-​Bibbja u tal-​ispirtu qaddis, uħud bla għadd oħra bl-​istess mod tbiddlu minn uħud li jħobbu jpattu u vendikattivi għal uħud li juru mħabba u paċenzja lejn oħrajn.

Int x’Se Tagħmel?

Li nżommu f’moħħna jum il-​vendetta t’Alla se jgħinna nieħdu vantaġġ mill-​paċenzja taʼ Jehovah. Imma l-​opportunità biex nagħmlu dan m’hijiex bla limitu. Dalwaqt jasal dak il-​jum. L-​appostlu Pietru wera għala għadu ma ġiex: “Jehovah ma jeħodhiex bil-​lajma rigward il-​wegħda tiegħu, bħalma xi nies jikkunsidraw il-​lajma, imma hu paċenzjuż magħkom għaliex ma jixtieqx li xi ħadd jinqered imma jixtieq li kulħadd jasal għall-​indiema.”−2 Pietru 3:9.

Huwa urġenti, allura, li nippreparaw issa għall-​jum taʼ kontijiet t’Alla billi nistudjaw l-​Iskrittura u napplikaw il-​pariri tagħha. Dan se jgħinna biex insegwu l-​kelmiet tas-​salmista: “Ħalli r-​rabja waħedha u itlaq id-​dagħdigħa; turix ruħek sħun biss biex tagħmel il-​ħażen. Għax dawk li jagħmlu l-​ħażen infushom se jiġu maqtugħin, imma dawk li qegħdin jittamaw f’Jehovah huma dawk li se jkollhom pussess tal-​art.”−Salm 37:8, 9.

[Stampa f’paġna 7]

Wara jum il-​vendetta t’Alla, ‘dawk li qegħdin jittamaw f’Jehovah se jkollhom pussess tal-​art’.