“Ħobbu s-​Sewwa u s-​Sliem”!

“Ġietni l-​kelma tal-​Mulej taʼ l-​eżerċti u qalli: ‘. . . Ħobbu s-​sewwa u s-​sliem!’”—ŻAKKARIJA 8:18, 19.

1, 2. (a) X’inhu r-​rekord taʼ l-​umanità fejn jikkonċerna l-​paċi? (b) Did-dinja preżenti għala qatt m’hija se tara paċi reali?

“ID-​DINJA għadha qatt ma kellha paċi. Xi mkien​—u taʼ spiss f’ħafna postijiet f’daqqa—​dejjem kien hemm il-​gwerra.” Hekk qal il-​Professur Milton Mayer taʼ l-​Università taʼ Massachusetts, fl-​Istati Uniti. X’kummentarju taʼ swied il-​qalb dwar l-​umanità! Veru, il-​bnedmin riedu l-​paċi. Il-​politikanti pprovaw kull għamla taʼ modi biex iżommuha, mill-​Pax Romana taʼ żmien ir-​Rumani sal-​politika taʼ “Mutually Assured Destruction” (Qerda Żgurata Taʼ Xulxin) matul il-​Gwerra Bierda. Fl-​aħħar mill-​aħħar, iżda, l-​isforzi kollha tagħhom fallew. Bħalma esprimiha Isaija ħafna sekli ilu, ‘il-​messaġġieri tas-​sliem bkew biki taʼ mrar.’ (Isaija 33:7) Dan għala?

² Dan għaliex paċi dejjiema għandha tinbet minn nuqqas taʼ mibgħeda u regħba; trid tkun imqabbda fil-​verità. Il-​paċi ma tistax tkun ibbażata fuq gideb. Kien għalhekk li Jehovah meta wiegħed restawr u paċi għal Iżrael tal-​qedem qal: “Se nifrex fuqha s-​sliem bħal xmara, u bħal xmara tfur bil-​ġid tal-​ġnus.” (Isaija 66:12) L-​alla taʼ dis-sistema t’affarijiet, Satana x-​Xitan, huwa “qattiel,” u “giddieb u missier il-​gideb.” (Ġwann 8:44; 2 Korintin 4:4) Dinja b’alla bħal dak kif qatt tistaʼ jkollha l-​paċi?

3. Jehovah liema għotja taʼ l-​għaġeb ta lin-​nies tiegħu, minkejja li qegħdin jgħixu f’dinja taʼ inkwiet?

³ Taʼ min josserva, iżda, li Jehovah jagħti l-​paċi lin-​nies tiegħu saħansitra waqt li jgħixu fid-​dinja taʼ Satana mkissra bil-​gwerer. (Ġwann 17:16) Fis-​sitt seklu Q.E.K., hu wettaq il-​wegħda tiegħu permezz taʼ Ġeremija u ta “sliem u verità” lill-​ġens speċjali tiegħu meta rrestawrahom f’art twelidhom. (Ġeremija 33:6) U f’dawn l-​aħħar jiem, ta “paċi u verità” lin-​nies tiegħu fil-​“pajjiż,” jew qasam spiritwali tagħhom fuq l-​art, avolja għaddew minn l-​agħar żmien taʼ inkwiet li did-dinja qatt rat s’issa. (Isaija 66:8; Mattew 24:7-13; Apokalissi 6:1-8) Hekk kif inkomplu d-​diskussjoni tagħna fuq Żakkarija kapitlu 8, se niksbu apprezzament iżjed profond taʼ dawn il-​paċi u verità mogħtijin minn Alla u naraw x’għandna nagħmlu biex nippreservaw is-​sehem tagħna fihom.

“Ħa Jissaħħu Idejkom”

4. Żakkarija kif inkuraġġixxa lil Iżrael biex jaġixxu jekk riedu jesperjenzaw il-​paċi?

⁴ Għas-​sitt darba f’Żakkarija kapitlu 8, nisimgħu pronunzja eċċitanti mingħand Jehovah: “Dan igħid il-​Mulej taʼ l-​eżerċti: ‘Ħa jissaħħu idejkom, intom li f’dawn il-​jiem smajtu dawn il-​kelmiet li qalu l-​profeti li kien hemm fi żmien it-​tqegħid tas-​sisien tat-​tempju tal-​Mulej taʼ l-​eżerċti għall-​bini tas-​santwarju. Għax qabel dak iż-​żmien ma kienx hemm salarju għall-​bniedem jew ħlas għall-​bhima, u lanqas min kien ħiereġ u dieħel ma kellu rasu mistrieħa mill-​għadu, wara li jiena xħett in-​nies kollha wieħed kontra l-​ieħor.’”—Żakkarija 8:9, 10.

5, 6. (a) Minħabba l-​iskuraġġiment taʼ l-​Iżraeliti, x’kienet is-​sitwazzjoni f’Iżrael? (b) Jehovah liema bidla wiegħed lil Iżrael jekk dan ipoġġi l-​qima tiegħu l-​ewwel?

⁵ Żakkarija tkellem dan il-​kliem waqt li t-​tempju kien qiegħed jinbena mill-​ġdid f’Ġerusalemm. Qabel, l-​Iżraeliti li kienu rritornaw minn Babilonja ġew skuraġġiti u waqqfu x-​xogħol taʼ bini tat-​tempju. Talli dawru l-​attenzjoni tagħhom lejn li jkunu komdi huma, ma kellhom ebda barka u ebda paċi mingħand Jehovah. Avolja kkultivaw ir-​rabaʼ tagħhom u ħadu ħsieb tad-​dwieli tagħhom, ma pprosperawx. (Ħaggaj 1:3-6) Kien bħal li kieku kienu qegħdin jaħdmu ‘bla salarju.’

⁶ Issa li t-​tempju kien qiegħed jinbena mill-​ġdid, Żakkarija inkuraġġixxa lil-​Lhud biex ‘ikunu b’saħħithom,’ biex b’kuraġġ ipoġġu l-​qima taʼ Jehovah l-​ewwel. X’kellu jiġri kieku għamlu hekk? “‘Issa jiena m’għadnix bħalma kont fl-​imgħoddi għall-​bqija taʼ dan il-​poplu​—Oraklu tal-​Mulej taʼ l-​eżerċti—​għax jiena niżraʼ s-​sliem, id-​dielja tagħti l-​frott tagħha, u l-​art tagħti l-​egħlejjel tagħha, u s-​smewwiet in-​nida tagħhom; u dan kollu nagħtih lill-​bqija taʼ dan il-​poplu biex ikun tagħhom. U jiġri li bħalma intom, ja dar taʼ Ġuda u dar taʼ Israel, kontu saħta fost il-​ġnus, hekk jiena nsalvakom, u tkunu barka. Tibżgħu xejn: ħa jissaħħu idejkom!’” (Żakkarija 8:11-13) Kieku Iżrael kellu jaġixxi b’determinazzjoni, kien jipprosperixxi. Iktar kmieni, meta l-​ġnus xtaqu jiċċitaw eżempju taʼ maledizzjoni, setgħu jippontaw lejn Iżrael. Issa Iżrael kellu jkun eżempju taʼ barka. X’raġuni eċċellenti biex ‘iħallu jdejhom jissaħħu’!

7. (a) In-​nies taʼ Jehovah liema bidliet eċċitanti esperjenzaw, li laħqu l-​aqwa tagħhom fis-​sena taʼ servizz 1995? (b) Billi tħares lejn ir-​rapport annwali, liema pajjiżi tara li għandhom statistiċi notevoli taʼ pubblikaturi, pijunieri, medja taʼ sigħat?

⁷ Xi ngħidu għal-​lum? Sewwa, fis-​snin qabel l-​1919, in-​nies taʼ Jehovah kienu ftit jew wisq neqsin miż-​żelu. Ma ħadux waqfa newtrali għal kollox fl-​ewwel gwerra dinjija, u kellhom it-​tendenza li jsegwu lil xi bniedem minflok lis-​Sultan tagħhom, Ġesù Kristu. Bħala riżultat, xi wħud kienu skuraġġiti minn oppożizzjoni minn ġewwa u minn barra l-​organizzazzjoni. Imbagħad, fl-​1919, bl-​għajnuna taʼ Jehovah ħallew idejhom jissaħħu. (Żakkarija 4:6) Jehovah tahom il-​paċi, u pprosperixxew b’mod setgħan. Dan jidher fl-​istatistiċi tagħhom taʼ l-​aħħar 75 sena, li jilħqu l-​quċċata tagħhom fis-​sena taʼ servizz 1995. Bħala poplu, ix-​Xhieda taʼ Jehovah jaħarbu min-​nazzjonaliżmu, tribaliżmu, preġudizzju, u kull sors ieħor taʼ mibgħeda. (1 Ġwann 3:14-18) Jaqdu lil Jehovah b’żelu ġenwin fit-​tempju spiritwali tiegħu. (Lhud 13:15; Apokalissi 7:15) Is-​sena l-​oħra biss, qattgħu ’l fuq minn biljun siegħa jitkellmu m’oħrajn dwar Missierhom tas-​sema! Kull xahar, ikkonduċew 4,865,060 studju tal-​Bibbja. Medja taʼ 663,521 ħadu sehem fis-​servizz taʼ pijunier kull xahar. Meta ministri fil-​Kristjaneżmu jridu jagħtu eżempju taʼ nies li huma verament entużjasti fil-​qima tagħhom, xi drabi jippontaw lejn ix-​Xhieda taʼ Jehovah.

8. Kull Kristjan individwali kif jibbenefika miż-​‘żerriegħa tas-​sliem’?

⁸ Minħabba ż-​żelu tagħhom, Jehovah jagħti lin-​nies tiegħu ‘ż-​żerriegħa tas-​sliem.’ Kull individwu li jikkultiva dik iż-​żerriegħa se jara l-​paċi tikber f’qalbu u f’ħajtu. Kull Kristjan kredent li jsegwi l-​paċi maʼ Jehovah u maʼ Kristjani sħabu jieħu sehem fil-​verità u l-​paċi tal-​poplu li jġorr isem Jehovah. (1 Pietru 3:11; qabbel Ġakbu 3:18.) M’hijiex dik ħaġa taʼ l-​għaġeb?

“La Tibżgħux”

9. Jehovah liema bidla wiegħed fil-​mod taʼ kif jittratta mal-​poplu tiegħu?

⁹ Issa naqraw is-​sebaʼ pronunzja mingħand Jehovah. X’inhi? “Dan igħid il-​Mulej taʼ l-​eżerċti: ‘Bħalma kont [ħ]sibt li nagħmlilkom id-​deni meta missir[i]jietkom kebbsuli l-​korla tiegħi u l-​ħsieb ma biddiltux,’ igħid il-​Mulej taʼ l-​eżerċti, ‘hekk f’dawn il-​jiem erġajt għamilt li nagħmel il-​ġid lil Ġerusalemm u lid-​dar taʼ Ġuda. La tibżgħux!’”—Żakkarija 8:14, 15.

10. Liema rekord tax-​Xhieda taʼ Jehovah juri li ma beżgħux?

¹⁰ Avolja n-​nies taʼ Jehovah kienu mxerrdin f’sens spiritwali matul l-​ewwel gwerra dinjija, fi qlubhom riedu jagħmlu dak li kien sewwa. Għaldaqstant, Jehovah, wara li amministra ftit dixxiplina, biddel il-​mod tiegħu taʼ kif jittratta magħhom. (Malakija 3:2-4) Illum, inħarsu lura u niżżuh ħajr b’mod ferventi għal dak li għamel. Veru, ġejna ‘mibgħudin mill-​ġnus kollha.’ (Mattew 24:9) Ħafna ntefgħu l-​ħabs, u xi wħud saħansitra mietu għall-​fidi tagħhom. Taʼ spiss niffaċċjaw apatija jew ostilità. Imma ma nibżgħux. Nafu li Jehovah iżjed b’saħħtu minn kwalunkwe oppożizzjoni, viżibbli jew inviżibbli. (Isaija 40:15; Efesin 6:10-13) M’aħniex se nieqfu nagħtu kas tal-​kliem: “Ittama fil-​Mulej, żomm sħiħ u qawwi qalbek.”—Salm 27:14.

“Għidu S-​Sewwa Lil Xulxin”

11, 12. Individwalment x’għandna nżommu f’moħħna jekk irridu nieħdu sehem bis-​sħiħ fil-​barkiet li Jehovah jagħti lin-​nies tiegħu?

¹¹ Biex nieħdu sehem bis-​sħiħ fil-​barkiet mingħand Jehovah, hemm affarijiet li għandna niftakru. Żakkarija jgħid: “‘Dawn huma l-​ħwejjeġ li għandkom tagħmlu: Għidu s-​sewwa lil xulxin; fil-​bibien taʼ beltkom agħmlu l-​ħaqq li jġib is-​sliem; tbejtux deni għal xulxin fi qlubkom; u l-​ħalf fil-​falz la taħmluhx; għax dan hu kollu li jiena nobgħod,’​—Oraklu tal-​Mulej taʼ l-​eżerċti.”—Żakkarija 8:16, 17.

¹² Jehovah iħeġġiġna biex nitkellmu l-​verità. (Efesin 4:15, 25) Ma jismax it-​talb taʼ dawk li jipproġettaw affarijiet taʼ ħsara, jaħbu l-​verità għal qligħ persunali, jew ilissnu ġuramenti foloz. (Proverbji 28:9) Ladarba jobgħod l-​apostasija, iridna niggranfaw mal-​verità tal-​Bibbja. (Salm 25:5; 2 Ġwann 9-11) Jerġaʼ, bħall-​irġiel ixjeħ fil-​bibien tal-​belt f’Iżrael, anzjani li jittrattaw każi ġudizzjarji għandhom jibbażaw il-​pariri u d-​deċiżjonijiet tagħhom fuq il-​verità tal-​Bibbja, mhux fuq opinjoni persunali. (Ġwann 17:17) Jehovah iridhom ifittxu “ħaqq li jġib is-​sliem,” billi jipprovaw, bħala ragħajja Kristjani, iġibu lura l-​paċi bejn iż-​żewġ naħat f’tilwima u jgħinu midinbin nedmin jiksbu paċi mill-​ġdid m’Alla. (Ġakbu 5:14, 15; Ġuda 23) Fl-​istess ħin, huma jippreservaw il-​paċi tal-​kongregazzjoni, billi b’kuraġġ jixħtu ’l barra lil dawk li jiksru dik il-​paċi minħabba li apposta jippersistu f’għemil ħażin.—1 Korintin 6:9, 10.

“Ferħ u Hena”

13. (a) Żakkarija liema bidla rigward is-​sawm ipprofetizza? (b) Liema sawm kien osservat f’Iżrael?

¹³ Issa, nisimgħu t-​tmien pronunzja solenni: “‘Dan igħid il-​Mulej taʼ l-​eżerċti: Is-​sawm tar-​rabaʼ xahar, u s-​sawm tal-​ħames u s-​sawm tas-​sebaʼ u s-​sawm tal-​għaxar xahar, ikun għad-​dar taʼ Ġuda jiem taʼ ferħ u hena u taʼ festi sbieħ. Imma ħobbu s-​sewwa u s-​sliem!’” (Żakkarija 8:19) Taħt il-​Liġi Mosajka, l-​Iżraeliti kienu jsumu f’Jum it-​Tpattija biex jesprimu niket għal dnubiethom. (Levitiku 16:29-31) L-​erbaʼ sawmiet imsemmijin minn Żakkarija kienu apparentement osservati bħala luttu għal ġrajjiet f’konnessjoni mal-​konkwista u l-​qerda taʼ Ġerusalemm. (2 Slaten 25:1-4, 8, 9, 22-26) Issa, madankollu, it-​tempju kien qiegħed jinbena mill-​ġdid u Ġerusalemm timtela bin-​nies mill-​ġdid. Il-​luttu kien qiegħed jinbidel f’hena, u s-​sawmiet setgħu jsiru staġuni taʼ festi.

14, 15. (a) Iċ-​ċelebrazzjoni tal-​Mafkar kif kienet raġuni kbira għall-​ferħ, u dan dwar liema ħaġa għandu jfakkarna? (b) Bħalma jidher fir-​rapport annwali, liema pajjiżi kellhom attendenzi straordinarji fil-​Mafkar?

¹⁴ Illum, ma nosservawx is-​sawmiet imsemmijin minn Żakkarija jew is-​sawm preskritt fil-​Liġi. Ladarba Ġesù offra ħajtu għal dnubietna, aħna qegħdin ingawdu l-​barkiet taʼ Jum it-​Tpattija. Dnubietna jitgħattew, mhux sempliċement b’mod rappreżentattiv, imma kompletament. (Lhud 9:6-14) Billi nsegwu l-​kmand tal-​Qassis il-​Kbir tas-​sema, Ġesù Kristu, aħna nosservaw il-​Mafkar taʼ mewtu bħala l-​unika ċelebrazzjoni solenni fil-​kalendarju Kristjan. (Luqa 22:19, 20) Ma nesperjenzawx aħna “ferħ u hena” hekk kif ninġabru flimkien kull sena għal dik iċ-​ċelebrazzjoni?

¹⁵ Is-​sena l-​oħra, 13,147,201 ġew flimkien biex jiċċelebraw il-​Mafkar, 858,284 iktar milli fl-​1994. X’kotra taʼ nies! Immaġina t-​thennija fit-​78,620 kongregazzjoni tax-​Xhieda taʼ Jehovah hekk kif għadd kbir mhux tas-​soltu marru fi qtajja fis-​Swali tas-​Saltna tagħhom għaċ-​ċelebrazzjoni. Ċertament, ilkoll preżenti ġew imqanqlin biex ‘iħobbu s-​sewwa u s-​sliem’ hekk kif ftakru fil-​mewt taʼ dak il-​Wieħed li hu “t-​Triq, il-​Verità u l-​Ħajja” u li issa jsaltan bħala l-​“Prinċep tas-​Sliem” il-​kbir taʼ Jehovah! (Ġwann 14:6; Isaija 9:5 [Isaija 9:6, NW]) Dik iċ-​ċelebrazzjoni kellha tifsir speċjali għal dawk li osservawha f’pajjiżi mtertqin b’taqlib u gwerer. Xi wħud minn ħutna raw b’għajnejhom stess affarijiet li jwaħħxu u li ma jitfissrux matul l-​1995. Xorta waħda, ‘is-​sliem t’Alla li jgħaddi kulma l-​moħħ jistaʼ jifhem, żammilhom qalbhom u moħħhom sħaħ fi Kristu Ġesù.’—Filippin 4:7.

‘Ejjew Nitolbu L-​Ħniena Taʼ Jehovah’

16, 17. Nies tal-​ġnus kif jistgħu “jitolbu l-​ħniena tal-​Mulej”?

¹⁶ Minfejn, iżda, ġew dawk il-​miljuni kollha li attendew għall-​Mafkar? Id-​disaʼ espressjoni mitkellma taʼ Jehovah tispjega: “Dan igħid il-​Mulej taʼ l-​eżerċti: ‘Għad jiġu popli u nies li jgħammru fi bliet kbar, u n-​nies taʼ belt imorru għand dawk taʼ belt oħra u jgħidulhom: “Imxu, ejjew immorru għand il-​Mulej nitolbuh ħniena u nfittxu l-​Mulej taʼ l-​eżerċti; ngħid għalija, sejjer jien ukoll.” U kotra taʼ popli u ġnus qawwija jiġu jfittxu l-​Mulej taʼ l-​eżerċti f’Ġerusalemm u jitolbu l-​ħniena tal-​Mulej.’”—Żakkarija 8:20-22.

¹⁷ Nies li attendew għall-​Mafkar riedu “jfittxu l-​Mulej taʼ l-​eżerċti.” Ħafna minn dawn kienu l-​qaddejja ddedikati u mgħammdin tiegħu. Miljuni t’oħrajn li attendew kienu għadhom ma laħqux dak il-​punt. F’xi pajjiżi l-​attendenza tal-​Mafkar kienet erbaʼ jew ħames darbiet iżjed mill-​għadd taʼ pubblikaturi tas-​Saltna. Dawn il-​ħafna wħud interessati jeħtieġu l-​għajnuna biex ikomplu jagħmlu progress. Ejjew ngħallmuhom biex jeżultaw fl-​għarfien li Ġesù miet għal dnubietna u qiegħed issa jaħkem fis-​Saltna t’Alla. (1 Korintin 5:7, 8; Apokalissi 11:15) U ejjew ninkuraġġuhom biex jiddedikaw lilhom infushom lil Alla Jehovah u jissottomettu ruħhom għas-​Sultan maħtur tiegħu. B’dan il-​mod se “jitolbu l-​ħniena tal-​Mulej.”—Salm 116:18, 19; Filippin 2:12, 13.

“Għaxart Irġiel Mill-​Ilsna Kollha Tal-​Ġnus”

18, 19. (a) Fit-​twettiq taʼ Żakkarija 8:23, min illum hu “Lhudi”? (b) Min illum huma l-​‘għaxar irġiel’ li “jaqbdu Lhudi u jżommuh minn tarf il-​libsa tiegħu”?

¹⁸ Għall-​aħħar darba fit-​tmien kapitlu taʼ Żakkarija, naqraw: “Dan igħid il-​Mulej taʼ l-​eżerċti.” X’inhi l-​aħħar proklamazzjoni taʼ Jehovah? “F’dawk il-​jiem għaxart irġiel mill-​ilsna kollha tal-​ġnus jaqbdu Lhudi u jżommuh minn tarf il-​libsa tiegħu, u jgħidulu: ‘Ħa niġi magħkom, għaliex smajna li Alla magħkom!’” (Żakkarija 8:23) Fi żmien Żakkarija, Iżrael naturali kien il-​ġens magħżul t’Alla. Fl-​ewwel seklu, madankollu, Iżrael irrifjuta lill-​Messija taʼ Jehovah. Għaldaqstant, Alla tagħna għażel “Lhudi”​—Iżrael ġdid—​bħala l-​poplu speċjali tiegħu, l-​“Israel t’Alla” fformat minn Lhud spiritwali. (Galatin 6:16; Ġwann 1:11; Rumani 2:28, 29) L-​għadd finali taʼ dawn kellu jkun 144,000, magħżulin minn fost il-​bnedmin biex isaltnu maʼ Ġesù fis-​Saltna tiegħu tas-​sema.—Apokalissi 14:1, 4.

¹⁹ Il-​biċċa l-​kbira minn dawn il-​144,000 diġà mietu leali u marru għall-​premju tagħhom tas-​sema. (1 Korintin 15:51, 52; Apokalissi 6:9-11) Ftit għad baqaʼ fuq l-​art u dawn jithennew jaraw li l-​‘għaxar irġiel’ li jagħżlu li jmorru mal-​“Lhudi” huma tabilħaqq “kotra kbira . . . minn kull ġens u tribù, minn kull poplu u lsien.”—Apokalissi 7:9; Isaija 2:2, 3; 60:4-10, 22.

20, 21. Hekk kif it-​tmiem taʼ din id-​dinja joqrob iżjed, kif nistgħu nibqgħu f’paċi maʼ Jehovah?

²⁰ Hekk kif it-​tmiem taʼ did-dinja joqrob b’mod inevitabbli, il-​Kristjaneżmu huwa bħal Ġerusalemm fi żmien Ġeremija: “Stennejna s-​sliem u ma għandna ebda riżq; żmien il-​fejqan, u arana mwerwra.” (Ġeremija 14:19) Dak it-​twerwir se jilħaq quċċata meta l-​ġnus iduru fuq ir-​reliġjon falza u jġibuha fi tmiem vjolenti. Ftit wara, il-​ġnus infushom se jesperjenzaw qerda fil-gwerra finali t’Alla, Armageddon. (Mattew 24:29, 30; Apokalissi 16:14, 16; 17:16-18; 19:11-21) Xi żmien taʼ taqlib se jkun dak!

²¹ Matul dan kollu, Jehovah se jipproteġi lil dawk li jħobbu l-​verità u jikkultivaw ‘iż-​żerriegħa tas-​sliem.’ (Żakkarija 8:12; Sofonija 2:3) Ejjew, mela, nibqgħu salvi ġol-​pajjiż tal-​poplu tiegħu, billi b’mod żeluż infaħħruh pubblikament u billi ngħinu lil kemm uħud possibbli biex “jitolbu l-​ħniena tal-​Mulej.” Jekk nagħmlu hekk, dejjem se ngawdu l-​paċi taʼ Jehovah. Iva, “il-​Mulej jagħti l-​qawwa lill-​poplu tiegħu; ibierek il-​Mulej bis-​sliem il-​poplu tiegħu!”—Salm 29:11. (w96 1/1)

Tistaʼ Tispjega Int?

◻ In-​nies t’Alla kif ‘ħallew idejhom jissaħħu’ fi żmien Żakkarija? Illum?

◻ Kif nirreaġixxu aħna għal persekuzzjoni, ostilità, u apatija?

◻ X’inhu involut f’li ‘ngħidu s-​sewwa lil xulxin’?

◻ Persuna kif tistaʼ ‘titlob il-​ħniena taʼ Jehovah’?

◻ Liema raġuni kbira għall-​ferħ tidher fit-​twettiq taʼ Żakkarija 8:23?

[Stampa f’paġna 28]

Is-​sena l-​oħra, ix-​Xhieda taʼ Jehovah qattgħu 1,150,353,444 siegħa jitkellmu man-​nies dwar is-​Saltna t’Alla