Il-​Kelma taʼ Ġeħova Hi Ħajja

Punti Prinċipali mill-​Kotba taʼ Ħaggaj u Żakkarija

HIJA s-​sena 520 Q.E.K. Għaddew 16-il sena mindu l-​Lhud li kienu eżiljati f’Babilonja u li kienu ġew lura poġġew il-​pedament tat-​tempju taʼ Ġeħova f’Ġerusalemm. Madankollu, it-​tempju għadu ma tlestiex, u x-​xogħol tal-​bini huwa projbit. Ġeħova jaħtar lill-​profeta Ħaggaj u xahrejn wara lill-​profeta Żakkarija biex iħabbru l-​kelma Tiegħu.

Ħaggaj u Żakkarija għandhom mira waħda: Li jimmotivaw lill-​poplu biex jerġaʼ jibda x-​xogħol tal-​bini mill-​ġdid tat-​tempju. L-​isforzi taʼ dawn il-​profeti jirnexxu, u t-​tempju jitlesta ħames snin wara. Dak li ħabbru Ħaggaj u Żakkarija huwa mniżżel fil-​kotba Bibliċi li jġorru isimhom. Il-​kotba taʼ Ħaggaj u Żakkarija tlestew fis-​sena 520 Q.E.K. u fis-​sena 518 Q.E.K. rispettivament. Bħal dawn il-​profeti, aħna wkoll għandna xogħol mogħti minn Alla, li għandu jitlesta qabel tmiem din is-​sistema dinjija. Dan huwa x-​xogħol taʼ l-​ippridkar tas-​Saltna u taʼ li nagħmlu dixxipli. Ejja naraw liema inkuraġġiment nistgħu nieħdu mill-​kotba taʼ Ħaggaj u Żakkarija.

“ĦALLU LIL QALBKOM TIKKUNSIDRA TRIQATKOM”

(Ħaggaj 1:1–​2:​23)

F’112-il ġurnata, Ħaggaj iwassal erbaʼ messaġġi biex jimmotiva lill-​poplu. L-​ewwel messaġġ hu: “‘[“Ħallu lil qalbkom tikkunsidra triqatkom,” NW]. Itilgħu fuq il-​muntanja, ġibu l-​injam u ibnu d-​dar, u jien nitgħaxxaq biha u nissebbaħ fiha,’ jgħid il-​Mulej.” (Ħaggaj 1:​7, 8) Il-​poplu jwieġeb b’mod favorevoli. It-​tieni messaġġ fih wegħda minn Ġeħova: “Nimla dan it-​tempju bil-​glorja.”—Ħaggaj 2:7.

Skond it-​tielet messaġġ, il-​fatt li ttraskuraw il-​bini mill-​ġdid tat-​tempju għamel lill-​‘poplu u x-​xogħol kollu taʼ idejh’ mniġġsin f’għajnejn Ġeħova. Madankollu, minn dakinhar li jerġaʼ jibda x-​xogħol tat-​tiswija, Ġeħova ‘jibda jberikhom.’ Bħalma jgħid ir-​rabaʼ messaġġ, Ġeħova se ‘jeqred il-​qawwa tas-​slaten tal-​ġnus’ u jpoġġi lill-​Gvernatur Żerubbabel bħala “siġill.”—Ħaggaj 2:​14, 19, 22, 23.

Mistoqsijiet Skritturali Mweġbin:

1:6​—Xi tfisser l-​espressjoni “xrobtu, u m’hemmx li tiskru”? Din l-​espressjoni sempliċement tindika li ma tantx kien se jkun hemm inbid. Minħabba n-​nuqqas taʼ barka taʼ Ġeħova, il-​provvista taʼ l-​inbid kienet se tkun limitata—żgur li ma kinitx se tkun biżżejjed biex wieħed jisker.

2:​6, 7, 21, 22—Min jew liema ħaġa qiegħda tikkaġuna t-​theżżiż, u b’liema riżultat? Ġeħova qed ‘jheżżeż il-​ġnus kollha’ permezz taʼ l-​ippridkar globali tal-​messaġġ tas-​Saltna. Ix-​xogħol taʼ l-​ippridkar iġiegħel ukoll li “l-​ġid kollu tal-​popli” jiġi fid-​dar taʼ Ġeħova, u b’hekk timtela bil-​glorja. Maż-​żmien, “il-​Mulej taʼ l-​eżerċti” se jheżżeż “is-​smewwiet [u l-​art] u l-​baħar u l-​blat,” u dan se jġiegħel lis-​sistema dinjija preżenti kollha kemm hi titheżżeż u ma tibqax teżisti iktar.—Ebrej 12:​26, 27.

2:9​—B’liema modi tistaʼ ‘l-​glorja taʼ l-​aħħar tat-​tempju tkun akbar minn taʼ qabel’? Dan kellu jseħħ b’minn taʼ l-​inqas tliet modi: in-​numru taʼ snin li t-​tempju kien se jdum jeżisti, min kellu jgħallem fih, u min kellu jinġemaʼ hemm biex iqim lil Ġeħova. Għalkemm it-​tempju glorjuż taʼ Salamun kien dam jintuża 420 sena, mill-​1027 Q.E.K sas-​sena 607 Q.E.K., ‘l-​aħħar tempju’ dam jintuża 580 sena, minn meta tlesta fis-​sena 515 Q.E.K. sal-​qerda tiegħu fis-​sena 70 E.K. Iktar minn hekk, il-​Messija—Ġesù Kristu—għallem fl-​‘aħħar tempju,’ u marru iktar nies fih biex jaduraw lil Alla milli fit-​tempju “taʼ qabel.”—Atti 2:​1-11.

Lezzjonijiet Għalina:

1:​2-4. Ir-​reżistenza għax-​xogħol taʼ l-​ippridkar m’għandhiex iġġegħelna nbiddlu l-​prijoritajiet tagħna milli ‘nfittxu l-​ewwel is-​saltna’ għal li nfittxu l-​ewwel l-​interessi tagħna.—Mattew 6:33.

1:​5, 7, NW. Huwa tajjeb għalina li ‘nħallu lil qalbna tikkunsidra triqatna’ u nirriflettu fuq kif dak li nagħmlu f’ħajjitna jeffettwa r-​relazzjoni tagħna m’Alla.

1:​6, 9-​11; 2:​14-​17. Il-​Lhud fi żmien Ħaggaj kienu qed jaħdmu iebes għall-​miri persunali tagħhom imma ma kinux qed igawdu l-​frott taʼ xogħolhom. Huma kienu qed jittraskuraw it-​tempju, u għalhekk ma kellhomx il-​barka t’Alla. Aħna għandna nagħtu prijorità lill-​miri spiritwali u nagħtu servizz b’ruħna kollha lil Alla, billi niftakru li kemm jekk għandna ftit u kemm jekk għandna ħafna materjalment, “il-​barka tal-​Mulej iġġib l-​għana.”—Proverbji 10:22.

2:​15, 18. Ġeħova ħeġġeġ lil-​Lhud biex minn dakinhar ’il quddiem jiffokaw fuq li jerġgħu jibnu t-​tempju u mhux fuq il-​mod kif kienu ttraskuraw ix-​xogħol fil-​passat. Bl-​istess mod, mil-​lum ’il quddiem aħna għandna nistinkaw biex niffokaw fuq il-​qima tagħna lejn Ġeħova.

‘MHUX BIL-​QAWWA, IMMA BL-​ISPIRTU TIEGĦI’

(Żakkarija 1:1–​14:21)

Żakkarija jibda l-​attività profetika tiegħu billi jistieden lil-​Lhud biex ‘jerġgħu jduru lejn il-​Mulej.’ (Żakkarija 1:3) It-​tmien viżjonijiet li jiġu wara jassiguraw l-​appoġġ t’Alla fix-​xogħol tal-​bini mill-​ġdid tat-​tempju. (Ara l-​kaxxa “It-​Tmien Viżjonijiet Allegoriċi taʼ Żakkarija.”) Ix-​xogħol tal-​bini kien se jitlesta “la bil-​ħila u lanqas bil-​qawwa, imma bl-​ispirtu [taʼ Ġeħova].” (Żakkarija 4:6) Ir-​raġel imsejjaħ Rimja żgur li se “jibni s-​santwarju tal-​Mulej” u “jkun qassis fuq it-​tron tiegħu.”—Żakkarija 6:​12, 13; Karm Żammit.

Betel tibgħat xi delegati biex jistaqsu lill-​qassisin dwar kif kellhom josservaw is-​sawm li kien jikkommemora l-​qerda taʼ Ġerusalemm. Ġeħova jgħid lil Żakkarija li n-​niket matul l-​erbaʼ sawmiet li kienu jsiru bħala tfakkira tal-​ħsara li waqgħet fuq Ġerusalemm se jinbidel fi żmien taʼ “ferħ u hena u taʼ festi sbieħ.” (Żakkarija 7:2; 8:19) Iż-​żewġ dikjarazzjonijiet li jiġu wara jinkludu ġudizzju kontra l-​ġnus u l-​profeti foloz, profeziji Messjaniċi, u messaġġ taʼ tiġdid tal-​poplu t’Alla.—Żakkarija 9:1; 12:1.

Mistoqsijiet Skritturali Mweġbin:

2:5 (2:​1, NW)​—Wieħed raġel għala kien qed ikejjel lil Ġerusalemm b’ħabel? Milli jidher, din l-​azzjoni kienet tirreferi għall-​bini taʼ ħajt taʼ kenn madwar il-​belt. L-​anġli informaw lir-​raġel li Ġerusalemm kienet se tikber u li kien se jkollha l-​protezzjoni taʼ Ġeħova.—Żakkarija 2:​7-9 (Żakkarija2:3-5, NW).

6:​11-​13​—Il-​fatt li l-​Qassis il-​Kbir Ġożwè ġie inkurunat, kien ifisser li hu sar sultan-qassis? Le, Ġożwè ma kienx mil-​linja rjali taʼ David. Madankollu, l-​inkurunar tiegħu ffigura bil-​quddiem lill-​Messija. (Ebrej 6:20) Il-​profezija dwar “Rimja” titwettaq permezz tas-​Sultan-Qassis tas-​sema Ġesù Kristu. (Ġeremija 23:5) Bħalma Ġożwè qeda lil-​Lhud li ġew lura u serva bħala qassis il-​kbir fit-​tempju li reġaʼ nbena, hekk ukoll Ġesù huwa l-​Qassis il-​Kbir għall-​qima vera fit-​tempju spiritwali taʼ Ġeħova.

8:​1-​23​—Meta jitwettqu l-​għaxar dikjarazzjonijiet li jissemmew f’dawn il-​versi? Qabel kull dikjarazzjoni nsibu l-​espressjoni “dan jgħid il-​Mulej taʼ l-​eżerċti” u kull waħda minnhom hija wegħda taʼ paċi minn Alla għan-​nies tiegħu. Xi wħud mid-​dikjarazzjonijiet twettqu fis-​sitt seklu Q.E.K., imma lkoll kemm huma jew twettqu mill-​1919 E.K. ’l hawn jew inkella qegħdin jitwettqu issa.a

8:3​—Ġerusalemm għala hija msejħa “l-​belt tas-​sewwa” (KŻ)? Qabel il-​qerda fis-​sena 607 Q.E.K., Ġerusalemm kienet “il-​belt li taħqar,” abitata minn profeti u qassisin korrotti u poplu żleali. (Sofonija 3:1; Ġeremija 6:13; 7:​29-34) Madankollu, issa li t-​tempju kien reġaʼ nbena u l-​poplu reġaʼ beda jqim lil Ġeħova, il-​veritajiet tal-​qima vera kienu se jiġu mitkellmin f’dan il-​post, u Ġerusalemm kienet se tissejjaħ “il-​belt tas-​sewwa.”

11:​7-​14​—X’kien ifisser li Żakkarija qasam il-​bastun li kien semma “Ħlewwa” u ieħor li kien semma “Rabta”? Żakkarija huwa deskritt bħala wieħed li kien ‘jirgħa l-​merħla lesta għall-​qatla’—uħud bħal nagħaġ li huma sfruttati mill-​mexxejja tagħhom. Fl-​irwol tiegħu bħala ragħaj, Żakkarija kien jiffigura bil-​quddiem lil Ġesù Kristu, li kien mibgħut għal dawk tal-​poplu li kienu f’patt m’Alla imma huma kienu warrbuh. Il-​fatt li qasam il-​bastun imsejjaħ “Ħlewwa” kien jissimbolizza li Alla kien se jtemm il-​patt tal-​Liġi mal-​Lhud u jieqaf jittrattahom bil-​ħlewwa. Il-​fatt li qasam il-​bastun “Rabta” kien ifisser li hu kien se jkisser ir-​rabta teokratika tal-​fratellanza li kien hemm bejn Ġuda u Israel.

12:11​—X’kien “il-​biki taʼ Ħadad-rimmon fil-​wita taʼ Megiddu”? Is-​Sultan Ġosija taʼ Ġuda kien inqatel f’battalja mal-​Fargħun Neko taʼ l-​Eġittu fil-​“wita taʼ Megiddu,” u matul is-​snin il-​mewt tiegħu ġiet mibkija b’‘lamentazzjonijiet.’ (2 Kronaki 35:25) Għalhekk, “il-​biki taʼ Ħadad-rimmon” għandu mnejn jirreferi għall-​biki minħabba l-​mewt taʼ Ġosija.

Lezzjonijiet Għalina:

1:​2-6; 7:​11-​14. Ġeħova huwa ferħan b’dawk li bi ndiema jaċċettaw it-​twiddib u jduru lejh billi jagħtuh qima b’ruħhom kollha u hu jerġaʼ jdur lejhom. Min-​naħa l-​oħra, hu ma jwiġibx għall-​għajta t’għajnuna li ssir minn dawk li ‘ma jridux jagħtu widen, jagħtuh darhom, [u] jsoddu widnejhom li ma jmorrux jisimgħu’ l-​messaġġ tiegħu.

4:​6, 7. L-​ebda ostaklu ma kien tant kbir li l-​ispirtu taʼ Ġeħova ma setax jegħlbu ħalli x-​xogħol tal-​bini mill-​ġdid tat-​tempju jitlesta b’suċċess. Kwalunkwe problema li nistgħu niltaqgħu magħha fis-​servizz tagħna lil Alla nistgħu negħlbuha billi neżerċitaw fidi f’Ġeħova.—Mattew 17:20.

4:​10. Żerubbabel u l-​poplu tiegħu lestew it-​tempju skond il-​livelli għoljin t’Alla, u Ġeħova kien qed jifli dak li kienu qed jagħmlu. M’huwiex diffiċli għall-​bnedmin imperfetti li jgħixu fi qbil maʼ dak li jistenna Ġeħova.

7:​8-​10; 8:​16, 17. Sabiex niksbu l-​favur taʼ Ġeħova rridu neżerċitaw il-​ġustizzja, nuru l-​qalb tajba bl-​imħabba, il-​ħniena, u ngħidu l-​verità lil xulxin.

8:​9-​13. Ġeħova jberikna meta ‘idejna jissaħħu’ biex nagħmlu x-​xogħol li hu inkarigana nagħmlu. Dawn il-​barkiet jinkludu paċi, sigurtà, u progress spiritwali.

12:6. Dawk fost il-​poplu taʼ Ġeħova li għandhom pożizzjonijiet taʼ indokrar għandhom ikunu bħal “torċa mqabbda”—żelużi b’mod li jispikka.

13:3. Il-​lealtà tagħna lejn l-​Alla l-​veru u l-​organizzazzjoni tiegħu għandha tisboq il-​lealtà lejn kwalunkwe bniedem, ikun kemm ikun qribna.

13:​8, 9. Kienu ħafna l-​apostati li lilhom Ġeħova ċaħad, tnejn minn kull tlieta fil-​pajjiż. Terz biss ġew irfinuti permezz tan-​nar. Fi żmienna, il-​Kristjaneżmu, li l-​maġġuranza minnu jgħid li huwa Kristjan, ġie miċħud minn Ġeħova. Numru żgħir biss, il-​Kristjani midlukin, ‘sejjaħ isem’ Ġeħova u ssottometta ruħu għall-​proċess taʼ l-​irfinar. Il-​Kristjani midlukin u sħabhom fit-​twemmin jagħtu prova li huma iktar milli sempliċement Xhieda taʼ Ġeħova taʼ l-​isem.

Imqanqlin biex Naġixxu biż-​Żelu

Dak li Ħaggaj u Żakkarija pproklamaw, kif jeffettwa lilna llum? Meta nirriflettu fuq kif il-​messaġġ qanqal lil-​Lhud biex jagħtu attenzjoni lix-​xogħol tal-​bini mill-​ġdid tat-​tempju, ma niġux aħna mqanqlin biex ikollna sehem żeluż fix-​xogħol taʼ l-​ippridkar tas-​Saltna u taʼ li nagħmlu dixxipli?

Żakkarija bassar li l-​Messija kien se jiġi “riekeb fuq ħmar,” li kien se jiġi tradut għal “tletin xekel tal-​fidda,” li kien se jiġi milqut, u li ‘l-​merħla kienet ħa tixtered.’ (Żakkarija 9:9; 11:12; 13:7) X’impatt jistaʼ jkollha fuq il-​fidi tagħna l-​meditazzjoni fuq profeziji Messjaniċi bħal dawn taʼ Żakkarija! (Mattew 21:​1-9; 26:​31, 56; 27:​3-10) Il-​fiduċja tagħna fil-​Kelma taʼ Ġeħova u l-​provvedimenti tiegħu għas-​salvazzjoni tagħna tissaħħaħ.—Ebrej 4:12.

[Nota taʼ taħt]

[Kaxxa f’paġna 11]

IT-​TMIEN VIŻJONIJIET ALLEGORIĊI TAʼ ŻAKKARIJA

1:​8-​17: Tagħti garanzija li t-​tempju kien se jitlesta u turi li Ġerusalemm u bliet oħrajn f’Ġuda kienu se jitbierku.

2:​1-​4 (1:​18-​21, NW): Twiegħed it-​tmiem taʼ l-​‘erbat iqrun li xerrdu lil Ġuda,’ jiġifieri, il-​gvernijiet kollha li jopponu l-​qima taʼ Ġeħova.

2:​5-​17 (2:​1-​13, NW): Turi li Ġerusalemm kienet se tikber u li Ġeħova kien se jsir “ħajt tan-​nar madwarha”—protezzjoni.

3:​1-​10: Turi li Satana kien involut fl-​oppożizzjoni li saret għax-​xogħol tat-​tempju u li l-​Qassis il-​Kbir Ġożwè huwa meħlus u l-​iżball tiegħu mneħħi.

4:​1-​14: Tagħti l-​assiguranza li l-​ostakli li jidhru qishom muntanja se jiċkienu u li l-​Gvernatur Żerubbabel kien se jtemm il-​bini tat-​tempju.

5:​1-4: Tlissen saħta fuq dawk li jagħmlu l-​ħażin u li ma ġewx kastigati.

5:​5-​11: Tħabbar it-​tmiem tal-​ħażen.

6:​1-8: Twiegħed ħarsien u protezzjoni anġeliċi.

[Stampa f’paġna 8]

X’kienet il-​mira tal-​messaġġi taʼ Ħaggaj u Żakkarija?

[Stampa f’paġna 10]

Dawk li għandhom pożizzjoni taʼ indokrar kif inhuma bħal “torċa mqabbda”?