Għala Qed Iħallu r-​Reliġjon?

F’NOFS is-​seklu 19, qatt ma kont tismaʼ lil xi resident fil-​Prussja (issa t-​Tramuntana tal-​Ġermanja) jgħid li ma kien jappartjeni lil ebda reliġjon partikulari. Fil-​fatt, li sempliċement jikkonverti minn xi reliġjon prominenti għal xi knisja nonkonformista setaʼ jagħmlu suġġett għal sorveljanza mill-​pulizija. Kemm inbidlu ż-​żminijiet!

Illum, numru kbir taʼ Ġermaniżi qed jirriżenjaw mill-​knejjes. Skond rapport, 1 minn kull 4 jistqarr li ma jappartjeni lil ebda reliġjon affattu. Xejra simili qed tidher fl-​Awstrija u fl-​Isvizzera. Jekk is-​sħubija hija d-​demm li jagħti l-​ħajja lir-​reliġjon, mela, bħalma esprimieha l-​kittieb Ġermaniż Reimer Gronemeyer, “il-​knejjes fl-​Ewropa qed jiżvinaw.”

Għala Qed Jiċħdu r-​Reliġjon

Għala ħafna qed jiċħdu r-​reliġjon organizzata? Taʼ spiss, għal raġunijiet finanzjarji, speċjalment f’artijiet fejn il-​membri jiġu mitlubin li jħallsu xi taxxa tal-​knisja. Ħafna jistaqsu, ‘Għala għandhom il-​flus li ħdimt tant għalihom imorru għall-​knisja?’ Xi wħud huma urtati mill-​poter u l-​ġid enormi li għandha l-​knisja. Huma x’aktarx jaqblu mal-​Kardinal Joachim Meisner minn Cologne, il-​Ġermanja, meta qal li l-​ġid tal-​knisja setaʼ influwenzaha biex tagħti wisq attenzjoni lejn affarijiet materjali u “li ma tiħux il-​fidi fi Kristu bis-​serjetà biżżejjed.”

Xi wħud qed jitilqu mill-​knisja tagħhom minħabba li jsibuha taʼ dwejjaq, mhix interessanti, mhix kapaċi li tissodisfa l-​ġuħ spiritwali tagħhom. Huma jsofru l-​ġuħ imsemmi mill-​profeta Għamos, “mhux il-​ġuħ tal-​ħobż, lanqas l-​għatx għall-​ilma, iżda għas-​smigħ tal-​kelma tal-​Mulej.” (Għamos 8:11) Minħabba li jirċievu ftit li xejn għajnuna mir-​reliġjon tagħhom, huma jitilquha.

Fil-waqt li l-​problemi li jqumu huma ġenwini, hija l-​aħjar tweġiba li taqtaʼ qalbek minn kull reliġjon? Immaġina raġel bil-​ġuħ li jara xi ħaġa li tidher qisha biċċa ħobż. Meta jipprova jikolha, madankollu, isib li hi magħmula mis-​serratura. Se jaqtaʼ qalbu mill-​idea li jiekol u jissodisfa l-​ġuħ tiegħu? Le, kieku jfittex xi ikel veru. B’mod simili, jekk xi reliġjon ma tissodisfax il-​ġuħ spiritwali tal-​membri tagħha, għandhom huma jaqtgħu qalbhom mir-​reliġjon? Jew ikunu iktar għaqlin li jfittxu xi mod biex jissodisfaw il-​ġuħ spiritwali tagħhom? Dak hu li ħafna għamlu, bħalma jurina l-​artiklu li jmiss.