Jehovah X’Jistenna Minna?

“X’qiegħed jitlob lura minnek Jehovah ħlief li teżerċita l-​ġustizzja u li tħobb il-​qalb tajba u li tkun modest f’li timxi m’Alla tiegħek?”​—MIKEA 6:​8, NW.

1, 2. Xi wħud mill-​qaddejja taʼ Jehovah għala jistgħu jiskuraġġixxu ruħhom, imma x’għandu jkun ferm t’għajnuna?

VERA hija mara Kristjana leali taʼ madwar 75 sena, li s-​saħħa tagħha ma tantx hi tajba. Hi tgħid: “Kultant, inħares mit-​tieqa tiegħi u nara lil ħuti Kristjani jippridkaw minn dar għal dar. Jaqbiżli d-​dmugħ għax nixtieq inkun magħhom, imma l-​mard li għandi ma jħallinix nagħmel kemm nixtieq fis-​servizz taʼ Jehovah.”

² Qatt ħassejtek hekk? M’għandniex xi ngħidu, kulmin iħobb lil Jehovah jixtieq li jimxi f’ismu u jwettaq dak kollu li hu jeħtieġ minna. Imma xi ngħidu jekk saħħitna bdiet tmajna, qegħdin nixjieħu, jew għandna r-​responsabbiltajiet tal-​familja? Forsi nħossuna xi ftit skuraġġiti minħabba li dawn iċ-​ċirkustanzi jistgħu jtellfuna milli nagħmlu dak kollu li tixtieq qalbna fis-​servizz t’Alla. Jekk din hi s-​sitwazzjoni tagħna, żgur li se nsibuh taʼ inkuraġġiment li nikkunsidraw Mikea kapitli 6 u 7. Dawn il-​kapitli juru li l-​ħtiġijiet taʼ Jehovah minbarra li huma raġunevoli jistgħu jintlaħqu wkoll.

Kif Alla Jittratta lin-​Nies Tiegħu

3. Jehovah kif jittrattahom lill-​Iżraelin ribellużi?

³ Ejja l-​ewwelnett nagħtu ħarsa lejn Mikea 6:​3-5 u ninnotaw il-​mod kif Jehovah jittratta man-​nies tiegħu. Ftakar li fi żmien Mikea l-​Iżraelin huma ribellużi. Xorta waħda, Jehovah jindirizzahom bil-​mogħdrija bil-​kliem “poplu tiegħi.” Hu jitlobhom: “Ftakar, iva, poplu tiegħi.” Minflok ma jakkużahom bl-​aħrax, hu jipprova jilħqilhom qalbhom billi jistaqsihom, “X’għamiltlek jiena?” Hu saħansitra jħeġġiġhom biex ‘iwiġbuh’ jew bħallikieku ‘jagħtu xiehda kontrih’ (NW).

4. L-​eżempju taʼ kif Alla juri l-​mogħdrija għandu jkollu liema effett fuqna?

⁴ X’eżempju jagħti Jehovah lilna lkoll! Hu b’mogħdrija jsejjaħ saħansitra lin-​nies taʼ Iżrael u Ġuda taʼ żmien Mikea l-​“poplu tiegħi” u meta jkellimhom juża l-​kliem “jekk jogħġbok” (NW). Mela, żgur li aħna għandna nuru l-​mogħdrija u nkunu qalbna tajba fil-​mod kif nittrattaw lil dawk li huma parti mill-​kongregazzjoni. Veru, xi wħud ma tantx hu faċli li tingwalaha magħhom, jew forsi huma dgħajfin spiritwalment. Iżda, jekk iħobbu lil Jehovah, aħna rridu ngħinuhom u nagħdruhom.

5. Liema punt bażiku jidher f’Mikea 6:​6, 7?

⁵ Issa ejja naraw Mikea 6:​6, 7. Mikea jistaqsi serje taʼ mistoqsijiet u jgħid: “Biex se nersaq quddiem il-​Mulej, u nitbaxxa quddiem Alla l-​Għoli? Se nersaq quddiemu b’sagrifiċċji tal-​ħruq u b’għoġiela taʼ sena? Il-​Mulej se jogħġbuh l-​eluf taʼ mtaten, u l-​għaxriet taʼ eluf taʼ widien taʼ żejt? Se noffrilu ’l ibni l-​kbir b’sagrifiċċju għad-​dnub tiegħi? Se nagħtih l-​ewwel wild tiegħi, il-​frott taʼ ħdani għal ħtijieti?” Le, m’huwiex possibbli li togħġob lil Jehovah bl-​“eluf taʼ mtaten, u l-​għaxriet taʼ eluf taʼ widien taʼ żejt.” Imma hemm xi ħaġa li se togħġbu. Din x’inhi?

Neżerċitaw il-​Ġustizzja

6. Liema tliet ħtiġijiet divini huma mniżżlin f’Mikea 6:8?

⁶ F’Mikea 6:8 (NW), naraw dak li Jehovah jistenna minna. Mikea jistaqsi: “X’qiegħed jitlob lura minnek Jehovah ħlief li teżerċita l-​ġustizzja u li tħobb il-​qalb tajba u li tkun modest f’li timxi m’Alla tiegħek?” Dawn it-​tliet ħtiġijiet jinvolvu l-​mod kif inħossuna, kif naħsbu, u kif naġixxu. Irridu nħossuna dejjem lesti li nuru dawn il-​kwalitajiet, naħsbu dwar kif se nuruhom, u nieħdu azzjoni biex nuruhom. Ejja nikkunsidraw dawn it-​tliet ħtiġijiet waħda waħda.

7, 8. (a) Xi jfisser “li teżerċita l-​ġustizzja”? (b) Liema inġustizzji kienu komuni ħafna fi żmien Mikea?

⁷ “Li teżerċita l-​ġustizzja” jfisser li tagħmel dak li hu sewwa. Il-​mod kif Jehovah jagħmel l-​affarijiet huwa l-​livell tal-​ġustizzja. Madankollu, in-​nies li kienu jgħixu fi żmien Mikea ma kinux juru l-​ġustizzja, imma l-​inġustizzja. B’liema modi? Ejja naraw Mikea 6:​10. Fl-​aħħar taʼ dan il-​vers, in-​negozjanti huma deskritti bħala li qegħdin jużaw “efa mnaqqsa,” jiġifieri, kejl inqas milli suppost. Vers 11 iżid li dawn qed jużaw “bċejjeċ foloz taʼ l-​użin.” U skond il-​vers 12, “ilsienhom qerq ġo fommhom.” B’hekk, il-​kejl falz, l-​użin falz, u d-​diskors falz kienu affarijiet komuni ħafna fid-​dinja kummerċjali taʼ żmien Mikea.

⁸ Prattiċi inġusti ma ssibhomx biss fis-​suq. Huma komuni wkoll fil-​qrati. Mikea 7:3 jindika li “l-​prinċep u l-​imħallef jittallbu rigali.” It-​tixħim jingħata lill-​imħallfin biex dawn jaqtgħu sentenzi inġusti kontra nies innoċenti. L-​istess vers iżid li “l-​kbir,” jew iċ-​ċittadin influwenti, jingħaqad fl-​atti kriminali. Fil-​fatt, Mikea jgħid li l-​prinċep, l-​imħallef, u min hu kbir ‘iħawdu’ bejniethom, jew jikkoordinaw, l-​għemejjel mill-​agħar tagħhom.

9. Ġuda u Iżrael kif inhuma effettwati mill-​inġustizzji li bdew jagħmlu n-​nies mill-​agħar?

⁹ L-​inġustizzji li bdew jagħmlu l-​mexxejja l-​ħżiena jeffettwaw lil Iżrael u lil Ġuda kollha. Mikea 7:5 jinnota li n-​nuqqas taʼ ġustizzja wassal biex ikun hemm nuqqas taʼ fiduċja bejn il-​ġirien, il-​ħbieb tal-​qalb, u saħansitra l-​imseħbin fiż-​żwieġ. Il-​vers 6 jgħid li dan wassal għal sitwazzjoni li fiha qraba intimi bħal ulied subien u missirijiethom, ulied bniet u ommijiethom, saru jobogħdu lil xulxin.

10. Illum li hawn tant inġustizzji, il-​Kristjani kif qed iġibu ruħhom?

¹⁰ Xi ngħidu għalina llum? Ma narawx aħna kundizzjonijiet simili? Bħal Mikea, aħna mdawrin b’nuqqas taʼ ġustizzja, atmosfera fejn ħadd ma jafda ’l ħadd, u kollass fil-​ħajja tal-​familja u dik soċjali. Madankollu, bħala l-​qaddejja t’Alla li qed ngħixu f’nofs din id-​dinja mimlija ħażen, ma rridux inħallu l-​ispirtu tal-​mod inġust li bih qed taġixxi d-​dinja jidħol fil-​kongregazzjoni Kristjana. Anzi, aħna nistinkaw biex inżommu l-​prinċipji taʼ l-​onestà u l-​integrità, billi nuruhom f’kull aspett tal-​ħajja tagħna taʼ kuljum. Tabilħaqq, aħna “nġibu ruħna sewwa f’kollox.” (Lhud 13:18) Ma taqbilx int li meta nagħmlu dak li hu ġust ingawdu l-​barkiet kbar li jiġu minn fratellanza li turi fiduċja vera?

In-​Nies Kif Jisimgħu “Leħen il-​Mulej”?

11. Mikea 7:​12 kif qed jitwettaq?

¹¹ Mikea jipprofetizza li, minkejja l-​kundizzjonijiet inġusti li jeżistu, il-​ġustizzja se tilħaq lil kull xorta taʼ nies. Il-​profeta jbassar li n-​nies se jinġabru “minn baħar sa ieħor u minn muntanja sa oħra” biex isiru aduraturi taʼ Jehovah. (Mikea 7:​12) Illum, fit-​twettiq finali taʼ din il-​profezija, m’huwiex xi ġens wieħed partikulari, imma individwi minn kull ġens li qegħdin jibbenefikaw mill-​ġustizzja imparzjali t’Alla. (Isaija 42:1) Dan kif qed iseħħ?

12. “Leħen il-​Mulej” kif qed jinstemaʼ llum?

¹² Għat-​tweġiba, ejja nikkunsidraw il-​kliem li Mikea kien qal iktar kmieni. Mikea 6:9 jistqarr: “Leħen il-​Mulej isejjaħ il-​belt, jiswa li wieħed jibżaʼ minn ismek!” In-​nies mill-​ġnus kollha kif jisimgħu “leħen il-​Mulej,” u dan x’għandu x’jaqsam maʼ li aħna nagħmlu dak li hu ġust? Sewwa, in-​nies illum ma jisimgħux leħen Alla letteralment. Madankollu, permezz tax-​xogħol taʼ l-​ippridkar tagħna mad-​dinja kollha, leħen Jehovah qiegħed jinstemaʼ minn individwi taʼ kull razza u qasam tal-​ħajja. B’hekk, kulmin jismaʼ se ‘jibżaʼ minn isem Alla,’ u jibda jkollu rispett kbir lejh. Meta aħna naqdu bħala proklamaturi żelużi tas-​Saltna nkunu qegħdin nimxu bl-​imħabba u bil-​ġustizzja. Meta nagħmlu l-​isem t’Alla magħruf maʼ kulħadd mingħajr parzjalità, aħna nkunu qed ‘neżerċitaw il-​ġustizzja.’

Irridu Nħobbu l-​Qalb Tajba

13. X’inhi d-​differenza bejn il-​qalb tajba bl-​imħabba u l-​imħabba?

¹³ Issa jmiss li niddiskutu t-​tieni ħtieġa msemmija f’Mikea 6:8 (NW). Jehovah jistenna li aħna ‘nħobbu l-​qalb tajba.’ Il-​kelma Ebrajka tradotta “qalb tajba” tiġi tradotta wkoll “qalb tajba bl-​imħabba” jew “imħabba leali.” L-​espressjoni “qalb tajba bl-​imħabba” hi li wieħed juri bil-​fatti li jimpurtah minn oħrajn, juri tħassib bil-​mogħdrija għalihom. Il-​qalb tajba bl-​imħabba hija differenti mill-​kwalità taʼ l-​imħabba. B’liema mod? Il-​kelma “mħabba” tinkludi ħafna iktar, u din tistaʼ tiġi applikata anki għal oġġetti u konċetti. Per eżempju, l-​Iskrittura titkellem dwar “min iħobb l-​inbid u ikel bnin” u wkoll dwar “min iħobb l-​għerf.” (Proverbji 21:17; 29:3) Mill-​banda l-​oħra, il-​qalb tajba bl-​imħabba dejjem tinvolvi lin-​nies, speċjalment lil dawk li jaqdu ’l Alla. Mikea 7:20 (NW) għalhekk qed jitkellem dwar il-​“qalb tajba bl-​imħabba” li ntweriet m’Abraham—bniedem li qeda lil Alla Jehovah.

14, 15. Il-​qalb tajba bl-​imħabba kif tintwera, u liema evidenza taʼ dan tissemma fil-​paragrafi?

¹⁴ F’Mikea 7:18 (NW), il-​profeta jgħid li Alla “jitgħaxxaq bil-​qalb tajba bl-​imħabba.” F’Mikea 6:8 (NW), jintqalilna biex mhux sempliċement nuru qalb tajba imma biex inħobbu dik il-​kwalità. X’nitgħallmu minn dawn l-​Iskritturi? Nitgħallmu li l-​qalb tajba bl-​imħabba nuruha minn rajna u f’kollox għaliex aħna rridu nuruha. Bħal Jehovah, nieħdu pjaċir, jew hija l-​għaxqa tagħna, li nuru qalb tajba bl-​imħabba lejn kulmin hu fil-​bżonn.

¹⁵ Illum, qalb tajba bl-​imħabba bħal din hija l-​marka li tidentifika lill-​poplu t’Alla. Ikkunsidra sempliċement eżempju wieħed. F’Ġunju tas-​sena 2001, tempesta tropikali kkaġunat għargħar kbir f’Texas, l-​Istati Uniti, tant li saret ħsara lil eluf taʼ djar, inkluż mijiet taʼ djar taʼ Xhieda taʼ Jehovah. Biex jgħinu lil ħuthom il-​Kristjani fil-​bżonn, maʼ l-​10,000 Xhud offrew il-​ħin u l-​enerġija tagħhom minn rajhom u b’idejhom miftuħa. Għal iktar minn sitt xhur, dawn il-​volontieri ħadmu bla waqfien, lejl u nhar, bis-​Sibt u l-​Ħadd b’kollox, biex jibnu mill-​ġdid 8 Swali tas-​Saltna u iktar minn 700 dar għal ħuthom il-​Kristjani. Dawk li ma setgħux jagħmlu dan ix-​xogħol taw ikel, provvisti, u flus. Dawn l-​eluf taʼ Xhieda kollha għala ġew biex jgħinu lil ħuthom? Għax ‘iħobbu l-​qalb tajba.’ U kemm hu taʼ faraġ li nkunu nafu li opri taʼ qalb tajba bl-​imħabba bħal dawn isiru minn ħutna mad-​dinja kollha! Iva, hija xi ħaġa taʼ ferħ, u mhux taʼ piż, li wieħed ‘iħobb il-​qalb tajba’!

Kun Modest fil-​Mod Kif Timxi m’Alla Tiegħek

16. Liema eżempju jgħin biex jenfasizza l-​bżonn li aħna nimxu m’Alla?

¹⁶ It-​tielet ħtieġa li nsibu f’Mikea 6:8 (NW) hi “li tkun modest f’li timxi m’Alla tiegħek.” Dan ifisser li nagħrfu l-​limitazzjonijiet tagħna u niddependu minn Alla. Biex nagħtu eżempju: Immaġina għal mument tifla żgħira tiggranfa maʼ id missierha waqt li t-​tnejn mexjin fil-​maltemp. It-​tifla taf tajjeb li s-​saħħa li għandha hija limitata, imma hi għandha fiduċja f’missierha. Aħna wkoll irridu nkunu nafu l-​limitazzjonijiet tagħna imma fl-​istess ħin irridu nuru fiduċja f’Missierna tas-​sema. Din il-​fiduċja kif nistgħu nżommuha sħiħa? L-​ewwelnett, billi nżommu f’moħħna għala hu għaqli li nibqgħu qrib Jehovah. Mikea jfakkarna fi tliet raġunijiet: Jehovah hu l-​Ħellies, il-​Gwida, u l-​Protettur tagħna.

17. Jehovah kif ħeles, iggwida, u pproteġa lill-​poplu tiegħu taʼ żmien il-​qedem?

¹⁷ Skond Mikea 6:​4, 5, Alla jgħid: “Jien tellajtek mill-​art taʼ l-​Eġittu.” Iva, Jehovah kien il-​Ħellies taʼ Iżrael. Jehovah jgħid ukoll: “Jien bgħatt quddiemek ’il Mosè, lil Aron u ’l Mirjam.” Mosè u Aron kienu mdorrijin jiggwidaw lill-​ġens, u Mirjam iggwidat lin-​nisa taʼ Iżrael f’żifna tar-​rebħa. (Eżodu 7:​1, 2; 15:​1, 19-21; Dewteronomju 34:10) Jehovah ipprovda gwida permezz tal-​qaddejja tiegħu. Fil-​vers 5, Jehovah ifakkar lill-​ġens taʼ Iżrael li hu pproteġiehom kontra Balak u Balgħam, u li tahom protezzjoni matul l-​aħħar fażi tal-​vjaġġ tagħhom minn Sittim fl-​art taʼ Mowab sa Gilgal ġewwa l-​Art Imwiegħda.

18. Alla kif jaġixxi bħala l-​Ħellies, il-​Gwida, u lProtettur tagħna llum?

¹⁸ Hekk kif aħna nimxu m’Alla, hu jeħlisna mid-​dinja taʼ Satana, jiggwidana permezz tal-​Kelma u taʼ l-​organizzazzjoni Tiegħu, u bħala grupp jipproteġina mill-​attakki taʼ l-​avversarji tagħna. B’hekk, aħna għandna raġuni biżżejjed għalxiex naqbdu sew maʼ id Missierna tas-​sema hekk kif nimxu miegħu matul l-​aħħar fażi tempestuża tal-​vjaġġ tagħna lejn xi ħaġa ferm aqwa mill-​Art Imwiegħda tal-​qedem—id-​dinja l-​ġdida u ġusta t’Alla.

19. Il-​modestja kif inhi relatata mal-​limitazzjonijiet tagħna?

¹⁹ Il-​fatt li nkunu modesti waqt li nimxu m’Alla se jgħinna wkoll biex ikollna ħarsa realistika taċ-​ċirkustanzi tagħna. Dan hu minħabba li l-​modestja tinkludi li nkunu konxji tal-​limitazzjonijiet tagħna. L-​età avanzata jew in-​nuqqas taʼ saħħa forsi jistgħu jillimitawna f’dak li nistgħu nagħmlu fis-​servizz taʼ Jehovah. Madankollu, minflok ma nħallu dan jaqtgħalna qalbna tajjeb li niftakru li Alla jaċċetta l-​isforzi u s-​sagrifiċċji tagħna ‘skond ma għandna, u mhux skond li ma għandniex.’ (2 Korintin 8:12) Tabilħaqq, Jehovah jistenna minna li naqduh b’ruħna kollha, skond ma jippermettulna ċ-​ċirkustanzi. (Kolossin 3:​23) Meta nagħmlu kulma nistgħu fis-​servizz tiegħu biż-​żelu u bis-​serjetà, Alla jberikna bil-​kbir.​—Proverbji 10:22.

Attitudni taʼ Stennija Ġġib Barkiet

20. Li nkunu konxji taʼ liema fatt se jgħinna nuru attitudni taʼ stennija bħal dik taʼ Mikea?

²⁰ Meta nesperjenzaw il-​barka taʼ Jehovah inħossuna mqanqlin biex nimitaw l-​attitudni taʼ Mikea. Hu jiddikjara: “Nistenna ’l Alla tas-​salvazzjoni tiegħi.” (Mikea 7:7) Dan il-​kliem kif inhu relatat maʼ li aħna nimxu m’Alla bil-​modestja? Il-​fatt li jkollna attitudni taʼ stennija, jew sabar, jgħinna nevitaw li nħossuna diżappuntati li l-​jum taʼ Jehovah għadu ma wasalx. (Proverbji 13:12) Ngħiduha kif inhi, ilkoll kemm aħna mxennqin għat-​tmiem taʼ din id-​dinja mill-​agħar. Madankollu, kull ġimgħa hemm eluf taʼ nies li qed jibdew jimxu m’Alla. Il-​fatt li nkunu nafu dan jagħtina raġuni għalxiex nuru attitudni taʼ stennija. F’konnessjoni maʼ dan, wieħed Xhud li ilu jaqdi għal bosta snin qal: “Meta nħares lura lejn il-​55 sena li qattajt fix-​xogħol taʼ l-​ippridkar, jien konvint li ma tlift xejn minħabba li qgħadt nistenna lil Jehovah. Anzi, ġejt skansat minn ħafna wġigħ taʼ qalb.” Hekk tħossok int?

21, 22. Mikea 7:​14 kif qed jitwettaq fi żmienna?

²¹ Bla ebda dubju, il-​fatt li nimxu maʼ Jehovah ikun taʼ benefiċċju għalina. Hekk kif naqraw Mikea 7:​14, naraw li hu qed iqabbel lill-​poplu t’Alla maʼ nagħaġ li qed jgħammru fis-​sigurtà mar-​ragħaj tagħhom. Illum, fit-​twettiq akbar taʼ din il-​profezija, il-​fdal taʼ Iżrael spiritwali u magħhom in-​“nagħaġ oħra” jsibu s-​sigurtà maʼ Jehovah, ir-​Ragħaj tagħhom li tant hu taʼ min jafdah. Huma jgħammru bħala merħla “maqtugħa għaliha ġol-​foresta, fil-​qalba taʼ ġnejna sabiħa,” mifrudin spiritwalment minn din id-​dinja li fiha l-​inkwiet u l-​perikli qegħdin dejjem jiżdiedu.​—Ġwanni 10:16; Dewteronomju 33:28; Ġeremija 49:31; Galatin 6:​16.

²² In-​nies t’Alla jgawdu l-​prosperità, bħalma bassar ukoll Mikea 7:14. B’referenza għannagħaġ, jew in-​nies, t’Alla, Mikea jistqarr: ‘Jalla jirgħu f’Basan u f’Gilgħad.’ Sewwasew bħalma n-​nagħaġ f’Basan u f’Gilgħad kienu jirgħu f’mergħat kollhom ħdura u bdew imorru ’l quddiem, hekk in-​nies t’Alla llum igawdu prosperità spiritwali—jerġaʼ barka oħra għal dawk li jimxu m’Alla bil-​modestja.—Numri 32:1; Dewteronomju 32:14.

23. Liema lezzjoni nistgħu nisiltu meta nikkunsidraw Mikea 7:​18, 19?

²³ F’Mikea 7:​18, 19, il-​profeta jenfasizza x-​xewqa taʼ Jehovah li jaħfer lil dawk li jindmu. Il-​vers 18 jistqarr li Jehovah qed “jaħfer id-​dnub” u “jneħħi l-​ħażen.” U skond vers 19, hu se “jarmi ħtijietna kollha f’qiegħ il-​baħar.” Liema lezzjoni nistgħu nisiltu minn dan? Nistgħu nistaqsu lilna nfusna jekk aħniex nimitaw lil Jehovah f’dan ir-​rigward. Naħfruhom aħna l-​iżbalji li oħrajn jagħmlu kontrina? Meta dawn jindmu u jipprovaw jirmedjaw, żgur li se nkunu rridu nimitaw lil Jehovah u nuru li aħna lesti li naħfru għalkollox u b’mod permanenti bħalma jagħmel hu.

24. Int kif ibbenefikajt mill-​profezija taʼ Mikea?

²⁴ Kif ibbenefikajna billi kkunsidrajna lprofezija taʼ Mikea? Ġejna mfakkrin li Jehovah jipprovdi tama vera għal dawk li jinġibdu lejh. (Mikea 2:​1-​13) Ġejna inkuraġġiti nagħmlu kulma nistgħu biex nippromwovu l-​qima vera sabiex inkunu nistgħu nimxu f’isem Alla għal dejjem. (Mikea 4:​1-4) U ġejna aċċertati li, huma x’inhuma ċ-​ċirkustanzi tagħna, ilkoll kemm aħna nistgħu nwettqu dak li Jehovah jeħtieġ minna. Iva, il-​profezija taʼ Mikea tassew tqawwina biex nimxu f’isem Jehovah.

Int Kif Twieġeb?

• Skond Mikea 6:8 (NW), Jehovah x’jeħtieġ minna?

• X’hemm bżonn li nagħmlu jekk irridu ‘neżerċitaw il-​ġustizzja’?

• Kif nistgħu nuru li ‘nħobbu l-​qalb tajba’?

• X’hemm involut f’li ‘nkunu modesti f’li nimxu m’Alla’?

[Stampi f’paġna 21]

Minkejja l-​kundizzjonijiet ħżiena li kienu jeżistu fi żmienu, Mikea għex fi qbil mal-​ħtiġijiet taʼ Jehovah. Anki int tistaʼ tagħmel dan

[Stampa f’paġna 23]

Eżerċita l-​ġustizzja billi tagħti xiehda lil nies minn kull qasam tal-​ħajja

[Stampi f’paġna 23]

Uri li tħobb il-​qalb tajba billi tara x’għandu bżonn ħaddieħor

[Stampa f’paġna 23]

Agħmel kulma tistaʼ filwaqt li bil-​modestja tagħraf il-​limitazzjonijiet tiegħek