Bijografija

It-​Tfittxija Tagħna għal Teżor Ġabitilna Rikkezzi Dejjiema

Kif rakkontata minn Dorothea Smith u Dora Ward

Liema tip taʼ teżor konna qed infittxu? Konna żewġ tfajliet b’xewqa kbira li nieħdu sehem fit-​twettiq tal-​kmand taʼ Ġesù: “Morru u agħmlu dixxipli min-​nies tal-​ġnus kollha.” (Mattew 28:19) Ħalli nispjegaw kif din it-​tfittxija ġabitilna rikkezzi dejjiema.

DOROTHEA: Jien twilidt fl-​1915, ftit wara li bdiet l-​ewwel gwerra dinjija, u kont iż-​żgħira fil-​familja tagħna. Konna ngħixu f’Howell, Michigan, l-​Istati Uniti. Missieri ma kienx reliġjuż, imma ommi kienet mara li tibżaʼ minn Alla. Hi pprovat tgħallimna nsegwu l-​Għaxar Kmandamenti, imma kienet tinkwieta li jien, ħija Willis, u oħti Viola ma konna nagħmlu parti minn ebda knisja.

Meta kelli 12-il sena, ommi ddeċidiet li jien niġi mgħammda bħala membru tal-​Knisja Presbiterjana. Jien niftakar sew il-​jum tal-​magħmudija tiegħi. Miegħi tgħammdu żewġ trabi, li kienu qed iżommuhom l-​ommijiet tagħhom. Veru ħassejtni umiljata li ġejt mgħammda flimkien mat-​trabi. Il-​qassis raxxax ftit qtar taʼ l-​ilma fuq rasi u qal ftit kliem minn taħt l-​ilsien li lanqas biss fhimt. Fil-​fatt, dawk iż-​żewġ trabi daqsi kienu jafu dwar il-​magħmudija!

Darba waħda fl-​1932, waqfet karozza quddiemna, u ommi marret tiftaħ il-​bieb. Kien hemm żewġ ġuvintur li kienu qed joffru kotba reliġjużi. Wieħed minnhom introduċa lilu nnifsu bħala Albert Schroeder. Hu wera lil ommi xi letteratura pubblikata mix-​Xhieda taʼ Ġeħova. Hi ħadet il-​kotba. Dawk il-​pubblikazzjonijiet għenuha biex taċċetta l-​verità mill-​Kelma t’Alla.

Tibda t-​Tfittxija għal Teżor

Maż-​żmien, mort noqgħod m’oħti f’Detroit. Hemmhekk iltqajt maʼ mara anzjana li kienet tiġi għand oħti biex tgħallimha l-​Bibbja. Dawk id-​diskussjonijiet fakkruni dwar programm fuq ir-​radju li kien jixxandar kull ġimgħa u li kont nisimgħu m’ommi meta kont għadni d-​dar magħha. Dak il-​programm kien jikkonsisti f’taħdita taʼ 15-il minuta fuq suġġett Bibliku mogħtija minn J. F. Rutherford, li dak iż-​żmien kien jieħu t-​tmexxija fost ix-​Xhieda taʼ Ġeħova. Fl-​1937 bdejna nissieħbu maʼ l-​ewwel kongregazzjoni tax-​Xhieda taʼ Ġeħova f’Detroit. Jien tgħammidt is-​sena taʼ wara.

Fil-bidu tas-​snin 40, tħabbar li x-​Xhieda taʼ Ġeħova kienu se jiftħu skola msejħa Gilgħad f’South Lansing, New York, biex jitħarrġu l-​missjunarji. Meta sirt naf li xi wħud mill-​gradwati taʼ din l-​iskola kienu se jiġu mistidnin jaqdu barra ’l pajjiż, jien ħsibt bejni u bejn ruħi, ‘Kemm nixtieq immur Gilgħad!’ Għamiltha l-​mira tiegħi li nattendi Gilgħad. Xi privileġġ ikun li tfittex f’postijiet oħrajn għal “teżori”​—jiġifieri, għal nies li jixtiequ jsiru dixxipli taʼ Ġesù Kristu!​—Ħaggaj 2:​6, 7.

Nilħaq il-​Mira Tiegħi bil-​Mod il-​Mod

F’April taʼ l-​1942, jien tlaqt ix-​xogħol li kelli u bdejt naqdi bħala pijuniera, jew evanġelizzatriċi full-time, f’Findlay, Ohio, flimkien maʼ grupp taʼ ħames aħwa nisa. Ma kienx hemm kongregazzjoni bi programm taʼ laqgħat normali, imma konna ninkuraġġixxu lil xulxin billi bħala grupp naqraw artikli mill-​pubblikazzjonijiet Kristjani tagħna. Matul l-​ewwel xahar tiegħi bħala pijuniera, qassamt 95 ktieb maʼ wħud interessati! Madwar sena u nofs wara, irċivejt inkarigu biex naqdi bħala pijuniera speċjali f’Chambersburg, Pennsylvania. Hemmhekk ngħaqadt maʼ grupp taʼ ħames pijunieri nisa oħra, inkluż Dora Ward, oħt Kristjana minn Iowa. Jien u Dora bdejna naħdmu flimkien bħala pijunieri. Aħna konna tgħammidna fl-​istess sena, u kellna l-​istess xewqa li nattendu l-​Iskola taʼ Gilgħad u naqdu barra ’l pajjiż bħala missjunarji.

Kmieni fl-​1944 wasal il-​jum importanti! It-​tnejn li aħna rċivejna stedina biex nattendu r-​rabaʼ klassi taʼ Gilgħad. Bdejna f’Awissu taʼ dik is-​sena. Imma qabel ma nkompli nirrakkonta, ħalli Dora tgħidilkom kif saret dik l-​oħt li akkumpanjatni għal ħafna snin fit-​tfittxija għal teżor.

Ħerqana biex Nibda l-​Għoti taʼ Xiehda Full-Time

DORA: Ommi kienet titlob biex issib il-​fehma tal-​Kelma t’Alla. Darba waħda l-​Ħadd, kont magħha meta smajna taħdita minn J. F. Rutherford fuq ir-​radju. Fit-​tmiem tat-​taħdita, ommi qalet, “Din hi l-​verità!” Ftit wara, bdejna nistudjaw il-​pubblikazzjonijiet tax-​Xhieda taʼ Ġeħova. Fl-​1935, meta kelli 12-il sena, attendejt taħdita tal-​magħmudija mogħtija minn wieħed mix-​Xhieda taʼ Ġeħova, u ħassejt xewqa kbira biex niddedika ħajti lil Ġeħova. Tliet snin wara, tgħammidt. Id-​dedikazzjoni u l-​magħmudija tiegħi għenuni nibqaʼ soda biex inżomm il-​miri tiegħi sew quddiem għajnejja matul is-​snin li kien baqagħli l-​iskola. Kont ħerqana biex nispiċċa l-​iskola ħalli nkun nistaʼ nibda naqdi bħala pijuniera.

F’dak iż-​żmien, il-​grupp taʼ Xhieda li konna nissieħbu miegħu kien jiltaqaʼ bħala kongregazzjoni f’Fort Dodge, Iowa. Kien jirrikjedi sforz kbir biex nattendu l-​laqgħat Kristjani. Lura f’dak iż-​żmien, l-​artikli taʼ studju fit-​Torri taʼ l-​Għassa ma kellhomx mistoqsijiet għad-​diskussjoni mal-​kongregazzjoni. Kull pubblikatur kien mitlub li jagħti mistoqsijiet preparati lill-​ħu li kien jikkonduċi l-​Istudju tat-​Torri taʼ l-​Għassa. Kull nhar taʼ Tnejn fil-​għaxija, jien u ommi konna nippreparaw mistoqsija għal kull paragrafu, u konna nagħtuhom lill-​ħu li jikkonduċi ħalli jkun jistaʼ jagħżel liema juża minnhom.

Minn żmien għal żmien, il-​kongregazzjoni tagħna kien ikollha żjara minn indokratur li jivvjaġġa. John Booth, wieħed minn dawn l-​aħwa, kien għenni nibda l-​ministeru minn bieb għal bieb meta kelli 12-il sena. Taʼ 17-il sena kont staqsejtu kif nimla applikazzjoni tal-​pijunieri, u hu għenni. Mur għidli li konna se nerġgħu niltaqgħu iktar tard fil-​ħajja u nsiru ħbieb għal għomorna!

Bħala pijuniera, ħdimt ħafna m’oħtna Dorothy Aronson, evanġelizzatriċi full-time li kienet 15-il sena akbar minni. Konna naħdmu flimkien bħala pijunieri sakemm hi ġiet mistiedna tattendi l-​ewwel klassi taʼ Gilgħad fl-​1943. Wara dan, jien bqajt naqdi bħala pijuniera waħdi.

L-​Oppożizzjoni Ma Jirnexxilhiex Twaqqafna

Is-​snin 40 kienu taʼ sfida għalina minħabba l-​atmosfera patrijottika li nħolqot mit-​tieni gwerra dinjija. Meta konna nippridkaw minn dar għal dar, taʼ spiss kienu jissottawna bil-​bajd jinten, bit-​tadam misjur, u xi drabi saħansitra bil-​ġebel! Kellna prova iktar serja meta darba konna qegħdin f’kantuniera taʼ triq nippreżentaw ir-​rivisti It-​Torri taʼ l-​Għassa u l-​Consolation (issa Awake!). Il-​pulizija, imxewxin minn opponenti reliġjużi, avviċinawna u heddew li jarrestawna jekk jerġgħu jarawna nippridkaw pubblikament.

M’għandniex xi ngħidu, aħna rrifjutajna li nieqfu nippridkaw, u għalhekk ħaduna l-​għassa tal-​pulizija għal interrogazzjoni. Wara li ħallewna nitilqu, erġajna morna fl-​istess kantuniera tat-​triq u bdejna noffru l-​istess rivisti. L-​aħwa rġiel responsabbli tawna l-​parir biex nużaw Isaija 61:​1, 2 biex niddefendu l-​waqfa tagħna. Darba waħda, meta avviċinani pulizija żagħżugħ, jien għedtlu l-​versi bl-​amment b’biżaʼ kbir fuqi. B’sorpriża, hu dar f’daqqa u telaq ’l hemm! Għalija kienu l-​anġli li pproteġewna.

Jum li Ma Ninsieh Qatt

Fl-​1941 kelli l-​privileġġ li nattendi konvenzjoni tax-​Xhieda taʼ Ġeħova li damet ħamest ijiem f’St. Louis, Missouri. Matul din il-​konvenzjoni, Ħuna Rutherford staqsa lit-​tfal kollha li kellhom bejn il-​5 u t-​18-il sena biex jinġabru fil-​parti prinċipali taʼ l-​istejdjum. Inġabru eluf taʼ tfal. Ħuna Rutherford sellmilna billi xejjer il-​maktur tiegħu. Aħna lkoll xejjirnielu lura. Wara li ta taħdita taʼ siegħa, hu qal: “Intom it-​tfal li qbiltu li tagħmlu r-​rieda t’Alla u li ħadtu l-​waqfa fuq in-​naħa tal-​gvern teokratiku tiegħu permezz taʼ Ġesù Kristu u għalhekk qbiltu li tobdu lil Alla u lis-​Sultan tiegħu, jekk jogħġobkom qumu bil-​wieqfa.” Il-​15,000 tifel u tifla qamu f’daqqa​—jien kont waħda minnhom! Il-​kelliemi żied: “Intom ilkoll li se tagħmlu dak kollu li tistgħu sabiex tgħidu lil oħrajn dwar is-​Saltna t’Alla u l-​barkiet li se ġġib, jekk jogħġobkom għidu Iva.” Aħna hekk għamilna, u faqqgħet ċapċipa kbira.

Imbagħad ħareġ il-​ktieb Children,a u kien hemm ringiela twila taʼ tfal u żgħażagħ mexjin lejn il-​platform, fejn Ħuna Rutherford ta lil kull wieħed minna kopja tal-​ktieb il-​ġdid. Kien tassew mument eċċitanti! Illum, ħafna minn dawk li rċivew ktieb f’din l-​okkażjoni għadhom qed jaqdu b’mod żeluż lil Ġeħova madwar id-​dinja, hekk kif jitkellmu dwar is-​Saltna t’Alla u s-​sewwa tiegħu.​—Salm 148:​12, 13.

Wara li qdejt bħala pijuniera għal tliet snin, kemm kont ferħana li rċivejt inkarigu bħala pijuniera speċjali f’Chambersburg! Hemmhekk iltqajt maʼ Dorothea, u malajr sirna ħbieb tal-​qalb. Bħala żgħażagħ, konna mimlijin entużjażmu u kellna ħafna enerġija. Konna ħerqanin biex inkabbru s-​sehem tagħna fix-​xogħol taʼ l-​ippridkar. Flimkien bdejna t-​tfittxija għal teżor li damet tul ħajjitna kollha.​—Salm 110:​3, Saydon.

Ftit xhur wara li bdejna naqdu bħala pijunieri speċjali, iltqajna m’Albert Mann, li kien gradwat taʼ l-​ewwel klassi taʼ Gilgħad. Kien wasal biex jitlaq għall-​inkarigu tiegħu f’pajjiż ieħor. Hu inkuraġġiena biex naċċettaw kwalunkwe inkarigu li stajna nirċievu f’pajjiż barrani.

Fl-​Iskola Flimkien

DORA U DOROTHEA: Immaġina kemm konna ferħanin meta bdejna t-​taħriġ tagħna bħala missjunarji! Fl-​ewwel jum taʼ l-​iskola, isimna ġie reġistrat minn Albert Schroeder, il-​ħu li kien qassam il-​ktieb Studies in the Scriptures m’omm Dorothea 12-il sena qabel. Kien hemm ukoll John Booth. Hu issa kien qed jieħu ħsieb il-​Kingdom Farm, fejn kien hemm l-​iskola. Iktar tard, iż-​żewġt irġiel qdew bħala membri tal-​Ġemgħa li Tiggverna tax-​Xhieda taʼ Ġeħova.

Fl-Iskola taʼ Gilgħad tgħallimna l-​veritajiet profondi tal-​Bibbja. Kien taħriġ eċċellenti. Kien hemm 104 studenti fil-​klassi tagħna, inkluż l-​ewwel student barrani li kien mill-​Messiku. Hu kien qed jipprova jtejjeb l-​Ingliż tiegħu filwaqt li aħna konna qed nipprovaw nitgħallmu l-​Ispanjol. Kemm konna eċċitati fil-​jum meta Ħuna Nathan H. Knorr qassam l-​inkarigi fejn konna sejrin naqdu aħna l-​istudenti! Il-​biċċa l-​kbira ġew inkarigati lejn l-​Amerika t’Isfel u l-​Amerika Ċentrali; l-​inkarigu tagħna kien iċ-​Ċili.

Infittxu għal Teżor fiċ-​Ċili

Sabiex inkunu nistgħu mmorru ċ-​Ċili kellna bżonn niksbu visa, u dan ħa daqsxejn taż-​żmien mhux ħażin. B’hekk, wara li ggradwajna f’Jannar taʼ l-​1945, qdejna bħala pijunieri f’Washington, D.C., għal sena u nofs. Meta rċivejna l-​visa tagħna, sirna parti minn grupp taʼ disaʼ missjunarji li tlaqna lejn iċ-​Ċili. Is-​sebgħa l-​oħra kienu minn klassijiet taʼ Gilgħad li saru qabel.

Ġew diversi aħwa rġiel Kristjani biex jilqgħuna f’Santiago, il-​belt kapitali. Wieħed minnhom kien Albert Mann, dak il-​gradwat taʼ Gilgħad li kien inkuraġġiena ftit snin qabel. Hu kien ġie ċ-​Ċili sena qabilna, flimkien maʼ Joseph Ferrari li kien mit-​tieni klassi taʼ Gilgħad. Kien hemm inqas minn 100 pubblikatur b’kollox fiċ-​Ċili meta wasalna aħna. Konna ħerqanin biex infittxu u nsibu iktar teżori​—nies taʼ qalb onesta​—fl-​inkarigu ġdid tagħna.

Ġejna inkarigati biex naqdu f’dar missjunarja f’Santiago. Kienet esperjenza ġdida għalina li ngħixu maʼ familja kbira taʼ missjunarji. Minbarra li kellna nqattgħu numru taʼ sigħat fix-​xogħol taʼ l-​ippridkar, il-​missjunarji kollha kellhom isajru darba f’ġimgħa għall-​familja kollha. Aħna kellna xi mumenti imbarazzanti. Darba waħda, ippreparajna xi gallettini għall-​kolazzjon għall-​familja tagħna li kellha ħafna ġuħ, imma meta ħriġna l-​gallettini mill-​forn, bdejna nxommu riħa xejn pjaċevoli. Konna użajna baking soda minflok baking powder! Xi ħadd kien poġġa l-​baking soda f’bott vojt tal-​baking powder.

Iżda, kienu iktar imbarazzanti l-​iżbalji li konna nieħdu waqt li konna qed nitgħallmu l-​Ispanjol. Konna nistudjaw il-​Bibbja maʼ familja kbira li kienet se twaqqaf l-​istudju minħabba li ma stajniex niftiehmu. Imma billi huma kienu jfittxu l-​iskritturi fil-​Bibbji tagħhom stess, xorta rnexxielhom jitgħallmu l-​verità, u ħamsa minnhom saru Xhieda. F’dawk is-​snin, ma kienx ikun hemm kors tal-​lingwa għall-​missjunarji ġodda. Aħna bdejna nieħdu sehem fix-​xogħol taʼ l-​ippridkar minnufih u pprovajna nitgħallmu l-​lingwa min-​nies li konna nagħtuhom xiehda.

Ikkonduċejna ħafna studji tal-​Bibbja, u xi wħud mill-​istudenti tagħna kienu jwieġbu mill-​ewwel. Oħrajn kienu jeħtieġu ħafna paċenzja. Teresa Tello, mara żagħżugħa, qagħdet tismaʼ l-​messaġġ tal-​verità u qaltilna, “Jekk jogħġobkom, erġgħu ejjew u għiduli iktar.” Morna 12-il darba u qatt ma sibnieha. Għaddew tliet snin. Imbagħad, attendejna assemblea li saret ġo teatru f’Santiago. Il-​Ħadd, hekk kif konna se nitilqu mill-​assemblea, smajna lil xi ħadd jgħajjat, “Senorita Dora, Senorita Dora!” Aħna dorna, u rajna lil Teresa. Hi kienet qed iżżur lil oħtha faċċata tat-​triq u ġiet lejn it-​teatru biex tara x’kien qed jiġri. Kemm fraħna li rġajna ltqajna magħha! Għamilna arranġamenti għal studju tal-​Bibbja, u ftit wara tgħammdet. Iktar tard saret pijuniera speċjali. Illum, xi 45 sena wara, Teresa għadha qed taqdi fis-​servizz full-time speċjali.​—Koħèlet 11:1.

Niskopru Teżori fir-​“Ramel”

Fl-​1959 ġejna inkarigati lejn Punta Arenas​—li tfisser “Il-​Ponta tar-​Ramel”​—fit-​tarfnett tal-​kosta fin-​nofsinhar taċ-​Ċili li hi twila 4,300 kilometru. Punta Arenas hija territorju mhux tas-​soltu. Matul ix-​xhur sħan tas-​sajf, il-​ġranet huma twal​—ix-​xemx iddum ma tinżel sal-​ħdax u nofs taʼ fil-​għaxija. Stajna nqattgħu ħafna ġranet fil-​ministeru imma mhux mingħajr ostakli, għax fis-​sajf ikun hemm ħafna rwiefen qawwijin mill-​Antartiku. Ix-​xhur tax-​xitwa huma kesħin, u l-​ġranet qosra.

Minkejja dawn l-​isfidi, Punta Arenas hija affaxxinanti. Matul is-​sajf, dejjem ikun hemm mewġ taʼ sħab tax-​xita fis-​sema li jiġi mill-​punent. Kultant, tagħmel ħalba xita qawwija li xxarrbek, imma mbagħad jiġi r-​riħ u jnixxfek. Hekk kif ix-​xemx tfiġġ minn ġos-​sħab tibda tidher qawsalla sabiħa. Xi drabi, qawsalla bħal din iddum sigħat sħaħ, daqqa tidher u daqqa ma tidhirx hekk kif ix-​xemx tiddi minn ġos-​sħab tax-​xita.​—Ġob 37:14.

Lura f’dak iż-​żmien, kien hemm ftit pubblikaturi f’Punta Arenas. Aħna l-​aħwa nisa kellna nikkonduċu l-​laqgħat fil-​kongregazzjoni żgħira li kien hemm. Ġeħova bierek l-​isforzi tagħna. Sebgħa u tletin sena wara, erġajna ġejna nżuru dan il-​post. X’sibna? Sitt kongregazzjonijiet li qed jiffjorixxu u tliet Swali tas-​Saltna sbieħ. Kemm fraħna li Ġeħova ppermettielna niskopru teżori spiritwali f’dawn il-​bajjiet bir-​ramel tan-​nofsinhar!​—Żakkarija 4:​10.

Iktar Teżori fil-​“Bajja l-​Wiesgħa”

Wara li qdejna għal tliet snin u nofs f’Punta Arenas, ġejna inkarigati naqdu fil-​belt tal-​port taʼ Valparaiso. Il-​belt fiha 41 għolja madwar bajja li tħares lejn l-​Oċean Paċifiku. Aħna kkonċentrajna l-​attivitajiet tagħna taʼ l-​ippridkar fuq waħda minn dawn l-​għoljiet, Playa Ancha, li tfisser “Il-​Bajja l-​Wiesgħa.” Matul is-​16-il sena li domna hemmhekk, rajna grupp taʼ żgħażagħ irġiel Kristjani jikbru spiritwalment sal-​punt li issa qed jaqdu bħala indokraturi li jivvjaġġaw u bħala anzjani Kristjani fil-​kongregazzjonijiet madwar iċ-​Ċili.

L-inkarigu missjunarju li jmiss tagħna kien Viña del Mar. Qdejna għal tliet snin u nofs hemmhekk sakemm seħħ terremot li kkaġuna ħsara lid-​dar missjunarja. Aħna rritornajna lejn Santiago, fejn konna bdejna s-​servizz missjunarju tagħna 40 sena qabel. L-​affarijiet kienu nbidlu. Inbnew faċilitajiet ġodda tal-​fergħa, u l-​bini tal-​fergħa li kien hemm qabel sar dar għall-​missjunarji kollha li baqgħu fil-​pajjiż. Iktar tard, dik id-​dar bdiet tintuża bħala post fejn issir l-​Iskola tat-​Taħriġ Ministerjali. F’dak iż-​żmien, Ġeħova reġaʼ wriena l-​qalb tajba bl-​imħabba tiegħu. Ħamsa minna l-​missjunarji li konna avanzati fl-​età ġejna mistidnin ngħixu f’Betel. Matul iż-​żmien li qdejna fiċ-​Ċili kellna 15-il inkarigu differenti. Rajna x-​xogħol jikber minn ftit inqas minn 100 pubblikatur għal xi 70,000! X’ferħ kien li nfittxu għat-​teżori fiċ-​Ċili għal 57 sena!

Inħossuna mberkin ħafna li Ġeħova ppermettielna nsibu daqstant nies​—tassew teżori​— li baqgħu jintużaw minn Ġeħova fl-​organizzazzjoni tiegħu. Ilna iktar minn 60 sena naqdu lil Ġeħova flimkien, u naqblu b’qalbna kollha mas-​sentimenti li esprima s-​Sultan David, li kiteb: “Kemm hu kbir il-​ġid tiegħek, Mulej, li inti rfajt għal min jibżaʼ minnek”!​—Salm 31:20 (31:​19, NW).

[Nota taʼ taħt]

[Stampi f’paġna 9]

Dorothea fl-​2002 u fix-​xogħol taʼ l-​ippridkar fl-​1943

[Stampa f’paġna 10]

Nieħu sehem fix-​xogħol fit-​toroq f’Fort Dodge, Iowa, fl-​1942

[Stampa f’paġna 10]

Dora, fl-​2002

[Stampa f’paġna 12]

Dorothea u Dora quddiem l-​ewwel dar missjunarja tagħhom fiċ-​Ċili, fl-​1946