‘Ġeħova Hu s-​Saħħa Tiegħi’

Kif rakkontata minn Joan Coville

Twilidt f’Lulju taʼ l-​1925 f’Huddersfield, l-​Ingilterra. Kont l-​unika tifla u saħħti kienet batuta. Fil-​fatt, missieri kien jgħidli, “Kulmeta jonfoħ ir-​riħ fuqek, timrad.” U milli jidher hekk kien!

META kont tifla, il-​membri tal-​kleru kienu jitolbu bil-​ħerqa għall-​paċi, imma meta faqqgħet it-​tieni gwerra dinjija, bdew jitolbu għar-​rebħa. Dan kien iħawwadni u qanqalli d-​dubji f’moħħi. Preċiż f’dak iż-​żmien ġiet għandna Annie Ratcliffe, l-​unika Xhud taʼ Ġeħova fl-​inħawi tagħna.

Niġi f’Kuntatt mal-​Verità

Annie ħallitilna l-​ktieb Salvation u stiednet lil ommi biex tattendi diskussjoni minn fuq il-​Bibbja li kienet se ssir fid-​dar t’Annie.a Ommi talbitni mmur magħha. Għadni niftakarha dik l-​ewwel diskussjoni. Kienet dwar il-​fidwa, u ħaġa taʼ l-​iskantament, dik id-​diskussjoni xejn ma ddejjaqt nismagħha. Fiha twieġbu ħafna mill-​mistoqsijiet li kelli. Il-​ġimgħa taʼ wara, erġajna attendejna. Dakinhar, ġiet spjegata l-​profezija taʼ Ġesù dwar is-​sinjal taʼ l-​aħħar jiem. Meta kkunsidrajna l-​kundizzjonijiet ħżiena tad-​dinja, jien u ommi indunajna minnufih li din kienet il-​verità. Dik il-​ġurnata stess, konna mistidnin biex immorru s-​Sala tas-​Saltna.

Fis-sala, iltqajt maʼ xi pijunieri żgħażagħ, u fosthom kien hemm Joyce Barber (issa Ellis), li għadha taqdi maʼ żewġha, Peter, fil-​Betel taʼ Londra. Ħsibt li kulħadd kellu jaqdi bħala pijunier. Għalhekk, mill-​ewwel bdejt inqattaʼ 60 siegħa fl-​ippridkar kull xahar, avolja kont għadni l-​iskola.

Ħames xhur wara, fil-​11 taʼ Frar, 1940, jien u ommi tgħammidna f’assemblea taż-​żona (li llum tissejjaħ l-​assemblea tas-​circuit) fi Bradford. Missieri ma kienx jopponi r-​reliġjon ġdida tagħna, imma hu qatt m’aċċetta l-​verità. Fiż-​żmien meta tgħammidt jien ġie introdott metodu ġdid li kien jinvolvi li noqogħdu fil-​kantuniera biex nagħtu xiehda. Jien kont nieħu sehem, u kont inġorr basket tar-​rivisti kif ukoll kartelluni. Darba waħda, is-​Sibt, ġejt assenjata biex noqgħod fl-​iktar parti li kienu jgħaddu nies minnha ħdejn il-​ħwienet. Kien għad għandi l-​biżaʼ mill-​bniedem, u ħaġa taʼ l-​iskantament donnu li sħabi kollha taʼ l-​iskola għaddew minn ħdejn il-​kantuniera fejn kont wieqfa jien!

Fl-1940, il-​kumpanija (kif kienet magħrufa dak iż-​żmien il-​kongregazzjoni) li konna nagħmlu parti minnha kellha bżonn tinqasam. Wara li nqsamna, kważi dawk kollha taʼ mpari kienu fil-​kumpanija l-​oħra. Jien mort nilmenta dwar dan mal-​qaddej tal-​kumpanija (li issa jissejjaħ l-​indokratur li jippresiedi). Hu qalli: “Jekk trid ħbieb żgħażagħ, oħroġ u sibhom fis-​servizz taʼ l-​għalqa.” U dan hu eżattament dak li għamilt! Ma tantx domt nistenna qabel ma ltqajt m’Elsie Noble. Hi aċċettat il-​verità u mbagħad saret ħabibti għal għomri.

Is-​Servizz taʼ Pijunier u l-​Barkiet li Jġib Miegħu

Wara li spiċċajt l-​iskola, mort naħdem m’accountant. Madankollu, il-​ferħ li kont nara fuq wiċċ il-​qaddejja full-time żiedli x-​xewqa tiegħi li naqdi lil Ġeħova bħala pijuniera. F’Mejju taʼ l-​1945, b’ferħ bdejt naqdi bħala pijuniera speċjali. Matul l-​ewwel ġurnata tiegħi bħala pijuniera, niżlet xita bil-​qliel il-​ġurnata kollha. Madankollu, tant kont ferħana li kont qiegħda fix-​xogħol taʼ l-​ippridkar li x-​xita lanqas biss tajt kasha. Il-​fatt li kont inkun kuljum barra u nagħmel l-​eżerċizzju regolarment fuq ir-​rota tiegħi fil-​ministeru kellu effett tajjeb fuq saħħti. Għalkemm qatt ma kont niżen iktar minn 42 kilogramma, qatt ma kelli għalfejn nieqaf milli nagħmel ix-​xogħol taʼ pijuniera. Matul is-​snin, esperjenzajt fil-​veru sens tal-​kelma li ‘Ġeħova hu s-​saħħa tiegħi.’—Salm 28:7.

Sabiex jinbdew kongregazzjonijiet ġodda, jien intbgħatt bħala pijuniera speċjali fi bliet fejn ma kienx hemm Xhieda. L-​ewwel qdejt tliet snin fl-​Ingilterra u mbagħad tliet snin fl-​Irlanda. Waqt li kont pijuniera f’Lisburn, l-​Irlanda, studjajt maʼ raġel li kien qassis u assistent fi knisja Protestanta. Hekk kif sar jaf il-​verità dwar xi duttrini bażiċi tal-​Bibbja, hu beda jaqsam mal-​kongregazzjoni tiegħu l-​għarfien li kien għadu kif kiseb. Xi wħud minnhom ilmentaw maʼ l-​awtoritajiet tal-​knisja, u m’għandniex xi ngħidu, hu kellu jagħti spjegazzjoni. Qalilhom li ħass li kien id-​dmir Kristjan tiegħu li jgħid lill-​merħla li hu kien għallimhom ħafna gideb. Għalkemm il-​familja tiegħu opponietu bl-​aħrax, hu ddedika ħajtu lil Ġeħova u qdieh fedelment sal-​mewt.

F’Larne, li kien it-​tieni inkarigu tiegħi bħala pijuniera fl-​Irlanda, qdejt għal sitt ġimgħat waħdi għax l-​oħt li kienet pijuniera miegħi kienet qed tattendi l-​Assemblea Theocracy’s Increase fi New York, fl-​1950. Dan kien żmien iebes għalija. Kemm xtaqt li kont f’dik l-​assemblea! Madankollu, matul dawk il-​ġimgħat kelli diversi esperjenzi inkuraġġanti fis-​servizz taʼ l-​għalqa. Iltqajt maʼ raġel anzjan li kien aċċetta waħda mill-​pubblikazzjonijiet tagħna iktar minn 20 sena qabel. Matul is-​snin, hu kien qraha kemm-il darba, tant li kien jafha kważi bl-​amment. Kemm hu u kemm ibnu u bintu aċċettaw il-​verità.

Nirċievi Taħriġ fl-​Iskola taʼ Gilegħad

Fl-​1951, ġejt mistiedna flimkien m’għaxar pijunieri oħrajn mill-​Ingilterra biex nattendi s-​17-il klassi taʼ l-​Iskola taʼ Gilegħad f’South Lansing, New York. Kemm ħadt gost bl-​istruzzjoni mill-​Bibbja li rċivejna matul dawk ix-​xhur! Dak iż-​żmien, l-​aħwa nisa kienu għadhom ma jinkitbux fl-​Iskola tal-​Ministeru Teokratiku fil-​kongregazzjonijiet lokali, imma f’Gilegħad aħna l-​aħwa nisa rċivejna inkarigi biex, bħala studenti, nagħtu taħditiet u rapporti. Kemm konna eċċitati! Matul l-​ewwel taħdita tiegħi, l-​id li kont qed inżomm in-​noti tiegħi biha tgħidx kemm bdiet titriegħed. L-​istruttur, Ħuna Maxwell Friend, biex jiċċajta qalli: “Mhux talli kont eċċitata fil-​bidu, bħalma jkunu l-​kelliema tajbin kollha, imma talli bqajt eċċitata sa l-​aħħar.” Matul il-​kors, ilkoll kemm aħna tejjibna l-​abbiltà tagħna biex nesprimu ruħna quddiem il-​klassi. Iż-​żmien tar u t-​taħriġ tagħna spiċċa, u aħna l-​gradwati ngħatajna l-​inkarigu biex naqdu f’għadd taʼ pajjiżi barranin. L-​inkarigu tiegħi kien it-​Tajlandja!

“Il-​Pajjiż tat-​Tbissim”

Jien inqisu bħala rigal mingħand Ġeħova l-​fatt li Astrid Anderson ġiet assenjata biex tkun il-​missjunarja li kellha taqdi miegħi fit-​Tajlandja. Domna sebaʼ ġimgħat fuq vapur tal-​merkanzija biex wasalna hemmhekk. Meta wasalna fil-​kapitali, Bangkok, sibna belt kbira bi swieq mimlijin attività u sistema taʼ kanali konnettjati maʼ xulxin li kienu jservu minflok toroq biex in-​nies jivvjaġġaw minnhom. Fl-​1952, kien hemm inqas minn 150 pubblikatur tas-​Saltna fit-​Tajlandja.

Meta rajna għall-​ewwel darba t-​Torri taʼ l-​Għassa bit-​Tajlandiż, bdejna ngħidu, ‘Kif qatt nistgħu nkunu kapaċi nitkellmu b’din il-​lingwa?’ Kienet speċjalment taʼ sfida biex ngħidu l-​kliem bit-​tonalità xierqa. Per eżempju, il-​kelma khaù li tingħad b’tonalità li tibda bl-​għoli u mbagħad titbaxxa tfisser “ross,” imma l-​istess kelma li tingħad b’leħen oħxon tfisser “aħbar.” Għalhekk, meta konna fis-​servizz taʼ l-​għalqa, konna qed ngħidu lin-​nies, “Ġibtlek ross tajjeb” minflok “aħbar tajba”! Imma bil-​mod il-​mod—u wara ħafna żbalji tad-​daħq—irnexxielna.

It-Tajlandiżi huma nies dħulin ħafna. Mhux taʼ b’xejn li t-​Tajlandja tissejjaħ il-​Pajjiż tat-​Tbissim. L-​ewwel inkarigu tagħna kien il-​belt taʼ Khorat (li issa hi magħrufa bħala Nakhon Ratchasima), fejn qdejna għal sentejn. Iktar tard ngħatajna l-​inkarigu fil-​belt taʼ Chiang Mai. Il-​biċċa l-​kbira mit-​Tajlandiżi huma Buddisti u m’humiex familjari mal-​Bibbja. F’Khorat, studjajt maʼ raġel li kien inkarigat mill-​uffiċċju tal-​posta. Iddiskutejna dwar il-​patrijarka Abraham. Peress li dan ir-​raġel kien diġà semaʼ l-​isem Abraham, hu beda jmejjel rasu b’entużjażmu biex jurina li kien jafu. Imma malajr indunajt li ma konniex qed nitkellmu dwar l-​istess Abraham. Dan ir-​raġel kellu f’moħħu lil Abraham Lincoln, li qabel kien president taʼ l-​Istati Uniti!

Konna nieħdu gost ngħallmu l-​Bibbja lit-​Tajlandiżi taʼ qalb onesta, imma fl-​istess ħin, it-​Tajlandiżi għallmuna kif inkunu ferħanin u ngħixu ħajja sempliċi. Din il-​lezzjoni kienet imprezzabbli, għax fl-​ewwel dar missjunarja f’Khorat, la kellna elettriku u lanqas ilma. F’inkarigi bħal dawn ‘tgħallimna s-​sigriet taʼ kif ikollna bl-​abbundanza u kif inkunu fil-​bżonn.’ Bħall-​appostlu Pawlu, esperjenzajna xi jfisser li ‘jkollna s-​saħħa permezz taʼ dak li jagħtina l-​qawwa.’—Flp. 4:12, 13.

Sieħeb Ġdid u Inkarigu Ġdid

Lura fl-​1945 żort Londra. Matul iż-​żjara tiegħi hemmhekk, żort il-​British Museum flimkien maʼ xi pijunieri u Beteliti oħrajn. Wieħed minnhom kien Allan Coville, li ftit taż-​żmien wara attenda l-​11-il klassi taʼ Gilegħad. Hu ġie assenjat biex imur Franza u mbagħad il-​Belġju.b Iktar tard, waqt li kont għadni naqdi bħala missjunarja fit-​Tajlandja, hu talabni biex niżżewġu, u jien aċċettajt il-​proposta tiegħu.

Iżżewwiġna fi Brussell, il-​Belġju, fid-​9 taʼ Lulju, 1955. Minn dejjem kont noħlom li nqattaʼ l-​qamar il-​għasel tiegħi f’Pariġi, u għalhekk Allan irranġa biex il-​ġimgħa taʼ wara nattendu assemblea hemmhekk. Madankollu, kif wasalna, Allan minnufih ġie mitlub biex jgħin bħala interpretu matul l-​assemblea kollha. Kuljum kellu jitlaq minn kmieni fil-​għodu, u konna nerġgħu lura lejn il-​post fejn konna qed noqogħdu tard bil-​lejl. Għalhekk, veru li l-​qamar il-​għasel tiegħi qattajtu Pariġi, imma lil Allan rajtu kważi dejjem mill-​bogħod—fuq il-​platform! Minkejja dan, xorta kont ferħana li nara lir-​raġel li kont għadni kemm iżżewwiġt jiġi użat biex jaqdi lill-​aħwa, u ma kelli ebda dubju f’moħħi li jekk Ġeħova jkun fiċ-​ċentru taż-​żwieġ tagħna, konna se nkunu verament henjin.

Iż-żwieġ ħadni wkoll f’territorju ġdid taʼ l-​ippridkar—il-​Belġju. Dak kollu li kont naf dwar il-​Belġju kien li dan intuża bħala post fejn ġew miġġildin il-​battalji f’diversi gwerer, imma ma domtx ma skoprejt li l-​biċċa l-​kbira mill-​Belġjani fir-​realtà huma nies li jħobbu l-​paċi. L-​inkarigu tiegħi kien ifisser ukoll li kelli nitgħallem il-​Franċiż, li hu mitkellem fin-​naħa t’isfel tal-​pajjiż.

Fl-1955, kien hemm madwar 4,500 pubblikatur fil-​Belġju. Għal kważi 50 sena, jien u Allan qdejna fil-​Betel u fix-​xogħol taʼ l-​ivvjaġġar. L-​ewwel sentejn u nofs, konna nivvjaġġaw bir-​rota, telgħin u neżlin l-​għoljiet, xemx u xita. Matul is-​snin, qattajna l-​lejl f’iktar minn 2,000 dar differenti taʼ Xhieda sħabna! Spiss iltqajt m’aħwa li ma kinux f’saħħithom fiżikament imma qdew lil Ġeħova bis-​saħħa kollha li kellhom. L-​eżempju tagħhom inkuraġġieni biex ma naqtax qalbi fis-​servizz tiegħi. Fl-​aħħar taʼ kull ġimgħa li nkunu qattajna nżuru lil xi kongregazzjoni, aħna dejjem konna nħossuna mibnijin. (Rum. 1:11, 12) Allan kien sieħeb fil-​veru sens tal-​kelma. Kemm huwa minnu l-​kliem t’Ekkleżjasti 4:9, 10: “Tnejn aħjar minn wieħed, . . . għax jekk wieħed minnhom jaqaʼ, l-​ieħor jistaʼ jqajjem lil sieħbu”!

Barkiet Minn Ħajja taʼ Servizz bis-​‘Saħħa taʼ Ġeħova’

Matul is-​snin, jien u Allan kellna ħafna esperjenzi henjin taʼ li ngħinu lil oħrajn biex jaqdu lil Ġeħova. Per eżempju, fl-​1983 żorna l-​kongregazzjoni Franċiża f’Antwerp, fejn qgħadna maʼ familja li kien qed joqgħod magħhom ukoll Benjamin Bandiwila, ħu żagħżugħ miz-​Zaire (illum ir-​Repubblika Demokratika tal-​Kongo). Benjamin kien mar il-​Belġju biex jikseb edukazzjoni iktar għolja. Hu qalilna, “Verament ngħir għall-​ħajja li għandkom, dedikata kompletament għas-​servizz taʼ Ġeħova.” Allan wieġbu: “Int tgħid li tgħir għalina; però qed tfittex karriera fid-​dinja. Ma taħsibx li din hi kontradizzjoni?” Dan il-​kumment sinċier ġiegħel lil Benjamin jaħseb dwar ħajtu. Iktar tard meta mar lura z-​Zaire, hu beda jaqdi bħala pijunier, u fil-​preżent qed jaqdi bħala membru tal-​Kumitat tal-​Fergħa.

Fl-1999, għamilt operazzjoni biex inneħħi ulċera mill-​esofagu (il-kanal taʼ l-​ikel mill-​ħalq għall-​istonku). Minn dakinhar bdejt niżen biss 30 kilogramma. Jien tassew ‘reċipjent tal-​fuħħar’ fraġli. Madankollu, inħossni grata li Ġeħova tani “l-​qawwa iktar min-​normal.” Wara l-​operazzjoni, hu għamilha possibbli biex nerġaʼ nakkumpanja lil Allan fix-​xogħol taʼ l-​ivvjaġġar. (2 Kor. 4:7) Imbagħad, f’Marzu tas-​sena 2004, Allan miet waqt li kien rieqed. Tgħidx kemm nimmissjah, imma l-​fatt li naf li qiegħed fil-​memorja taʼ Ġeħova jfarraġni.

Illum, fl-​età taʼ 83 sena nħares lura lejn it-​63 sena li qattajt fis-​servizz full-time. Għadni attiva fil-​ministeru u qed nikkonduċi studju tal-​Bibbja fid-​dar u kuljum nuża l-​opportunitajiet biex nitkellem dwar l-​iskop meraviljuż taʼ Ġeħova. Kultant, ngħid, ‘Kif kienet tkun ħajti kieku ma bdejtx naqdi bħala pijuniera fl-​1945?’ Lura dak iż-​żmien, is-​saħħa batuta li kelli kienet skuża valida biex ma nsirx pijuniera. Iżda, kemm jien grata li bdejt naqdi bħala pijuniera meta kont għadni żagħżugħa! Jien kelli l-​privileġġ li nesperjenza personalment li jekk inpoġġu lil Ġeħova l-​ewwel, hu se jkun is-​saħħa tagħna.

[Noti taʼ taħt]

[Stampa f’paġna 18]

Mal-​missjunarja li qdiet miegħi, Astrid Anderson (lemin)

[Stampa f’paġna 18]

Fix-​xogħol taʼ l-​ivvjaġġar mar-​raġel tiegħi, fl-​1956

[Stampa f’paġna 20]

M’Allan fis-​sena 2000