Ibbenefika Mill-​Iskola Tal-​Ministeru Teokratiku Għall-​1996​—It-​2 Parti

¹ Ftit wara l-​inawgurazzjoni taʼ L-​Iskola Tal-​Ministeru Teokratiku fl-​1943, waħda mill-​fergħat tas-​Soċjetà rrapportat: “Dan l-​arranġament tajjeb ħafna rnexxielu f’qasir żmien jgħin lil ħafna aħwa rġiel li kienu mmaġinaw li qatt ma se jkunu kelliema pubbliċi biex isiru effiċjenti ħafna fuq il-​platform u iktar effettivi fl-​għalqa.” L-​iskola tkompli tipprovdi taħriġ eċċellenti, li lkoll kemm aħna għandna bżonn.

² Qari Tal-​Bibbja: Dawk li jiġu mogħtijin sehem bħala kelliema m’humiex l-​uniċi li jibbenefikaw mill-​iskola. Attwalment, ilkoll kemm aħna għandna inkarigu​—il-​qari tal-​Bibbja kull ġimgħa. L-​iskeda taʼ l-​iskola turi liema kapitli tal-​Bibbja għandhom jinqraw kull ġimgħa. Hemm ħafna tfakkiriet Skritturali li jenfasizzaw l-​importanza tal-​qari tal-​Bibbja kuljum. (Ġoż. 1:​8; Salm. 1:​2; Atti 17:11) Il-​qari tal-​Bibbja huwa essenzjali għal saħħa spiritwali tajba; isostni l-​moħħ u l-​qalb. Jekk naqraw il-​Bibbja minn taʼ l-​inqas ħames minuti kuljum, se jirnexxilna nżommu maʼ l-​iskeda. Fl-​aħħar tas-​sena, inkunu qrajna ’l fuq minn 150 kapitlu tal-​Kelma t’Alla. Jekk inżommu Bibbja fil-​qrib, għandu jirnexxilna naqraw ftit minnha kuljum.

³ Taħdita Taʼ Istruzzjoni: Sabiex iqanqal lill-​aħwa għal servizz leali u żeluż, il-​kelliemi li jagħti t-​taħdita taʼ istruzzjoni jeħtieġ li juża metodi taʼ tagħlim tajbin, li jipprovdi fehma, u li jibni apprezzament lejn Jehovah, lejn il-​Kelma tiegħu, u lejn l-​organizzazzjoni tiegħu. L-​anzjani u l-​qaddejja ministerjali jistgħu jwettqu dan billi jippreparaw tajjeb, jibnu t-​taħdita tagħhom madwar it-​tema, jitkellmu b’konvinzjoni, u jagħmlu l-​materjal ħaj. (Eb. 4:12) Huwa importanti li l-​kelliemi jżomm mal-​ħin mogħti lilu. Il-​ktieb “All Scripture” huwa miżgħud b’testi mill-​Bibbja u jippreżenta ammont kbir taʼ materjal Skritturali eċċitanti li nistgħu nibbenefikaw minnu spiritwalment. Il-​ktieb Proclaimers fih l-​istorja taż-​żmien modern taʼ l-​organizzazzjoni viżibbli taʼ Jehovah u jirrakkonta ġrajjiet fil-​ħajjiet taʼ nies li għexu verament u li wrew fidi, żelu, devozzjoni, u mħabba. Hemm ħafna x’nistgħu nitgħallmu dwar il-​wirt teokratiku tagħna u l-​mod kif Jehovah bierek lin-​nies tiegħu fiż-​żminijiet moderni.

⁴ Punti Prinċipali Mill-​Bibbja: L-​aħwa rġiel mogħtijin dan l-​inkarigu għandhom jagħżlu versi speċifiċi li jistgħu jiġu applikati b’mod prattiku għall-​benefiċċju tal-​kongregazzjoni. Dan jirrikjedi li jaqraw il-​kapitli mogħtijin, jimmeditaw fuqhom, u jagħmlu tfittxija fuq il-​versi magħżulin biex isibu punti li jiċċaraw it-​tifsir taʼ dawk l-​iskritturi. Fuq wara tal-​Watch Tower Publica­tions Index, hemm l-​“iScripture Index,” li jistaʼ jkun t’għajnuna biex wieħed isib informazzjoni dwar versi speċifiċi mill-​Bibbja. Aħwa rġiel li jkollhom din il-​parti għandhom jużaw l-​għaqal u jevitaw li jdaħħlu materjal li m’għandux x’jaqsam. M’għandhomx jippreparaw iktar materjal milli jistaʼ jiġi mgħoddi b’mod raġonevoli f’sitt minuti.

⁵ Ilkoll kemm aħna nistgħu nibbenefikaw mill-​Iskola Tal-​Ministeru Teokratiku. Tistaʼ tgħinna nitjiebu fl-​abbiltà tagħna li nitkellmu u ngħallmu. Li nieħdu vantaġġ sħiħ minn dan il-​provvediment żgur se jgħinna nagħmlu ‘l-​mixi ’l quddiem tagħna jidher mill-​persuni kollha.’​—1 Tim. 4:15.