X’Nistaʼ Nagħmel Biex Xi Ħadd Jagħti Widen?

¹ Fil-​belt taʼ Filippi, “ċerta mara jisimha Lidja, bejjiegħa tal-​vjola, . . . kienet qiegħda tagħti widen, u Jehovah fetħilha qalbha beraħ biex toqgħod attenta għall-​affarijiet li kienu qegħdin jintqalu minn Pawlu.” (Atti 16:14) X’jgħallimna dan ir-​rakkont? Meta wieħed jagħti widen ikun qiegħed jiftaħ it-​triq għalih biex jitgħallem il-​verità. Is-​suċċess tagħna f’li naqsmu l-​messaġġ tas-​Saltna jiddependi primarjament fuq kemm jixtieq jagħti widen l-​inkwilin. Ladarba xi ħadd jagħti widen, huwa relattivament faċli li nippreżentaw il-​messaġġ tagħna. Imma li nagħmlu lil xi ħadd jagħti widen jistaʼ jkun taʼ sfida. X’nistgħu nagħmlu?

² Qabel nieħdu sehem fis-​servizz, għandna niflu d-​dehra tagħna u t-​tagħmir li se nkunu sejrin nużaw. Għala? In-​nies huma iktar inklinati li jagħtu widen lil xi ħadd li jġib ruħu b’dinjità. Lebsin aħna kif jixraq imma b’modestà? Għalkemm l-​iżmattar jistaʼ jkun popolari fid-​dinja, aħna nevitaw traskuraġni bħal din għax aħna ministri li nirrappreżentaw lis-​Saltna t’Alla. Id-​dehra nadifa u pulita tagħna tagħti testimonjanza favorevoli għall-​messaġġ tas-​Saltna li aħna nxandru.

³ Kun Amikevoli u Rispettabbli: Minkejja l-​attitudnijiet li dejjem jinbidlu tal-​lum, ħafna nies għad għandhom rispett lejn il-​Bibbja u jieħdu pjaċir b’konversazzjoni rispettabbli u amikevoli dwar dak li fiha l-​Bibbja. Tbissima kordjali u ġenwina tistaʼ sserraħ moħħ l-​inkwilin u tiftaħ it-​triq għal diskussjoni sabiħa. Is-​sinċerità u l-​manjieri tajbin tagħna għandhom jidhru wkoll fil-​kliem u fil-​kondotta tagħna, li jinkludi li nisimgħu bir-​rispett kollu dak li jixtieq jgħid l-​inkwilin.

⁴ L-​iskop tagħna huwa li naqsmu t-​tama tal-​Bibbja m’oħrajn. B’dan f’moħħna, għandna nkunu ċerti li l-​kliem tagħna jkun jattira, mhux kuntrarju jew taʼ sfida. M’hemmx għalfejn naħlu ħin nargumentaw maʼ xi ħadd li jidher ċar li jopponi. (2 Tim. 2:​23-​25) Nistgħu nagħżlu minn varjetà kbira taʼ preżentazzjonijiet inkuraġġanti u f’waqthom ipprovduti lilna f’Il-Ministeru Tas-​Saltna u l-​ktejjeb “Kif Nibdew u Nkomplu Diskussjonijiet Mill-​Bibbja.” M’għandniex xi ngħidu, irridu nippreparaw dawn sewwa biex inkunu nistgħu nitkellmu b’manjiera kordjali u konvinċenti.​—1 Piet. 3:​15.

⁵ Wara ż-​żjara tagħna, ftit inkwilini jirnexxilhom jiftakru eżattament dak li għedna. Madankollu, kważi lkoll kemm huma jistgħu jiftakru l-​manjiera li biha tkellimna. Qatt m’għandna nissottovalutaw il-​qawwa tat-​tjieba u l-​qalb tajba. Ċertament li fit-​territorju tagħna hemm ħafna nies bħal ngħaġ li se jagħtu widen għall-​verità bħalma għamlet Lidja fl-​ewwel seklu. Li nagħtu attenzjoni bir-​reqqa lejn id-​dehra tagħna u lejn il-​mod taʼ kif nitkellmu jistaʼ jinkuraġġixxi lil uħud sinċieri biex jagħtu widen għall-​Kelma t’Alla u jilqgħuha b’mod favorevoli.​—Mark 4:20.