Kaxxa għall-Mistoqsija
◼ X’inhu l-użu xieraq tat-termini “ħu” u “oħt”?
Meta wżati fis-sens litterali, it-termini “ħu” u “oħt” jirreferu għal individwi li għandhom l-istess ġenituri. Din ir-relazzjoni naturali ġeneralment toħloq ġibda kordjali, u r-rabta mill-qrib li dawn l-individwi jesperjenzaw hija msaħħa iktar b’rabtiet soċjali, ambjentali, u emozzjonali.
Ġesù għallem lid-dixxipli tiegħu biex jindirizzaw lil Jehovah fit-talb bħala “Missierna.” L-użu taʼ dik l-espressjoni timplika li, bħala Kristjani, aħna lkoll parti minn ċirku taʼ familja magħquda fejn ingawdu relazzjoni spiritwali għanja. Dan ġie enfasizzat iktar minn Ġesù meta qal lis-segwaċi tiegħu li “intom ilkoll aħwa.”—Matt. 6:9; 23:8.
Minħabba r-rabtiet spiritwali mill-qrib tagħna ġewwa l-familja t’Alla, aħna nindirizzaw wieħed lill-ieħor bħala “Ħuna” u “Oħtna,” partikolarment fil-laqgħat tal-kongregazzjoni. Matul dawn l-okkażjonijiet spiritwali, dak li jkun qiegħed jippresiedi l-laqgħa jirrikonoxxi individwi mgħammdin billi juża l-espressjoni “ħuna” jew “oħtna” segwit mill-kunjom taʼ dak li jkun qiegħed jiġi indirizzat.
Xi ngħidu jekk persuna mhux mgħammda tixtieq tieħu sehem fil-laqgħat? Meta individwu jkun ilu assoċjat man-nies taʼ Jehovah għal xi żmien u qiegħed joqrob id-dedikazzjoni, billi jikkunsidra lilu nnifsu bħala wieħed mix-Xhieda taʼ Jehovah, ma jkun hemm l-ebda oġġezzjoni jekk qabel il-kunjom jintqalu l-kelmiet “Ħuna” jew “Oħtna.” Dan ikun speċjalment veru jekk l-individwu jkun sar pubblikatur mhux mgħammed.
Mill-banda l-oħra, persuni interessati li għadhom kemm bdew jattendu l-laqgħat tagħna għadhom ma ħadux il-passi li jkunu jidentifikawhom bħala parti mill-familja t’Alla. Dawn l-individwi ma jiġux indirizzati bħala “Ħuna” jew “Oħtna,” peress li r-relazzjoni spiritwali tal-familja t’Alla ma teżistix fil-każ tagħhom. Mela matul il-laqgħat, aħna nindirizzawhom formalment, billi nużaw titlu bħal “Sur” maʼ kunjomhom.
Il-fatt li nużaw l-espressjonijiet “ħu” u “oħt” fil-laqgħat tal-kongregazzjoni tagħna jindika għaqda li hija ħafna iktar mill-qrib u ħafna iktar prezzjuża milli kieku nużaw l-ewwel isem. Dan ifakkarna fir-relazzjoni mbierka ħafna li ngawdu bħala familja spiritwali taħt il-Missier wieħed, Alla Jehovah. Niġu mfakkrin ukoll dwar l-imħabba profonda u l-affezzjoni li għandna lejn xulxin.—Ef. 2:19; 1 Piet. 3:8.