Kun Taʼ Eżempju Fil-Kliem u Fil-Kondotta
1 L-appostlu Pawlu ħeġġeġ lil Timotju biex ikun taʼ eżempju fil-kliem u fil-kondotta. (1 Tim. 4:12) Aħna wkoll għandu jkollna diskors u kondotta eżemplari, speċjalment meta nieħdu sehem fil-ministeru, għax li nagħmlu hekk jistaʼ jiddetermina jekk nilħqux il-qalb taʼ dawk li niltaqgħu magħhom jew le.
2 Jeħtieġ li nuru l-aspetti kollha tal-manjieri tajbin, inklużi l-kortesija, il-konsiderazzjoni, il-qalb tajba, l-edukazzjoni, u t-tattika. Billi nirriflettu dawn il-kwalitajiet, nuru li aħna konxji taʼ kif l-azzjonijiet tagħna jeffettwaw is-sentimenti t’oħrajn. Il-manjieri tajbin fil-ministeru jistgħu jiġu mxebbhin mal-ħwawar, li jintużaw biex itejbu t-togħma taʼ l-ikel. Mingħajrhom, ikel bnin jistaʼ jsir bla togħma u bla gost. Li nonqsu li nuru manjieri tajbin meta nittrattaw m’oħrajn jistaʼ jkollu effett simili.—Kol. 4:6.
3 Kun Taʼ Eżempju Fil-Kliem: Tbissima dħulija u tislima mill-qalb huma elementi vitali fil-preżentazzjoni tagħna taʼ l-aħbar tajba. Meta nħawru l-introduzzjoni tagħna bis-sinċerità u bil-kordjalità, nuru lill-inkwilin li aħna ġenwinament interessati fih. Meta jitkellem, agħti widen bir-reqqa u uri rispett xieraq għall-opinjoni tiegħu. Meta titkellem int, agħmel hekk bit-tattika u bil-ħlewwa.—Qabbel Atti 6:8.
4 Xi kultant niltaqgħu maʼ xi ħadd li jistaʼ ma jkunx dħuli, saħansitra ostili. Kif għandna nirreaġixxu? Pietru ħeġġiġna biex nitkellmu b’mod li nuru ‘ħlewwa u rispett profond.’ (1 Piet. 3:15; Rum. 12:17, 18) Ġesù qal li jekk inkwilin jiċħad bir-rabja l-messaġġ tas-Saltna, għandna sempliċement ‘infarfru t-trab minn maʼ saqajna.’ (Matt. 10:14) Jekk aħna nuru manjieri eżemplari taħt ċirkostanzi bħal dawn, dan jistaʼ eventwalment irattab il-qalb taʼ dak li jopponi.
5 Kun Taʼ Eżempju Fil-Kondotta: Waqt li nkunu qegħdin nippridkaw l-aħbar tajba f’toroq mimlijin nies u f’postijiet pubbliċi, jeħtieġ li nkunu konsiderevoli, ma ngħajtux jew niffittaw, u m’għandniex nimblokkaw lin-nies li jkunu għaddejjin. Meta nkunu fid-djar taʼ wħud li juru interess, irridu nġibu ruħna sew u naġixxu taʼ mistednin grati, billi nuru apprezzament għall-ospitalità tagħhom. It-tfal li jkunu magħna jridu juru rispett lejn l-inkwilin u lejn il-propjetà tiegħu u għandhom iġibu ruħhom sew u joqogħdu attenti meta nkunu qegħdin nitkellmu. Jekk it-tfal ma joqogħdux kwieti, dan se jħalli impressjoni ħażina.—Prov. 29:15.
6 Id-dehra persunali tagħna għandha tagħmilha ovvja lil oħrajn li aħna ministri tal-Kelma t’Alla. Fl-ilbies u l-maxta tagħna, m’għandna nkunu la traskurati u mħabblin u lanqas bit-tlellix u lussu żejjed. Id-dehra tagħna għandha dejjem tkun denja taʼ l-aħbar tajba. (Qabbel Filippin 1:27.) Billi nagħtu attenzjoni bir-reqqa lejn id-dehra u t-tagħmir tagħna, ma nkunux il-kawża taʼ li nfixklu lil oħrajn jew li nġagħluhom isibu xi difett fil-ministeru tagħna. (2 Kor. 6:3, 4) Kliemna u l-kondotta eżemplari tagħna jżidu kwalità li togħġob lill-messaġġ tas-Saltna, u b’hekk iġibu unur lil Jehovah.—1 Piet. 2:12.