Kaxxa għall-Mistoqsija
◼ X’għandu jsir meta jseħħ diżastru li jeffettwa direttament lil ħutna?
Jekk Iseħħ Diżastru Fl-Inħawi Fejn Toqgħod: Titlifx rasek. Ibqaʼ kalm, u ikkonċentra fuq dak li hu verament taʼ valur—il-ħajja, u mhux x’tippossiedi. Ħu ħsieb il-bżonnijiet fiżiċi immedjati tal-familja tiegħek. Imbagħad għarraf lill-anzjani biċ-ċirkostanzi tagħkom u fejn tinsabu fil-preżent.
L-anzjani u l-qaddejja ministerjali għandhom irwol kruċjali f’li jipprovdu għajnuna. Jekk tingħata twissija bil-quddiem taʼ xi diżastru, bħalma jiġri f’xi maltempati kbar, dawn l-aħwa għandhom ikunu ċerti li kulħadd qiegħed f’post ’il bogħod mill-periklu u, jekk jippermetti l-ħin, għandhom jiksbu u jqassmu xi provisti li jkunu meħtiġin.
Wara dan, dawk li jikkonduċu l-istudju tal-ktieb għandhom jagħmlu kuntatt maʼ kull familja u jiċċekkjaw li kollox sew. L-indokratur li jippresiedi jew xi anzjan ieħor għandu jiġi mgħarraf bis-sitwazzjoni taʼ kull familja, anki jekk kollox hu sew. Jekk xi ħadd weġġaʼ, l-anzjani għandhom jipprovaw jirranġaw għal kura medika. Għandhom jipprovdu wkoll xi affarijiet materjali bħal ikel, ilbies, kenn, jew xi provisti tad-dar li jkun hemm bżonn. (Ġwn. 13:35; Gal. 6:10) L-anzjani lokali għandhom jagħtu appoġġ spiritwali u emozzjonali lill-kongregazzjoni u għandhom jirranġaw kemm jistaʼ jkun malajr biex jerġgħu jibdew il-laqgħat tal-kongregazzjoni. Wara li ssir stima bir-reqqa, wieħed mill-anzjani għandu jikkuntattja lill-indokratur tas-circuit f’isem il-ġemgħa taʼ l-anzjani biex jinformah b’xi korrimenti, b’xi ħsara lis-Sala tas-Saltna, jew ħsara lid-djar taʼ l-aħwa, kif ukoll b’xi bżonnijiet speċjali. L-indokratur tas-circuit għandu mbagħad iċempel lill-uffiċċju tal-fergħa b’rapport dwar is-sitwazzjoni. L-uffiċċju tal-fergħa mbagħad jirranġa għal miżuri t’għajnuna fuq skala kbira skond ma jkun hemm bżonn.
Jekk Iseħħ Diżastru X’Imkien Ieħor: Ftakar fl-aħwa rġiel u nisa fit-talb tiegħek. (2 Kor. 1:8-11) Jekk tixtieq tipprovdi għajnuna monetarja, tistaʼ tibgħat id-donazzjonijiet tiegħek lis-Soċjetà, fejn jitwarrab fond għall-għajnuna għal dan l-għan. L-indirizz huwa: Watch Tower, The Ridgeway, London NW7 1RN. (Atti 2:44, 45; 1 Kor. 16:1-3; 2 Kor. 9:5-7; ara l-Watchtower taʼ l-1 taʼ Diċembru, 1985, paġni 20-2.) Tibgħatx xi affarijiet jew provisti fejn seħħ id-diżastru sakemm dan m’huwiex mitlub b’mod speċifiku mill-aħwa inkarigati. Dan se jassigura li jkun hemm sforz biex tingħata l-għajnuna bl-ordni u tqassim kif jixraq t’affarijiet. (1 Kor. 14:40) Jekk jogħġobkom iċċemplux lis-Soċjetà għalxejn, għax dan jistaʼ jimblokka l-linji tat-telefon li jkunu meħtiġin biex isir kuntatt maʼ l-inħawi fejn seħħ id-diżastru.
Wara li jsir stħarriġ adegwat, is-Soċjetà tiddetermina jekk għandux jiġi fformat kumitat għall-għajnuna. Se jiġu informati l-aħwa rġiel responsabbli. Kulħadd għandu jikkopera maʼ l-anzjani li jkunu qegħdin jieħdu t-tmexxija sabiex jintlaħqu b’mod adegwat il-bżonnijiet kritiċi taʼ l-aħwa kollha.—Ara Jehovah’s Witnesses—Proclaimers of God’s Kingdom, paġni 310-15.