Nagħtu Xiehda Lil Nies Taʼ Kull Lingwa U Reliġjon

¹ Fl-​ewwel seklu l-​Kristjani taw xiehda żeluża lil nies li kienu jitkellmu b’lingwi oħrajn u li kellhom reliġjonijiet differenti. B’riżultat taʼ dan, “sas-​sena 100 x’aktarx li kull provinċja li kienet tmiss mal-​Mediterran kien fiha komunità Kristjana.”​—History of the Middle Ages.

² Hawn Malta, ħafna nies jitkellmu lingwi oħrajn minbarra l-​Malti. Hawn ħafna negozjanti, ħaddiema u turisti barranin. Xi wħud li jipprattikaw diversi reliġjonijiet mhux Kristjani immigraw hawnhekk, inklużi xi wħud li huma Buddisti, Ħindu, Lhud u Musulmani. Minħabba din il-​varjetà taʼ lingwi u reliġjonijiet, hija taʼ sfida mhux ħażin li nkunu nafu nkellmu u nagħtu xiehda lil dawn in-​nies kollha meta niltaqgħu magħhom. Fil-​fatt, jistaʼ jkollna territorju missjunarju fil-​lokalità tagħna stess. Kif nistgħu nsegwu l-​kmandi taʼ Ġesù ‘biex inxandru lill-​poplu u nixhdu’ bir-​reqqa lil nies taʼ kull lingwa u reliġjon?​—Atti 10:​42.

Nagħtu Xiehda lil Nies li Jitkellmu b’Lingwa Oħra

³ Żjieda kbira fil-​pubblikaturi ġodda ġejja minn fost il-​popolazzjoni li titkellem b’lingwi barranin f’ħafna pajjiżi tad-​dinja. Fil-​Gran Britannja ġew stabbiliti kongregazzjonijiet f’16-il lingwa barranija, u hemm gruppi f’7 lingwi oħrajn. Madankollu, għadu jistaʼ jitwettaq iktar kemm fil-​Gran Britannja u kemm f’Malta.

⁴ Nissuperaw l-​Ostaklu tal-​Lingwa: Ma hemm l-​ebda dubju li ħafna nies jitgħallmu ħafna iktar malajr u jifhmu iktar fil-​fond meta jiġu mgħallmin f’ilsien pajjiżhom. “Minħabba l-​Evanġelju” u sabiex huma ‘jkollhom sehem minnu’ maʼ oħrajn, ħafna aħwa rġiel u nisa tgħallmu lingwa oħra. (1 Kor. 9:23) Għalkemm waħda oħt li titkellem bl-​Ingliż kienet ilha għal snin sħaħ tagħti r-​rivisti lil waħda mara li titkellem biċ-​Ċiniż, din irrifjutat li tistudja l-​Bibbja sakemm waħda oħt oħra, li kienet qiegħda titgħallem iċ-​Ċiniż, offritilha ktieb f’dik il-​lingwa. Mill-​ewwel ġie aċċettat flimkien maʼ studju. Dak li għamel differenza kien l-​isforz tat-​tieni oħt biex titkellem ftit kliem fil-​lingwa tal-​mara stess.​—Qabbel Atti 22:2.

⁵ Kien għal din ir-​raġuni tajba li It-​Torri taʼ l-​Għassa taʼ l-​1 taʼ Frar, 1993, jagħmel dan il-​kumment: “It-​tagħlim taʼ lingwa barranija . . . mhux biss jiżviluppa l-​kapaċità mentali taż-​żgħażagħ imma wkoll jagħmilhom iktar utli għall-​organizzazzjoni taʼ Jehovah.” Ħafna membri tal-​familja Betel daħlu għall-​isfida li jitgħallmu lingwa ġdida. B’dan il-​mod, aħwa rġiel kienu taʼ għajnuna partikulari f’kongregazzjonijiet fejn huma meħtiġin biex jieħdu t-​tmexxija. Jekk taf xi lingwa oħra jew jekk int lest li titgħallem, int ukoll għandek mnejn tkun tistaʼ tagħti għajnuna lil xi kongregazzjoni jew grupp taʼ lingwa barranija.​—Mt. 9:​37, 38.

⁶ Wieħed ħu fi Florida li tgħallem il-​Vjetnamiż qabel ma daħal fil-​verità, issa qed isib ferħ kbir f’li jaqsam l-​aħbar tajba maʼ nies li jitkellmu l-​Vjetnamiż. Biex jagħmel lilu nnifsu iktar disponibbli li juża l-​għarfien tiegħu taʼ dik il-​lingwa għall-​għoti taʼ xiehda, flimkien mal-​familja tiegħu vvjaġġa n-​naħa l-​oħra tal-​pajjiż lejn fejn il-​bżonn huwa akbar fil-​qasam Vjetnamiż. Minn mindu mar joqgħod hemm, qiegħed ikollu suċċess kbir f’li jistudja l-​Bibbja maʼ ħafna nies mill-​Vjetnam.

⁷ Waħda pijuniera f’Kalifornja kienet tiltaqaʼ maʼ diversi nies torox fit-​territorju tagħha. Hija talbet lil Jehovah biex jgħinha ssib lil xi ħadd li jkun jistaʼ jgħallimha tikkomunika bis-​sinjali sabiex tkun tistaʼ tgħallimhom il-​verità. Darba waħda waqt li kienet qiegħda tixtri f’supermarket fil-​viċin, waħda żagħżugħa truxa resqet lejha u kitbet nota li fiha staqsietha biex tgħinha ssib prodott. Wara li għenitha ssibu, il-​pijuniera kitbet nota li fiha esprimiet ix-​xewqa tagħha li titgħallem tikkomunika bis-​sinjali sabiex tgħin lit-​torox f’dawk l-​inħawi. Imbagħad il-​mara truxa kitbet din il-​mistoqsija, “Għala trid tgħin lit-​torox?” L-​oħt kitbet lura: “Jien waħda mix-​Xhieda taʼ Jehovah, u rrid ngħin lit-​torox jifhmu l-​Bibbja. Jien lesta li ngħallmek il-​Bibbja jekk int tgħallimni nikkomunika bis-​sinjali.” L-​oħt tgħid: “Ma tistax timmaġina x’ferħ ħassejt meta hi qalet ‘Orrajt.’” L-​oħt kienet tmur għand il-​mara kull fil-​għaxija għal sitt ġimgħat. Hi tgħallmet tikkomunika bis-​sinjali, u l-​mara truxa tgħallmet il-​verità u tgħammdet! Dan ġara ’l fuq minn 30 sena ilu, u l-​oħt pijuniera għadha tagħti xiehda lit-​torox u qiegħda issa tissieħeb maʼ kongregazzjoni li tikkomunika bis-​sinjali.

⁸ Nużaw l-​Għodda li Hija Pprovduta: Il-​letteratura tagħna hija disponibbli f’ħafna lingwi barranin. Ikun tajjeb li ġġorr fuljetti​—jew jekk l-​ebda kongregazzjoni taʼ lingwa barranija m’hi qiegħda taħdem l-​istess territorju, il-​brochure X’Jirrikjedi—​fil-lingwi li huma mitkellma fit-​territorju tiegħek. Jekk ikun ovvju li l-​Ingliż m’huwiex il-​lingwa ewlenija taʼ dak li jkun, staqsih b’liema lingwa jaqra. Dan jistaʼ jżidlek l-​għażliet dwar liema letteratura tistaʼ toffri. Per eżempju, wieħed li jitkellem bl-​Urdu jistaʼ wkoll ikun kapaċi jaqra l-​Għarbi.

⁹ Saħansitra jekk ma titkellimx il-​lingwa taʼ l-​individwu li tiltaqaʼ miegħu fl-​attività taʼ l-​għoti taʼ xiehda, int xorta tistaʼ tippreżentalu l-​aħbar tajba. Kif? Billi tuża l-​ktejjeb Good News for All Nations. Dan fih messaġġ stampat fil-​qosor f’59 lingwa. Bħalma jispjegaw l-​istruzzjonijiet f’paġna 2 tal-​ktejjeb, wara li tkun iddeterminajt il-​lingwa taʼ l-​inkwilin, ħallih jaqra l-​informazzjoni stampata fil-​paġna fil-​ktejjeb li tapplika għalih. Wara li jaqraha, urih pubblikazzjoni bil-​lingwa tiegħu. Jekk m’għandekx fuqek, urih il-​pubblikazzjoni bl-​Ingliż. Indika li se tipprova tmur lura b’kopja bil-​lingwa tiegħu. Staqsih l-​isem, u iktbu flimkien maʼ l-​indirizz.

Nagħtu Xiehda lil Nies taʼ Reliġjonijiet Mhux Kristjani

¹⁰ Ftit għarfien dwar l-​isfond reliġjuż taʼ persuna jgħinna nagħtu xiehda effettiva dwar is-​Saltna taʼ Alla. Il-​ktieb Mankind’s Search for God jagħtina dehen rigward ir-​reliġjonijiet prinċipali tad-​dinja sabiex inkunu nistgħu nifhmu t-​twemmin tan-​nies tajjeb biżżejjed biex ngħinuhom jaslu għall-​għarfien tal-​verità.

¹¹ Il-​kaxxa fl-​aħħar paġna taʼ dan l-​insert tagħti lista kurrenti tal-​pubblikazzjonijiet li l-​organizzazzjoni taʼ Jehovah pprovdiet għall-​użu waqt għoti taʼ xiehda lil nies mhux Kristjani. Billi naqraw dawn il-​pubblikazzjonijiet, aħna nifhmu kif navviċinaw lin-​nies bl-​aħbar tajba. M’għandniex ninsew li l-​ktejjeb Kif Nibdew u Nkomplu Diskussjonijiet Fuq Il-​Bibbja huwa għodda utli. Paġni 13-16 taʼ dak il-​ktejjeb jipprovdu suġġerimenti prattiċi fuq kif tirrispondi lil Buddisti, Ħindu, Lhud, u Musulmani.

¹² Noqogħdu Attenti X’Ngħidu: Irridu noqogħdu attenti li ma nqisux lin-​nies taʼ ċerta reliġjon kollha bl-​istess mod billi nikkonkludu li t-​twemmin persunali tagħhom huwa neċessarjament l-​istess bħal taʼ dawk bl-​istess fidi. Minflok, stinka biex tifhem kif jaħsibha l-​individwu li qed titkellem miegħu. (Atti 10:​24-35) Bħala Musulman, Salimoon ġie mrobbi bit-​twemmin li l-​Koran huwa l-​kelma taʼ Alla. Imma qatt ma setaʼ jaċċetta kompletament it-​tagħlim Musulman li Alla kollu ħniena kien se jittortura lin-​nies f’infern jaqbad. Darba waħda, ix-​Xhieda taʼ Jehovah stednuh biex jattendi laqgħa. Mill-​ewwel għaraf il-​verità, u issa qiegħed jaqdi ferħan bħala anzjan fil-​kongregazzjoni Kristjana.

¹³ Meta nagħtu xiehda lil dawk bi twemmin mhux Kristjan, irridu noqogħdu attenti li l-​mod kif navviċinaw lil persuna ma jtellifniex l-​opportunità li niddiskutu magħhom dwar l-​aħbar tajba. (Atti 24:16) Xi segwaċi taʼ xi reliġjonijiet huma sensittivi ħafna għal kwalunkwe attentat biex tikkonvertihom mill-​fidi tagħhom. Għalhekk, oqgħod b’sebaʼ għajnejn biex issib punti li t-​tnejn li intom taqblu fihom sabiex tħajjarhom lejn il-​verità sħiħa tal-​Kelma taʼ Alla. Uħud bħal nagħaġ se jirrispondu għal preżentazzjoni b’qalb tajba u ċara tal-​verità.

¹⁴ Huwa importanti wkoll li nikkunsidraw xi kliem nużaw, li ma mmorrux bla bżonn inbiegħdu lin-​nies mill-​messaġġ tagħna. Per eżempju, jekk immedjatament tidentifika lilek innifsek bħala Kristjan, is-​semmiegħ tiegħek awtomatikament għandu mnejn jassoċjak mal-​knejjes tal-​Kristjaneżmu, u dan jistaʼ joħloq ostaklu. Jistaʼ wkoll ikun taʼ vantaġġ li tirreferi għall-​Bibbja bħala “l-​Iskrittura” jew il-​“Kotba Mqaddsa.”​—Mt. 21:42; 2 Tim. 3:15.

¹⁵ Jekk tiltaqaʼ maʼ xi ħadd taʼ reliġjon mhux Kristjana u ma tħossokx ippreparat biżżejjed biex tagħtih xiehda dak il-​ħin, uża l-​opportunità biex sempliċement issir tafu, tħalli fuljett, u tgħidu lil xulxin x’jisimkom. Imbagħad mur lura wara ġurnata jew tnejn, wara li tkun ippreparajt biżżejjed biex tagħtih xiehda.​—1 Tim. 4:16; 2 Tim. 3:17.

¹⁶ Nagħtu Xiehda lill-​Buddisti: (Ara kapitlu 6 fil-​ktieb Mankind’s Search for God.) Twemmin Buddist ivarja ħafna minn segwaċi għal ieħor. Minflok ma jappoġġja l-​eżistenza taʼ Ħallieq persunali, il-​Buddiżmu jqis lir-​raġel Indjan Budda Gautama, tas-​sitt seklu Q.E.K., bħala xempju reliġjuż. Meta għall-​ewwel darba ra raġel marid, raġel xiħ, u raġel mejjet, Gautama ssara biex jifhem it-​tifsir tal-​ħajja. ‘Kienu l-​bnedmin imwelldin sempliċement biex ibatu, jixjieħu, u jmutu?’ tħasseb hu. M’għandniex xi ngħidu, aħna nistgħu nwieġbu dawk il-​mistoqsijiet għal Buddisti sinċieri li jridu jkunu jafu t-​tweġibiet.

¹⁷ Meta tkellem lill-​Buddisti, żomm mal-​messaġġ pożittiv u l-​veritajiet ċari misjubin fl-​aqwa ktieb qaddis, il-​Bibbja. Bħal ħafna nies oħrajn, il-​Buddisti huma interessati b’mod ħerqan fil-​paċi, il-​moralità, u l-​ħajja tal-​familja, u taʼ spiss huma jieħdu pjaċir jiddiskutu dawn is-​suġġetti. Dan jistaʼ jwasslek biex tenfasizza s-​Saltna bħala s-​soluzzjoni vera għall-​problemi taʼ l-​umanità.

¹⁸ Fi snin reċenti kien hemm influss taʼ Ċiniżi li jemmnu fil-​Buddiżmu u filosofiji Orjentali oħrajn. Meta waħda oħt f’Montana rat raġel Ċiniż f’ħanut tal-​merċa, hi tatu fuljett bil-​lingwa tiegħu u offrietlu studju tal-​Bibbja. Hu qal: “Trid tgħid il-​Bibbja Mqaddsa? Ili nfittex dan ħajti kollha!” Hu beda jistudja dik il-​ġimgħa u beda jattendi l-​laqgħat kollha.

¹⁹ Pijuniera fin-​Nevada ilha tgħallem il-​verità lil studenti Ċiniżi għal iktar minn għaxar snin. Meta kienet qed taħdem fi blokk taʼ tmien appartamenti okkupati minn dawn l-​istudenti, hi talbet lil Jehovah jgħinha tibda studju f’kull appartament. Fi żmien ġimgħatejn kienet qed tistudja maʼ taʼ l-​inqas student wieħed f’kull appartament. Introduzzjoni effettiva għaliha hija li tgħid, illi hi sabet tħassib komuni fost l-​istudenti​—kollha jridu paċi u ferħ. Imbagħad issaqsihom jekk dan kienx it-​tħassib tagħhom ukoll. Huma dejjem jaqblu. Hi tidderieġi l-​attenzjoni tagħhom lejn il-​brochure Lasting Peace and Happiness​—How to Find Them, li huwa mfassal għan-​nies Ċiniżi. Wara biss ħames sessjonijiet taʼ studju, wieħed mill-​istudenti qalilha li kien ilu jfittex il-​verità għal żmien twil u li issa sabha.

²⁰ Nagħtu Xiehda lill-​Ħindu: (Ara kapitlu 5 fil-​ktieb Mankind’s Search for God.) Il-​Ħinduiżmu m’għandu l-​ebda twemmin definit. Il-​filosofija tiegħu hija kumplessa ħafna. Il-​Ħindu għandhom il-​kunċett trinitarjan taʼ l-​alla prinċipali tagħhom Brahmin (Brahma l-​Ħallieq, Vixnu l-​Preservatur, u Siva l-​Qerried). Twemmin f’ruħ immortali huwa essenzjali fit-​tagħlim tagħhom taʼ rinkarnazzjoni, li għandha l-​ħabta tagħti l-​Ħindu ħarsa fatali tal-​ħajja. (Ara l-​ktejjeb Kif Nibdew u Nkomplu Diskussjonijiet Fuq Il-​Bibbja, paġna 14, u The Watchtower, tal-​15 taʼ Mejju, 1997, paġni 3-8.) Il-​Ħinduiżmu jgħallem it-​tolleranza, li r-​reliġjonijiet kollha jwasslu għall-​istess verità.

²¹ Meta tkun qed tagħti xiehda lil Ħindu tistaʼ tibda billi tispjega dwar it-​tama tagħna bbażata fuq il-​Bibbja li ngħixu għal dejjem f’perfezzjoni umana fuq l-​art kif ukoll dwar it-​tweġibiet sodisfaċenti li tagħti l-​Bibbja għall-​mistoqsijiet importanti li jiffaċċjaw lill-​umanità kollha.

²² Nagħtu Xiehda lil-​Lhud: (Ara kapitlu 9 fil-​ktieb Mankind’s Search for God.) Kuntrarju għal reliġjonijiet mhux Kristjani oħrajn, il-​Ġudaiżmu huwa bbażat fuq l-​istorja, mhux il-​mitoloġija. Permezz taʼ l-​Iskrittura Ebrajka ispirata, konnessjoni essenzjali hija pprovduta fit-​tfittxija taʼ l-​umanità għall-​veru Alla. U madankollu, kuntrarju għall-​Kelma taʼ Alla, tagħlim bażiku modern tal-​Ġudaiżmu huwa t-​twemmin f’ruħ umana immortali. Nistgħu nistabbilixxu bażi komuni billi nikkonfermaw li aħna nqimu lil dak Alla taʼ Abraham u billi nirrikonoxxu li kollha kemm aħna niffaċċjaw l-​istess diffikultajiet fid-​dinja tal-​lum.

²³ Jekk tiltaqaʼ maʼ Lhudi li nieqes mill-​fidi f’Alla, li ssaqsih jekk dejjem kienx iħossu hekk jistaʼ jgħinek tagħraf x’se jolqtu l-​iktar. Per eżempju, hu forsi qatt ma semaʼ spjegazzjoni sodisfaċenti dwar għala Alla jippermetti s-​sofferenzi. Lhud sinċieri jistgħu jiġu inkuraġġiti jeżaminaw mill-​ġdid l-​identità taʼ Ġesù bħala l-​Messija, mhux permezz tar-​rappreżentazzjonijiet ħżiena tal-​Kristjaneżmu dwaru, imma bil-​mod kif jippreżentawh il-​kittieba Lhud taʼ l-​Iskrittura Griega.

²⁴ Nagħtu Xiehda lill-​Musulmani: (Ara kapitlu 12 fil-​ktieb Mankind’s Search for God.) Il-​Musulmani (jew, Misilmin) huma segwaċi taʼ l-​Islam (jew, Mawmettaniżmu), li jinkludi t-​twemmin f’Allah bħala d-​divinità unika tagħhom u f’Mawmettu (570-632 E.K.) bħala l-​aħħar u l-​iktar profeta importanti tiegħu. Minħabba li ma jemmnux li Alla kellu Iben, il-​Musulmani jirrikonoxxu lil Ġesù Kristu bħala profeta inqas importanti taʼ Alla, imma xejn iktar. Il-​Koran, li għandu inqas minn 1,400 sena, jirreferi kemm għall-​Iskrittura Ebrajka kif ukoll għall-​Iskrittura Griega. Similaritajiet kbar jeżistu bejn l-​Islam u l-​Kattoliċiżmu. Iż-​żewġ reliġjonijiet jgħallmu l-​immortalità tar-​ruħ umana, l-​istat taʼ turment temporanju, u l-​eżistenza taʼ l-​infern jaqbad.

²⁵ Bażi komuni ovvja hija t-​twemmin tagħna li hemm biss Alla wieħed veru u li l-​Bibbja ġiet ispirata minnu. Qarrej attent tal-​Koran ra referenzi għat-​Tora, is-​Salmi, u l-​Vanġeli bħala li huma il-​Kelma taʼ Alla u qara li dawn għandhom jitqiesu hekk u li għandhom jiġu obduti. Għaldaqstant, tistaʼ toffri li tistudja dawn maʼ l-​individwu.

²⁶ Din il-​preżentazzjoni tistaʼ tkun effettiva maʼ xi ħadd li jidentifika ruħu bħala Musulman: “Ma tantx tkellimt maʼ Musulmani, imma qrajt xi ħaġa dwar xi tagħlim tar-​reliġjon tiegħek f’dan il-​ktieb żgħir. [Mur lejn paġni 15-16 fil-​ktejjeb Kif Nibdew u Nkomplu Diskussjonijiet Fuq Il-​Bibbja.] Dan jgħid li intom temmnu li Ġesù kien profeta imma li Mawmettu kien l-​aħħar u l-​iktar profeta importanti. Temmen ukoll li Mosè kien profeta veru? [Agħti ċans għal tweġiba.] Nistaʼ nurik dak li Mosè tgħallem mingħand Alla dwar l-​isem persunali Tiegħu?” Imbagħad aqra Eżodu 6:​2, 3. Meta terġaʼ tmur, tistaʼ tiddiskuti s-​sottitlu “One God, One Religion (Alla Wieħed, Reliġjon Waħda),” f’paġna 13 fil-​ktejjeb The Time for True Submission to God.

²⁷ Illum, ħafna qegħdin jaġixxu f’armonija mal-​kliem taʼ Isaija 55:​6, li jaqra: “Fittxu l-​Mulej sakemm tistgħu ssibuh, sejjħulu sakemm hu fil-​qrib!” Dan japplika għall-​uħud kollha taʼ qalb onesta, tkun xi tkun il-​lingwa li jitkellmu jew l-​isfond reliġjuż tagħhom. Nistgħu nkunu fiduċjużi li Jehovah se jbierek l-​isforzi tagħna waqt li nagħmlu ħilitna f’li ‘nagħmlu dixxipli mill-​ġnus kollha.’​—Mt. 28:19.

[Kaxxa f’Paġna 6]

LETTERATURA MFASSLA GĦAL NIES MHUX KRISTJANI

Buddisti

In Search of a Father (Ktejjeb)

“Ħares! Qed Nagħmel l-​Affarijiet Kollha Ġodda” (Brochure)

Ċiniżi

Lasting Peace and Happiness​—How to Find Them (Brochure)

Ħindu

From Kurukshetra to Armageddon​—And Your Survival (Ktejjeb)

Our Problems​—Who Will Help Us Solve Them? (Brochure)

The Path of Divine Truth Leading to Liberation (Ktejjeb)

Victory Over Death​—Is It Possible for You? (Ktejjeb)

Why Should We Worship God in Love and Truth? (Brochure)

Lhud

A Peaceful New World​—Will It Come? (Fuljett Nru. 17)

Jehovah’s Witnesses​—What Do They Believe? (Fuljett Nru. 18)

Will There Ever Be a World Without War? (Brochure)

Musulmani

How to Find the Road to Paradise (Fuljett)

The Time for True Submission to God (Ktejjeb)