Ir-​Riżoluzzjoni Tagħna—Li Nsusu wara l-​Mod taʼ Ħajja taʼ Jehovah

¹ Fil-​konvenzjonijiet “Il-​Mod taʼ Ħajja t’Alla” spikkat ir-​riżoluzzjoni li ġiet adottata fl-​aħħar taħdita. Din bdiet bl-​istqarrija: “Aħna . . . b’qalbna kollha naqblu li l-​mod t’Alla huwa l-​aqwa mod taʼ ħajja.” Ftakar xi ftit punti importanti minn din ir-​riżoluzzjoni li għalihom għedna, “IVA!”

² Aħna riżoluti li nibqgħu nodfa quddiem Jehovah, u bla tebgħa mid-​dinja. Se nkomplu npoġġu r-​rieda t’Alla l-​ewwel f’ħajjitna. Billi nużaw il-​Kelma tiegħu, il-​Bibbja, bħala l-​gwida tagħna, m’aħniex se niżvijaw lejn il-​lemin jew ix-​xellug, u b’hekk nikkonfermaw li l-​mod t’Alla huwa bil-​wisq iktar superjuri għall-​mod tad-​dinja.

³ Fil-​biċċa l-​kbira, id-​dinja ma tagħtix kas tal-​mod taʼ ħajja t’Alla u taħsad il-​konsegwenzi. (Ġer. 10:23) Għalhekk, għandna nkomplu nitgħallmu mill-​Istruttur il-​Kbir tagħna, Jehovah, li jgħid: “Din hi t-​triq; għaddi minnha.” (Is. 30:21) Il-​mod taʼ ħajja taʼ Jehovah, kif turina l-​Iskrittura, huwa superjuri fi kwalunkwe aspett. Sabiex insusu wara dan il-​mod, bilfors irridu nieħdu vantaġġ sħiħ minn dak kollu li jgħallimna Jehovah.

⁴ Il-​Programm Superjuri taʼ Tagħlim taʼ Jehovah: Jehovah jgħallimna l-​iskop veru tal-​ħajja u kif nistgħu nużaw ħajjitna bl-​aħjar mod. Jgħallimna kif intejbu l-​kwalità taʼ ħajjitna mentalment, moralment, u spiritwalment. Jgħallimna kif ngħixu fil-​paċi maʼ ħutna, mal-​familja tagħna, u mal-​proxxmu tagħna. Dan jagħmlu permezz tal-​manwâl tiegħu, il-​Bibbja, u permezz taʼ l-​organizzazzjoni tiegħu.

⁵ Il-​laqgħat tagħna tal-​kongregazzjoni huma importanti wisq f’dan ir-​rigward. Hekk kif nattendu u nipparteċipaw regolarment fil-​ħames laqgħat kollha, aħna nirċievu taħriġ komprensiv bħala ministri taʼ l-​aħbar tajba u edukazzjoni bbilanċjata sew dwar l-​għajxien Kristjan. (2 Tim. 3:​16, 17) L-​Istruttur Grandjuż tagħna jkompli jipprovdilna edukazzjoni teokratika permezz t’assembleat u konvenzjonijiet. Il-​mira tagħna għandha tkun li qatt ma nitilfu xi laqgħa jew xi sessjoni jekk saħħitna u ċ-​ċirkustanzi tagħna jippermettulna li nattendu.

⁶ Jalla nkomplu nsusu bir-​reqqa wara l-​mod taʼ ħajja t’Alla fil-​jiem li ġejjin, billi dan kollu nagħmluh għat-​tifħir taʼ Jehovah u għall-​benefiċċju dejjiemi tagħna!​—Is. 48:17.