Kif tagħti xhieda billi tuża stand tal-letteratura

L-għoti taʼ xhieda permezz taʼ stand jew mejda tal-letteratura qed juri li hu mod effettiv ħafna li permezz tiegħu qed jinġibdu lejn il-verità wħud taʼ qalb onesta. (Ġw. 6:44) Għaldaqstant, l-anzjani ġew inkuraġġiti jorganizzaw l-ippritkar f’postijiet pubbliċi fit-territorju tal-kongregazzjoni fejn jgħaddu ħafna nies. Ladarba dawn l-istands ma jibqgħux f’post wieħed, ġeneralment m’hemmx għalfejn isaqsu għal permess mill-awtoritajiet. Min jikkwalifika biex jieħu sehem? Pubblikaturi li jużaw l-għaqal, li jippreżentaw ruħhom b’mod dinjituż, u li jafu jaqbdu konversazzjoni. Issa ġejja lista taʼ x’għandu jsir u x’m’għandux isir biex tgħin il-pubblikaturi jkollhom iktar suċċess.

Affarijiet li għandek tagħmel:

Tkun dħuli maʼ dawk li jgħaddu minn ħdejk u t’għajnuna għalihom. Xi pubblikaturi jitbissmu b’mod dħuli u ġenwin, u jsellmulhom. Jekk xi ħadd iħares lejn l-istand hu u għaddej, forsi tistaʼ tgħidlu: “Tistaʼ tieħu xi ħaġa jekk trid.”
Toqgħod distanza xierqa mill-istand. F’xi postijiet, il-pubblikaturi jmorru tajjeb meta joqogħdu viċin ħafna tal-istand, madwar nofs metru ’l bogħod. Oħrajn raw li jekk joqogħdu daqshekk viċin, in-nies joqogħdu jaħsbuha biex jieqfu. U allura dawn l-aħwa joqogħdu iktar ’il bogħod u jistennew sakemm xi ħadd jieqaf ħdejn l-istand. Meta xi ħadd jiġi viċin l-istand, ipprova aqbad konversazzjoni miegħu, forsi billi ssaqsih: “Qatt ħsibt dwar dik il-mistoqsija?”
Tuża l-Bibbja kull meta tistaʼ.
Tispjega l-arranġament taʼ studju tal-Bibbja lil kull min jieħu pubblikazzjoni għall-istudju, bħal pereżempju l-ktieb Il-Bibbja X’Tgħallem? Offri li turih il-vidjow Għala għandek tistudja l-Bibbja? fuq xi mowbajl jew tablet.
Meta jkun possibbli, ikseb id-dettalji taʼ wħud li juru interess. Ħu l-inizjattiva biex issib lil xi ħadd li hu kwalifikat biex jgħinu.

Affarijiet li m’għandekx tagħmel:

Tkun aggressiv, insistenti, toqgħod tħaqqaqha man-nies, jew toqgħod eżatt mal-istand qisek xi għassies.
Tqis dan il-qasam tal-ministeru sempliċement bħala mod kif tqassam il-letteratura. Meta nkunu fil-ministeru, l-għan tagħna hu li nibdew studji tal-Bibbja, u għalhekk għandna nipprovaw naqbdu konversazzjoni man-nies.
Tgħatti l-istand jew tintilef f’konversazzjoni mal-ħu jew l-oħt li qed taħdem magħha. Jekk ikollok tuża l-mowbajl biex tagħmel telefonata persunali, spiss ikun aħjar jekk twarrab ftit minn ħdejn l-istand.
Tidħol f’dibattiti maʼ wħud li jopponu. Jekk xi ħadd li jopponi jsir abbużiv, jistaʼ jkun hemm bżonn li tmur post ieħor.