Għoti taʼ Xhieda fit-Toroq li Hu Effettiv
1. Liema hu mod wieħed kif nistgħu nimitaw lil Ġesù?
1 Matul il-ministeru tiegħu fuq l-art, Ġesù ma żammx lura milli jitkellem man-nies li ltaqaʼ magħhom fit-triq u f’postijiet pubbliċi oħrajn. (Lq. 9:57-61; Ġw. 4:7) Hu ried jaqsam il-messaġġ importanti tiegħu maʼ kemm jistaʼ jkun nies. Illum, l-għoti taʼ xhieda fit-toroq hu mod eċċellenti kif ngħinu lin-nies jiksbu l-għerf divin. (Prov. 1:20) Se jkollna iktar suċċess jekk nieħdu l-inizjattiva u nużaw id-dixxerniment.
2. Kif inhi involuta l-inizjattiva meta nkunu qed nagħtu xhieda fit-toroq?
2 Ħu l-Inizjattiva: Ġeneralment ikun aħjar jekk tavviċina lin-nies minflok ma toqgħod bilwieqfa jew tpoġġi bilqiegħda f’post wieħed tistenna lil dawk għaddejjin biex javviċinawk. Tbissem, agħmel kuntatt bl-għajnejn, u kun kalm u dħuli. Jekk qed taħdem maʼ pubblikaturi oħrajn, normalment ikun l-aħjar jekk tavviċinaw lin-nies separatament. Hemm bżonn l-inizjattiva wkoll biex issib mod kif terġaʼ tkellem lill-individwu interessat. Jekk ikun xieraq, fl-aħħar tal-konversazzjoni, bil-ħlewwa staqsi kif tistaʼ terġaʼ tikkuntattja lill-individwu. Xi pubblikaturi jagħmlu l-għoti taʼ xhieda fit-toroq regolarment fl-istess inħawi, u dan jippermettilhom jitkellmu mal-istess nies darba wara l-oħra u jkabbrulhom l-interess.
3. Kif nistgħu nużaw id-dixxerniment meta nkunu qed nagħtu xhieda fit-toroq?
3 Uża d-Dixxerniment: Uża l-għaqal meta tiddeċiedi fejn se toqgħod bilwieqfa fit-triq u lil min se tavviċina. Mhuwiex neċessarju li tagħti xhieda lil kull min jgħaddi. Osserva sew. Pereżempju, jekk l-individwu jkun mgħaġġel forsi jkun aħjar jekk ma twaqqfux. Meta nkunu qed nagħtu xhieda quddiem xi ħanut, kun diskret biex ma tinkwetax lill-maniġer bla bżonn. Spiss ikun aħjar jekk tagħti xhieda lin-nies hekk kif jitilqu mill-ħanut minflok huma u deħlin. Avviċina lin-nies b’mod li ma tbeżżagħhomx jew ma taħsadhomx. Ukoll, uża d-dixxerniment meta toffri xi letteratura. Jekk individwi juru ftit li xejn interess, tistaʼ toffrilhom fuljett minflok ir-rivisti.
4. L-għoti taʼ xhieda fit-toroq, għala hu tip taʼ għoti taʼ xhieda taʼ benefiċċju u pjaċevoli?
4 L-għoti taʼ xhieda fit-toroq jippermettilna nxerrdu ħafna żrieragħ tal-verità f’perijodu qasir taʼ żmien. (Ekk. 11:6) Xi nies li niltaqgħu magħhom jistgħu saħansitra jkunu dawk li ma nistgħux insibuhom id-dar meta nkunu qed naħdmu minn dar għal dar. Għax ma tagħmilx arranġamenti biex tieħu sehem fl-għoti taʼ xhieda fit-toroq, tip taʼ servizz tal-għalqa pjaċevoli u effettiv?