Nissaportu Traġedja li Ma Tistax Tiddeskriviha

KIF RAKKONTAT MINN JAMES GIARRANO

Waħda mill-​iktar affarijiet li ġġib ferħ fil-​ħajja hi meta ssir nannu jew nanna. Jien u marti Vicki konna qed nistennew b’ħerqa kbira t-​twelid taʼ l-​ewwel neputi tagħna. It-​tifla tagħna, Theresa, u r-​raġel tagħha, Jonathan, kienu qed jistennew tarbija fil-​bidu t’Ottubru taʼ l-​2000. Qatt m’għaddielna minn rasna li dalwaqt konna se niġu wiċċ imbwiċċ maʼ traġedja li ma tistax tiddeskriviha.

NHAR is-​Sibt, 23 taʼ Settembru, jien u l-​mara, flimkien mat-​tifel tagħna u l-​mara tiegħu, irħejnielha fuq vaganza. Konna se niltaqgħu maʼ xi membri oħrajn tal-​familja tagħna u nqattgħu ġimgħa fil-​gżejjer taʼ Outer Banks fin-​North Carolina. Theresa u Jonathan kienu ddeċidew li ma jiġux magħna għall-​vaganza għax hi kellha disaʼ xhur tqala u konna se nivvjaġġaw distanza twila bil-​karozza—madwar 11-il siegħa mid-​dar tagħna f’Ohio.

Ridna nħallu l-​vaganza għal iktar tard, imma Theresa insistiet li mmorru. Hi żguratna li kollox kien se jmur b’wiċċ il-​ġid. Barra minn hekk, it-​tabib tagħha ħass li t-​tqala x’aktarx li kienet se tkompliha sa l-​aħħar, u hi kien għad baqgħalha ġimagħtejn biex jagħlqilha ż-​żmien.

Nhar l-​Erbgħa, 27 taʼ Settembru, 2000, kienet ġurnata sabiħa li fakkritni għala għal snin sħaħ bħala familja dejjem morna vaganza f’dawn l-​inħawi. Fejn konna nafu li sa tmiem il-​ġurnata ħajjitna kienet se tinbidel mil-​lejl għan-​nhar?

“Theresa Ma Tinstab Imkien!”

Dik il-​lejla stess jien irċivejt telefonata mingħand ħija li kien f’Ohio. Kien jinstemaʼ nervuż ħafna u ħassejtu qed iġibha fit-​tul. Fl-​aħħar, qalilna li kellu jgħidilna: “Theresa ma tinstab imkien!” Il-​pulizija kienet involuta fil-​biċċa tax-​xogħol għax l-​affarijiet li ġraw qabel u wara li sparixxiet kienu qajmu suspetti. Dakinhar, meta Jonathan wasal id-​dar wara nofsinhar, hu sab li l-​bieb taʼ barra ma kienx imsakkar. Dak li Theresa kienet qed tiekol fil-​għodu kien għadu fuq il-​mejda, u anki l-​basket kienet ħallietu hemm. Kien hemm xi ħaġa oħra stramba: Iż-​żarbun tagħha—l-​uniku par li kien jiġiha fid-​disaʼ xahar tat-​tqala tagħha—kien għadu ħdejn il-​bieb.

Jonathan kien ċempel id-​dar għall-​ħabta tad-​9:30 taʼ fil-​għodu. Theresa qaltlu li kienet ċemplet waħda mara li riedet tiġi biex tara l-​karozza tagħhom li kienet għall-​bejgħ. Wara dan, Theresa suppost li kellha toħroġ tagħmel xi qadjiet. Jonathan ċemplilha f’xi nofsinhar, imma ma qabadhiex. Kompla jċempel wara nofsinhar, imma xorta ma sab lil ħadd. Meta wasal id-​dar fl-​4:15 taʼ wara nofsinhar, innota li l-​karozza ma kinitx hemm. Ċempel l-​isptar għax ħaseb li forsi Theresa daħlet twelled, imma ma kinitx hemm. Ċempel ukoll lil xi membri tal-​familja, imma ħadd ma kien raha. Tatu rasu, u allura ċempel lill-​pulizija. F’xi s-​6:00 taʼ fil-​għaxija, il-​pulizija sabet il-​karozza mhux daqstant ’il bogħod mid-​dar tagħhom. Imma Theresa xorta ma kienet tidher imkien.

Meta waslitilna l-​aħbar fin-​North Carolina, din ħallietna xxokkjati. Jien u l-​mara, flimkien mat-​tifel tagħna u l-​mara tiegħu, ippakkjajna l-​basktijiet u rħejnielha lura lejn id-​dar. Kellna vjaġġ twil bil-​karozza u kien wieħed emozzjonali. Komplejna nivvjaġġaw matul il-​lejl u wasalna lura f’Ohio l-​għada fil-​għodu.

Żviluppi Ġodda fil-​Każ

Sadattant, Jonathan u xi qraba, flimkien maʼ ħbieb tal-​qalb u oħrajn kienu qed jgħinu lill-​pulizija fit-​tfittxija għal Theresa, li baqgħet għaddejja tul il-​lejl kollu. It-​tfittxija kompliet għal ħamest ijiem taʼ qtigħ il-​qalb. Fl-​aħħar, nhar it-​Tnejn, 2 t’Ottubru, kien hemm żviluppi ġodda fil-​każ. Sa dakinhar, il-​pulizija kienet skopriet minfejn kienet saret it-​telefonata lil Theresa l-​Erbgħa fil-​għodu. Waħda mara li kienet toqgħod ftit blokkijiet ’il bogħod kienet ċemplet minn telefon ċellulari.

Wara li interrogaw lill-​mara, l-​uffiċjali tal-​pulizija bdew jissuspettaw fiha. Iktar tard fil-​għaxija, dawn marru lura d-​dar taʼ din il-​mara. Imma hekk kif l-​uffiċjali tal-​pulizija kienu resqin lejn id-​dar semgħu sparatura. Daħlu fid-​dar, u sabu l-​mara mejta. Kienet sparat lilha nfisha. B’għaġeb kbir, sabu tarbija tifel tat-​twelid f’kamra fit-​tieni sular. Il-​ħaġa taʼ l-​iskantament kienet li kien raqad tul dan il-​ġenn kollu!

Imma xorta waħda Theresa kienet għadha ma nstabitx. Fis-​sigħat taʼ wara, l-​uffiċjali tal-​pulizija komplew ifittxu fid-​dar għal xi evidenza li turi jekk kinitx marret hemm. It-​tfittxija ntemmet it-​Tlieta fil-​għodu kmieni ġewwa l-​garaxx. Hemmhekk, f’qabar mhux fond ħafna, sabu l-​ġisem taʼ Theresa. Iktar tard, l-​uffiċjal inkarigat wasal għall-​konklużjoni li kienet qalgħet daqqa li tilfitha minn sensiha, u li mbagħad sparawlha f’darha. Theresa mietet mill-​ewwel, u mbagħad it-​tarbija ittiħditilha minn ġol-​ġuf tagħha. Meta nħarsu lura lejn dak li ġara, il-​ħsieb li għallinqas ma batietx iserraħna ftit.

It-tifel tat-​twelid ittieħed l-​isptar, u sabu li kien b’saħħtu ferm—lanqas girfa waħda ma kellu! Kellu jsir bilfors test tad-​DNA u dan ikkonferma li tassew huwa n-​neputi tagħna. Jonathan semmieh kif hu u Theresa kienu ddeċidew—Oscar Gavin. Wara li dam ftit biss l-​isptar, it-​tifel li kien jiżen 3.9 kilogrammi, intbagħat id-​dar fi ħdan missieru nhar il-​Ħamis 5 t’Ottubru. Konna ferħanin li issa kellna n-​neputi tagħna magħna, imma ma nistgħux niddeskrivu bil-​kliem l-​uġigħ li ħassejna għall-​fatt li Theresa ma kinitx hemm biex iżżommu.

Ir-​Reazzjoni fil-​Komunità

Jien u l-​familja tiegħi tant tqanqalna mill-​appoġġ kbir li rċivejna—f’ħafna każi minn nies li qatt ma ltqajna magħhom. Matul il-​jiem li Theresa ma setgħetx tinstab, mijiet taʼ nies offrew li jgħinuna nfittxuha. Kien hemm ħafna li tawna l-​flus. Ħafna ħwienet lokali li kienu jbigħu provvisti għall-​uffiċċji stampawlna mingħajr ħlas eluf taʼ karti bl-​avviż li Theresa għabet. U volontieri qassmu dawn il-​karti f’żona taʼ diversi mili ’l bogħod mid-​dar taʼ Theresa.

Waħda minn ħutna l-​Kristjani taħdem maʼ avukat lokali, u meta qaltlu dwar is-​sitwazzjoni tagħna, hu offra li jgħinna. Aħna aċċettajna l-​offerta tiegħu, u din kienet barka kbira. Għenna bil-​mod kif kellna nittrattaw mal-​mezzi tax-​xandir kif ukoll b’ċerti kwistjonijiet legali li qamu. Iktar minn hekk, hu rrikkmandalna żewġ investigaturi privati, li għenuna ħafna fil-​każ tagħna. Kienu interessati b’mod ġenwin fina u dan missilna qalbna.

Wara li n-​neputi tagħna nstab, l-​għajnuna żdiedet. Ħafna ħwienet tal-​merċa bagħtulna ikel u provvisti għad-​dar. Ħafna individwi taw xi ħwejjeġ għal Oscar kif ukoll ħrieqi, ħalib tat-​trab għat-​trabi, u ġugarelli. Tant qlajna minnhom li Oscar żgur ma kienx se jużahom kollha, u allura ż-​żejjed tajnieh lit-​taqsima tal-​maternità fl-​isptar lokali. Peress li din l-​istorja kienet qed tiġi rapportata mill-​mezzi tax-​xandir, irċivejna eluf taʼ kartolini u ittri—mhux biss minn dawk li kienu joqogħdu ħdejna imma minn madwar id-​dinja kollha.

L-appoġġ kbir kien jidher b’mod partikulari fil-​funeral taʼ Theresa, li sar nhar il-​Ħadd 8 t’Ottubru. Konna nafu li ħafna nies kienu se jiġu, imma ġew ħafna iktar milli stennejna. Saru arranġamenti biex tintuża sala fl-​iskola sekondarja lokali, u din imtliet sa l-​inqas rokna b’iktar minn 1,400 ruħ. Fost dawk li attendew kien hemm membri tal-​familja, ħbieb, uffiċjali tal-​pulizija, is-​sindku, u oħrajn mill-​komunità. Kien hemm ukoll membri mill-​mezzi tax-​xandir, u l-​istazzjonijiet televiżivi lokali ġibdu t-​taħdita, li xxandret ukoll diretta fuq l-​Internet. Barra minn hekk, mijiet taʼ nies qagħdu fl-​intrata taʼ l-​iskola jew imgezzin taħt l-​umbrelel barra fix-​xita u l-​kesħa, u semgħu t-​taħdita mill-​ispeakers li kienu mqabbdin maʼ dawk tas-​sala. Bit-​taħdita ngħatat xiehda kbira dwar it-​twemmin tagħna bbażat fuq il-​Bibbja.

Wara, mijiet taʼ nies qagħdu jistennew bil-​paċenzja wara xulxin biex jagħtu l-​kondoljanzi tagħhom. Domna hemm kważi tliet sigħat, ngħannqu lil dawk kollha li ġew u nesprimu l-​apprezzament tagħna talli ġew. Wara l-​funeral, lukanda f’dak il-​post b’qalb tajba pprovdiet ikla għal iktar minn 300 ruħ fosthom dawk tal-​familja tagħna, ħbieb tal-​qalb, u oħrajn li kienu għenuna nsibu lit-​tifel.

Ma nistgħux nesprimu biżżejjed kemm napprezzaw dak li n-​nies—il-​biċċa l-​kbira minnhom barranin—għamlu biex jgħinuna. Din l-​esperjenza ġagħlitna nkunu determinati iktar minn qatt qabel biex nieħdu sehem bis-​sħiħ fil-​ministeru Kristjan, għax hemm ħafna individwi taʼ qalbhom tajba li rridu nagħtuhom l-​aħbar tajba tas-​Saltna t’Alla.—Mattew 24:14.

Kif Irreaġixxiet il-​Kongregazzjoni

Mill-​bidunett taʼ din l-​esperjenza kerha, aħna sibna appoġġ kbir u kontinwu minn ħutna l-​Kristjani. Dan l-​appoġġ li donnu ma kien jieqaf qatt kien ġej kemm mill-​kongregazzjoni tagħna tax-​Xhieda taʼ Jehovah u kemm minn kongregazzjonijiet oħrajn.

Anki qabel ma wasalna d-​dar min-​North Carolina, l-​anzjani fil-​kongregazzjoni tagħna kienu diġà organizzaw gruppi biex isibu lil Theresa. Ħafna minn ħutna ma marrux għax-​xogħol biex jingħaqdu magħna fit-​tfittxija. Xi wħud qalu lill-​imgħallem tagħhom li kienu lesti li ma jitħallsux, imma f’ċerti każi l-​imgħallem ħalliehom jitilqu u ħallashom xorta. Matul il-​ġranet li Theresa kienet nieqsa, xi wħud minn ħutna rġiel spiritwali qagħdu maʼ Jonathan sabiex ma jkunx waħdu. Għadd t’aħwa ġew apposta biex iżommulna d-​dar nadifa u fl-​ordni. Oħrajn taw daqqa t’id billi temgħu lill-​volontieri u wieġbu t-​telefon.

Madwar sitt ġimgħat wara l-​mewt taʼ Theresa, il-​mara tiegħi u Jonathan kellhom jiffaċċjaw sfida diffiċli ferm—li jagħżlu l-​affarijiet taʼ Theresa u jiżbarazzaw id-​dar tagħha. Jonathan ħass li ma setax jibqaʼ joqgħod fid-​dar li hu u Theresa kienu għexu fiha flimkien, u għalhekk iddeċieda li jbigħha. Kien diffiċli ħafna għalihom li joqogħdu jagħżlu l-​affarijiet taʼ Theresa—kollox kien ifakkarhom fiha u f’kemm kienu qed iħossu n-​nuqqas tagħha. Imma anki f’dan il-​waqt, l-​aħwa ġew jgħinuna. Għenuna nerfgħu l-​affarijiet tagħha fil-​kaxxi u saħansitra għamlu xi xogħol taʼ tiswija fid-​dar biex tkun lesta għall-​bejgħ.

Xi ħaġa iktar importanti hi li l-​aħwa pprovdew appoġġ spiritwali u emozzjonali lill-​familja tagħna. Kienu jċemplulna u jiġu jarawna biex jinkuraġġuna. Ħafna bagħtu kartolini u ittri li tant qanqluna. Dan l-​appoġġ b’imħabba ma damx biss għall-​ewwel ftit ġranet u ġimgħat imma kompla għal xhur sħaħ.

Ħafna mill-​aħwa qalulna biex ngħidulhom kulmeta jkollna bżonn lil xi ħadd joqgħod jismagħna, u aħna aċċettajna l-​offerta ħanina tagħhom. Meta tkun tistaʼ taqsam is-​sentimenti tiegħek maʼ ħbieb li tħobb u li tafdahom tħossok imfarraġ wisq! Verament, huma applikaw il-​kliem tal-​proverbju Bibliku: “Il-​ħabib iħobbok kull ħin, bħal ħuk imwieled għal żmien l-​hemm.”—Proverbji 17:17; 18:24.

L-​Effett li Tħalla fuq il-​Familja Tagħna

Irrid ngħid li ma kienx faċli għalija u għall-​familja tiegħi li nissaportu l-​qtil taʼ Theresa. Ħajjitna nbidlet għalkollox. Xi kultant inħossni rrabjat li m’hijiex miegħi. Inħoss in-​nuqqas tat-​tgħanniq u l-​bews tagħha.

Marti u Theresa kellhom relazzjoni mill-​qrib ferm maʼ xulxin. Ma kinitx tgħaddi ġurnata li minn taʼ l-​inqas ma kinux jgħidu kelma flimkien. Kienu jqattgħu sigħat sħaħ jitkellmu dwar it-​tqala taʼ Theresa. Kienu ħadmu flimkien biex jippreparaw il-​kamra tas-​sodda tat-​tarbija.

Vicki tiddeskrivi dak li tħoss hi: “Hemm ħafna affarijiet li nimmissja. Nimmissja mmur nippriedka magħha. Nimmissja nixtri magħha. L-​iktar li jweġġagħni hu l-​fatt li ma narahiex bit-​tifel tagħha—dan jaqsamli qalbi wisq. Naf kemm kienet tħobbu lil Oscar anki qabel biss twieled. Kienet taf li kien se jkollha tifel. Wara li kont ħdimtilha kutra għat-​tarbija u tajthielha, Theresa kitbitli din il-​kartolina:

‘Għażiża ommi,

Grazzi ħafna tal-​kutra sabiħa tat-​tarbija. Napprezza ħafna x-​xogħol kbir kollu li ħadt biex tagħmilha. Nixtieq nerġaʼ ngħidlek grazzi taʼ l-​għajnuna kollha tiegħek u l-​inkuraġġiment li tajtni biex niffaċċja ftit mill-​iktar mumenti diffiċli taʼ ħajti. Dejjem se niftakar dan u nibqaʼ grata. Smajthom jgħidu li meta tikber, xi darba tintebaħ li l-​aqwa ħabiba tiegħek hija ommok. Jien nirringrazzja lil Jehovah kuljum li ma domtx wisq ma indunajt b’dan. Inħobbok dejjem.’”

Li weġġagħna wkoll kien li naraw dak li għadda minnu r-​raġel tat-​tifla. Waqt li Oscar kien l-​isptar, Jonathan kellu jagħmel waħda mill-​iktar affarijiet diffiċli għalih. Peress li ddeċieda li għal ftit żmien jiġi joqgħod magħna, hu kellu jġorr l-​affarijiet tal-​kamra tas-​sodda tat-​tarbija li hu u Theresa kienu ppreparaw fid-​dar tagħhom. Ippakkja ż-​żiemel li jitbandal, il-​benniena, u l-​ġugarelli, u ġabhom id-​dar tagħna.

Dak li Għenna Nissaportu

Meta titlef lil xi ħadd li tħobb b’mod daqstant traġiku, jiġuk ħafna mistoqsijiet u emozzjonijiet li jħawduk. Kien hemm drabi meta jien bħala anzjan Kristjan ipprovajt infarraġ u ngħin lil ħaddieħor biex jikkumbatti dawn il-​mistoqsijiet u sentimenti. Imma meta tkun int dak li qed iġġarrab in-​niket, l-​emozzjonijiet jistgħu jħawdulek il-​ħsieb.

Per eżempju, billi kont naf kif kienet tinsab Theresa u li konna se nagħmlu ġimgħa vaganza, kont tlabt lil Jehovah biex jipproteġiha. Meta nstabet maqtula, nammetti li għall-​ewwel ġewni d-​dubji għala t-​talb tiegħi ma ġiex imwieġeb. M’għandniex xi ngħidu, naf li Jehovah ma jagħtiniex garanzija li se jipprovdi protezzjoni mirakoluża għan-​nies tiegħu individwalment. Komplejt nitlob biex nifhem. Sibt il-​faraġ billi kont naf li Jehovah jipproteġi lin-​nies tiegħu spiritwalment—jiġifieri, hu jipprovdilna li għandna bżonn sabiex inħarsu r-​relazzjoni tagħna miegħu. Din hija l-​iktar protezzjoni importanti, għax tistaʼ teffettwalna l-​futur etern tagħna. F’dak is-​sens, Jehovah pproteġa lil Theresa; hi kienet qed taqdih fedelment meta mietet. Sibt is-​serħan mill-​fatt li naf li l-​prospetti li terġaʼ tgħix fil-​futur jinsabu f’idejn Alla l-​ħanin.

Kien hemm versi skritturali li kienu taʼ faraġ b’mod speċjali. Dawn huma xi wħud minnhom li għenuni nissaporti:

“Kemm it-​tajbin u kemm il-​ħżiena għad iqumu minn bejn l-​imwiet.” (Atti 24:15) Ili nemmen bil-​wegħda tal-​Bibbja dwar irxoxt f’ġenna taʼ l-​art, imma issa din it-​tama hija ħafna iktar reali għalija. Sempliċement illi naf li għad nerġaʼ nħaddan lil Theresa miegħi tani l-​qawwa li niflaħ ngħaddi kull ġurnata.

“[Jehovah] m’huwiex Alla tal-​mejtin, iżda tal-​ħajjin, għax għalih kulħadd jgħix.” (Luqa 20:37, 38) Insib faraġ kbir mill-​fatt li naf li bħalissa Jehovah jikkunsidra lill-​mejtin kollha—li jum wieħed se jiġu rxoxtati—bħala li qed ‘jgħixu.’ Allura fil-​ħarsa tiegħu, l-​għażiża Theresa tagħna hija ħajja u kif.

Vicki tixtieq taqsam ftit mill-​versi tal-​Bibbja li saħħew lilha b’mod partikulari:

“‘Alla ma jigdibx.’ (Lhud 6:18; Titu 1:2) Minħabba li Jehovah ma jistax jigdeb, jien naf li hu se jwettaq il-​wegħda tiegħu u jirxoxta l-​mejtin.

“‘Tistagħġbux b’dan: tiġi siegħa meta dawk kollha li jkunu fl-​oqbra [‘tal-​mafkar,’ NW] jisimgħu [leħen Ġesù] u joħorġu.’ (Ġwann 5:28, 29) Il-​kliem ‘oqbra tal-​mafkar’ jissuġġerixxi li Theresa tinsab fil-​memorja taʼ Jehovah sakemm iqabbad lil Ibnu, Ġesù Kristu, biex jirxoxtaha. Naf li m’hemmx post iktar fis-​sigurtà milli tkun fil-​memorja perfetta taʼ Jehovah.

“Fit-​talb kollu tagħkom itolbu u uru lil Alla xi jkollkom bżonn, u iżżuh ħajr. U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu Ġesù.’ (Filippin 4:6, 7) B’mod partikulari, jien nitlob għall-​ispirtu taʼ Jehovah biex jagħtini l-​qawwa. Meta nħossni verament imdejqa, nersaq lejn Jehovah u ngħidlu, ‘Għandi bżonn iktar mill-​ispirtu tiegħek,’ u jgħinni ngħaddi ġurnata oħra. Xi kultant lanqas ikun jistaʼ joħroġli l-​kliem, imma hu jagħtini l-​qawwa biex inkompli nissaporti.”

Jehovah verament għenna nissaportu din it-​traġedja li ma tiddeskrivihiex bil-​kliem. Naturalment, xorta għadna ninsabu mnikktin minħabba Theresa tagħna. Ma nistennewx li n-​niket tagħna jitneħħa kompletament qabel ma nkunu nistgħu nerġgħu ngħannquha fid-​dinja l-​ġdida taʼ Jehovah. Sadattant, aħna ninsabu iktar determinati minn qatt qabel li naqdu lil Jehovah fedelment. Jonathan huwa determinat li jagħmel l-​aħjar li jistaʼ biex irabbi lil Oscar ħalli jħobb u jaqdi lil Jehovah, u Vicki u jien se ngħinuh b’kull mezz possibbli. Minn qalbna nixtiequ li nkunu hemm fid-​dinja l-​ġdida t’Alla biex nilqgħu lura lil Theresa u nlaqqgħuha maʼ binha li ma rnexxilhiex iżżommu f’dirgħajha.

[Stampa f’paġna 19]

It-​tifla tagħna Theresa, tismaʼ qalb it-​tarbija tagħha tħabbat

[Stampi f’paġna 20, 21]

Ħassejna appoġġ kbir fil-​funeral

[Stampa f’paġna 23]

Maʼ marti, Vicki, fit-​tieġ taʼ Theresa

[Stampa f’paġna 23]

In-​neputi tagħna, Oscar