“Il-​Mixi m’Alla Jġib Barkiet Issa u għal Dejjem”

TAʼ SPISS jingħad li l-​ħajja hija vjaġġ. Qatt tħossok, bħalma jħossuhom ħafna, li donnok intlift? Aħna ngħixu taħt pressjonijiet kbar ħafna f’din id-​dinja. Hekk kif is-​soċjetà taʼ madwarna ssir iktar vjolenti u immorali, għandna mnejn inħossuna mifluġin minn qawwiet li m’għandniex kontroll fuqhom. Kif nistgħu nżommu l-​bilanċ tagħna f’dawn iż-​żminijiet taʼ taqlib? Kif nistgħu nibqgħu mexjin fit-​triq tajba għal ħajjitna?

Fil-Bibbja nsibu tweġiba mill-​isbaħ li tagħtina tama. Turina li għandna opportunità meraviljuża​—nistgħu nimxu m’Alla. Forsi xi wħud iwaqqgħuh għaċ-​ċajt ħsieb bħal dan. Wara kollox, kif jistaʼ sempliċi bniedem jimxi mal-​Ħallieq taʼ l-​univers li jistaʼ kollox? Il-​Bibbja turi li huwa possibbli li dan isir. Fil-​fatt, jekk dak li jkun jimxi m’Alla, se jgħix l-​aqwa u l-​iktar ħajja hienja possibbli f’din id-​dinja mimlija inkwiet. Iżda x’hemm involut? U x’barkiet jirriżultaw meta individwu jimxi m’Alla?

Dawn il-​mistoqsijiet se jitwieġbu fit-​taħdita li tant tmisslek qalbek, “Il-​Mixi m’Alla Jġib Barkiet Issa u għal Dejjem.” Din it-​taħdita pubblika se tibda tingħata fil-​konvenzjonijiet distrettwali tax-​Xhieda taʼ Jehovah minn dan ix-​xahar ’il quddiem. Madwar id-​dinja se jsiru mijiet taʼ konvenzjonijiet bħal dawn. Biex issib l-​eqreb post għalik, ikkuntattja lix-​Xhieda taʼ Jehovah fl-​inħawi tiegħek jew ikteb lill-​pubblikaturi taʼ din ir-​rivista.