It-​Tmiem Permanenti għall-​Vjolenza​—Kif?

BIEX irażżnu din il-​mewġa taʼ vjolenza, numru taʼ bliet fl-​Istati Uniti esperimentaw b’idea ġdida​—flus jew oġġetti fi bdil m’armi tan-​nar irritornati, bla mistoqsijiet. Ir-​riżultat? Għall-​ispiża taʼ $341,000, il-​Belt taʼ St. Louis, per eżempju, ġabret 8,500 arma. Programm simili fi New York City ġabar iktar minn elf arma.

X’effett kellu dan kollu fuq il-​kriminalità? B’dispjaċir, ftit li xejn. Omiċidji relatati m’armi tan-​nar laħqu l-​ogħla quċċata f’St. Louis is-​sena taʼ wara. Fi New York City, huwa stmat li għad hemm żewġ miljun arma tan-​nar fl-​idejn. Fl-​Istati Uniti, hemm madwar 200 miljun arma tan-​nar f’idejn in-​nies, kważi waħda għal kull raġel, mara, u tifel jew tifla. F’pajjiżi oħrajn, vjolenza relatata maʼ l-​armi tan-​nar qiegħda tiżdied b’rata allarmanti. Fl-​Britannja “bejn l-​1983 u l-​1993, in-​numru t’offiżi ddokumentati mill-​pulizija li fihom l-​armi tan-​nar kienu involuti kważi rdoppja, għal 14,000,” tgħid The Economist. Għalkemm ir-​rata t’omiċidji hija relattivament baxxa, hemm madwar miljun arma llegali f’dak il-​pajjiż.

Ċertament, kwalunkwe tnaqqis f’dawk in-​numri tal-​biżaʼ huwa pass ’il quddiem. Madankollu, miżuri bħal dawk deskritti hawn fuq bil-​kemm jilħqu l-​għerq tal-​kaġuni għall-​vjolenza. X’inhuma dawk il-​kaġuni? Ħafna fatturi ġew iċċitati, imma xi ftit minnhom huma fundamentali. Nuqqas taʼ stabbiltà fil-​familja u istruzzjoni morali ġiegħel lil bosta żgħażagħ jissieħbu maʼ gajjiet biex ikollhom sens taʼ li jappartjenu lil xi ħadd. Il-​lixka taʼ profitti kbar tqanqal lil ħafna biex jirrikorru għall-​vjolenza. L-​inġustizzja timbotta lil oħrajn biex jirrimedjaw il-​problemi b’mezzi vjolenti. Kburija bil-​pajjiż, razza, jew klassi fis-​soċjetà ġġiegħel lin-​nies jinjoraw is-​sofferenzi t’oħrajn. Dawn huma fatturi b’għeruq fondi li m’hemmx soluzzjonijiet taʼ malajr għalihom.

X’Jistaʼ Jsir?

Iktar pulizija, sentenzi taʼ ħabs iktar ħorox, restrizzjonijiet fuq l-​armi tan-​nar, il-​piena tal-​mewt​—dawn kollha ġew proposti u pprovati bħala mezzi biex titrażżan il-​kriminalità u l-​vjolenza. Dawn ġabu diversi gradi taʼ suċċess, imma l-​fatt taʼ dwejjaq huwa li l-​vjolenza għadha mqabbda magħna. Għala? Minħabba li dawn il-​miżuri ma jagħmlu xejn ħlief jittrattaw is-​sintomi.

Mill-banda l-​oħra, ħafna esperti jħossu li ċ-​ċavetta biex tintemm il-​vjolenza hija l-​edukazzjoni. Waqt li din l-​idea tagħmel sens, irridu ninnotaw li l-​vjolenza m’hijiex limitata għal nazzjonijiet fejn l-​opportunitajiet edukattivi huma limitati. Fil-​fatt, donnu li xi wħud mill-​iktar nazzjonijiet vjolenti huma wkoll dawk bl-​ogħla livelli t’edukazzjoni. M’huwiex diffiċli li tara li dak li hemm bżonn m’huwiex biss edukazzjoni imma edukazzjoni tat-​tip addattat. Liema tip huwa dak? Hemm xi ħadd li kapaċi jgħallem in-​nies biex ikunu individwi li jħobbu l-​paċi u retti?

“Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi. Li kieku tajt widen għall-​kmandamenti tiegħi, kien ikun bħal xmara sliemek, u sedqek bħal mewġ tal-​baħar.” (Korsiv tagħna.) (Isaija 48:17, 18) Alla Jehovah kif jgħallem lin-​nies ikunu wħud li jħobbu l-​paċi u twajbin? Primarjament permezz tal-​Kelma tiegħu, il-​Bibbja.

Il-​Qawwa Tal-​Kelma T’Alla

Il-​Bibbja ċertament li mhix biss kollezzjoni taʼ ħrejjef u qwiel antikwati u rrelevanti. Fiha prinċipji u ideat mill-​Ħallieq taʼ l-​umanità, li, mill-​post tiegħu taʼ vantaġġ suprem, jaf in-​natura umana iktar minn kulħadd. “Daqskemm huma ogħla s-​smewwiet mill-​art, daqshekk ieħor huma triqati ’l fuq minn triqatkom, u l-​fehmiet tiegħi mill-​fehmiet tagħkom,” jgħid Alla Jehovah.—Isaija 55:9.

Għal din ir-​raġuni l-​appostlu Pawlu jixhed li “l-​kelma taʼ Alla hi ħajja u qawwija, taqtaʼ aktar minn xabla b’żewġt ixfar; hija tinfed sa tifred minn xulxin ir-​ruħ u l-​ispirtu u l-​ġogi u l-​mudullun; u tgħarbel il-​ħsibijiet u l-​fehmiet tal-​qalb.” (Lhud 4:12) Iva, il-​Kelma t’Alla għandha l-​qawwa li tilħaq u tmiss il-​qalb taʼ persuna u tbiddlilha l-​mod taʼ kif taħseb u ġġib ruħha. M’huwiex dan li hemm bżonn biex jitbiddlu l-​modi vjolenti tan-​nies illum?

Ix-Xhieda taʼ Jehovah, li issa jlaħħqu madwar ħames miljuni f’iktar minn 230 pajjiż, huma prova ħajja li l-​Kelma t’Alla, tabilħaqq, għandha l-​qawwa li tittrasforma l-​ħajjiet għall-​aħjar. Fosthom hemm nies minn kull nazzjonalità, lingwa, u razza. Jiġu wkoll mil-​livelli tal-​ħajja u l-​ambjenti soċjali kollha. Xi wħud minnhom qabel kienu jgħixu ħajjiet vjolenti u mħawdin. Imma minflok ma ħallew fatturi bħal dawn iqanqlu l-​animożità, ir-​rivalità, id-​diskriminazzjoni, u l-​mibgħeda fosthom, huma tgħallmu jegħelbu dawn l-​ostakli u saru poplu li jħobb il-​paċi u magħqud mad-​dinja kollha. X’għamel dan possibbli?

Kampanja Li Ttemm Il-​Vjolenza

Ix-​Xhieda taʼ Jehovah għandhom l-​obbligu li jgħinu lil oħrajn jakkwistaw għarfien eżatt dwar l-​iskop t’Alla kif irrivelat fil-​Kelma tiegħu, il-​Bibbja. F’kull rokna taʼ l-​art, qegħdin ifittxu ’l dawk li jridu jitgħallmu l-​mogħdijiet taʼ Jehovah u jkunu mgħallmin minnu. L-​isforzi tagħhom qegħdin jagħtu l-​frott. Ir-​riżultat taʼ din il-​kampanja edukattiva huwa li profezija meraviljuża qiegħda tiġi mwettqa.

Xi 2,700 sena ilu, il-​profeta Isaija kien ispirat biex jikteb: “Għad jiġri fl-​aħħar jiem li . . . kotra sħiħa taʼ poplu għad jiġu u jgħidu: ‘Ħalli mmorru u nitilgħu fuq il-​għolja tal-​Mulej, lejn id-​dar taʼ Alla taʼ Ġakobb, biex igħallimna t-​triqat tiegħu, u nimxu fil-​mogħdijiet tiegħu.’”—Isaija 2:2, 3. 

Li tkun mgħallem minn Jehovah u miexi fil-​mogħdijiet tiegħu jistaʼ jipproduċi bidliet mill-​isbaħ fil-​ħajjiet tan-​nies. Waħda mill-​bidliet hija mbassra fl-​istess profezija: “Huma jibdlu x-​xwabel tagħhom f’sikek tal-​moħriet, u l-​lanez tagħhom fi mnieġel. Ebda ġens ma jerfaʼ x-​xabla kontra ġens ieħor, u s-​sengħa tal-​gwerra iżjed ma jitgħallmuhiex.” (Isaija 2:4) Ħafna nies qraw din l-​iskrittura. Fil-​fatt, dan it-​test huwa mnaqqax fuq ħajt fil-​Plaza tal-​Ġnus Magħquda fi New York City. Huwa tfakkira taʼ dak li għalih il-​Ġnus Magħquda taspira imma li falliet iġġib fis-​seħħ. Din l-​eliminazzjoni tal-​gwerra u l-​vjolenza m’hi se tinkiseb minn ebda organizzazzjoni politika magħmula mill-​bniedem. Hija xi ħaġa li Alla Jehovah waħdu kapaċi jagħmel. Kif se jirnexxilu jwettaqha?

Ovvjament mhux kulħadd se jirrispondi għall-​istedina biex ‘jitlaʼ fuq il-​għolja tal-​Mulej’ u biex ‘jitgħallem it-​triqat tiegħu’ u ‘jimxi fil-​mogħdijiet tiegħu’; lanqas ma se jkunu kollha lesti li “jibdlu x-​xwabel tagħhom f’sikek tal-​moħriet, u l-​lanez tagħhom fi mnieġel.” X’se jagħmel Jehovah dwar uħud bħal dawn? M’huwiex se jżomm il-​bieb taʼ l-​opportunità miftuħ għal dejjem jew joqgħod jistennihom jinbidlu. Biex iġib tmiem għall-​vjolenza, Jehovah se jġib ukoll tmiem għal dawk li jinsistu fuq il-​prattiċi vjolenti tagħhom.

Lezzjoni Vitali

Dak li Alla għamel fi żmien Noè jipprovdi lezzjoni taʼ twissija għalina llum. Ir-​rakkont tal-​Bibbja juri x’tip taʼ dinja eżistiet dak inhar: “L-​art tħassret quddiem Alla u mtliet bil-​vjolenza.” Minħabba f’hekk, Alla informa lil Noè: “Għalija tmiem il-​ħajjin kollha wasal, għax mtliet bil-​vjolenza l-​art kollha minħabba fihom. Hawn jien se neqridhom minn wiċċ l-​art.”—Ġenesi 6:11, 13.

Irridu ninnotaw punt wieħed importanti. Huwa u jġib id-​Dilluvju fuq dik il-​ġenerazzjoni, Alla żamm ħajjin lil Noè u l-​familja tiegħu. Għala? Il-​Bibbja twieġeb: “Noè kien bniedem ġust u kien perfett fost in-​nies taʼ żmienu; kien jimxi sewwa maʼ Alla.” (Ġenesi 6:9; 7:1) Waqt li mhux kulmin kien jgħix dak iż-​żmien kien neċessarjament persuna vjolenti, Noè u l-​familja tiegħu biss “kien[u] jimx[u] sewwa maʼ Alla.” Minħabba f’hekk baqgħu ħajjin meta dik id-​dinja vjolenti nġiebet fi tmiem.

Hekk kif naraw l-​art għal darb’ oħra ssir ‘mimlija bil-​vjolenza,’ nistgħu nibqgħu ċerti li Alla m’huwiex sejjer ma jindunax biha. Sewwa sew bħalma għamel fi żmien Noè, hekk dalwaqt se jieħu azzjoni u jġib tmiem għall-​vjolenza​—b’mod permanenti. Imma se jipprovdi wkoll triq għal ħelsien mill-​periklu għal dawk li issa qegħdin jitgħallmu ‘jimxu sewwa m’Alla,’ dawk li qegħdin jirrispondu għall-​kampanja edukattiva grandjuża tiegħu favur il-​paċi.

Permezz tas-​salmista, Jehovah jagħti din l-​assiguranza: “Ftit ieħor, u l-​ħażin ma jkunx aktar; għad tħares fejn kien, u ma ssibux. Imma l-​ġwejdin għad jirtu l-​art, u bi sliem kotran jitgħaxxqu.”—Salm 37:10, 11.

Ix-Xhieda taʼ Jehovah se jkunu henjin li jistudjaw il-​Bibbja miegħek sabiex tkun tistaʼ tingħaqad maʼ dawk li jgħidu: “Ħalli mmorru u nitilgħu fuq il-​għolja tal-​Mulej, lejn id-​dar taʼ Alla taʼ Ġakobb, biex igħallimna t-​triqat tiegħu, u nimxu fil-​mogħdijiet tiegħu.” (Isaija 2:3) Billi tagħmel hekk, tistaʼ tkun fost dawk li se jaraw it-​tmiem tal-​ħażen u l-​vjolenza kollha. Int tistaʼ ‘titgħaxxaq bi sliem kotran.’ (w96 2/15)

[Sors taʼ l-​Istampa f’paġna 5]

Reuters/Bettmann