Imita l-​Ħniena taʼ Jehovah

“Ħennu, bħalma hu ħanin Missierkom.”—LUQA 6:36.

1. Il-​Fariżej kif urew li ma kellhom ebda ħniena?

GĦALKEMM maħluqin fi xbieha t’Alla, il-​bnedmin taʼ spiss jonqsu li jimitaw il-​ħniena tiegħu. (Ġenesi 1:27) Per eżempju, ikkunsidra l-​Fariżej. Dawn bħala grupp, sabuha ferm diffiċli biex jifirħu meta Ġesù bil-​ħniena kollha fejjaq l-​id niexfa taʼ wieħed raġel fil-​ġurnata tas-​Sabat. Minflok, bdew jiftiehmu kont­ra Ġesù dwar “kif se jeqirduh.” (Mattew 12:9-14) F’okkażjoni oħra, Ġesù fejjaq raġel li kien għami mit-​twelid. Għal darb’oħra, “xi wħud mill-​Fariżej” ma raw ebda raġuni għala kellhom jifirħu minħabba l-​mogħdrija li wera Ġesù. Minflok, huma lmentaw: “Dan il-​bniedem m’huwiex ġej mingħand Alla, għax ma jħarisx is-​Sibt.”—Ġwann 9:1-7, 16.

2, 3. Ġesù x’ried ifisser bl-​istqarrija tiegħu, “Ilqgħu ruħkom mill-​ħmira tal-​Fariżej”?

² Il-​qalb iebsa li wrew il-​Fariżej kienet delitt kontra l-​umanità u dnub kontra Alla. (Ġwann 9:39-41) Mhux taʼ b’xejn li Ġesù wissa lid-​dixxipli tiegħu, “Ilqgħu ruħkom mill-​ħmira” taʼ dan il-​grupp taʼ nies li jipp­retenduha u reliġjonisti oħrajn, bħalma kienu s-​Sadduċej. (Mattew 16:6) Fil-​Bibbja, il-​ħmira hija wżata biex tirrappreżenta d-​dnub jew il-​korruzzjoni. Mela Ġesù kien qed jgħid li t-​tagħlim tal-​“kittieba [skribi] u l-​Fariżej” setaʼ jikkorrompi l-​qima pura. Kif? Minħabba li dan għallem lin-​nies biex il-​Liġi t’Alla jqisuha biss f’termini tar-​regoli arbitrarji u r-​ritwali tagħhom, waqt li jinjoraw “dak li hu l-​aqwa,” inkluża l-​ħniena. (Mattew 23:23) Din il-​forma ritwalistika taʼ reliġjon, lill-​qima t’Alla għamlitha tagħbija li ħadd ma kien jiflaħha.

³ Fit-​tieni parti tal-​parabbola tiegħu taʼ l-​iben il-​ħali, Ġesù kixef il-​ħsieb korrott tal-​mexxejja reliġjużi. Fil-​parabbola, il-​missier li jirrappreżenta lil Jehovah, kien ħerqan biex jaħfer lill-​ibnu li kien niedem. Imma ħu t-​tifel, li kien akbar minnu, u li kien jirrappreżenta lil ‘Fariżej u lill-​kittieba [skribi],’ kien jaħsibha kompletament differenti fuq din il-​kwistjoni.—Luqa 15:2.

Il-​Korla taʼ Ħuh

4, 5. Ħu l-​iben il-​ħali f’liema sens kien “mitluf”?

⁴ “Mela ibnu l-​kbir kien fl-​għalqa. Huwa u rieġaʼ lura, kif wasal qrib id-​dar samaʼ daqq u żfin. Sejjaħ wieħed mill-​qaddejja u staqsieh dak x’kien. ‘Hawn ħuk,’ qallu dak, ‘u missierek qatillu l-​għoġol l-​imsemmen, għax raġaʼ kisbu qawwi u sħiħ.’ Hu inkorla, u ma riedx jidħol ġewwa.”—Luqa 15:25-28.

⁵ Jidher ċar li l-​iben il-​ħali ma kienx l-​uniku wieħed li kellu problema. “Iż-​żewġ ulied iffigurati hawnhekk huma mitlufin,” jgħid xogħol wieħed taʼ referenza, “wieħed minħabba n-​nuqqas taʼ tjieba li jiddegradah, u l-​ieħor minħabba li jqis lilu nnifsu bħala twajjeb, u dan jagħmih.” Innota li ħu l-​iben il-​ħali mhux talli rrifjuta li jifraħ imma talli “inkorla.” L-​għerq tal-​kelma “korla” fil-​Grieg jissuġġerixxi, mhux sempliċement li telagħlu u beda jirrabja, imma kundizzjoni kontinwa tal-​moħħ. Milli jidher, ħu l-​iben il-​ħali kien ilu jżomm f’qalbu għal ħuh, u għalhekk ħass li ma kienx xieraq li jiċċelebra r-​ritorn taʼ xi ħadd li wara kollox qatt ma missu telaq mid-​dar.

6. Ħu l-​iben il-​ħali lil min jirrappreżenta, u għala?

⁶ Ħu l-​iben il-​ħali jirrappreżenta tajjeb lil dawk li ma ħadux pjaċir bil-​mogħdrija u l-​attenzjoni li wera Ġesù mal-​midinbin. Dawk li kienu jqisu lilhom infushom bħala twajbin ma tqanqlux mill-​ħniena li wera Ġesù; lanqas ma rriflettew dak il-​ferħ li jkun hemm fis-​sema meta wieħed midneb jiġi maħfur. Minflok, il-​ħniena li Ġesù wera ġagħlithom jinkorlaw, u bdew ‘jaħsbu ħażin’ f’qalbhom. (Mattew 9:2-4) Darba minnhom, xi wħud mill-​Fariżej tant kienu rrabjati li baqgħu baqgħu sakemm sejħu lil dak ir-​raġel li Ġesù kien fejqu, u mbagħad “keċċewh ’il barra” mis-​sinagoga​—mid-​dehra qalftuh ’il barra! (Ġwann 9:22, 34) Il-​mexxejja reliġjużi Lhud, bħal ħu l-​iben il-​ħali li “ma riedx jidħol ġewwa,” irrifjutawha l-​opportunità li kellhom biex ‘jifirħu maʼ min jifraħ.’ (Rumani 12:15) Ġesù kompla jikxef ir-​raġunamenti mill-​agħar tagħhom hekk kif kompla bil-​parabbola tiegħu.

Raġunament Żbaljat

7, 8. (a) Ħu l-​iben il-​ħali b’liema mod ma kienx fehem x’kien verament ifisser li tkun iben? (b) L-​iben il-​kbir fiex kien differenti minn missieru?

⁷ “Iżda missieru ħareġ jitolbu jidħol. ‘Ara,’ qal lil missieru, ‘ili dawn is-​snin koll­ha naqdik, kelmtek ma ksirthielek qatt, u kieku qatt tajtni ġidi lili biex nagħmel ikla u nifraħ maʼ ħbiebi! Mbagħad jiġi dan ibnek, li belagħlek ġidek man-​nisa żienja, u lilu toqtollu l-​għoġol l-​imsemmen!’”—Luqa 15:28-30.

⁸ B’dan il-​kliem, ħu l-​iben il-​ħali għamilha ċara kemm ma kienx fehem x’kien verament ifisser li tkun iben. Hu kien jaqdi lil missieru bil-​mod li wieħed impjegat jaqdi lill-​imgħallem tiegħu. Hu stess hekk qallu lil missieru: “ili . . . naqdik.” Veru li dan l-​iben il-​kbir qatt ma telaq mid-​dar jew kiser il-​kelma taʼ missieru. Imma kienet l-​ubbidjenza tiegħu ġejja mill-​imħabba? Kien hu jħossu verament ferħan li kien qed jaqdi lil missieru, jew minflok kien qed iħossu iktar u iktar sodisfatt bih innifsu, għax ħaseb li kien iben tajjeb sempliċement għax għamel dmiru u ħadem “fl-​għalqa”? Kieku kien verament iben devot, għala naqas li jaħsibha kif kien jaħsibha missieru? Meta kellu opportunità li juri l-​ħniena maʼ ħuh, għala ma kien hemm ebda lok għal mogħdrija f’qalbu?—Qabbel Salm 50:20-22.

9. Spjega kif il-​mexxejja reliġjużi Lhud kienu jixbhu lill-​iben il-​kbir.

⁹ Il-​mexxejja reliġjużi Lhud kienu jixbhu lil dan l-​iben il-​kbir. Kienu jaħsbu li kienu leali lejn Alla għaliex żammew b’mod strett mal-​kodiċi tal-​liġi. Veru, l-​ubbidjenza hija vitali. (1 Samwel 15:22) Imma l-​enfasi żejda li poġġew fuq l-​għemejjel bidlu l-​qima t’Alla f’rutina mekkanika, sempliċi qoxra taʼ devozzjoni b’ebda spiritwalità vera. Moħħhom kien ossessjonat bit-​tradizzjonijiet. L-​imħabba ma kinitx teżisti f’qalbhom. Mhux talli hekk, imma talli lin-​nies komuni kienu jqisuhom bħala trab taħt saqajhom, saħansitra jirreferu għalihom b’disp­rezz bħala “nies misħuta.” (Ġwann 7:49) Tabilħaqq, kif setaʼ Alla jibqaʼ impressjonat bil-​għemejjel taʼ dawn il-​mexxejja meta qalb­hom kienet ferm ’il bogħod minnu?—Mattew 15:7, 8.

10. (a) Il-​kelmiet, “Ħniena rrid, u mhux sagrifiċċju” għala kienu parir f’waqtu? (b) Nuqqas taʼ ħniena kemm huwa serju?

¹⁰ Ġesù qal lill-​Fariżej biex ‘imorru u jitgħallmu x’jiġifieri, “Ħniena rrid, u mhux sagrifiċċju.”’ (Mattew 9:13; Hosegħa 6:6, KŻ) Ma kinux jagħrfu eżattament x’kienu l-​prijoritajiet, għax mingħajr il-​ħniena s-​sagrifiċċji koll­ha tagħhom ma kienu jiswew xejn. Din hija xi ħaġa verament serja, għax il-​Bibbja tistqarr li dawk “bla qalb [“ħniena,” KŻ]” huma magħdudin fost dawk li Alla jgħid li ‘ħaqq­hom il-​mewt.’ (Rumani 1:31, 32) M’għandniex għalfejn niskantaw, għalhekk, li Ġesù qal li bħala klassi, il-​mexxejja reliġjużi kien hemm qerda taʼ dejjem tistenniehom. Jidher ċar li kien in-​nuqqas taʼ ħniena tagħhom li kkontribwixxa l-​iktar biex ikun ħaqq­hom dan il-​ġudizz­ju. (Mattew 23:33) Imma forsi xi individwi minn din il-​klassi setgħu jiġu megħjunin. Bħala konklużjoni għal din il-​parabbola, Ġesù stinka biex jirranġa l-​ħsieb taʼ dawn il-​Lhud permezz tal-​kliem li l-​missier qal lill-​ibnu l-​kbir. Ejjew naraw kif.

Il-​Ħniena taʼ Missier

11, 12. Il-​missier fil-​parabbola taʼ Ġesù kif jipprova jirraġuna maʼ ibnu l-​kbir, u x’jistaʼ jkun sinjifikanti fil-​fatt li l-​missier uża l-​kelma “ħuk”?

¹¹ “‘Ibni,’ qallu missieru, ‘inti dejjem miegħi, u kull ma hu tiegħi huwa tiegħek. Imma kien meħtieġ li nagħmlu festa u nifirħu, għax dan ħuk kien mejjet u raġaʼ qam, kien mitluf u nstab.’”—Luqa 15:31, 32.

¹² Innota li l-​missier uża l-​espressjoni “dan ħuk.” Għala? Sewwa, ftakar li iktar kmieni, meta kellem lil missieru, dan l-​iben il-​kbir kien sejjaħ lill-​iben il-​ħali “ibnek” mhux “ħija.” Donnu ma kienx jirrikonoxxi r-​rabta familjari li kien hemm bejnu u bejn ħuh iż-​żgħir. Għalhekk issa, il-​missier kien fil-​fatt qed jgħid lil dan ibnu l-​kbir: ‘Dan m’huwiex biss ibni. Huwa ħuk l-​għażiż, demmek stess. Ma taħsibx li għandek għalxiex tifraħ li ġie lura?’ Il-​messaġġ taʼ Ġesù suppost kien ċar biżżejjed għall-​mexxejja Lhud. Dawk il-​midinbin li huma kienu jistmerru kienu fir-​realtà “ħuthom.” Tabilħaqq, “ma ssibx bniedem ġust fid-​dinja li jagħmel is-​sewwa bla ma jaqaʼ f’xi ħtija.” (Koħèlet 7:20) Allura l-​Lhud prominenti kellhom għalxiex jifirħu meta l-​midinbin kienu jaslu għall-​indiema.

13. Il-​fatt li l-​parabbola taʼ Ġesù tintemm ħesrem iħallina b’liema mistoqsija li ġġagħalna naħsbu?

¹³ Il-​parabbola tintemm ħesrem wara din it-​talba tal-​missier. Huwa bħallikieku Ġesù qiegħed jistieden lis-​semmiegħa tiegħu biex jagħmluha huma l-​konklużjoni taʼ din l-​istorja. Kien x’kien il-​mod li bih irreaġixxa l-​iben il-​kbir, kull semmiegħ ġie ffaċċjat mill-​mistoqsija, ‘Int se jkollok sehem fil-​ferħ li jiġi esperjenzat fis-​sema meta xi midneb jasal għall-​indiema?’ Il-​Kristjani llum ukoll għandhom l-​opportunità li juru t-​tweġiba tagħhom għal din il-​mistoqsija. Kif?

Nimitaw il-​Ħniena t’Alla Llum

14. (a) Kif nistgħu napplikaw il-​parir taʼ Pawlu misjub f’Efesin 5:1 fejn tidħol il-​ħniena? (b) Għal liema interpretazzjoni żbaljata rigward il-​ħniena t’Alla rridu noqogħdu attenti?

¹⁴ Pawlu wissa lill-​Efesin: “Kunu, mela, tixbhu lil Alla, bħala wlied maħbuba.” (Efesin 5:1) Għaldaqstant, bħala Kristjani għandna napprezzawha l-​ħniena t’Alla, indaħħluha fil-​fond taʼ qalbna, u mbagħad nuru din il-​kwalità fil-​mod kif nittrattaw m’oħrajn. Madankollu, ikun xieraq li noqogħdu attenti. Il-​ħniena t’Alla m’għand­hiex tiġi interpretata ħażin bħala skuża biex innaqqsu s-​serjetà tad-​dnub. Per eżempju, hemm xi wħud li għandhom mnejn jirraġunaw b’indifferenza, ‘Jekk nagħmel dnub, dejjem nistaʼ nitlob lil Alla biex jaħfirli, u hu jkollu ħniena minni.’ Attitudni bħal din hija ekwivalenti għal dak li qal Ġuda, wieħed mill-​kittieba tal-​Bibbja, jiġifieri “li jaqilbu l-​grazzja taʼ Alla tagħna f’żína.” (Ġuda 4) Għalkemm Jehovah huwa mimli ħniena, “ma jħalli xejn għaddej” meta jiġi biex jittratta maʼ dawk li jidinbu imma li ma jridux jindmu.—Eżodu 34:7; qabbel Ġożwè 24:19; 1 Ġwann 5:16.

15. (a) L-​anzjani b’mod partikulari għala għandhom bżonn iżommu ħarsa bbilanċjata tal-​ħniena? (b) Waqt li ma jittollerawx lil min jidneb apposta, l-​anzjani x’għandhom jistinkaw biex jagħmlu, u għala?

¹⁵ Mill-​banda l-​oħra, għandna bżonn inkunu daqstant attenti li ma mmorrux fl-​estrem l-​ieħor​—tendenza li nsiru riġidi u niġġudikaw lil dawk li juru ndiema ġenwina u jitnikktu bil-​mod kif irid Alla, minħabba dnubiethom. (2 Korintin 7:11) Ladarba l-​anzjani huma fdati biex jieħdu ħsieb in-​nagħaġ taʼ Jehovah, huwa essenzjali li dawn iżommu ħarsa bbilanċjata f’dan ir-​rigward, speċjalment meta jittrattaw kwistjonijiet ġudizzjali. Il-​kongregazzjoni Kristjana trid tinżamm nadifa, u huwa xieraq skond l-​Iskrittura li ‘jitneħħa l-​bniedem il-​ħażin’ billi jiġi maqtugħ mis-​sħubija. (1 Korintin 5:11-13) Fl-​istess ħin, huwa tajjeb li tintwera ħniena meta jkun hemm bażi ċara għal dan. Għalhekk, waqt li l-​anzjani ma jittollerawx lil min jidneb apposta, huma jistinkaw biex ifittxu korsa taʼ mħabba u ħniena, li tkun fil-​limitu tal-​ġustizzja. Huma dejjem iżommu dan il-​prinċipju Bibliku quddiem għajnejhom: “Il-​ħaqq ikun bla ħniena għal min ma jurix ħniena; u l-​ħniena tirbaħ fuq il-​ħaqq.”—Ġakbu 2:13; Proverbji 19:17; Mattew 5:7.

16. (a) Permezz tal-​Bibbja uri kif Jehovah verament jixtieq li l-​midinbin jerġgħu lura għandu. (b) Kif nistgħu nuru li anki aħna nieħdu gost bir-​ritorn taʼ midinbin li jaslu għall-​indiema?

¹⁶ Il-​parabbola taʼ l-​iben il-​ħali tagħmilha ċara li Jehovah jixtieq li dawk li jidinbu jerġgħu lura għandu. Tabilħaqq, hu jibqaʼ jistedinhom sakemm ma jkunx hemm iktar tama għalihom. (Eżekjel 33:11; Malakija 3:7; Rumani 2:4, 5; 2 Pietru 3:9) Bħall-​missier taʼ dak l-​iben il-​ħali, Jehovah jittrattahom bid-​dinjità lil dawk li jerġgħu lura, u jaċċettahom lura u jirrikonoxxihom bis-​sħiħ bħala membri tal-​familja. Qiegħed int timitah lil Jehovah f’dan ir-​rigward? Kif taġixxi meta wieħed taʼ l-​istess twemmin, li għal xi żmien kien maqtugħ mis-​sħubija, jerġaʼ jiġi aċċettat bħala membru tal-​kongregazzjoni? Aħna diġà nafu li jkun hemm ‘ferħ fis-​smewwiet.’ (Luqa 15:7) Imma jkun hemm ferħ fuq l-​art, fil-​kongregazzjoni tiegħek, u saħansitra f’qalbek? Jew, bħal fil-​każ taʼ l-​iben il-​kbir fil-​parabbola, qed iżżomm f’qalbek, bħallikieku dak l-​individwu ma jixraqlux li jiġi milqugħ għax wara kollox qatt ma missu telaq mill-​merħla t’Alla?

17. (a) Liema sitwazzjoni żviluppat f’Korintu fl-​ewwel seklu, u Pawlu x’parir ta lil dawk fil-​kongregazzjoni fuq kif jittrattaw il-​kwistjoni? (b) It-​twissija taʼ Pawlu għala kienet prattika, u kif nistgħu napplikawha llum? (Ara wkoll il-​kaxxa fuq il-​lemin.)

¹⁷ Biex jgħinna neżaminaw lilna nfusna f’dan ir-​rigward, ikkunsidra x’ġara għall-​ħabta tas-​sena 55 E.K. f’Korintu. Hemmhekk, raġel li kien tkeċċa mill-​kongregazzjoni fl-​aħħar irranġa ħajtu. L-​aħwa x’kellhom jagħmlu? Kellhom huma jiddubitaw mill-​indiema tiegħu u jkomplu jevitawh? Għall-​kuntrarju, Pawlu ħeġġeġ lill-​Korintin: “Mela issa intom għandkom tħennu għalih u tfarrġuh, li ma jmurx jaqtaʼ jiesu taħt it-​toqol tan-​niket. Għalhekk nitlobkom turuh imħabbitkom għalih.” (2 Korintin 2:7, 8) Taʼ spiss, dawk li jiżbaljaw u juru ndiema jkunu suxxettibb­li partikolarment għal sentimenti taʼ diżunur u disperazzjoni. Għaldaqstant, dawn ikunu jeħtieġu li jkollhom l-​assiguranza li kemm sħabhom fit-​twemmin u kemm Jehovah jħobbuhom. (Ġeremija 31:3; Rumani 1:12) Dan huwa vitali. Għala?

18, 19. (a) Il-​Korintin kif urew li iktar qabel kienu indulġenti żżejjed? (b) Attitudni bla ħniena kif irriżultat f’li l-​Korintin ‘jiġu megħlubin mix-​Xitan’?

¹⁸ Waħda mir-​raġunijiet li Pawlu ta meta kien qed iwissi lill-​Korintin ħalli jipprattikaw il-​maħfra kienet, biex ‘ma jegħlibniex ix-​Xitan, għax nafu x’inhuma l-​ħsibijiet tiegħu.’ (2 Korintin 2:11) X’ried jgħid biha? Sewwa, iktar qabel Pawlu kellu jċanfar lill-​kongregazzjoni taʼ Korintu għax kienet indulġenti żżejjed. Huma kienu ppermettew lil dan l-​istess raġel ikompli għaddej bi dnubu qisu qatt ma kien xejn. Minħabba li għamlet hekk, il-​kongregazzjoni​—b’mod partikulari l-​anzjani—​bdew jogħġbu lil Satana, għax tgħidx kemm kien jieħu gost kieku rnexxielu jġib isem ħażin fuq il-​kongregazzjoni.—1 Korintin 5:1-5.

¹⁹ Jekk issa jmorru fl-​estrem l-​ieħor u jirrifjutaw li jaħfru lil dak li jkun nidem, Satana jkun qed jegħlibhom b’mod ieħor. Kif? Billi hu setaʼ japprofitta ruħu mill-​fatt li huma jkunu qed ikunu ħorox u bla ħniena. Jekk xi midneb li jkun nidem “jaqtaʼ jiesu taħt it-​toqol tan-​niket”​—jew bħalma tgħid il-​Bibbja taʼ Karm Żammit ‘jinbalaʼ bil-​kobor żejjed tan-​niket tiegħu’—​ara l-​anzjani x’responsabbiltà kbira jkollhom quddiem Jehovah! (Qabbel Eżekjel 34:6; Ġakbu 3:1.) Kellu raġun Ġesù, wara li wissa lis-​segwaċi tiegħu kontra li jfixklu “lil wieħed minn dawn iċ-​ċkejknin,” jgħid: “Oqogħdu attenti! Jekk ħuk jaqaʼ f’xi dnub, widdbu, u jekk jindem aħfirlu.”a (Korsiv tagħna.)—Luqa 17:1-4.

20. B’liema mod ikun hemm ferħ kemm fis-​sema u kemm fuq l-​art meta xi midneb jindem?

²⁰ L-​eluf li jerġgħu lura għall-​qima pura kull sena huma grati għall-​ħniena li Jehovah wera magħhom. “Qatt ma niftakar li kien hemm xi żmien f’ħajti li kont daqshekk ferħana fuq xi ħaġa,” tgħid oħt Kristjana dwar il-​fatt li ġiet aċċettata lura bħala parti mill-​kongregazzjoni. M’għandniex xi ngħidu, il-​ferħ tagħha jidwi fost l-​anġli. Jalla aħna wkoll ningħaqdu mal-​‘ferħ fis-​smewwiet’ li jseħħ meta xi midneb jasal għall-​indiema. (Luqa 15:7) Meta nagħmlu dan, inkunu qed nimitaw il-​ħniena taʼ Jehovah.

[Nota taʼ taħt]

Bħala Reviżjoni

◻ Ħu l-​iben il-​ħali b’liema mod kien jixbah lill-​mexxejja reliġjużi Lhud?

◻ Ħu l-​iben il-​ħali b’liema mod ma kienx fehem x’kien verament ifisser li tkun iben?

◻ Meta nirriflettu fuq il-​ħniena t’Alla, liema żewġ estremi jeħtieġ li nevitaw?

◻ Kif nistgħu nimitaw il-​ħniena t’Alla llum?

[Kaxxa f’paġna 17]

‘URU MĦABBITKOM GĦALIH’

Rigward il-​midneb li tkeċċa u li kien wera ndiema, Pawlu qal lill-​kongregazzjoni Kristjana: “Nitlobkom turuh imħabbitkom għalih.” (2 Korintin 2:8) Il-​kelma Griega tradotta “turuh” hija terminu legali li jfisser li “tagħmel validu.” Iva, uħud li jkunu wrew indiema u li jiġu aċċettati lura fil-​kongregazzjoni jeħtieġ li jħossu li huma maħbubin u milqugħin mill-​ġdid bħala membri tal-​kongregazzjoni.

Irridu niftakru, madankollu, li l-​biċċa l-​kbira fil-​kongregazzjoni ma jkunux jafu preċiżament x’kienu ċ-​ċirkustanzi partikulari li wasslu biex individwu jitkeċċa jew biex jiġi aċċettat lura fil-​kongregazzjoni. Barra minn hekk, jistaʼ jkun hemm xi wħud li kienu effettwati jew imweġġ­għin personalment​—forsi b’konsegwenzi għal tul taʼ żmien​—​mill-iżball taʼ dak li jkun nidem. Għalhekk, billi nkunu sensittivi fi kwistjonijiet bħal dawn, meta jsir xi avviż dwar xi ħadd li jkun ġie aċċettat lura fil-​kongregazzjoni, aħna nistgħu nifhmu għala ma nlissnux espressjonijiet taʼ merħba sakemm dawn ikunu jistgħu jsiru fuq bażi persunali.

Kemm isaħħaħ il-​fidi taʼ dawk li jkunu ġew aċċettati lura fil-​kongregazzjoni meta jsiru jafu li ntlaqgħu lura bħala membri tal-​kongregazz­joni Kristjana! Nistgħu ninkuraġġixxu lil dawn l-​individwi li juru ndiema billi nitkellmu magħhom u nieħdu gost nissieħbu magħhom fis-​Sala tas-​Saltna, fil-​ministeru, u f’okkażjonijiet addattati oħrajn. Billi nuru, jew nagħmlu valida, l-​imħabba tagħna għal dawn l-​individwi għeżież, ma nkunu bl-​ebda mod qegħdin inċekknu s-​serjetà tad-​dnubiet li kkommettew. Minflok, flimkien mal-​qtajjaʼ tas-​sema, aħna nifirħu għall-​fatt li huma ċaħdu l-​korsa midinba u reġgħu lura għand Jehovah.—Luqa 15:7.

[Stampa f’paġna 15]

L-​iben il-​kbir irrifjuta li jifraħ għar-​ritorn taʼ ħuh