Aħna Naqdu lil Alla li Juri Ħafna Ħniena

1. X’jistaʼ jiġina f’moħħna meta naħsbu dwar persuna li turi l-​ħniena?

META naħsbu dwar persuna li turi ħniena, forsi jiġina f’moħħna xi ħadd li hu dħuli, qalbu tajba, iħoss għal dak li jkun, u ġeneruż. Jaf niftakru wkoll l-​istorja li qal Ġesù dwar is-​Samaritan it-​tajjeb. Dan ir-​raġel “aġixxa bil-​ħniena” maʼ Lhudi li kien misruq u msawwat mill-​ħallelin. Is-​Samaritan “tħassru” u bi mħabba ħa ħsiebu. (Lq. 10:29-​37) Minn din l-​istorja nistgħu nitgħallmu ħafna dwar il-​ħniena—kwalità sabiħa li għandu Alla. Alla jħobbna, u għalhekk hu juri l-​ħniena magħna b’diversi modi kuljum.

2. X’inhu mod ieħor kif persuna turi l-​ħniena?

² X’tistaʼ tagħmel ukoll persuna li turi l-​ħniena? Hi tistaʼ tagħżel li ma tagħtix il-​kastig lil xi ħadd li jkun żbalja. Ġeħova hekk jagħmel magħna. Is-​salmista jgħid li Ġeħova “m’għamlilniex skond dnubietna.” (Salm 103:10) Imma xi kultant, Ġeħova jkollu bżonn jiddixxiplina lil persuna li tkun għamlet dnub serju.

3. Liema mistoqsijiet ser inwieġbu?

³ F’dan l-​artiklu ser inwieġbu tliet mistoqsijiet: Ġeħova għala juri l-​ħniena? Huwa possibbli li tiddixxiplina lil xi ħadd u fl-​istess ħin turi l-​ħniena miegħu? U x’jistaʼ jgħinna nuru din il-​kwalità? Ejja naraw kif il-​Kelma t’Alla twieġeb dawn il-​mistoqsijiet.

ĠEĦOVA GĦALA JURI L-​ĦNIENA?

4. Ġeħova għala juri l-​ħniena?

⁴ Ġeħova jħobb juri l-​ħniena. L-​appostlu Pawlu kiteb li Alla hu “għani fil-​ħniena.” Hawnhekk, Pawlu kien qed jispjega li Alla wera l-​ħniena mal-​midlukin, għax minkejja li huma imperfetti, tahom it-​tama li jgħixu fis-​sema. (Efes. 2:4-​7) Imma Ġeħova ma jurix ħniena mal-​midlukin biss. David kiteb: “Ġeħova hu tajjeb maʼ kulħadd, u l-​ħniniet tiegħu huma fuq xogħlijietu kollha.” (Salm 145:9) Minħabba li Ġeħova jħobb lin-​nies, hu jieħu kull opportunità biex juri l-​ħniena magħhom.

5. Ġesù kif tgħallem dwar il-​ħniena taʼ Ġeħova?

⁵ L-​iktar wieħed li jaf kemm Ġeħova jħobb juri l-​ħniena hu Ġesù. Qabel Ġesù ġie fuq l-​art, kien ilu eluf taʼ snin maʼ Ġeħova fis-​sema. (Prov. 8:30, 31) Ġesù ra lil Missieru juri l-​ħniena għal ħafna drabi maʼ bnedmin imperfetti. (Salm 78:37-​42) U meta għallem, Ġesù spiss tkellem dwar din il-​kwalità sabiħa li għandu Missieru.

6. Ġesù kif għenna nifhmu l-​ħniena li juri Ġeħova?

⁶ Kif semmejna fl-​artiklu taʼ qabel dan, Ġesù rrakkonta l-​istorja tal-​iben il-​ħali biex jgħinna nifhmu kemm Ġeħova jħobb juri ħniena. It-​tifel kien telaq mid-​dar u “berbaq ġidu billi għex ħajja sfrattata.” (Lq. 15:13) Iktar tard, hu vera ddispjaċieh għall-​ħażen li kien għamel, u reġaʼ mar lura d-​dar. Missieru kif aġixxa? Ġesù qal: “Waqt li kien għadu ’l bogħod, missieru lemħu u ħassu mqanqal u tħassru, u telaq jiġri u għannqu u biesu b’tenerezza.” Il-​missier ma ġegħlux iħossu skomdu lit-​tifel tiegħu. Minflok, urieh ħniena u ħafirlu u reġaʼ laqgħu lura. Minkejja l-​ħażen kollu li għamel, għax hu vera ddispjaċieh, missieru ħafirlu. Dan il-​missier li wera l-​ħniena mat-​tifel tiegħu jirrappreżenta lil Ġeħova. Permezz taʼ din l-​istorja li tmiss il-​qalb, Ġesù qed jurina li Ġeħova jaħfer lil dawk kollha li vera jiddispjaċihom għal dak li jkunu għamlu.—Lq. 15:17-​24.

7. Mill-​mod kif Ġeħova juri l-​ħniena, kif juri li hu għaref ħafna?

⁷ Ġeħova juri l-​ħniena għax hu għaref ħafna. Id-​deċiżjonijiet li jieħu Ġeħova huma dejjem taʼ ġid għalina. Il-​Bibbja tgħid li “l-​għerf li ġej minn fuq” hu “mimli ħniena u frott tajjeb.” (Ġak. 3:17) Bħal ġenitur li jħobb, Ġeħova jaf li meta juri ħniena mal-​qaddejja tiegħu tkun għall-​ġid tagħhom. (Salm 103:13; Is. 49:15) Grazzi għall-​ħniena taʼ Ġeħova, aħna għandna tama sabiħa għall-​futur minkejja li aħna imperfetti. U għax l-​għerf taʼ Ġeħova hu bla limitu, hu juri l-​ħniena meta jara li hemm raġuni biex jagħmel dan. Però ma jfissirx li għax Ġeħova juri l-​ħniena, jagħlaq għajnejh għall-​ħażen.

8. Xi kultant xi jkun hemm bżonn li jsir, u għala?

⁸ Ejja ngħidu li Xhud jibda jgħix ħajja li ma togħġobx lil Ġeħova. Aħna x’għandna nagħmlu? Ġeħova qal lil Pawlu biex jikteb: “Tibqgħux tagħmluha” miegħu. (1 Kor. 5:11) Meta xi ħadd ma jiddispjaċihx għall-​ħażin li jkun qed jagħmel, jiġi maqtugħ mis-​sħubija. Dan huwa importanti biex l-​aħwa jkunu protetti u nuru li naċċettaw il-​livelli taʼ Ġeħova. Imma xi wħud jaħsbu li meta xi ħadd jiġi maqtugħ mis-​sħubija, Alla ma jkunx wera ħniena miegħu. Huwa veru dan? Ejja naraw.

META XI ĦADD JIĠI MAQTUGĦ MIS-​SĦUBIJA, TKUN INTWERIET ĦNIENA?

9-10. Skont Ebrej 12:5, 6, għala meta xi ħadd jiġi maqtugħ mis-​sħubija tkun intweriet il-​ħniena? Agħti eżempju.

⁹ Meta nisimgħu avviż li xi ħadd li nafu u nħobbu “m’għadux wieħed mix-​Xhieda taʼ Ġeħova,” aħna nħossuna mdejqin ħafna. Forsi naħsbu li ma kellux għalfejn jiġi maqtugħ mis-​sħubija. Meta jiġri hekk, tkun intweriet ħniena mal-​persuna? Iva. Jekk xi ħadd li għamel dnub ma jiġix iddixxiplinat meta jkun hemm bżonn, hu ma jkunx qed jintwera l-​għerf, il-​ħniena, u l-​imħabba. (Prov. 13:24) Meta xi ħadd jiġi maqtugħ mis-​sħubija, jistaʼ mbagħad jiddispjaċih għal dak li għamel u jinbidel? Iva. Ħafna aħwa li kienu qegħdin jagħmlu dnubiet serji qalu li meta ġew maqtugħin mis-​sħubija, dan għenhom biex jindunaw kemm kien serju d-​dnub li għamlu, jiġu f’sensihom, ibiddlu l-​mod taʼ kif jgħixu ħajjithom, u jerġgħu lura għand Ġeħova.—Aqra Ebrej 12:5, 6.

¹⁰ Ejja nġibu eżempju. Ragħaj induna li waħda min-​nagħaġ hi marida. Hu jaf li biex ifejjaq lil din in-​nagħġa għandu jifridha minn mal-​merħla. In-​nagħaġ jieħdu pjaċir ikunu flimkien, u jibżgħu ħafna meta jkunu weħidhom. Imma meta r-​ragħaj jifred in-​nagħġa minn mal-​merħla, ifisser li hu kattiv? Dażgur li le. Hu jaf li jekk in-​nagħġa se tibqaʼ mal-​merħla, in-​nagħaġ l-​oħrajn se jimirdu wkoll. Billi jneħħiha minn magħhom, hu jkun qed jipproteġi l-​merħla kollha.—Qabbel Levitiku 13:3, 4.

11. (a) Xi ħadd li jkun ġie maqtugħ mis-​sħubija, kif nistgħu nqabbluh maʼ nagħġa marida? (b) Xi ħadd li hu maqtugħ mis-​sħubija x’jistaʼ jagħmel, u x’għajnuna jistaʼ jirċievi?

¹¹ Nistgħu nqabblu lil Kristjan li ġie maqtugħ mis-​sħubija maʼ nagħġa marida. Hu marid spiritwalment għax għamel il-​ħsara lill-​ħbiberija tiegħu maʼ Ġeħova. (Ġak. 5:14) Issa, bħalma xi ħadd marid jistaʼ jmarrad lil oħrajn, xi ħadd li għamel il-​ħsara lill-​ħbiberija tiegħu maʼ Ġeħova jistaʼ jaffettwa ħażin lill-​aħwa. Għalhekk, f’ċerti każi jkun hemm bżonn li l-​persuna tiġi maqtugħa mis-​sħubija. Din id-​dixxiplina turi li Ġeħova jħobb lill-​aħwa leali fil-​kongregazzjoni, u tistaʼ tgħin lil dak li jkun għamel id-​dnub biex jinduna bil-​ħażen li għamel u jiddispjaċih. Waqt li jkun maqtugħ mis-​sħubija, hu jistaʼ jattendi l-​laqgħat biex jirċievi l-​ikel spiritwali u jerġaʼ jsaħħaħ il-​fidi tiegħu. Hu jistaʼ wkoll jaqra l-​letteratura u jara l-​JW Broadcasting^®. U meta l-​anzjani jaraw li qed jagħmel il-​bidliet, minn żmien għal żmien jistgħu jtuh pariri biex jgħinuh jirranġa l-​ħbiberija tiegħu maʼ Ġeħova. B’hekk ikun jistaʼ jerġaʼ jiġi aċċettat lura bħala wieħed mix-​Xhieda taʼ Ġeħova.b

12. L-​anzjani kif jistgħu juru l-​imħabba u l-​ħniena maʼ persuna li ma jkunx iddispjaċieha għal dak li għamlet?

¹² Huwa importanti li niftakru li dawk biss li ma jiddispjaċihomx għad-​dnub li għamlu jiġu maqtugħin mis-​sħubija. L-​anzjani jafu li jridu joqogħdu attenti ħafna qabel jiddeċiedu li jaqtgħu lil xi ħadd mis-​sħubija. Huma jafu li Ġeħova jiddixxiplina lil persuna ‘kemm ikun jistħoqqilha,’ u hu jridhom jagħmlu l-​istess. (Ġer. 30:11) Huma jħobbuhom lill-​aħwa, u żgur li ma jkunux iridu jagħmlu xi ħaġa li tagħmel il-​ħsara lill-​ħbiberija tal-​aħwa maʼ Ġeħova. Imma xi kultant, l-​uniku mod kif juru l-​imħabba u l-​ħniena hu billi jaqtgħu mis-​sħubija għal perjodu taʼ żmien lil persuna li tkun għamlet id-​dnub.

13. Kristjan f’Korintu għala kellu jiġi maqtugħ mis-​sħubija?

¹³ Aħseb dwar dak li għamel l-​appostlu Pawlu lil xi ħadd li mhux vera ddispjaċieh għal dak li għamel. Kristjan f’Korintu kien qed jgħix ħajja immorali mal-​mara taʼ missieru. Din kienet xi ħaġa diżgustanti! Pawlu kien jaf li Ġeħova qal lill-​Iżraelin: “Raġel li jimtedd maʼ mart missieru jkun kixef l-​għera taʼ missieru. It-​tnejn li huma żgur li għandhom jingħataw il-​mewt.” (Lev. 20:11) Ovvjament, Pawlu ma setax jgħid lill-​kongregazzjoni li dan il-​Kristjan għandu jiġi maqtul. Imma hu qal lill-​Korintin biex jaqtgħuh mis-​sħubija. Il-​ħażen li beda jagħmel dan ir-​raġel beda jaffettwa lil oħrajn fil-​kongregazzjoni. Fil-​fatt, xi wħud fil-​kongregazzjoni ħasbu li ma kien qed jagħmel xejn ħażin.—1 Kor. 5:1, 2, 13.

14. Pawlu kif wera ħniena mar-​raġel li ġie maqtugħ mis-​sħubija f’Korintu, u għala? (2 Korintin 2:5-​8, 11)

¹⁴ Iktar tard, Pawlu sar jaf li dan ir-​raġel għamel bidliet kbar. Hu kien vera ddispjaċieh għal dak li għamel! Għalkemm dan ir-​raġel ġab tmaqdir fuq il-​kongregazzjoni, Pawlu qal lill-​anzjani li hu ma riedx ikun “aħrax wisq.” Hu qalilhom: “Għandkom taħfrulu b’qalb tajba u tfarrġuh.” Pawlu qalilhom hekk biex “ma jmurx dan jinbelaʼ għax ikun sewwed qalbu żżejjed.” Pawlu tħassru lil dan ir-​raġel li vera ddispjaċieh għal dak li għamel. Għalhekk, hu ma riedx jara lil dan ir-​raġel jaqtaʼ qalbu tant li ma jkomplix jirranġa l-​ħbiberija tiegħu maʼ Ġeħova.—Aqra t-​2 Korintin 2:5-​8, 11.

15. L-​anzjani kif jiddixxiplinaw u fl-​istess ħin juru l-​ħniena?

¹⁵ Bħal Ġeħova, l-​anzjani jħobbu juru l-​ħniena. Jekk ikun hemm bżonn, huma jiddixxiplinaw b’mod sod lil dak li jkun għamel id-​dnub, imma fejn hu possibbli juru wkoll il-​ħniena. Jekk l-​anzjani ma jagħmlux hekk, ma jkunux qed juru ħniena, anzi jkunu qed jagħlqu għajnejhom għall-​ħażin li jkun qed jagħmel. Imma, l-​anzjani biss għandhom juru l-​ħniena?

X’JISTAʼ JGĦINNA BIEX NURU L-​ĦNIENA?

16. Skont Proverbji 21:13, Ġeħova x’jagħmel maʼ dawk li ma jurux ħniena?

¹⁶ Bħal Ġeħova, il-​Kristjani kollha għandhom juru l-​ħniena. Għala? Raġuni waħda hi minħabba li Ġeħova mhux se jismaʼ lil dawk li ma jurux ħniena m’oħrajn. (Aqra Proverbji 21:13.) Aħna żgur nixtiequ li Ġeħova jismaʼ t-​talb tagħna. Għalhekk, għandna dejjem nuru l-​ħniena. Aħna għandna nkunu dejjem lesti li nisimgħu lil ħu jew oħt li tkun qiegħda tbati. Għandna nagħmlu l-​almu tagħna biex napplikaw il-​lezzjoni li nsibu f’dan il-​vers: “Min ma jipprattikax il-​ħniena se jiġi ġudikat mingħajr ħniena.” (Ġak. 2:13) Jekk aħna naċċettaw li għandna bżonn nintwerew il-​ħniena, x’aktarx li se nuru l-​ħniena wkoll. Aħna għandna nuru l-​ħniena speċjalment maʼ ħu jew oħt li tkun reġgħet ġiet aċċettata lura fil-​kongregazzjoni.

17. Is-​Sultan David kif wera l-​ħniena?

¹⁷ Fil-​Bibbja nsibu eżempji li jgħinuna kif nuru l-​ħniena u ma nkunux ħorox. Pereżempju, aħseb dwar is-​Sultan David. Hu wera l-​ħniena ħafna drabi. Minkejja li Sawl ried joqtlu, David wera l-​ħniena mas-​sultan li Ġeħova kien għażel. Hu qatt ma prova jpattihielu jew jagħmillu l-​ħsara.—1 Sam. 24:9-​12, 18, 19.

18-19. F’liema żewġ okkażjonijiet David ma weriex ħniena?

¹⁸ Però, David mhux dejjem wera l-​ħniena. Pereżempju, Nabal vera kien raġel aħrax. Darba waħda, hu beda jgħajjar lil David u ma riedx jagħti ikel lilu u lis-​suldati tiegħu. Għalhekk, David irrabja ħafna u ddeċieda li joqtol lil Nabal u lill-​irġiel li jgħixu fid-​dar tiegħu. Imma l-​mara taʼ Nabal, Abigajl, kienet qalbha tajba u paċenzjuża, u hi tat l-​ikel lil David. Għalhekk, David ma qatilx lil Nabal u l-​irġiel tiegħu.—1 Sam. 25:9-​22, 32-​35.

¹⁹ F’okkażjoni oħra, il-​profeta Natan qal storja lil David dwar raġel sinjur li seraq l-​unika nagħġa li kellu raġel fqir. Malli semaʼ dan, David irrabja ħafna u qal: “Daqskemm hu ħaj Ġeħova, ir-​raġel li għamel dan jistħoqqlu jmut!” (2 Sam. 12:1-​6) David kien jaf li l-​Liġi Mosajka tgħid li min jisraq nagħġa għandu jagħti lura erbgħa. (Eżo. 22:1) Allura, David kien vera aħrax meta qal li dak li seraq in-​nagħġa kien ħaqqu l-​mewt. Natan kien qed jgħid l-​istorja lil David biex jgħinu jifhem li dak li għamel hu kien ħafna agħar! U Ġeħova ma kienx aħrax maʼ David bħalma kien hu maʼ dak ir-​raġel li seraq in-​nagħġa.—2 Sam. 12:7-​13.

20. X’nistgħu nitgħallmu mill-​eżempju taʼ David?

²⁰ Meta David kien irrabjat, hu ried li Nabal u l-​irġiel kollha tiegħu jiġu maqtulin. U iktar tard, David qal li r-​raġel sinjur li seraq in-​nagħġa fl-​istorja taʼ Natan għandu jiġi maqtul ukoll. David kien qalbu tajba, allura għala ġġudika bl-​aħrax lir-​raġel li seraq in-​nagħġa? Aħseb dwar dak li kien għaddej minnu f’dak ż-​żmien. David kien qed iħoss il-​kuxjenza tniggżu. Meta xi ħadd jiġġudika bl-​aħrax, ikun qed juri li l-​ħbiberija tiegħu maʼ Ġeħova mhix b’saħħitha. Ġesù wissa lid-​dixxipli tiegħu: “Tibqgħux tiġġudikaw biex ma tiġux ġudikati; għax bl-​istess ġudizzju li tiġġudikaw, tiġu ġudikati; u bil-​kejl li tkejlu, ikejlulkom.” (Mt. 7:1, 2) Mela ejja noqogħdu attenti biex ma niġġudikawx bl-​aħrax, u naħdmu iebes biex dejjem nuru l-​ħniena bħal Alla.

21-22. Aħna kif nistgħu nuru l-​ħniena?

²¹ Li nuru ħniena ma jfissirx biss li nitħassru lill-​oħrajn, imma rridu nagħmlu xi ħaġa biex ngħinu. Ilkoll kemm aħna nistgħu naraw min għandu bżonn l-​għajnuna fil-​familja, fil-​kongregazzjoni, u fejn ngħixu. U żgur se jkollna ħafna opportunitajiet biex nuru ħniena! Taf lil xi ħadd li għandu bżonn l-​għajnuna? Tistaʼ tgħinu billi forsi tipprovdilu xi ikel jew b’affarijiet bżonjużi oħrajn? Hemm xi ħadd li ġie aċċettat lura u għandu bżonn ħabib biex jiġi inkuraġġit? Tistaʼ tipprietka l-​messaġġ tal-​aħbar tajba lil oħrajn? Dan hu wieħed mill-​aħjar modi kif nuru l-​ħniena maʼ kulħadd.—Ġob 29:12, 13; Rum. 10:14, 15; Ġak. 1:27.

²² Jekk noqogħdu attenti għal dawk li għandhom bżonn xi għajnuna bħalma semmejna, se naraw li hemm ħafna opportunitajiet kif nistgħu nuru l-​ħniena. Meta aħna nuru l-​ħniena se nferrħu lil Missierna tas-​sema għax hu juri ħafna ħniena!