Il-​Kelma Profetika t’Alla Tagħti Tama għall-​Futur

GRAZZI għall-​Kelma t’Alla, il-​Bibbja Mqaddsa, il-​Kristjani veri jħarsu lejn il-​futur b’fidi, tama, u ottimiżmu. Huma jħarsu ’l quddiem lejn il-​futur minħabba li jħossuhom żguri fir-​relazzjoni tagħhom m’Alla Jehovah. Bħalma spjegat l-​ewwel taħdita tal-​Konvenzjonijiet Distrettwali “Il-​Kelma Profetika t’Alla”, ix-​Xhieda taʼ Jehovah ilhom studenti entużjasti tal-​profeziji tal-​Bibbja għal snin sħaħ. Għalhekk, Jehovah x’kellu merfugħ għall-​poplu tiegħu f’dawn il-​konvenzjonijiet? Armati bil-​Bibbji f’idejhom, dawk kollha preżenti kienu ħerqanin li jsiru jafu. It-​tema taʼ kull jum tal-​konvenzjoni hija preżentata bħala sottitlu separat.

L-​EWWEL JUM: Nimxu fid-​Dawl tal-​Kelma t’Alla

It-​taħdita “Il-​Kelma t’Alla Mexxietna” spjegat li l-​poplu taʼ Jehovah huwa bħal wieħed li jibda vjaġġ fid-​dlam tal-​lejl. Hekk kif ix-​xemx tkun tielgħa, jibda jara biss dellijiet, imma meta x-​xemx tiddi direttament minn nofs is-​sema, jibda jara l-​affarijiet fid-​dettall. Bħalma ġie mbassar fi Proverbji 4:​18, in-​nies taʼ Jehovah issa qed jaraw ċar minfejn għandhom jgħaddu permezz tad-​dawl tax-​xemx kollu dija tal-​verità mill-​kelma profetika t’Alla. Ma jitħallewx jitfixklu fid-​dlam spiritwali.

L-indirizz taʼ qofol, “Oqgħod Attent għall-​Kelma Profetika t’Alla,” fakkar lis-​semmiegħa li dawk li jfittxu lil Jehovah huma meħlusin mid-​diżappunt u d-​delużjoni li jesperjenzaw dawk li jsegwu messijiet foloz u profeti foloz. F’kuntrast kbir maʼ dawn, il-​kredenzjali tal-​veru Messija, Ġesù Kristu, huma abbundanti! Per eżempju, it-​trasfigurazzjoni mirakoluża taʼ Ġesù pprovdiet dehra tiegħu bil-​quddiem bħala s-​Sultan tas-​Saltna t’Alla mqiegħed fuq it-​tron. Minn mindu ġie fil-​qawwa tas-​Saltna fl-​1914, Ġesù hu wkoll il-​“kewkba taʼ filgħodu” msemmija fit-​2 Pietru 1:19. “Bħala l-​Kewkba Messjanika taʼ Fil-​għodu, hu jagħti merħba lil jum ġdid, jew era ġdida, li jżernaq għall-​umanità ubbidjenti kollha,” qal il-​kelliemi.

It-taħdita “Niddu Bħala Dawwala,” li introduċiet il-​programm taʼ wara nofsinhar, fetħet fuq Efesin 5:8 [KŻ], fejn l-​appostlu Pawlu jagħtina l-​parir biex nibqgħu ‘nimxu bħala wlied id-​dawl.’ Il-​Kristjani huma dawwala, mhux sempliċement billi jaqsmu l-​Kelma t’Alla m’oħrajn imma wkoll billi japplikaw il-​Bibbja f’ħajjithom bħalma għamel Ġesù.

Sabiex inkunu dawwala taʼ dan it-​tip, aħna rridu ‘Nitgħaxxqu bil-​Qari tal-​Kelma t’Alla.’ Dan is-​suġġett ġie żviluppat f’simposju maqsum fi tliet partijiet. Wara li kkwota lil Abraham Lincoln, li lill-​Bibbja sejħilha “l-​aqwa għotja li Alla qatt ta lill-​bniedem,” l-​ewwel kelliemi staqsa lill-​udjenza x’kixfu d-​drawwiet tal-​qari tagħhom dwar kemm huma japprezzaw il-​Kelma taʼ Jehovah. Is-​semmiegħa ġew inkuraġġiti biex jaqraw il-​Bibbja bir-​reqqa, billi jieħdu l-​ħin biex f’moħħhom jimmaġinaw ix-​xena tar-​rakkonti Skritturali u jassoċjaw punti ġodda m’affarijiet li diġà tgħallmu.

Il-parti li jmiss tas-​simposju enfasizzat il-​bżonn għall-​istudju, mhux qari fuq fuq, jekk irridu nassorbu l-​“ikel sħiħ.” (Lhud 5:​13, 14) L-​istudju jkun tassew edifikanti, qal il-​kelliemi, jekk ‘inħejju qalbna’ minn qabel, bħalma għamel il-​qassis Iżraelit Esdra. (Esdra 7:​10, Saydon) Imma l-​istudju għala huwa daqshekk importanti? Għax għandu konnessjoni diretta mar-​relazzjoni tagħna maʼ Jehovah. Għaldaqstant, l-​istudju tal-​Bibbja għandu jkun xi ħaġa prezzjuża, pjaċevoli, u rifreskanti, għalkemm dan jinvolvi dixxiplina u sforz mentali. Kif nistgħu nsibu l-​ħin għal studju effettiv? Billi ‘nirbħu ż-​żmien’ minn attivitajiet inqas importanti, qal l-​aħħar kelliemi tas-​simposju. (Efesin 5:​16, Saydon) Iva, il-​qofol biex insibu l-​ħin huwa li nużaw il-​ħin li għandna bl-​aħjar mod.

It-taħdita “Alla Jagħti s-​Saħħa lill-​Għajjien” irrikonoxxiet li llum il-​ġurnata ħafna nies huma għajjenin. Sabiex ikun jistaʼ jkollna “l-​qawwa iktar min-​normal” għall-​ministeru Kristjan, għandna bżonn nistrieħu fuq Jehovah, li “jagħti l-​qawwa lill-​għajjien.” (2 Korintin 4:​7, NW; Isaija 40:29) Xi għajnuniet li jqawwuna huma l-​Kelma t’Alla, it-​talb, il-​kongregazzjoni Kristjana, il-​parteċipazzjoni regulari fil-​ministeru, l-​indokraturi Kristjani, u l-​eżempju leali t’oħrajn. It-​tema “Kunu Għalliema meta Tqisu ż-​Żmien” enfasizzat il-​bżonn li l-​Kristjani jkunu kemm għalliema kif ukoll predikaturi, u l-​bżonn li jaħdmu iebes f’li jiżviluppaw “l-​arti tat-​tagħlim.”—2 Timotju 4:​2, NW.

L-aħħar taħdita tal-​jum, “Min Jiġġieled Kontra Alla ma Jirbaħx,” semmiet sforzi bbażati fuq informazzjoni żbaljata li saru dan l-​aħħar f’xi artijiet biex jittimbraw lix-​Xhieda taʼ Jehovah bħala kult perikoluż. Imma m’għandniex għalfejn nibżgħu, għaliex Isaija 54:17 jgħid: “‘Ebda arma magħmula kontrik ma tiswa, u kull ilsien li jħaqqaq kontrik toħorġu b’ħati. Din hi x-​xorti tal-​qaddejja tal-​Mulej; mingħandi jieħdu r-​raġun,’ oraklu tal-​Mulej.”

IT-​TIENI JUM: Affarijiet Mgħarrfin Permezz tal-​Kitba tal-​Profeti

Wara diskussjoni tat-​test Bibliku tal-​jum, dawk miġburin gawdew it-​tieni simposju tal-​konvenzjoni, intitolat “Nigglorifikaw lil Jehovah Bħala Wħud li Nġorru d-​Dawl.” L-​ewwel taħdita wriet li l-​mira taʼ Kristjan hi li jigglorifika lil Jehovah billi jippriedka kullimkien. It-​taħdita taʼ wara semmiet il-​bżonn li nidderieġu lil uħud li jwieġbu b’mod favorevoli lejn l-​organizzazzjoni t’Alla. Kif? Billi nieħdu ħames jew għaxar minuti qabel jew wara kull studju tal-​Bibbja fid-​dar biex nuru kif tiffunzjona l-​organizzazzjoni t’Alla. It-​tielet taħdita taʼ dan is-​simposju enfasizzat il-​bżonn li nigglorifikaw lil Alla b’għemil tajjeb.

It-taħdita “Ħobb Ħafna t-​Tfakkiriet taʼ Jehovah” kopriet versi magħżulin minn Salm 119. Ċertament, aħna għandna bżonn it-​tfakkiriet, għax ilkoll għandna t-​tendenza li ninsew. Kemm huwa importanti, għalhekk, li niżviluppaw imħabba għat-​tfakkiriet taʼ Jehovah, sewwa sew bħalma għamel is-​salmista!

Imbagħad wasal mument speċjali—it-​taħdita tal-​magħmudija intitolata “Li Nagħtu Kas il-​Kelma Profetika Jwassal għall-​Magħmudija.” Il-​kandidati għall-​magħmudija ġew imfakkrin li għandhom jimitaw lil Kristu mhux sempliċement billi jkunu mgħammdin imma wkoll billi jsegwu l-​passi tiegħu mill-​qrib. (1 Pietru 2:21) Xi privileġġ għandhom dawn l-​uħud ġodda li jieħdu sehem fit-​twettiq taʼ Ġwann 10:​16, fejn Ġesù bassar li kellu jiġbor in-​“nagħaġ oħra” biex jaqdu flimkien mad-​dixxipli tiegħu maħturin bl-​ispirtu!

It-taħdita “Isimgħu x’Għandu xi Jgħid l-​Ispirtu,” li fetħet il-​programm taʼ wara nofsinhar, spjegat li l-​ispirtu taʼ Jehovah jitkellem magħna permezz tal-​Bibbja, “l-​ilsir leali u diskret,” u l-​kuxjenza tagħna mħarrġa fuq il-​Bibbja. (Mattew 24:​45, NW) Għaldaqstant, il-​Kristjani m’għandhomx bżonn jisimgħu vuċi letterali mis-​sema sabiex ikunu jafu kif jogħġbu lil Alla. Id-​diskussjoni taʼ wara, “Sodi għal Tagħlim li Hu fi Qbil mad-​Devozzjoni lejn Alla,” ħeġġet lill-​Kristjani biex ma jeżaminawx ideat li jikkorrompu l-​morali li xxerred din id-​dinja. Tabilħaqq, kurżità mhux kontrollata tistaʼ tesponina għal informazzjoni taʼ ħsara fornuta mill-​apostati u aġenti oħrajn taʼ Satana. Kemm hu aħjar li naqraw regolarment il-​Bibbja kif ukoll l-​artikli kollha tar-​rivisti It-​Torri taʼ l-​Għassa u Stenbaħ!

It-taħdita taʼ wara, li kienet intitolata “Żomm Quddiem Għajnejk l-​Eżempju tat-​Tagħlim Sħiħ,” enfasizzat l-​importanza taʼ li nkunu familjari sewwa maʼ l-​“eżempju” Skritturali, jew il-​qafas, tal-​verità. (2 Timotju 1:13) Li niggranfaw maʼ dan l-​eżempju huwa l-​qofol mhux biss biex ikollna devozzjoni lejn Alla imma wkoll biex nidentifikaw dak li m’huwiex fi qbil mal-​verità.

Immaġina li Jehovah jħares lejk bħala ġid. X’unur dan! It-​taħdita “‘Il-​Ġid Kollu’ Qed Jimla d-​Dar taʼ Jehovah,” ibbażata fuq il-​profezija taʼ Ħaggaj, kienet inkuraġġanti ferm għaliex assigurat lis-​semmiegħa li kull membru tal-​“kotra kbira” huwa tassew ġid għal Jehovah. (Apokalissi 7:9) Għalhekk, Jehovah se jeħlishom mit-​‘theżżiż’ finali tal-​ġnus li hu se jikkaġuna matul it-​“taħbit il-​kbir” li ġej. (Ħaggaj 2:​7, 21, 22; Mattew 24:21) Madankollu, il-​poplu taʼ Jehovah sadanittant għandu jishar spiritwalment, kif ġie spjegat fil-​parti “L-​Iskritturi Profetiċi Jiftħulna Għajnejna biex Noqogħdu Għassa.” Il-​kelliemi kkwota l-​kliem taʼ Ġesù: “Ishru, mela, għax ma tafuhx il-​jum li fih jiġi Sidkom.” (Mattew 24:42) Kif nistgħu nibqgħu għassa spiritwalment? Billi nżommu ruħna okkupati fis-​servizz taʼ Jehovah, nitolbu kontinwament, u nibqgħu nistennew il-​jum il-​kbir taʼ Jehovah.

L-aħħar taħdita tal-​jum kienet intitolata “Il-​Kelma Profetika fiż-​Żmien taʼ l-​Aħħar.” Din se nibqgħu niftakruha fis-​snin li ġejjin. Għala? Għax il-​kelliemi ħabbar il-​ħruġ taʼ ktieb ġdid—Oqgħod Attent għall-​Profezija taʼ Danjel! “Din il-​pubblikazzjoni taʼ 320 paġna bi stampi sbieħ ħafna tkopri kull parti mill-​ktieb taʼ Danjel,” qal il-​kelliemi. X’evidenza hi din li Jehovah qed jitfaʼ d-​dawl fuq il-​Kelma profetika tiegħu, u dan kemm isaħħilna l-​fidi tagħna!

IT-​TIELET JUM: Il-​Kelma Profetika t’Alla Ma Tonqos qatt

L-​aħħar jum tal-​konvenzjoni beda bis-​simposju “Kliem Profetiku għaż-​Żmien Imwaqqat.” It-​tliet partijiet eżaminaw it-​tliet dikjarazzjonijiet taʼ ġudizzju esekuzzjonali minn Jehovah li ħabbar il-​profeta Ħabakkuk. L-​ewwel wieħed kien kontra l-​ġens stinat taʼ Ġuda u t-​tieni wieħed kien kontra Babilonja l-​oppressiva. L-​aħħar wieħed, li għad irid jitwettaq, japplika għall-​qerda imminenti tal-​bnedmin mill-​agħar kollha. Meta kien qed jitkellem dwar Armageddon, l-​aħħar ħu tas-​simposju qajjem ammont konsiderevoli taʼ biżaʼ minn Alla fis-​semmiegħa tiegħu meta qal: “Verament, se tkun xi ħaġa li tqanqal il-​biżaʼ meta Jehovah jiżvoga l-​forza sħiħa tal-​qawwa kbira tiegħu.”

“Napprezzaw il-​Wirt Spiritwali Tagħna” kien it-​titlu tad-​drama Biblika eċċitanti tal-​konvenzjoni. Din il-​preżentazzjoni li ġġagħlek teżamina lilek innifsek uriet il-​kuntrast bejn l-​attitudnijiet taʼ Ġakobb u Għesaw lejn l-​affarijiet spiritwali. Għesaw iddisprezza l-​wirt spiritwali tiegħu, u għalhekk dan ngħata lil Ġakobb, li kien jgħożżu. Dawk fil-​konvenzjoni saritilhom il-​mistoqsija “X’tana Jehovah [bħala wirt spiritwali]?” “Il-​verità tal-​Kelma tiegħu, il-​Bibbja; it-​tama taʼ ħajja taʼ dejjem; u l-​unur li nirrappreżentawh bħala proklamaturi taʼ l-​aħbar tajba,” wieġeb il-​kelliemi.

Il-parti taʼ wara kienet intitolata “X’Ifisser Għalik il-​Wirt Prezzjuż Tagħna?” Aħna nuru l-​attitudni xierqa lejn il-​wirt spiritwali tagħna billi npoġġu s-​servizz taʼ Jehovah u l-​privileġġi spiritwali qabel l-​interessi persunali jew materjali. B’dan il-​mod aħna nibnu ħajjitna fuq ir-​relazzjoni tagħna maʼ Jehovah, f’kuntrast kbir maʼ Adam, Għesaw, u l-​Iżraeliti mhux leali.

It-taħdita pubblika, “Kollox Jiġġedded—Bħalma Ġie Mbassar,” ġabret flimkien erbaʼ profeziji fundamentali rigward is-​“smewwiet ġodda” u l-​“art ġdida.” (Isaija 65:​17-25; 66:​22-24; 2 Pietru 3:13; Apokalissi 21:​1, 3-5) Jidher ċar li Jehovah kellu f’moħħu twettiq akbar taʼ dawn il-​profeziji minn dak li seħħ fuq il-​poplu restawrat tiegħu fil-​537 Q.E.K. Iva, hu kellu f’moħħu l-​gvern tas-​Saltna tiegħu (is-“smewwiet ġodda”) u s-​sudditi tiegħu fuq l-​art (l-“art ġdida”), li se jgħammru f’ġenna taʼ l-​art globali glorjuża.

Il-konvenzjoni ġiet fi tmiemha bit-​taħdita eċċitanti u li tqanqal intitolata “Dak li Nistennew hekk kif il-​Kelma t’ Alla Tiggwidana.” Din fakkret lil kulħadd li “ż-​żmien qsar” sabiex jitlesta x-​xogħol tal-​proklamazzjoni tas-​Saltna. (1 Korintin 7:29) Iva, aħna ninsabu preċiż fuq l-​għatba tat-​twettiq tad-​digriet taʼ Jehovah kontra Satana u s-​sistema mill-​agħar kollha tiegħu. Jalla s-​sentimenti tagħna jkunu bħal dawk tas-​salmista li għanna: “Ruħna tixxennaq għall-​Mulej, hu l-​għajnuna u t-​tarka tagħna.” (Salm 33:20) Xi prospett glorjuż hemm lest għal dawk li l-​istennijiet tagħhom huma bbażati fuq il-​kelma profetika t’Alla!

[Stampa f’paġna 7]

Drama eċċitanti żiedet l-​apprezzament għall-​wirt spiritwali tal-​qaddejja taʼ Jehovah

[Stampa f’paġna 7]

Ħafna li taw kas tal-​kelma profetika t’Alla tgħammdu