Bijografija

Qdejna Flimkien Id f’Id

KIF RAKKONTATA MINN MELBA BARRY

Fit-​2 taʼ Lulju, 1999, jien u żewġi konna f’laqgħa kbira tax-​Xhieda taʼ Jehovah, bħalma konna għal eluf taʼ drabi fis-​57 sena taʼ żwieġ li għaddejna flimkien. Lloyd kien qed jagħti l-​aħħar taħdita tal-​Ġimgħa fil-​konvenzjoni distrettwali ġewwa l-​Ħawajj. F’daqqa waħda ħassu ħażin. Minkejja l-​isforzi kollha li saru biex iġibuh f’sensih, hu miet.a

KEMM huma għeżież dawk l-​aħwa Kristjani fil-​Ħawajj li daru miegħi u għenuni nkampa maʼ din it-​traġedja! Lloyd kien effettwa l-​ħajjiet taʼ ħafna minnhom, kif ukoll taʼ ħafna oħrajn madwar id-​dinja.

Minn dak in-​nhar ’l hawn għaddew kważi sentejn, u matul dan iż-​żmien ħsibt ħafna dwar is-​snin meraviljużi li qattajna flimkien—ħafna minnhom f’inkarigu missjunarju barra mill-​pajjiż kif ukoll fil-​kwartieri ġenerali tax-​Xhieda taʼ Jehovah fi Brooklyn, New York. Qgħadt niftakar ukoll dwar żgħożiti, meta kont ngħix f’Sydney, l-​Awstralja, u dwar l-​isfidi li ffaċċjajna jien u Lloyd biex inkunu nistgħu niżżewġu fil-​bidu tat-​Tieni Gwerra Dinjija. Iżda, l-​ewwelnett ħa ngħidilkom kif sirt Xhud u kif iltqajt maʼ Lloyd lura fl-​1939.

Kif Sirt Xhud

Il-​ġenituri tiegħi, li dejjem ħadu ħsiebi b’imħabba u għożża kbira, kien jisimhom James u Henrietta Jones. Fl-​1932 spiċċajt l-​iskola meta kelli biss 14-il sena. Dak iż-​żmien id-​dinja kienet f’nofs kriżi ekonomika kbira. Bdejt naħdem biex ngħin lill-​familja, li kienet tinkludi wkoll liż-​żewġ ħuti bniet iżgħar minni. Fi ftit snin kelli impjieg b’paga tajba f’uffiċċju, fejn kelli diversi tfajliet li kont naħdem magħhom taħt is-​superviżjoni tiegħi.

Sadanittant, fl-​1935, ommi aċċettat letteratura Biblika mingħand ix-​Xhieda taʼ Jehovah u mill-​ewwel ħassitha konvinta li kienet sabet il-​verità. Aħna bdejna naħsbu li qed tiġġennen. Madankollu, darba waħda rajt il-​ktejjeb Where Are the Dead? (Fejn Qegħdin il-​Mejtin?) u kif rajt it-​titlu qabditni l-​kurżità. Għalhekk qbadt naqra dan il-​ktejjeb bil-​moħbi. Dak kulma kelli bżonn! Minnufih bdejt immur m’ommi għal laqgħa li kienet issir fost il-​ġimgħa msejħa l-​Istudju Mudell. Il-​ktejjeb bl-​isem Model Study (Studju Mudell)​—li eventwalment kien hemm tlieta minnu—kien fih mistoqsijiet u tweġibiet kif ukoll skritturi li jappoġġaw it-​tweġibiet.

Dik il-​ħabta, f’April taʼ l-​1938, Joseph F. Rutherford ġie jżur Sydney bħala rappreżentant mill-​kwartieri ġenerali tax-​Xhieda taʼ Jehovah. L-​ewwel taħdita pubblika li qatt mort nismaʼ kienet propju tiegħu. Din suppost li kellha tingħata fis-​Sydney Town Hall, imma xi wħud li kienu jopponu rnexxielhom iwaqqfuna milli nużaw dak il-​post. Minflok, it-​taħdita ngħatat fis-​Sydney Sports Ground, li kien ferm akbar. Minħabba r-​reklamar li komplew jagħmlulna dawk li kienu jopponu, attendew madwar 10,000 ruħ—numru taʼ l-​għaġeb meta tqis li dak iż-​żmien kien hemm 1,300 Xhud biss fl-​Awstralja.

Ftit wara dan, ħadt sehem fil-​ministeru taʼ l-​għalqa għall-​ewwel darba—u mingħajr ebda taħriġ. Meta l-​grupp tagħna wasal fit-​territorju fejn konna se nippridkaw, dak li kien inkarigat mill-​grupp qalli, “Dik id-​dar t’hemmhekk agħmilha int.” Tant kont eċċitata li meta l-​mara fetħet il-​bieb, staqsejtha, “Tistaʼ tgħidli x’ħin hu, jekk jogħġbok?” Daħlet ġewwa, iċċekkjat il-​ħin, u ġiet tgħidli. Dak kien kulma għedtilha, u erġajt mort fil-​karozza.

Madankollu, ma qtajtx qalbi, u f’qasir żmien kont qed naqsam il-​messaġġ tas-​Saltna m’oħrajn regolarment. (Mattew 24:14) F’Marzu taʼ l-​1939 issimbolizzajt id-​dedikazzjoni tiegħi lil Jehovah billi tgħammidt fil-​banju tal-​ġâra tagħna, Dorothy Hutchings. Peress li ma kienx hemm aħwa rġiel, eżatt wara li tgħammidt, ngħatajt responsabbiltajiet tal-​kongregazzjoni li normalment jassenjawhom lill-​irġiel Kristjani.

Ġeneralment konna nagħmlu l-​laqgħat tagħna fi djar privati, imma kultant konna nikru sala biex jingħataw it-​taħditiet pubbliċi fiha. Darba waħda, ħu żagħżugħ gustuż mill-​uffiċċju tal-​fergħa tagħna f’Betel ġie jżur il-​kongregazzjoni żgħira tagħna biex jagħtina taħdita. Mingħajr ma kont naf, hu kellu raġuni oħra f’moħħu meta ġie—biex isir jafni iktar. Iva, hekk iltqajt maʼ Lloyd.

Kif Iltqajt mal-​Familja taʼ Lloyd

F’qasir żmien ġietni x-​xewqa li naqdi lil Jehovah full-time. Madankollu, meta applikajt biex inkun pijuniera (biex nieħu sehem fix-​xogħol taʼ l-​ippridkar full-time), staqsewni jekk xtaqtx naqdi ġewwa Betel. Għalhekk, f’Settembru taʼ l-​1939, ix-​xahar meta bdiet it-​Tieni Gwerra Dinjija, sirt membru tal-​familja taʼ Betel ġewwa Strathfield, belt viċin Sydney.

F’Diċembru taʼ l-​1939 ivvjaġġajt lejn New Zealand għall-​konvenzjoni. Peress li Lloyd kien minn New Zealand, kien sejjer hemmhekk ukoll. Ivvjaġġajna fuq l-​istess vapur, u sirna nafu iktar lil xulxin. Lloyd irranġa biex niltaqaʼ m’ommu u missieru u ħutu fil-​konvenzjoni ġewwa Wellington u iktar tard fid-​dar tagħhom fi Christchurch.

Meta x-​Xogħol Tagħna Ġie Projbit

Nhar is-​Sibt, 18 taʼ Jannar, 1941, xi uffiċjali governattivi ġew fl-​uffiċċju tal-​fergħa b’xi sitt limousines suwed biex jikkonfiskawlna l-​propjetà. Minħabba li kont naħdem fl-​uffiċċju żgħir li kien hemm fid-​daħla taʼ Betel, kont l-​ewwel waħda li rajthom ġejjin. Peress li konna sirna nafu dwar il-​projbizzjoni xi 18-il siegħa qabel, ilħaqna neħħejna kważi l-​letteratura u l-​fajls kollha mill-​fergħa. Il-​ġimgħa taʼ wara, ġew arrestati ħames membri mill-​familja taʼ Betel, inkluż Lloyd.

Kont naf li l-​iktar li kellhom bżonn dawk l-​aħwa fil-​ħabs kien l-​ikel spiritwali. Biex ninkuraġġixxi lil Lloyd, iddeċidejt li niktiblu “ittri taʼ mħabba.” Kont nibda l-​ittra b’dan l-​istil, imma mbagħad kont nikkopja artikli sħaħ tat-​Torri taʼ l-​Għassa u niffirma bħala l-​għażiża tiegħu. Wara erbaʼ xhur u nofs, Lloyd ġie meħlus.

Kif Iżżewwiġna u Bqajna fis-​Servizz Full-Time

Fl-​1940, omm Lloyd ġiet l-​Awstralja, u Lloyd qalilha li konna qed naħsbu biex niżżewġu. Hi wissietu biex ma jiżżewwiġx, minħabba l-​fatt li t-​tmiem tas-​sistema t’affarijiet kien jidher li qiegħed fil-​qrib ferm. (Mattew 24:3-14) Hu qal ukoll lill-​ħbieb tiegħu dwar dan, imma kull darba kienu jwissuh biex ma jiżżewwiġx. Fl-​aħħar mill-​aħħar, jum wieħed fi Frar taʼ l-​1942, Lloyd ġie għalija baxx baxx flimkien maʼ erbaʼ Xhieda li wegħdu li ma jikxfuniex, ħadni fl-​uffiċċju tar-​reġistru, u żżewwiġna. Dak iż-​żmien, fl-​Awstralja, ix-​Xhieda taʼ Jehovah kienu għadhom mhux rikonoxxuti bħala ministri li kellhom l-​awtorità li jżewġu.

Għalkemm ma tħallejniex inkomplu s-​servizz tagħna f’Betel bħala koppja miżżewġa, staqsewna jekk xtaqniex inkunu pijunieri speċjali. Aħna aċċettajna b’ferħ l-​inkarigu li mmorru f’raħal li jismu Wagga Wagga. Peress li x-​xogħol taʼ l-​ippridkar kien għadu projbit u ma kellna l-​ebda għajnuna finanzjarja, kellna tassew nitfgħu t-​tagħbija tagħna fuq Jehovah.—Salmi 55:22, KŻ.

Biex immorru fl-​irħula konna nsuqu rota li fuqha jistgħu jirkbu tnejn jew iktar, u hemmhekk iltqajna maʼ diversi nies dħulin li magħhom kien ikollna konversazzjonijiet twal. Ma kinux ħafna dawk li aċċettaw studju tal-​Bibbja. Madankollu, wieħed raġel li kellu ħanut tant kien japprezza x-​xogħol li konna qed nagħmlu li kien jipprovdilna l-​frott u l-​ħaxix kull ġimgħa. Wara li qattajna sitt xhur f’Wagga Wagga, erġajna ġejna mistidnin biex immorru lura f’Betel.

Il-​familja taʼ Betel kienet neħħiet kulma kellha mill-​uffiċċju taʼ Strathfield f’Mejju taʼ l-​1942 u ħadet kollox fi djar privati. Kull ftit ġimgħat kienu jibdlu d-​dar sabiex jevitaw li jinkixfu. Meta jien u Lloyd morna lura f’Betel f’Awissu, morna magħhom f’wieħed minn dawk il-​postijiet. L-​inkarigu tagħna matul il-​ġurnata kien li naħdmu f’waħda mill-​istamperiji li kienu għamlu taħt l-​art. Fl-​aħħar, f’Ġunju taʼ l-​1943, ix-​xogħol tagħna ma baqax projbit.

Nippreparaw għas-​Servizz Missjunarju

F’April taʼ l-​1947 ngħatajna l-​applikazzjonijiet biex nattendu l-​Iskola taʼ Gilgħad (Watchtower Bible School of Gilead), li kienet tinsab f’South Lansing, New York, fl-​Istati Uniti taʼ l-​Amerika. Sadanittant, ġejna inkarigati biex inżuru l-​kongregazzjonijiet fl-​Awstralja biex insaħħuhom spiritwalment. Wara ftit xhur irċivejna l-​istedina biex nattendu l-​11-il klassi taʼ Gilgħad. Kellna tliet ġimgħat biex nieħdu ħsieb nirranġaw kollox u nippakkjaw. Tlaqna lill-​familja u ’l ħbiebna f’Diċembru taʼ l-​1947 u morna lejn New York maʼ 15 oħra mill-​Awstralja li kienu ġew mistidnin għall-​istess klassi.

Il-ftit xhur li qattajna fl-​Iskola taʼ Gilgħad malajr għaddew, u rċivejna inkarigu missjunarju biex immorru naqdu l-​Ġappun. Peress li kien jeħtieġ iż-​żmien biex jitlestew id-​dokumenti tagħna ħalli mmorru l-​Ġappun, Lloyd reġaʼ ġie assenjat bħala indokratur li jivvjaġġa tax-​Xhieda taʼ Jehovah. Il-​kongregazzjonijiet li ġejna inkarigati nżuru kienu jibdew mill-​belt taʼ Los Angeles u jibqgħu sejrin sal-​fruntiera tal-​Messiku. Ma kellniex karozza, u għalhekk ix-​Xhieda bl-​imħabba kollha kienu jwassluna minn kongregazzjoni għall-​oħra kull ġimgħa. L-​inħawi li kien ikopri dak is-​circuit kbir issa jagħmlu parti minn tliet distretti Ingliżi u tlieta Spanjoli, u kull distrett huwa magħmul minn madwar għaxar circuits!

Iż-​żmien tar, u f’Ottubru taʼ l-​1949 aħna u l-​missjunarji l-​oħrajn konna fi triqitna lejn il-​Ġappun fuq vapur li qabel kien jintuża biex iġorr it-​truppi. F’tarf mill-​vapur qegħdu lill-​irġiel u fl-​ieħor lin-​nisa u t-​tfal. Ġurnata biss qabel ma konna se naslu f’Yokohama, sibna maltempata kbira. Mid-​dehra, din tajret is-​sħab li kien hemm, għax l-​għada fil-​għodu, il-​31 t’Ottubru, meta telgħet ix-​xemx stajna naraw il-​Muntanja Fuji fil-​ġmiel kollu tagħha. X’merħba meraviljuża kienet din għall-​inkarigu ġdid tagħna!

Naħdmu mal-​Ġappuniżi

Hekk kif ersaqna qrib ix-​xatt, rajna mijiet taʼ nies b’xagħarhom iswed. ‘Kemm huma storbjużi dawn in-​nies!’ għedna hekk kif smajna koċċ taħbit. Kollha kienu libsin żraben taʼ l-​injam li bdew jagħmlu l-​ħoss fuq il-​mollijiet, li kienu magħmulin mill-​injam ukoll. Wara li qattajna l-​lejl f’Yokohama, ilkoll kemm aħna qbadna l-​ferrovija biex immorru fl-​inkarigu missjunarju tagħna ġewwa Kobe. Hemmhekk Don Haslett, ħu li kien magħna fil-​klassi fl-​iskola taʼ Gilgħad u li kien ġie l-​Ġappun ftit xhur qabel, kien kera dar missjunarja. Kienet dar kbira u sabiħa, mibnija fuq stil taʼ l-​Amerika taʼ Fuq, u kellha żewġ sulari—imma kienet kompletament vojta!

Sabiex ikollna xi ħaġa fuqiex norqdu bħala saqqu, kulħadd qabad jaqtaʼ l-​ħaxix twil mill-​ġnien taʼ madwar id-​dar u poġġejnieh fl-​art. Hekk bdejna l-​ħajja missjunarja tagħna, bil-​ftit affarijiet li kellna fil-​bagalji tagħna. Irnexxielna niksbu xi fuklari tal-​faħam, imsejħin hibachi, biex nisħnu u nsajru fuqhom. Lejl minnhom, Lloyd sab lil żewġ missjunarji sħabna, Percy u Ilma Iszlaub, mitlufin minn sensihom. Fetaħ it-​twieqi biex tidħol ftit arja friska u kiesħa, u rnexxielu jġibhom lura f’sensihom. Darba minnhom anki jien intlift minn sensija waqt li kont qed insajjar fuq dawn il-​fuklari tal-​faħam. Ħadna xi ftit taż-​żmien biex nidraw ċerti affarijiet!

Li nitgħallmu l-​lingwa kien prijorità, u lkoll kemm aħna konna nistudjaw il-​Ġappuniż 11-il siegħa kuljum għal xahar sħiħ. Wara dan, bdejna noħorġu fuq il-​ministeru b’sentenza jew tnejn miktubin biex inkunu nafu x’għandna ngħidu. Propju fl-​ewwel ġurnata li ħriġt, iltqajt maʼ Miyo Takagi, mara dħulija li laqgħetni bil-​ħlewwa. Fiż-​żjajjar tiegħi, kien ikollna nużaw ħafna d-​dizzjunarji mill-​Ġappuniż għall-​Ingliż biex nikkomunikaw sakemm irnexxielna nistabbilixxu studju tal-​Bibbja progressiv. Fl-​1999, waqt li konna qed nattendu għad-​dedikazzjoni tal-​parti l-​ġdida tal-​faċilitajiet tal-​fergħa fil-​Ġappun, erġajt rajt lil Miyo, kif ukoll lil diversi aħwa għeżież oħrajn li kont studjajt magħhom. Għaddew ħamsin sena, imma għadhom proklamaturi żelużi tas-​Saltna, u qed jagħmlu kulma jistgħu biex jaqdu lil Jehovah.

Fl-1 t’April, 1950, madwar 180 ruħ attendew għaċ-​ċelebrazzjoni tal-​Mafkar tal-​mewt taʼ Kristu li kellna f’Kobe. B’sorpriża għalina, l-​għada fil-​għodu ġew 35 persuna biex jieħdu sehem fil-​ministeru taʼ l-​għalqa. Kull missjunarju ħa miegħu fuq is-​servizz tlieta jew erbgħa minn dawn l-​uħud ġodda. L-​inkwilini ma bdewx ikellmu lili, barranija li ftit li xejn kont nifhem minn dak li jgħiduli, imma lil dawk il-​Ġappuniżi l-​ġodda li kelli miegħi. Damu jgħidu u jgħidu għal ftit ħin mhux ħażin, imma ma stajt nifhem xejn. B’ferħ nistaʼ ngħid li ftit minn dawn l-​uħud ġodda komplew jieħdu iktar għarfien u għadhom sejrin fix-​xogħol taʼ l-​ippridkar sal-​lum.

Ħafna Privileġġi u Inkarigi

Jien u żewġi komplejna x-​xogħol missjunarju tagħna f’Kobe sa l-​1952, meta mbagħad ġejna assenjati f’Tokyo, fejn Lloyd ġie inkarigat li jkun l-​indokratur taʼ l-​uffiċċju tal-​fergħa. Maż-​żmien, l-​inkarigi tax-​xogħol li ngħata ħaduh madwar il-​Ġappun kollu u f’pajjiżi oħrajn. Iktar tard, meta darba ġie jżurna f’Tokyo Nathan H. Knorr, li kien mill-​kwartieri ġenerali, qalli: “Bilħaqq, taf fejn sejjer żewġek fil-​vjaġġ taż-​żona li jmiss? L-​Awstralja u New Zealand.” Hu żied: “Int ukoll tistaʼ tmur jekk tħallas il-​passaġġ tiegħek.” Kemm ħassejtni eċċitata! Fuq kollox, kienu għaddew disaʼ snin minn mindu tlaqna mill-​Awstralja.

Minnufih ktibna lill-​familji tagħna. Ommi tatni l-​flus li kelli bżonn biex inkun nistaʼ nħallas il-​biljett. Qabel ma ġiet din l-​opportunità, jien u Lloyd dejjem kellna ħafna x’nagħmlu fl-​inkarigi tagħna, u ma kellniex il-​flus biex immorru nżuru lill-​familji tagħna. B’hekk, din kienet it-​tweġiba għat-​talb tiegħi. Bħalma wieħed jistaʼ jimmaġina, ommi kienet ferħana se ttir li setgħet tarani. Hi qaltli, “Tibżax, issa nfaddal il-​flus biex tkunu tistgħu terġgħu tiġu tliet snin oħra.” Tlaqna b’dak il-​ħsieb f’moħħna, imma b’sogħba, hi mietet f’Lulju taʼ wara. It-​tama tiegħi hi li nerġaʼ ningħaqad magħha fid-​dinja l-​ġdida—kemm se nkunu ferħanin!

Sa l-​1960 ix-​xogħol missjunarju kien l-​uniku inkarigu li kelli, imma mbagħad irċivejt ittra li fiha kien hemm miktub: “Mil-​lum ’il quddiem se jkollok l-​inkarigu li tieħu ħsieb il-​ħasil u l-​mogħdija tal-​ħwejjeġ tal-​familja kollha taʼ Betel.” Dak iż-​żmien, il-​familja taʼ Betel kienet magħmula minn madwar 12-il persuna, u għalhekk stajt illaħħaq maʼ dan ix-​xogħol kif ukoll maʼ l-​inkarigu missjunarju tiegħi.

Fl-1962 waqqgħu d-​dar li kellna, li kienet mibnija fuq stil Ġappuniż, u minflokha nbniet Dar Betel ġdida b’sitt sulari li tlestiet is-​sena taʼ wara. Ġejt inkarigata biex ngħin lill-​ġuvintur ġodda li kienu jiġu f’Betel biex jitgħallmu jżommu l-​kmamar tagħhom nodfa u fl-​ordni. Skond id-​drawwa, il-​ġuvintur fil-​Ġappun ma kienu jiġu mgħallmin jagħmlu xejn fid-​dar tagħhom. L-​enfasi kienet fuq li jkollhom edukazzjoni sekulari, u ommijiethom kienu jagħmlulhom kollox huma. Malajr tgħallmu li jien ma kontx se nagħmlilhom kollox bħal ommijiethom. Maż-​żmien, ħafna għamlu progress u ngħataw inkarigi ġodda taʼ responsabbiltà fl-​organizzazzjoni.

F’jum sajfi li kien verament sħun, ġiet studenta tal-​Bibbja żżur il-​faċilitajiet tagħna u ratni nogħrok ix-​showers. Hi qaltli, “Jekk jogħġbok għid lill-​maniġer li nixtieq inħallas seftura biex tiġi u tagħmel dan ix-​xogħol minflokok.” Jien spjegajtilha li għalkemm apprezzajt il-​ħsieb ġenwin tagħha, kont lesta li nagħmel kwalunkwe xogħol li jagħtuni ġewwa l-​organizzazzjoni taʼ Jehovah.

Sadanittant, jien u Lloyd irċivejna l-​istedina biex nattendu d-​39 klassi taʼ Gilgħad! Xi privileġġ kellna li fl-​1964, fl-​età taʼ 46 sena, nerġgħu mmorru l-​iskola! Il-​kors sar b’mod partikulari biex jgħin lil dawk li jaqdu fl-​uffiċċji tal-​fergħa jieħdu ħsieb ir-​responsabbiltajiet tagħhom. Wara l-​kors t’għaxar xhur, erġajna ġejna assenjati lura lejn il-​Ġappun. S’issa, kien hemm ’il fuq minn 3,000 proklamatur tas-​Saltna f’dan il-​pajjiż.

L-għadd taʼ Xhieda tant baqaʼ jiżdied bil-​ħeffa li sa l-​1972 kien hemm ’il fuq minn 14,000 Xhud, u nbena uffiċċju tal-​fergħa ġdid b’ħames sulari f’Numazu, fin-​nofsinhar taʼ Tokyo. Mill-​Betel tagħna, kellna veduta tassew sabiħa tal-​Muntanja Fuji. Bdew jiġu stampati ’l fuq minn miljun rivista kull xahar bil-​lingwa Ġappuniża permezz tal-​magna taʼ l-​istampar il-​ġdida, li kienet enormi. Imma dalwaqt kienet ġejja bidla għalina.

Fi tmiem l-​1974, Lloyd irċieva ittra mill-​kwartieri ġenerali tax-​Xhieda taʼ Jehovah fi Brooklyn li fiha ġie mistieden jaqdi fil-​Ġemgħa li Tiggverna. Għall-​ewwel ħsibt: ‘Hawn aħna. Peress li Lloyd għandu t-​tama għas-​sema u jien għandi t-​tama għall-​art, illum jew għada xorta jkollna ninfirdu. Forsi Lloyd għandu jmur Brooklyn mingħajri.’ Imma malajr biddilt il-​mod kif kont naħsibha, u b’hekk kont lesta li mmur maʼ Lloyd f’Marzu taʼ l-​1975.

Barkiet fil-​Kwartieri Ġenerali

Anki fi Brooklyn, Lloyd baqaʼ qalbu marbuta mas-​servizz fil-​Ġappun, u dejjem kien joqgħod jitkellem dwar l-​esperjenzi li kellna hemmhekk. Imma issa kien hemm xi opportunitajiet biex nitwessgħu. Lloyd kien ilu 24 sena jintuża fix-​xogħol taż-​żona, li kien jinvolvi li jivvjaġġa mad-​dinja. Jien kemm-il darba vvjaġġajt miegħu fuq dan ix-​xogħol.

Li mmur inżur lil ħutna Kristjani f’pajjiżi oħrajn għenni nsir konxja tal-​kundizzjonijiet li ħafna minnhom jaħdmu u jgħixu fihom. Qatt ma se ninsa wiċċ Entellia, tifla t’għaxar snin li ltqajt magħha fl-​Afrika taʼ fuq. Hi kienet tħobb ħafna l-​isem t’Alla u kienet timxi siegħa u nofs biex tmur għal-​laqgħat Kristjani u siegħa u nofs lura. Minkejja li kellha persekuzzjoni ħarxa mill-​familja tagħha, Entellia kienet iddedikat ħajjitha lil Jehovah. Meta morna nżuru l-​kongregazzjoni tagħha, fis-​sala kellhom biss tubu wieħed li kien jagħti dawl baxx imdendel fuq in-​noti tal-​kelliemi—il-​bqija tas-​sala kienet kompletament fid-​dlam. F’dak id-​dlam li kien hemm, kien jaqbadni l-​bard hekk kif kont nismaʼ l-​kant sabiħ taʼ l-​aħwa.

L-iktar ħaġa importanti f’ħajjitna ġrat f’Diċembru taʼ l-​1998 meta jien u Lloyd konna fost id-​delegati tal-​Konvenzjonijiet Distrettwali “Il-​Mod taʼ Ħajja t’Alla” li saru f’Kuba. Kemm bqajna impressjonati bil-​gratitudni u l-​ferħ li wrew l-​aħwa talli kienu qed iżuruhom l-​aħwa mill-​kwartieri ġenerali taʼ Brooklyn! Għandi ħafna memorji li tassew ngħożżhom taʼ meta ltqajt maʼ wħud għeżież li qed ifaħħru lil Jehovah b’mod hekk żeluż.

In-​Nies t’Alla—Il-​Familja Tiegħi

Għalkemm twelidt l-​Awstralja, sirt inħobb lin-​nies f’kull post li ntbgħatt fih mill-​organizzazzjoni taʼ Jehovah. Dan kien minnu fil-​Ġappun, u issa li ilni fl-​Istati Uniti għal iktar minn 25 sena, inħossni l-​istess hawnhekk. Meta tlift lil żewġi, ix-​xewqa tiegħi ma kinitx li nerġaʼ mmur l-​Awstralja, imma li nibqaʼ fil-​Betel taʼ Brooklyn, fejn ġejt assenjata minn Jehovah.

Issa għandi iktar minn 80 sena. Wara 61 sena fil-​ministeru full-time, għadni lesta biex naqdi lil Jehovah fejn iridni hu. Hu tassew ħa ħsiebi. Jien ngħożż is-​snin li fihom stajt naqsam ħajti maʼ sieħeb għażiż li kien iħobb lil Jehovah, li b’kollox ammontaw għal iktar minn 57 sena. Jien fiduċjuża li Jehovah se jibqaʼ jberikna, u naf li Hu qatt ma se jinsa xogħolna u l-​imħabba li wrejna għal ismu.—Lhud 6:10.

[Nota taʼ taħt]

[Stampa f’paġna 25]

M’ommi fl-​1956

[Stampa f’paġna 26]

Maʼ Lloyd u grupp taʼ pubblikaturi Ġappuniżi fil-​bidu tas-​snin 50

[Stampi f’paġna 26]

Maʼ l-​ewwel studenta tal-​Bibbja li studjajt magħha fil-​Ġappun, Miyo Takagi, fil-​bidu tas-​snin 50 u fl-​1999

[Stampa f’paġna 28]

Maʼ Lloyd waqt ix-​xogħol taʼ tqassim tar-​rivisti fil-​Ġappun