Jehovah Hu l-​Kenn Tagħna

“Għax int għandek il-​Mulej kenn tiegħek, . . . ebda deni ma jiġrilek.”—SALM 91:​9, 10.

1. Għala nistgħu ngħidu li Jehovah hu l-​kenn tagħna?

JEHOVAH hu kenn reali għan-​nies tiegħu. Jekk aħna devoti għalkollox lejh nistgħu nkunu ‘magħfusin minn kullimkien, iżda mhux mgħattnin; imħassbin, iżda mhux qalbna maqtugħa; ippersegwitati, iżda mhux abbandunati; mixħutin maʼ l-​art, iżda mhux meqrudin.’ Għala? Għax Jehovah jagħtina qawwa iktar min-​normal. (2 Korintin 4:​7-9) Iva, Missierna tas-​sema jgħinna nagħmlu l-​almu tagħna biex ngħixu ħajja devota, u għalhekk jistaʼ jkollna għal qalbna l-​kliem tas-​salmista: “Għax int għandek il-​Mulej kenn tiegħek, għamilt l-​Għoli għamara tiegħek. Ebda deni ma jiġrilek.”—Salm 91:​9, 10.

2. X’jistaʼ jingħad dwar Salm 91 u dak li jwiegħed?

² Dan il-​kliem taʼ Salm 91 setaʼ nkiteb minn Mosè. Is-​sopraskrizzjoni taʼ Salm 90 issemmi lil Mosè bħala l-​kittieb taʼ dak is-​salm, u Salm 91 jiġi eżatt warajh mingħajr ma jissemma xi kittieb ieħor. Forsi Salm 91 kien jitkanta b’mod antifonali, jiġifieri, l-​ewwel kienet tkanta persuna waħda (91:​1, 2), imbagħad ikun hemm kor li jweġibha (91:​3-8). Imbagħad, x’aktarx kien jerġaʼ jinstemaʼ kantant wieħed (91:9a) u jkun hemm grupp li jwieġbu (91:9b-13). Il-​kliem taʼ l-​aħħar setaʼ jitkanta minn persuna waħda (91:​14-16). Salm 91 iwiegħed sigurtà spiritwali lill-​Kristjani midlukin bħala klassi u anki lil sħabhom, li huma wkoll dedikati lil Alla, jipprovdilhom bħala grupp l-​istess assiguranza.a Ejja nikkunsidraw dan is-​salm mill-​ħarsa tal-​qaddejja kollha taʼ Jehovah.

Fis-​Sigurtà fil-​‘Post Sigriet t’Alla’

3. (a) X’inhu ‘l-​post sigriet taʼ l-​Għoli’? (b) X’nesperjenzaw billi ‘ngħammru għad-​dell taʼ Dak li jistaʼ kollox’?

³ Is-​salmista jkanta: “Int li tgħix għall-​kenn [“fil-​post sigriet,” “NW”] taʼ l-​Għoli, li tgħammar għad-​dell taʼ dak li jistaʼ kollox, għid lill-​Mulej: ‘Kenn tiegħi u qawwa tiegħi int, Alla tiegħi, jien fik nittama.’” (Salm 91:​1, 2) ‘Il-​post sigriet taʼ l-​Għoli’ huwa post figurattiv li joffrilna protezzjoni, speċjalment lill-​midlukin, li huma l-​mira speċjali tax-​Xitan. (Apokalissi 12:​15-17) Kollha kien jeqridna kieku ma kienx għall-​protezzjoni li ngawdu bħala wħud li jgħammru bħala mistiedna spiritwali t’Alla. Billi ‘ngħammru għad-​dell taʼ Dak li jistaʼ kollox,’ nesperjenzaw id-​dell tal-​protezzjoni t’Alla. (Salm 15:​1, 2; 121:5) M’hemm l-​ebda kenn aħjar jew fortizza iktar qawwija mill-​Mulej Sovran tagħna, Jehovah.—Proverbji 18:10.

4. Liema għodod juża n-​“nassab,” Satana, u aħna kif naħarbu?

⁴ Is-​salmista jkompli: “Għax hu [Jehovah] jeħilsek mix-​xibka tan-​nassab, u mill-​mard tal-​mewt [“mill-​pestilenza li qiegħda tikkaġuna l-​għawġ,” “NW”].” (Salm 91:3) In-​nassab f’Iżrael tal-​qedem taʼ spiss kien jaqbad l-​għasafar permezz taʼ nases jew xbieki. Fost in-​nases li juża “n-​nassab,” Satana, insibu l-​organizzazzjoni mill-​agħar tiegħu u “t-​tnassis” tiegħu, jew bħalma tpoġġiha n-​nota taʼ taħt fin-​New World Translation, “l-​atti makakki” tiegħu. (Efesin 6:11) Fil-​mogħdija tagħna nsibu ħafna xbieki moħbijin biex iġagħluna naqgħu fil-​ħażen u jkissruna spiritwalment. (Salm 142:4 [142:​3, NW]) Madankollu, ladarba ċħadna n-​nuqqas taʼ tjieba, ‘ħajjitna hija bħal għasfur li ħarab mix-​xbiek.’ (Salm 124:​7, 8) Kemm aħna grati li Jehovah jeħlisna minn dan in-​“nassab” mill-​agħar!—Mattew 6:​13, NW.

5, 6. Liema tip taʼ “pestilenza” kkaġunat l“għawġ,” imma n-​nies taʼ Jehovah għala ma jċedux għaliha?

⁵ Is-​salmista jikteb “il-​pestilenza li qiegħda tikkaġuna l-​għawġ.” Bħal marda li tittieħed u ssir epidemija, hemm xi ħaġa li tikkaġuna “l-​għawġ” għall-​familja umana u għal dawk li jappoġġaw is-​sovranità taʼ Jehovah. Dwar dan, il-​kittieb taʼ l-​istorja Arnold Toynbee kiteb: “Mit-​tmiem tat-​Tieni Gwerra Dinjija ’l hawn, in-​numru taʼ stati lokali, indipendenti, u sovrani rdoppja minħabba n-​nazzjonaliżmu . . . L-​attitudni preżenti tal-​bniedem kull ma tmur qed iġġib dejjem iżjed firda.”

⁶ Matul is-​sekli, ċerti ħakkiema komplew jitfgħu l-​ħatab fin-​nar, u l-​inkwiet u l-​firda internazzjonali komplew jiżdiedu. Huma riedu wkoll li l-​qima tingħata lilhom jew lil diversi xbihat jew simboli. Imma Jehovah qatt ma ħalla n-​nies leali tiegħu jċedu għal “pestilenza” bħal din. (Danjel 3:​1, 2, 20-23, 91(24)-94(27) [3:​1, 2, 20-​27, NW]; 6:​8-11, 17-23 [6:​7-10, 16-22, NW]) Bħala fratellanza internazzjonali kollha mħabba, aħna nagħtu lil Jehovah devozzjoni esklużiva, inżommu newtralità Skritturali, u mingħajr preġudizzji nagħrfu li Alla “jilqaʼ lil kull min għandu l-​biżaʼ tiegħu u jagħmel is-​sewwa, ikun minn liema poplu jkun.” (Atti 10:​34, 35; Eżodu 20:​4-6; Ġwann 13:​34, 35; 17:16; 1 Pietru 5:​8, 9) Għalkemm bħala Kristjani ngħaddu mill-​“għawġ” fil-​forma taʼ persekuzzjonijiet, aħna ferħanin u nħossuna f’sigurtà spiritwali ‘fil-​post sigriet taʼ l-​Għoli.’

7. Jehovah kif jipproteġina “bir-​rix tiegħu”?

⁷ B’Jehovah bħala l-​kenn tagħna, aħna nieħdu faraġ mill-​kliem: “Bir-​rix tiegħu jgħattik, u taħt ġwenħajh tistkenn, għax tarka u kurazza [“sur,” “NW”] l-​fedeltà tiegħu.” (Salm 91:4) Alla jipproteġina, bħalma għasfura tittajjar fuq il-​frieħ tagħha biex tipproteġihom. (Isaija 31:5) ‘Bir-​rix tiegħu jgħattina.’ L-​għasfura tgħatti l-​frieħ tagħha bir-​rix tagħha, jew bi ġwenħajha, biex tipproteġihom mill-​predaturi. Bħall-​frieħ, aħna fis-​sigurtà taħt il-​ġwienaħ figurattivi taʼ Jehovah għax sibna kenn fl-​organizzazzjoni Kristjana vera tiegħu.—Rut 2:​12; Salm 5:​2, 12 (5:​1, 11, NW).

8. “Il-​fedeltà” taʼ Jehovah kif inhi bħal tarka kbira u sur?

⁸ Aħna nafdaw fil-​“fedeltà.” Din hi bħal tarka kbira taʼ żmien il-​qedem, li taʼ spiss kienet tkun rettangolari u kbira biżżejjed biex tgħatti l-​ġisem kollu kemm hu. (Salm 5:13 [5:​12, NW]) Il-​fiduċja fi protezzjoni bħal din teħlisna mill-​biżaʼ. (Ġenesi 15:1; Salm 84:12 [84:​11, NW]) Il-​fedeltà t’Alla, bħall-​fidi tagħna, hi bħal tarka kbira u protettiva li twaqqaf il-​missili jaħarqu taʼ Satana u tilqaʼ d-​daqqiet taʼ l-​għadu. (Efesin 6:16) Hija wkoll sur, barrikata b’saħħitha taʼ difiża li warajha nżommu sod.

‘Ma Nibżgħux’

9. Għala l-​lejl jistaʼ jkun ħin li jqanqal il-​biżaʼ, imma aħna għaliex ma nibżgħux?

⁹ Rigward il-​protezzjoni t’Alla, is-​salmista jgħid: “Ma tibżax mill-​biżaʼ tal-​lejl, anqas minn vleġġa li tittajjar binhar, minn pesta li tixtered fid-​dlam, jew minn marda li ġġib ħerba f’nofsinhar.” (Salm 91:​5, 6) Ladarba ħafna mill-​agħar għemejjel isiru fis-​satra tal-​lejl, dan il-​ħin jistaʼ jqanqal il-​biżaʼ. Fid-​dlam spiritwali li issa qed jiksi l-​art, l-​għedewwa tagħna taʼ spiss jirrikorru għal atti qarrieqa fl-​isforz tagħhom biex ikissrulna l-​ispiritwalità tagħna u jwaqqfu x-​xogħol tagħna taʼ l-​ippridkar. Imma aħna ‘ma nibżgħux mill-​biżaʼ tal-​lejl’ għax Jehovah iħarisna.—Salm 64:​2, 3 (64:​1, 2, NW); 121:4; Isaija 60:2.

10. (a) X’donnu li qed tindika l-​“vleġġa li tittajjar binhar,” u aħna kif nirreaġixxu għal dan? (b) X’inhi n-​natura tal-​“pesta li tixtered fid-​dlam,” u għala ma nibżgħux minnha?

¹⁰ Il-​“vleġġa li tittajjar binhar” donnu li qed tindika attakk verbali. (Salm 64:​4-6 [64:​3-5, NW]; 94:20) Hekk kif nippersistu biex nippreżentaw informazzjoni vera, oppożizzjoni sfaċċata bħal din għas-​servizz sagru tagħna tkun kollha għalxejn. Iktar minn hekk, aħna ma nibżgħux ‘mill-​pesta li tixtered fid-​dlam.’ Din hi pesta figurattiva li tinfirex fid-​dalma taʼ din id-​dinja marida moralment u reliġjożament u li qiegħda fil-​kontroll taʼ Satana. (1 Ġwann 5:19) Tmewwet lill-​moħħ u lill-​qalb, u tħalli lin-​nies fl-​injoranza dwar Jehovah, l-​iskopijiet, u l-​provvedimenti taʼ mħabba tiegħu. (1 Timotju 6:4) F’din id-​dalma kollha, m’aħniex se nibżgħu ladarba qed ingawdu abbundanza taʼ dawl spiritwali.—Salm 43:3.

11. X’jiġrilhom dawk li jesperjenzaw “ħerba f’nofsinhar”?

¹¹ Lanqas il-​“marda li ġġib ħerba f’nofsinhar” ma tbeżżagħna. “Nofsinhar” jistaʼ jirreferi għall-​hekk imsejjaħ tidwil dinji. Dawk li jċedu għall-​modi materjalistiċi tagħha jitkissru spiritwalment. (1 Timotju 6:​20, 21) Hekk kif niddikjaraw il-​messaġġ tas-​Saltna bi qlubija, ma nibżgħu mill-​ebda għadu tagħna għax Jehovah hu l-​Protettur tagħna.—Salm 64:2 (64:​1, NW); Proverbji 3:​25, 26.

12. Maġenb min “jaqgħu” eluf, u b’liema mod?

¹² Is-​salmista jkompli: “Elf ruħ jaqgħu maġenbek, u għaxart elef fuq lemintek. Imma lejk id-​deni ma jersaqx. . . . Int dan tarah biss b’għajnejk, tara l-​ħlas li jieħdu l-​ħżiena.” (Salm 91:​7, 8) Ladarba jonqsu li jagħmlu lil Jehovah il-​kenn tagħhom, ħafna “jaqgħu” mejtin spiritwalment ‘maġenbna.’ Fil-​fatt, “għaxart elef” waqgħu fuq ‘il-​leminija’ taʼ Iżrael spiritwali taʼ żmienna. (Galatin 6:16) Imma sew jekk aħna Kristjani midlukin jew inkella sħabhom dedikati lil Alla, il-​“post sigriet” t’Alla jagħtina sigurtà. Aħna ‘naraw biss b’għajnejna l-​ħlas li jieħdu l-​ħżiena,’ li qed jaħsdu l-​inkwiet b’mod kummerċjali u reliġjuż u b’modi oħra wkoll.—Galatin 6:7.

‘Ma Jiġrilna Ebda Deni’

13. Liema tip taʼ deni ma jiġix fuqna, u għala?

¹³ Għalkemm is-​sigurtà taʼ din id-​dinja qed titfarrak, aħna npoġġu lil Alla l-​ewwel u ninkuraġġixxu ruħna bil-​kliem tas-​salmista: “Għax int għandek il-​Mulej kenn tiegħek, għamilt l-​Għoli għamara tiegħek. Ebda deni ma jiġrilek, ebda ħsara ma tersaq lejn darek.” (Salm 91:​9, 10) Iva, Jehovah hu l-​kenn tagħna. Madankollu, aħna nagħmlu wkoll lil Alla l-​Għoli “l-​għamara” tagħna fejn m’hemm l-​ebda periklu. Infaħħru lil Jehovah bħala s-​Sovran Universali, ‘ngħammru’ fih bħala s-​Sors tas-​sigurtà, u niddikjaraw l-​aħbar tajba tas-​Saltna tiegħu. (Mattew 24:14) Għalhekk, ‘ma jiġrilna l-​ebda deni’—l-​ebda ħaġa mill-​affarijiet kollha li ssemmew fil-​bidu taʼ dan is-​salm. Saħansitra meta nesperjenzaw bħal ħaddieħor xi hemm kbir bħal terremot, uragan, għargħar, ġuħ, u l-​effetti distruttivi tal-​gwerra, dan ma jkissrilniex il-​fidi tagħna jew is-​sigurtà spiritwali tagħna.

14. Bħala l-​qaddejja taʼ Jehovah, għala m’aħniex infettati b’mard fatali?

¹⁴ Il-​Kristjani midlukin huma bħal residenti barranin li qed jgħixu fi djar maqtugħin għalihom minn din is-​sistema t’affarijiet. (1 Pietru 2:11) ‘L-​ebda ħsara ma tersaq lejn darhom.’ Sew jekk it-​tama tagħna hi għas-​sema jew inkella għall-​art, m’aħna l-​ebda parti mid-​dinja, u m’aħniex infettati bil-​mard tagħha li huwa fatali spiritwalment bħalma huma l-​immoralità, il-​materjaliżmu, ir-​reliġjon falza, u l-​qima tal-​bhima salvaġġa u x-​“xbieha” tagħha, il-​Ġnus Magħquda.​—Apokalissi 9:​20, 21; 13:​1-​18; Ġwann 17:16.

15. F’liema aspetti għandna l-​għajnuna taʼ l-​anġli?

¹⁵ Dwar il-​protezzjoni li ngawdu, is-​salmista jżid: “Għax l-​anġli tiegħu hu [Jehovah] jibgħatlek, u jħarsuk fi triqatek kollha. Fuq idejhom jerfgħuk, li ma taħbatx maʼ xi ġebla riġlek.” (Salm 91:​11, 12) L-​anġli ngħataw is-​setgħa li jipproteġuna. (2 Slaten 6:​17; Salm 34:​8-10 [34:​7-9, NW]; 104:​4, NW; Mattew 26:53; Luqa 1:​19) Huma jħarsuna ‘fit-​triqat kollha tagħna.’ (Mattew 18:10) Bħala proklamaturi tas-​Saltna ngawdu gwida u ħarsien anġeliku u ma nitfixklux spiritwalment. (Apokalissi 14:​6, 7) Saħansitra lanqas ‘ġebel’ bħal projbizzjonijiet fuq ix-​xogħol tagħna ma jġagħluna nitfixklu jew nitilfu l-​favur divin.

16. L-​attakk taʼ ljun żgħir kif inhu differenti minn dak taʼ kobra, u aħna kif nirreaġixxu għal dawn l-​attakki?

¹⁶ Is-​salmista jkompli: “Fuq l-​iljun [“żgħir,” “NW”] u l-​lifgħa [“kobra,” “NW”] int timxi, ferħ taʼ ljun u serp [“kbir,” “NW”] int tirfes.” (Salm 91:13) Sewwa sew bħalma ljun żgħir jagħmel attakk frontali u dirett, xi wħud mill-​għedewwa tagħna juru l-​oppożizzjoni tagħhom bil-​miftuħ billi jgħaddu liġijiet imfasslin sabiex iwaqqfu x-​xogħol tagħna taʼ l-​ippridkar. Iżda minbarra dawn, isirulna wkoll attakki għal għarrieda bħal dawk taʼ kobra li tattakka minfejn tkun moħbija. Xi kultant, minn wara l-​kwinti, il-​kleru jattakkana billi juża lil dawk li jagħmlu l-​liġijiet, kif ukoll imħallfin, u oħrajn. Imma bl-​appoġġ taʼ Jehovah, aħna nfittxu li nirranġaw is-​sitwazzjoni paċifikament fil-​qrati, u b’hekk ‘niddefendu u nistabbilixxu legalment l-​aħbar tajba.’—Filippin 1:​7, NW; Salm 94:​14, 20-22.

17. Kif nirfsu fuq “il-​ferħ taʼ ljun”?

¹⁷ Is-​salmista jitkellem dwar l-​irfis fuq ‘il-​ferħ taʼ ljun u s-​serp kbir.’ Ferħ taʼ ljun jistaʼ jkun feroċi mhux ħażin, u serp kbir jistaʼ jkun rettili taʼ kobor enormi. (Isaija 31:4) Madankollu, ikun kemm ikun feroċi l-​ferħ taʼ ljun meta jagħmel attakk frontali, aħna b’mod figurattiv nirfsu fuqu billi nobdu iktar lil Alla iktar milli lill-​bnedmin jew ’l-organizzazzjonijiet li qishom iljuni. (Atti 5:29) Għalhekk, l-​“iljun” mimli theddid ma jagħmlilna xejn spiritwalment.

18. F’min jistaʼ jfakkarna ‘s-​serp kbir,’ u x’irridu nagħmlu jekk jattakkana?

¹⁸ Fis-​Settanta Griega, ‘is-​serp kbir’ huwa msejjaħ “dragun.” Dan ifakkarna fid-​“Dragun il-​kbir, is-​Serp tal-​qedem, li hu msejjaħ id-​Demonju u x-​Xitan.” (Apokalissi 12:​7-9; Ġenesi 3:15) Hu bħal rettili mostruż li kapaċi jfarrak u jiblaʼ l-​priża tiegħu. (Ġeremija 51:34) Meta Satana jkun qed jipprova jitkebbeb magħna, ifarrakna bil-​pressjonijiet taʼ din id-​dinja, u jiblagħna, ejja neħilsu mill-​irbit tiegħu u nirfsu fuq dan ‘is-​serp kbir.’ (1 Pietru 5:8) Il-​fdal midluk hekk jeħtieġ li jagħmel jekk irid li jkollu sehem mit-​twettiq taʼ Rumani 16:20.

Jehovah ​—Is-​Sors tas-​Salvazzjoni Tagħna

19. Għala nsibu kenn f’Jehovah?

¹⁹ Rigward l-​adoratur veru, is-​salmista jirrappreżenta lil Alla bħala li qed jgħid: “La tħabbeb miegħi, jien neħilsu; la għaraf ismi, jiena nħarsu.” (Salm 91:14) Il-​frażi “jiena nħarsu” letteralment hija, “ngħollih ’il fuq,” jiġifieri, fejn wieħed ma jilħaqx. Aħna nsibu kenn f’Jehovah bħala l-​adoraturi tiegħu speċjalment għax ‘tħabbibna miegħu.’ (Mark 12:​29, 30; 1 Ġwann 4:​19) Min-​naħa tiegħu, Alla ‘jeħlisna’ mill-​għedewwa tagħna. Qatt m’aħna se ninqerdu minn wiċċ l-​art. Minflok, se niġu salvati għax nafu u nsejħu l-​isem divin bil-​fidi. (Rumani 10:​11-13) Ukoll aħna determinati li ‘nimxu f’isem Jehovah għal dejjem.’​—Mikea 4:5; Isaija 43:​10-​12.

20. Bħalma jagħlaq Salm 91, Jehovah xi jwiegħdu lill-​qaddej leali tiegħu?

²⁰ Bħalma jagħlaq Salm 91, Jehovah jgħid hekk dwar il-​qaddej leali tiegħu: “Hu jsejjaħli, u jiena nwieġbu; miegħu nkun fid-​dwejjaq tiegħu, neħilsu u nerfagħlu ġieħu; u b’għomor twil nimlieh, nurih is-​salvazzjoni tiegħi.” (Salm 91:​15, 16) Meta nitolbu lil Jehovah fi qbil mar-​rieda tiegħu, hu jweġibna. (1 Ġwann 5:​13-​15) Aħna diġà għaddejna minn ħafna niket minħabba l-​mibegħda li Satana qanqal kontrina. Imma l-​kliem “miegħu nkun fid-​dwejjaq tiegħu” jippreparana għall-​provi li qed jistennewna fil-​futur u jaċċertana li Alla se jsostnina meta din is-​sistema mill-​agħar se tinqered.

21. Kif diġà ġew glorifikati l-​midlukin?

²¹ Minkejja l-​oppożizzjoni qalila taʼ Satana, il-​Kristjani midlukin kollha li għad baqaʼ fostna se jiġu glorifikati fis-​sema fiż-​żmien imwaqqat taʼ Jehovah—wara “għomor twil” fuq l-​art. Madankollu, il-​mod taʼ l-​għaġeb li bih Alla jidħol għall-​midlukin biex jeħlishom diġà gglorifikahom spiritwalment. U kemm iħossuhom onorati li f’dawn l-​aħħar jiem qed ikunu minn taʼ quddiem bħala Xhieda taʼ Jehovah fuq l-​art! (Isaija 43:​10-12) Iżda l-​aqwa salvataġġ li Jehovah se jwettaq fuq il-​poplu tiegħu se jseħħ matul il-​gwerra kbira tiegħu t’Armageddon meta se jivvindika s-​sovranità tiegħu u jkompli jqaddes lil ismu.—Salm 83:19 (83:​18, NW); Eżekjel 38:23; Apokalissi 16:​14, 16.

22. Min se ‘jara s-​salvazzjoni’ taʼ Jehovah?

²² Sew jekk aħna mill-​midlukin inkella sħabhom dedikati lil Alla, ilkoll niddependu minn Alla għas-​salvazzjoni. Matul “Jum il-​Mulej, kbir u tal-​biżaʼ,” dawk li qed jaqdu lealment lil Alla se jiġu salvati. (Ġoel 3:​3-5 [2:​30-32, NW]) Dawk minna li se jifformaw il-​“kotra kbira” li se tgħaddi għad-​dinja l-​ġdida t’Alla u li se jibqgħu leali matul it-​test finali se ‘jimtlew b’għomor twil’—ħajja mingħajr tmiem. Alla se jqajjem ukoll għadd kbir taʼ nies mill-​mewt. (Apokalissi 7:9; 20:​7-​15) Tabilħaqq, Jehovah se jieħu pjaċir ħafna ‘jurina s-​salvazzjoni’ permezz taʼ Ġesù Kristu. (Salm 3:9 [3:​8, NW]) B’dawn il-​prospetti meraviljużi quddiemna, ejja nkomplu nfittxu l-​għajnuna t’Alla ħalli ngħoddu jiem ħajjitna għall-​glorja tiegħu. Bi kliemna u b’għemilna, jalla nkomplu nuru li Jehovah hu l-​kenn tagħna.

[Nota taʼ taħt]

Int Kif Twieġeb?

• X’inhu l-​“post sigriet taʼ l-​Għoli”?

• Aħna għala ma nibżgħux?

• Kif inhu li aħna ‘ma jiġrilna ebda deni’?

• Għala nistgħu ngħidu li Jehovah hu s-​sors tagħna taʼ salvazzjoni?

[Stampa f’paġna 17]

Taf kif il-​fedeltà taʼ Jehovah hi tarka kbira għalina?

[Stampi f’paġna 18]

Jehovah jgħin lill-​qaddejja tiegħu biex iwettqu l-​ministeru tagħhom minkejja attakki għal għarrieda u oppożizzjoni diretta

[Sors]

Kobra: A. N. Jagannatha Rao, Trustee, Madras Snake Park Trust ▼