Mistoqsijiet mill-Qarrejja
Għandna aħna nikkonkludu minn Apokalissi 20:8 li se jkun hemm numru kbir ħafna taʼ nies li jiġu żvijati minn Satana fil-prova finali?
Apokalissi 20:8 jiddeskrivi l-attakk finali taʼ Satana fuq in-nies li jkunu ħajjin fuq l-art fi tmiem il-ħakma t’elf sena tas-Saltna Messjanika. Waqt li jitkellem dwar Satana, dan il-vers jgħid: “Joħroġ iqarraq bil-ġnus li jinsabu fl-erbaʼ rkejjen taʼ l-art, jiġifieri Gog u Magog, u jiġborhom għall-gwerra f’kotra kbira daqs ir-ramel tal-baħar.”
Minkejja l-avanzi li saru fil-metodi u l-istrumentazzjoni xjentifika, “ir-ramel tal-baħar” jibqaʼ kwantità jew għadd mhux magħruf. B’hekk, jistaʼ jingħad li din l-espressjoni tirrappreżenta numru mhux magħruf, mhux determinat. Imma timplika din numru immens, vast, saħansitra astronomiku, jew hija numru li mhux magħruf iżda xorta waħda mdaqqas, jew konsiderevoli?
Fil-Bibbja, l-espressjoni “daqs ir-ramel tal-baħar” tintuża b’modi differenti. Per eżempju, f’Ġenesi 41:49 naqraw: “Ġużeppi ġabar qamħ daqs ir-ramel tal-baħar, b’kotra hekk kbira li għeja jkejjlu, għax kien bla qjies.” Hawnhekk l-enfasi qiegħda fuq li ma setax jingħadd. Bl-istess mod, Jehovah stqarr: “Għax daqs kemm huma l-qtajjaʼ tas-smewwiet li ma jingħaddux u r-ramel tal-baħar li ma jitkejjilx, daqshekk ieħor għad inkattar nisel David.” Daqskemm huwa ċert li l-kwiekeb fis-sema u r-ramel tal-baħar ma jistgħux jingħaddu, daqshekk ieħor huwa ċert li Jehovah se jwettaq il-wegħda li għamel lil David.—Ġeremija 33:22.
Spiss, l-espressjoni “r-ramel tal-baħar” tirreferi għal xi ħaġa taʼ kwantità jew daqs kbir u impressjonanti. L-Iżraelin f’Gilgal kienu inkwetati ferm minħabba l-eżerċtu Filistew miġbur f’Mikmas, li kien “daqs ir-ramel taʼ xatt il-baħar.” (1 Samwel 13:5, 6; Mħallfin 7:12) U “Alla ta għerf lil Salamun u dehen kbir ħafna, u moħħ bla qjies bħar-ramel f’xatt il-baħar.” (1 Slaten 5:9 [4:29, NW]) Għalkemm dak li ssemma f’kull każ kien ammont kbir, xorta waħda ma kienx infinit.
“Ir-ramel tal-baħar” jistaʼ jirrappreżenta wkoll numru mhux magħruf, mingħajr ma jissuġġerixxi li hu immens. Jehovah qal lil Abraham: “Inkattarlek sewwa lil nislek bħall-kwiekeb tas-sema u bħar-ramel f’xatt il-baħar.” (Ġenesi 22:17) Meta tenna din il-wegħda lil Ġakobb, li kien in-neputi t’Abraham, Jehovah uża l-espressjoni “trab taʼ l-art,” li Ġakobb irrefera għalih bħala “ramel tal-baħar” meta reġaʼ tkellem dwar din il-wegħda. (Ġenesi 28:14; 32:13 [32:12, NW]) Kif seħħew l-affarijiet, apparti Ġesù Kristu, in-“nisel” t’Abraham jgħodd 144,000, li Ġesù sejħilhom il-“merħla ċkejkna.”—Luqa 12:32; Galatin 3:16, 29; Apokalissi 7:4; 14:1, 3.
X’nitgħallmu minn dawn l-eżempji? Nitgħallmu li l-espressjoni “daqs ir-ramel tal-baħar” ma tfissirx dejjem numru infinit, astronomiku; lanqas ma tintuża dejjem biex tiddeskrivi xi ħaġa immensa jew taʼ kobor bla qjies. Spiss tirrappreżenta numru mhux magħruf imma mdaqqas. B’hekk, ikun raġunevoli jekk nissopponu li l-folla ribelluża li tappoġġa lil Satana fl-attakk finali tiegħu fuq in-nies t’Alla mhix se tkun immensa, jew infinita, imma mdaqqsa u kbira biżżejjed biex tkun taʼ theddida. Madankollu, in-numru jibqaʼ mhux magħruf għalissa.