Uri Tħassib Ġenwin Fl-​Interess Kollu Li Ssib

¹ Il-​proklamazzjoni mad-​dinja kollha tas-​Saltna dalwaqt se tasal fi tmiemha, u wara li dan iseħħ dawk kollha “li ma jagħrfux lil Alla” se jġarrbu l-​qerda. (2 Tess. 1:​7-9) B’hekk, tħassib ġenwin fil-​ħajjiet t’oħrajn qed iqanqal lill-​poplu taʼ Jehovah biex jilħaq lil kemm jistaʼ jkun nies possibbli bil-​messaġġ tas-​Saltna.​—Sof. 2:3.

² Kull xahar, miljuni taʼ sigħat jitqattgħu fi tfittxija għal dawk li jixtiequ jisimgħu “bxara” taʼ xi ħaġa aħjar. (Isa. 52:7) Bi tweġiba għall-​offerta tal-​letteratura kurrenti, ħafna aċċettaw kopji taʼ It-​Torri Taʼ L-​Għassa u Stenbaħ! jew il-​brochure Alla X’Jirrikjedi Minna? Tħassib ġenwin f’dawn in-​nies għandu jqanqalna biex inkomplu nibnu fuq l-​interess kollu li nkunu sibna.​—Prov. 3:27.

³ Ħu Noti Preċiżi: Se twettaq ħafna iktar jekk iżżomm rekord komplet u preċiż taʼ l-​interess u l-​letteratura li tkun ħallejt. Informazzjoni bħall-​isem u l-​indirizz taʼ l-​inkwilin, il-​ġurnata u l-​ħin li żortu, x’letteratura ħallejtlu, u s-​suġġett diskuss se tgħinek tkun iktar effettiv meta terġaʼ tmur. Ukoll, jekk tniżżel xi kummenti li għamel l-​inkwilin fl-​ewwel konversazzjoni tagħkom, int tkun tistaʼ tirreferi għalihom b’mod effettiv hekk kif tkompli d-​diskussjoni fiż-​żjara lura.

⁴ Agħmel Iż-​Żjajjar Lura Minnufih: Kemm minn dawk li aċċettaw xi letteratura mingħandek ix-​xahar li għadda pprovajt terġaʼ żżurhom? Għaddew ġimgħat sħaħ mingħajr ma kien hemm iktar kuntatt? Tħassib ġenwin dwar il-​benesseri dejjiemi tagħhom għandu jqanqlek biex tmur lura kemm jistaʼ jkun malajr, preferibbilment fi ftit ġranet, sabiex il-​konversazzjoni tkun għadha friska fil-​moħħ. Billi tmur lura minnufih biex tkompli tibni fuq l-​interess li wrew, int jistaʼ jirnexxilek ittellef l-​isforzi taʼ Satana qabel ma “jersaq . . . u jaħtfilhom il-​kelma li nżergħet f’qalbhom.”​—Mark 4:15.

⁵ Il-​Preparazzjoni Hija Essenzjali: L-​effettività tiegħek f’li tagħmel żjajjar lura għandha x’taqsam direttament maʼ kemm tipprepara tajjeb. Ippjana x’se tagħmel qabel ma tmur. Il-​paġna taʼ wara taʼ Il-​Ministeru Tas-​Saltna t’April 1997 tipprovdi diversi preżentazzjonijiet li tistaʼ tuża b’suċċess meta toffri r-​rivisti jew il-​brochure X’Jirrikjedi. Il-​pass li jmiss huwa li jkollok xi punti f’moħħok fuqiex titkellem meta tirritorna. X’jistaʼ jingħad meta tmur lura biex tkompli fuq l-​interess li ntwera? Kif jistaʼ jinbeda studju tal-​Bibbja?

⁶ Meta tmur lura biex tkompli tiddiskuti dwar x’hemm bżonn biex innaddfu l-​art u nagħmluha post aħjar biex ngħixu fiha, tistaʼ tgħid:

◼ “Fiż-​żjara tiegħi taʼ qabel, qbilna li hemm bżonn taʼ miżuri drastiċi qabel ma l-​art tistaʼ tinbidel f’ġenna mimlija paċi. Taħseb li l-​bnedmin għandhom il-​mezzi biex iwettqu din il-​biċċa xogħol? [Ħalli ħin għal tweġiba.] Jekk jogħġbok innota għala se jkun neċessarju għal Alla li jindaħal fil-​kwistjonijiet tal-​bniedem.” Aqra Salm 37:​38. Imbagħad mur f’lezzjoni 5 tal-​brochure X’Jirrikjedi, u uża xi siltiet magħżulin minn paragrafi 4-5 biex turi kif Alla se jwettaq din il-​profezija. Kompli billi toffri studju tal-​Bibbja permezz tal-​brochure.

⁷ Jekk iddiskutejt dwar is-​Saltna t’Alla u ħallejt il-​brochure “X’Jirrikjedi” fl-​ewwel żjara, meta tkun se terġaʼ tmur tistaʼ tgħid xi ħaġa hekk:

◼ “L-​aħħar li tkellimna, identifikajna s-​Saltna t’Alla bħala li hija gvern reali li se jmexxi l-​art kollha. Il-​Bibbja turi li Ġesù Kristu se jkun il-​mexxej taʼ dak il-​gvern. Tistaʼ taħseb f’xi benefiċċji li jistaʼ jkollna jekk inkunu taħt dan it-​tip taʼ gvern u mexxej?” Ħalli ħin għal tweġiba. Iftaħ il-​brochure X’Jirrikjedi f’lezzjoni 6. Billi tuża xi punti magħżulin minn paragrafi 6-7 u l-​istampa f’paġna 13, uri x’se tagħmel is-​Saltna t’Alla għall-​umanità fil-​futur. Aqra Danjel 2:​44, u jekk hu xieraq, introduċi l-​ktieb Għarfien u offri studju tal-​Bibbja.

⁸ Jekk sibt lil xi ħadd li ammetta li r-​reliġjonijiet tad-​dinja ħolqu problemi għall-​umanità, tistaʼ tistaqsih dan fiż-​żjara lura:

◼ “Qatt ħsibt dwar kif nistgħu nkunu nafu liema reliġjon għandha l-​approvazzjoni t’Alla? [Ħalli ħin għal tweġiba.] Dan il-​brochure Alla X’Jirrikjedi Minna? isemmi l-​marki li jidentifikaw il-​vera reliġjon.” Mur f’lezzjoni 13, u enfasizza l-​ħames punti fil-​korsiv f’paragrafi 3-7. Tistaʼ tkompli billi tgħid: “Flimkien maʼ li nsibu l-​vera reliġjon, irridu nsibu x’jirrikjedi Alla minna individwalment.” Aqra Ġwann 4:​23, 24. Offri li tkompli tiddiskuti dan. Mur f’lezzjoni nru. 1 fil-​brochure, u uri kif aħna nistudjaw.

⁹ Meta tmur lura biex tkompli diskussjoni dwar l-​hena fil-​familja, tistaʼ tgħid xi ħaġa simili għal dan li ġej:

◼ “Meta ltqajna l-​ewwel darba, qsamt miegħek is-​sigriet taʼ l-​hena fil-​familja, jiġifieri li napplikaw il-​pariri misjubin fil-​Kelma t’Alla, il-​Bibbja. Meta tiġi biex tittratta l-​bżonnijiet taʼ familja moderna, temmen li l-​Bibbja hija antika jew aġġornata?” Ħalli ħin għal tweġiba. Ippreżenta l-​ktieb Għarfien. Mur f’kapitlu 2, u aqra l-​kwotazzjoni f’paragrafu 13. Billi tuża l-​punti f’paragrafu 3, offri studju tal-​Bibbja bħala familja.

¹⁰ Billi nieħdu noti preċiżi, nagħmlu preparazzjoni essenzjali, u mmorru lura minnufih biex inkattru l-​interess tagħhom, nistgħu nuru t-​tip taʼ mħabba lejn il-​ġar li se tattirahom lejn il-​mogħdija tas-​salvazzjoni.​—Matt. 22:​39; Gal. 6:​10.