Agħti Xiehda Kulfejn Hemm In-​Nies

¹ Billi rrikonoxxa l-​irwol li l-​ispirtu t’Alla kellu fil-​ministeru tiegħu, l-​appostlu Pawlu qal: “Alla hu li kabbar.” Stqarr ukoll: “Aħna ħaddiema maʼ Alla.” (1 Kor. 3:​5-9) Dan huwa privileġġ meraviljuż. Kif nistgħu nuru pubblikament li napprezzaw il-​fatt li nkunu ħaddiema m’Alla? Billi niddikjaraw l-​aħbar tajba lil dawk kollha li niltaqgħu magħhom fix-​xogħol minn dar għal dar u f’kull post ieħor.

² Aħna kkmandati li ‘nagħmlu dixxipli mill-​ġnus.’ (Matt. 28:19) Jekk nikkuntattjaw ftit nies biss meta nieħdu sehem fil-​ministeru, għandna mnejn niddejqu malajr u nħossuna li ma tantx għamilna ġid. Min-​naħa l-​oħra, l-​iktar li ngawdu l-​ministeru tagħna hu meta jirnexxilna nsibu ħafna nies u nitkellmu magħhom. Dan jistaʼ jkun daqsxejn taʼ sfida, peress li jitlob xi ftit taʼ l-​inizjattiva min-​naħa tagħna biex immorru fejn jinstabu n-​nies biex inkunu nist­għu nkellmuhom.

³ Eżempji Prattiċi: Nistgħu nagħtu xiehda lin-​nies fejn jarmaw tal-​monti, fil-​ġonna, u fejn jieqfu l-​karozzi tal-​linja. Meta tirkeb tal-​linja, lest biex tagħti xiehda matul il-​vjaġġ? Żewġ Xhieda li kienu f’karozza tal-​linja mimlija fi triqithom biex jiltaqgħu għas-​servizz qabdu diskussjoni bejniethom fuq l-​istampa tal-​Ġenna taʼ l-​art fil-​ktieb Għarfien, fil-​waqt li ddiskutew il-​wegħdi t’Alla għall-​futur. Kif ittamaw li se jiġri, żagħżugħ li kien bil-​wieqfa ħdejhom semagħhom u baqaʼ impressjonat b’dak li semaʼ. Qabel ma niżel minn tal-​linja, hu aċċetta ktieb u talab biex xi ħadd iżuru d-​dar.

⁴ Ħafna pubblikaturi sabu ferħ f’li jagħtu xiehda informali. Waħda oħt marret fiċ-​ċentru tal-​ħwienet lokali darba wara nofs in-​nhar u avviċinat lin-​nies li kienu lestew ix-​xirja tagħhom imma li ma kinux jidhru mgħaġġlin. Hi qassmet il-​letteratura kollha li kellha fil-​basket. Raġel li kien qiegħed jistenna fil-​karozza tiegħu ħa pjaċir bir-​rivisti li tagħtu. Dan kien attenda xi laqgħat qabel, u l-​konversazzjoni tagħhom kebbset l-​interess tiegħu.

⁵ Huwa privileġġ li neżaltaw l-​isem taʼ Jehovah. Billi nuru ż-​żelu tagħna fix-​xogħol taʼ l-​ippridkar, nuru li ma fhimniex ħażin l-​iskop tal-​qalb tajba mhix mistħoqqa li Alla wera lejna. Peress li “issa hu ż-​żmien tajjeb” biex ngħinu lil oħrajn, ejjew immorru kulfejn hemm in-​nies u nagħtuhom xiehda dwar “jum is-​salvazzjoni” taʼ Jehovah.​—2 Kor. 6:​1, 2.