Aħna Rridu Nkunu Għalliema, Mhux Sempliċement Predikaturi

¹ Ġie osservat li “x-​Xhieda taʼ Jehovah litteralment ksew l-​art bil-​għoti taʼ xiehda tagħhom.” Dan kif kien possibbli? Mhux bil-​ħila jew bil-​qawwa tal-​bnedmin, imma bl-​ispirtu t’Alla li jopera fuq il-​qaddejja tiegħu hekk kif jagħmlu użu minn diversi provvedimenti biex iwettqu l-​inkarigu tagħhom taʼ li jippridkaw u jgħallmu.​—Żak. 4:6; Atti 1:8.

² Il-​karta stampata hija mezz effettiv taʼ kif inwettqu x-​xogħol tagħna taʼ l-​ippridkar. Matul is-​snin, ġew stampati u mqassmin mix-​Xhieda taʼ Jehovah biljuni taʼ kotba, kotba żgħar, brochures, rivisti, u fuljetti sabiex jgħinu f’li tkun magħrufa l-​aħbar tajba tas-​Saltna. Rapporti fin-​1997 Yearbook juru li l-​produzzjoni tal-​letteratura laħqet livelli straordinarji. Sal-​ġurnata tal-​lum, ġew stampati iktar minn 91 miljun kopja tan-​New World Translation. F’sena waħda l-​għadd taʼ rivisti tat-​Torri Taʼ L-​Għassa u taʼ Stenbaħ! stampati fl-​Istati Uniti żdied b’7.1 fil-​mija. Fil-​Ġermanja, il-​produzzjoni tar-​rivisti żdiedet b’35 fil-​mija. Iktar minn terz tar-​rivisti stampati hemmhekk kienu bir-​Russu.

³ Għala hemm bżonn taʼ daqshekk letteratura? Madwar id-​dinja, kien hemm reazzjoni tremenda għall-​inkuraġġiment li ġejna mogħtijin biex nagħtu xiehda kulfejn jistgħu jinstabu n-​nies. Peress li ħafna iktar minna estendew ix-​xogħol tagħhom taʼ l-​għoti taʼ xiehda​—f’postijiet pubbliċi, fit-​toroq, u f’territorju tan-​negozju—​qegħdin jitħallew ammonti akbar taʼ letteratura maʼ nies li juru xi ftit taʼ l-​interess. Ħafna minn dawn bil-​kemm, jew forsi qatt qabel, ma kellhom l-​opportunità li jisimgħu l-​messaġġ tas-​Saltna. Biex ilaħħqu maʼ din il-​ħtieġa, il-​kongregazzjonijiet iżommu ħażna taʼ varjetà taʼ pubblikazzjonijiet għall-​użu fl-​aspetti kollha tal-​ministeru.

⁴ X’Inhi L-​Mira Tagħna F’Li Nqassmu L-​Letteratura? Il-​mira tagħna m’hijiex biss li nħallu l-​letteratura. L-​inkarigu taʼ li nagħmlu dixxipli jinvolvi żewġ aspetti​—li nippridkaw u li ngħallmu. L-​ewwel, għandna l-​privileġġ li nippridkaw l-​aħbar tajba tas-​Saltna, u nagħmlu lin-​nies konxji li din hija l-​unika tama għall-​umanità. (Mt. 10:7; 24:14) Il-​letteratura tagħna bbażata fuq il-​Bibbja hija mezz effettiv li ġie pprovat biż-​żmien taʼ kif jiġi stimulat l-​interess u jingħata għarfien lil oħrajn dwar is-​Saltna.

⁵ It-​tieni, jekk irridu nagħmlu dixxipli, irridu ngħallmu l-​affarijiet kollha li kkmanda Ġesù. (Mt. 11:1; 28:​19, 20) Għal darb’oħra, il-​letteratura għandha rwol importanti f’li nniżżlu l-​verità ġewwa l-​qlub taʼ l-​istudenti, u b’hekk ngħinuhom isiru dixxipli.

⁶ Dawk li jaċċettaw xi letteratura jistgħu jkunu ‘semmiegħa tal-​kelma,’ imma huwa diffiċli li se jsiru dawk li jagħmluha jekk jitħallew għal riħhom. (Ġak. 1:​22-​25) Ftit huma dawk li xi darba se jsiru dixxipli jekk ma jiggwidahomx xi ħadd. (Atti 8:​30, 31) Dawn jeħtieġu għalliem biex jgħinhom jaraw kemm hija minnha l-​verità misjuba fl-​Iskrittura. (Atti 17:​2, 3) Il-​mira tagħna hi li ngħinuhom jimxu ’l quddiem sal-​punt tad-​dedikazzjoni u l-​magħmudija u li nħarrġuhom biex isiru kwalifikati kif jixraq ħalli jgħallmu lil oħrajn.​—2 Tim. 2:2.

⁷ L-​Akbar Bżonn Huwa Għal Iktar Għalliema: Meta nippridkaw, niddikjaraw pubblikament l-​aħbar tajba. Li ngħallmu, madankollu, jinvolvi li nistruwixxu lil xi ħadd progressivament. Fil-​waqt li l-​ippridkar jagħmel lil oħrajn konxji tal-​messaġġ tas-​Saltna, it-​tagħlim jgħin individwi jaċċettaw l-​aħbar tajba u jaġixxu fuqha. (Lq. 8:15) Għalliem jagħmel iktar milli jxandar; hu jispjega, jirraġuna b’argumenti tajbin, joffri l-​provi, u jipperswadi.

⁸ Kemm jistaʼ jkun uħud minna għandhom ikunu għalliema, mhux sempliċement predikaturi. (Lhud 5:12a) Li nqassmu l-​letteratura huwa parti vitali minn xogħolna, imma li nilħqu t-​tieni objettiv tal-​ministeru tagħna fl-​aħħar mill-​aħħar jiddependi minn dak li nagħmlu bħala għalliema. Għalkemm nistgħu nifirħu meta jirnexxilna nħallu xi letteratura, biex naqdu sewwa l-​ministeru tagħna, m’għandniex inqisuha bħala l-​mira finali tagħna meta nħallu xi ħaġa. (2 Tim. 4:5) Li nħallu l-​letteratura huwa mezz effettiv taʼ kif niftħu t-​triq għal opportunitajiet biex ngħallmu l-​verità lil oħrajn.

⁹ Agħmel Żjajjar Lura Biex Tibda Studji Tal-​Bibbja: Ilkoll kemm aħna x’aktarx li ħallejna għadd taʼ kotba, brochures, u rivisti, u bnejna lista taʼ żjajjar lura. Għandna nwarrbu ħin regulari biex immorru lura ħalli nqajmu l-​interess. L-​għan ewlieni tagħna f’li nirritornaw m’huwiex sempliċement li nħallu iktar letteratura imma li ninkuraġġixxu lin-​nies ħalli jaqraw u jibbenefikaw minn dak li diġà għandhom. Kemm konna se nimxu ’l quddiem spiritwalment aħna nfusna li kieku ma ġiex xi ħadd darba wara l-​oħra biex jgħinna niksbu għarfien eżatt?​—Ġw. 17:3.

¹⁰ Ibni fuq kull interess li jintwera bl-​iskop li tibda studju tal-​Bibbja jew fil-​brochure Alla X’Jirrikjedi Minna? jew fil-​ktieb Għarfien Li Jwassal Għall-​Ħajja Taʼ Dejjem. Dawn iż-​żewġ pubblikazzjonijiet jippreżentaw il-​messaġġ tas-​Saltna f’għamla li faċli biex tifhmu. Il-​brochure X’Jirrikjedi fih kors taʼ studju komprensiv, billi jkopri t-​tagħlim bażiku tal-​Bibbja. Bil-​ktieb Għarfien wieħed kapaċi jgħallem il-​verità iktar fid-​dettall, iżda b’mod sempliċi, ċar, u fil-​qosor.

¹¹ Il-​programm simplifikat taʼ tagħlim, kif spjegat fl-​insert taʼ Il-​Ministeru Tas-​Saltna taʼ Ġunju 1996, jagħmilha faċli għall-​għalliem biex jistruwixxi u għall-​istudent biex jitgħallem. Żomm kopja taʼ dik l-​insert fejn tistaʼ ssibha sabiex tirrevedi metodi u tekniċi taʼ tagħlim li taw prova li huma effettivi. Xi ftit mis-​suġġerimenti li tagħti jinvolvu kif turi interess ġenwin fl-​istudent, kemm għandu jiġi mgħoddi materjal f’sessjoni waħda, kif tittratta mistoqsijiet li m’għandhomx x’jaqsmu mas-​suġġett, kif kemm l-​għalliem u kemm l-​istudent jistgħu jippreparaw minn qabel għall-​istudju, u kif tidderieġi lill-​istudent lejn l-​organizzazzjoni taʼ Jehovah. Billi jimxu fuq is-​suġġerimenti, iktar uħud minna, inklużi dawk ġodda, se jkunu kapaċi jikkonduċu studji progressivi.

¹² Rapporti Taʼ Suċċess Tajjeb Mill-​Għalqa: Il-​brochure X’Jirrikjedi u l-​ktieb Għarfien taw prova li huma għajnuniet imprezzabbli f’li jitħaffef il-​proċess taʼ li jsiru dixxipli. Malli rċieva l-​brochure X’Jirrikjedi, ħu fil-​Bolivja wżah minnufih biex jibda studju maʼ raġel. Erbaʼ xhur wara fil-​konvenzjoni distrettwali, dan l-​istudent kien fost dawk il-​kandidati ferħanin għall-​magħmudija!

¹³ Ħafna qegħdin jiġu mqanqlin li jiddedikaw ħajjithom lil Jehovah wara li jlestu l-​istudju tagħhom fil-​ktieb Għarfien. F’kongregazzjoni minnhom fl-​Angola, l-​għadd taʼ studji tal-​Bibbja kondotti mill-​pubblikaturi żdied minn 190 għal 260 u l-​attendenza għal-​laqgħat irdoppjat fin-​numru minn 180 għal 360 f’erbaʼ xhur biss minn mindu beda jintuża l-​ktieb Għarfien f’dawk l-​inħawi. Ftit żmien wara dan, kellha tiġi fformata kongregazzjoni oħra.

¹⁴ Wara li beda l-​ewwel studju tiegħu fil-​ktieb Għarfien, wieħed ħu qal li biex tikkonduċih huwa “faċli jekk dak li jikkonduċi sempliċement jistaqsi l-​mistoqsijiet, jaqra xi skritturi li japplikaw, u jkun ċert li l-​istudent fehem.” Għalkemm kien dejjem jaħseb li pubblikaturi kwalifikati ħafna biss setgħu jikkonduċu studji tal-​Bibbja progressivi u li hu qatt ma kien se jkun kapaċi, irrealizza li setaʼ, billi qal: “La kapaċi jien, kapaċi kulħadd.”

¹⁵ Huwa billi nikkonduċu studji tal-​Bibbja bħala parti mill-​ministeru tagħna li nwettqu l-​objettiv taʼ li nagħmlu dixxipli. Dawk li żviluppaw l-​abbiltà li jieħdu sehem f’dan l-​aspett tal-​ministeru jsibuh verament taʼ sodisfazzjon u premjanti bil-​bosta. Jalla jintqal dwarna li aħna wkoll qegħdin ‘inxandru s-​Saltna t’Alla u ngħallmu fuq il-​Mulej Ġesù Kristu bil-​kuraġġ u bla tfixkil.’​—Atti 28:31.