Uża l-​Browxers Biex Jappellaw Kemm għall-​Moħħ u Kemm għall-​Qalb

¹ Il-​verità tal-​Bibbja għandha tiġi ppreżentata b’tali mod li tkun tappella kemm għall-​moħħ u kemm għall-​qalb. Meta Ġesù spjega l-​verità lis-​semmiegħa tiegħu, hu għażel suġġetti li interessawhom u mmotivawhom. (Lq. 24:​17, 27, 32, 45) Is-​suċċess tal-​ministeru tagħna jiddependi ħafna mill-​isforz li nagħmlu biex nidentifikaw il-​bżonnijiet spiritwali tas-​semmiegħa tagħna.

² Il-​browxers jistgħu jkunu għodod effettivi biex jilħqu l-​moħħ u l-​qalb taʼ dawk li niltaqgħu magħhom fil-​ministeru. Aħseb bil-​quddiem dwar min jistaʼ jwieġeb għall-​messaġġ f’kull browxer li se jkun ippreżentat f’Awissu:

—Veru li Alla Jimpurtah Minna? Nies li huma magħfusin ekonomikament jew li esperjenzaw xi traġedja se japprezzaw dan il-​messaġġ taʼ faraġ dwar futur ħieles mis-​sofferenza.

—X’Inhu l-​Iskop tal-​Ħajja​—Kif Tistaʼ Ssibu? Żgħażagħ li qegħdin jaħsbu bis-​serjetà dwar il-​futur tagħhom se jibbenefikaw mit-​tweġibiet ibbażati fuq il-​Bibbja misjubin f’dan il-​browxer.

—Gawdi l-​Ħajja fuq l-​Art Għal Dejjem! Il-​ħafna stampi u skritturi ċċitati se jgħinu lil tfal żgħar u lil dawk li ftit li xejn jafu jaqraw biex jifhmu l-​iskopijiet t’Alla.

—Meta Xi Ħadd Li Tħobb Imut. Ħafna kummissjonanti japprezzaw li jkollhom kopji taʼ dan il-​browxer biex jagħtuhom lil familji mnikktin. Pubblikaturi li jagħtu xiehda fiċ-​ċimiterji jużaw dan il-​browxer biex ifarrġu lil dawk li jkunu bil-​vistu. Żewġt aħwa nisa resqu fuq familja taʼ sebgħa min-​nies li kienu qed jitolbu ħdejn qabar. Bħala riżultat taʼ li qasmu l-​messaġġ taʼ faraġ mill-​browxer, l-​għada nbeda studju tal-​Bibbja maʼ l-​omm!

—Għandek Int Temmen fit-​Trinità? Individwu reliġjuż ferm jistaʼ jwieġeb għall-​verità misjuba f’din l-​istqarrija taʼ fatti ddokumentata tajjeb dwar id-​duttrina fundamentali tal-​Kristjaneżmu.

³ Sir midħla taʼ kull browxer, u ddetermina kif l-​aħjar li tużah fit-​territorju tiegħek. Għal suġġerimenti dwar kif tippreżentahom, ara l-​paġna taʼ wara tal-​ħarġa taʼ Il-​Ministeru tas-​Saltna taʼ Lulju 1998. Jalla Jehovah jbierek l-​isforzi tiegħek biex tilħaq kemm l-​imħuħ u kemm il-​qlub tan-​nies.​—Mk. 6:34.