Kun Semmiegħ Tajjeb
1 Jeħtieġ id-dixxiplina biex wieħed jismaʼ b’attenzjoni. Dan jirrikjedi wkoll xewqa min-naħa tas-semmiegħ biex jitgħallem u jibbenefika minn dak li jkun qed jismaʼ. Għaldaqstant, Ġesù enfasizza l-bżonn biex dak li jkun ‘joqgħod attent kif jismaʼ.’—Lq. 8:18.
2 Dan japplika b’mod speċjali meta nattendu għal-laqgħat tal-kongregazzjoni, assembleat, u konvenzjonijiet. Dawn huma okkażjonijiet fejn irridu nisimgħu bir-reqqa. (Lhud 2:1) Hawnhekk ġejjin xi ftit punti li se jgħinuk tkun semmiegħ tajjeb f’dawn il-laqgħat Kristjani.
◼ Apprezza l-valur tal-laqgħat. Huma l-mezz prinċipali li bihom niġu “mgħallma mill-Mulej” permezz tal-prokuratur leali.—Is. 54:13; Lq. 12:42.
◼ Ipprepara minn qabel. Irrevedi l-materjal li jkun se jiġi diskuss, u kun ċert li ġġib miegħek il-Bibbja tiegħek u l-kopja persunali tal-pubblikazzjoni li tkun qed tiġi studjata.
◼ Agħmel sforz speċjali sabiex tikkonċentra matul il-laqgħat. Trid tevita li toqgħod titkellem maʼ dawk taʼ ħdejk kif ukoll li tkun moħħok x’qed jagħmlu l-oħrajn fl-udjenza. Ipprova taljenax rasek billi toqgħod taħseb dwar x’se tagħmel wara l-laqgħa jew dwar affarijiet persunali oħrajn.
◼ Analizza dak li jkun qed jiġi preżentat. Staqsi lilek innifsek: ‘Dan kif japplika għalija? Meta se napplikah?’
◼ Ħu xi noti qosra tal-punti prinċipali u l-iskritturi. Dan se jgħinek tiffoka l-ħsibijiet tiegħek fuq dak li jkun qed jiġi diskuss u jgħinek ukoll tiftakar il-punti prinċipali meta jkollok bżonn tużahom.
3 Għallem lil Uliedek Jisimgħu: It-tfal għandhom bżonn l-istruzzjoni spiritwali. (Dt. 31:12) Fiż-żminijiet tal-qedem dawk kollha “li kienu jifhmu dak li jisimgħu” fost in-nies t’Alla kellhom joqogħdu attenti hekk kif kienet tinqara l-Liġi. (Neħ. 8:1-3) Jekk il-ġenituri jkun moħħhom biss fil-laqgħat u joqogħdu attenti ħafna, x’aktarx li wliedhom jagħmlu bħalhom. Ma jkunx għaqli li jġibulhom xi ġugarelli jew kotba tat-tpinġija biex dawn ma jiddejqux. Il-fatt li joqogħdu jmorru t-tojlit għalxejn ukoll se jtellifhom milli jisimgħu. Ladarba l-“bluha b’għeruqha fil-qalb taʼ kull tifel,” il-ġenituri jridu jagħmlu kull sforz biex jaraw li waqt il-laqgħat uliedhom joqogħdu bil-qegħda u jisimgħu bil-kwiet.—Prov. 22:15.
4 Billi nkunu semmiegħa tajba, se nagħtu prova li aħna tassew għaqlin u li rridu ‘nżidu l-għerf tagħna.’—Prov. 1:5.