Għarraf l-​Isem u l-​Għemejjel taʼ Jehovah

¹ “Faħħru l-​Mulej u xandru ismu, għarrfu lill-​ġnus bl-​għemejjel tiegħu. . . . Tifraħ il-​qalb taʼ dawk li jfittxu l-​Mulej.” (Salm 105:​1, 3) Is-​salmista li kiteb dan il-​kliem, hu personalment sab ferħ kbir f’li jgħid lil oħrajn dwar Jehovah u l-​“għemejjel” tiegħu. Liema għemejjel? Mingħajr ebda dubju dawk li għandhom x’jaqsmu mal-​kariga glorjuża t’Alla bħala sultan u maʼ l-​aħbar tajba taʼ salvazzjoni permezz tiegħu.—Salm 96:​2, 3; 145:​11, 12.

² Hekk kif qed noqorbu lejn l-​istaġun tal-​Mafkar għas-​sena 2001, għandna ħafna raġunijiet biex nifirħu b’dak li Jehovah qed jagħmel magħna. Kif? L-​Ikla taʼ Fil-​Għaxija tal-​Mulej hija mingħajr dubju l-​akbar osservanza tas-​sena għall-​Kristjani veri kollha. M’hemm ebda okkażjoni oħra bħalha f’dik li hija importanza, skop, jew il-​mod kif issir. Dan huwa ż-​żmien biex ilkoll kemm aħna niftakru dak li Jehovah u Ġesù għamlu għalina sabiex jipprovdulna l-​mezz taʼ salvazzjoni. Mhux taʼ b’xejn li matul l-​istaġun tal-​Mafkar, ovvjament se nistennew li naraw żjieda kbira fl-​attività tas-​servizz taʼ l-​għalqa, hekk kif ngħarrfu l-​aħbar tajba taʼ salvazzjoni!

³ Se Tkun Pijunier Awżiljarju? F’April li għadda lħaqna r-​rekord taʼ 130 pijunier awżiljarju. Nistgħu din is-​sena nagħmlu x-​xhur taʼ Marzu u April speċjali billi nżidu l-​attività fil-​ministeru? Marzu fih ħames Sibtijiet, u April fih ħames Ħdud. Ħafna pubblikaturi li jaħdmu full-time sabu li jistgħu jlaħħqu x-​xogħol taʼ pijunier awżiljarju billi jippjanaw ġranet sħaħ taʼ servizz fi tmiem il-​ġimgħa. Sabiex ilaħħaq il-​ħtieġa taʼ 50 siegħa fix-​xahar, pijunier awżiljarju għandu bżonn jikkalkula bejn wieħed u ieħor 12-il siegħa fil-​ġimgħa. Ikkunsidra bir-​reqqa l-​iskedi suġġeriti fil-​kaxxa f’paġna 4. Hemm xi waħda minnhom li taqbel maċ-​ċirkustanzi tiegħek? Jekk le, forsi tistaʼ tippjana l-​iskeda persunali tiegħek biex tkun pijunier awżiljarju f’Marzu u f’April.

⁴ L-​anzjani jridu jibdew minn issa jibnu l-​entużjażmu u l-​appoġġ għall-​attività miżjuda tas-​servizz. F’April tas-​sena l-​oħra, f’waħda mill-​kongregazzjonijiet fejn l-​anzjani u l-​qaddejja ministerjali kollha ħadu sehem fix-​xogħol taʼ pijunier awżiljarju, 64 mill-​121 pubblikatur kienu pijunieri awżiljarji! Il-​kongregazzjoni ħadet gost ukoll tara sitt pubblikaturi mhux mgħammdin ġodda f’Marzu u f’April. Tabilħaqq, huwa l-​aħjar żmien għat-​tfal u dawk l-​uħud ġodda biex jistaqsu lill-​anzjani jekk jikkwalifikawx ħalli jibdew jieħdu sehem fl-​attività t’għoti taʼ xiehda pubblika.

⁵ Iktar Sforz Iġib Barkiet: Il-​kongregazzjonijiet li jagħmlu miri speċjali u iktar sforz igawdu ħafna barkiet. Xi kongregazzjonijiet jistgħu jpoġġu enfasi partikulari biex jinħadmu l-​inħawi li ma jsirux taʼ spiss, jikkonċentraw fuq aspetti oħrajn tal-​ministeru, jew jenfasizzaw l-​għoti taʼ xiehda bit-​telefon—mezz effettiv biex nikkuntattjaw lil dawk li ma jkunux id-​dar u lir-​residenti li ma jintlaħqux.

⁶ Għandhom in-​nuqqas taʼ saħħa u l-​età avanzata bilfors ifixklu lil xi ħadd milli jkun involut kemm jistaʼ jkun fis-​servizz? Mhux f’kull każ. Per eżempju, oħt xwejħa taʼ 86 sena li għandha kanċer, f’April qdiet bħala pijuniera awżiljarja minkejja li jintefħulha saqajha. Hi setgħet tieħu sehem sħiħ fis-​servizz permezz taʼ l-​għoti taʼ xiehda bit-​telefon, u b’hekk faħħret iktar lil Jehovah. Dan ħalla effett inkuraġġanti kemm fuqha kif ukoll fuq il-​kongregazzjoni.

⁷ Ipprepara Sew għall-​Mafkar: Din is-​sena l-​Mafkar se jkun fit-​8 t’April. Ladarba se jinzerta l-​Ħadd, għandu jkun possibbli biex jattendu iktar nies. Jistaʼ jkollna l-​akbar attendenza li qatt kellna jekk nagħmlu l-​parti tagħna billi (1) nattendu aħna personalment u (2) nistiednu oħrajn biex jingħaqdu magħna għall-​Mafkar. Lil min għandna nistiednu?

⁸ Ħares lejn in-​noti tas-​servizz taʼ l-​għalqa persunali tiegħek għall-​ismijiet taʼ dawk l-​uħud li wrew xi ftit interess għall-​verità, anki jekk ma tmurx iżżurhom regolarment. Ħmistax jew tliet ġimgħat qabel il-​Mafkar, ikkonċentra fuq li tmur iżżurhom kollha biex tistidinhom għall-​Mafkar. Jekk iċ-​ċirkustanzi tiegħek jippermettu, offri t-​trasport lil dawk li jkunu jixtiequ jattendu.

⁹ F’xi kongregazzjonijiet, l-​inviti tal-​Mafkar stampati ma jintużawx kollha. Is-​segretarji tal-​kongregazzjoni għandhom ikunu ċerti li jkollhom l-​inviti disponibbli minn żmien qabel sabiex jilħqu jitqassmu kollha. Tistaʼ tittajpja jew tikteb pulit il-​ħin u l-​post għall-​Mafkar fuq in-​naħa t’isfel taʼ l-​invit. Inkella tistaʼ tagħtihom volantin maʼ l-​invit li fih ikollu mniżżel l-​indirizz tas-​Sala tas-​Saltna jekk il-​Mafkar ikun se jsir hemmhekk. Bħala tfakkira, il-​biċċa l-​kbira taʼ l-​inviti tal-​Mafkar għandhom jingħataw personalment lill-​inkwilin.

¹⁰ Ftakar f’Dawk l-​Uħud Inattivi: Hija okkażjoni taʼ ferħ meta student tal-​Bibbja jiddedika lilu nnifsu lil Jehovah u jissimbolizza dan permezz tat-​tgħaddis fl-​ilma. Iżda kull sena, xi wħud fostna ma jibqgħux jassoċjaw magħna, u jieqfu milli jgħidu lil oħrajn dwar l-​isem u l-​għemejjel taʼ Jehovah. Għandna raġuni valida għalxiex ninkwetaw. Għalkemm il-​biċċa l-​kbira taʼ l-​uħud inattivi m’abbandunawx il-​verità, huma forsi jkunu waqfu milli jippridkaw minħabba xi skuraġġiment, problemi persunali, jew ansjetajiet oħrajn tal-​ħajja. (Mt. 13:​20-22) Dawk li jinsabu f’qagħda dgħajfa spiritwalment għandhom bżonn l-​għajnuna biex jiġu lura fil-​kongregazzjoni qabel ma jinbelgħu mis-​sistema taʼ Satana. (1 Pt. 5:8) F’dan l-​istaġun tal-​Mafkar irridu nagħmlu sforz speċjali sabiex lill-​uħud inattivi kollha li huma kwalifikati ngħinuhom jerġgħu jiġu involuti f’li jippridkaw l-​aħbar tajba.

¹¹ Is-​segretarju tal-​kongregazzjoni għandu javża lil dawk li jikkonduċu l-​istudju tal-​ktieb dwar l-​uħud inattivi li jistaʼ jkollhom fil-​grupp tagħhom. Il-​Kumitat tas-​Servizz tal-​Kongregazzjoni għandu jieħu t-​tmexxija f’li jirranġa li jsiru żjajjar pastorali lill-​uħud inattivi kollha. Jekk jiġi deċiż li l-​individwu jistaʼ jibbenefika minn studju tal-​Bibbja persunali, l-​indokratur tas-​servizz għandu jirranġa biex tingħata l-​għajnuna, wara li jkun ħa parir mingħand membri oħrajn tal-​kumitat tas-​servizz dwar min hu l-​iktar addattat biex jikkonduċi l-​istudju. Għalkemm forsi ma jkunx hemm għalfejn li l-​istudju jdum sejjer għal perijodu twil taʼ żmien, dak inkarigat biex jikkonduċih jistaʼ jirrapporta l-​ħin, iż-​żjajjar lura, u l-​istudju tal-​Bibbja.

¹² F’April li għadda, oħt li kienet qed taħdem minn dar għal dar offriet ir-​rivisti lil wieħed żagħżugħ li kien għaddej fit-​triq. Hu qalilha li martu kienet Xhud inattiva. Staqsieha fejn kienet is-​Sala tas-​Saltna u stieden lill-​oħt biex tmur iżżur lilu u lil martu d-​dar. B’riżultat taʼ dan, it-​tnejn attendew għal-​laqgħa taʼ wara u qablu li jkollhom studju tal-​Bibbja.

¹³ Kun Lest għal Attività Miżjuda! Is-​salmista li ddikjara li għandna ngħarrfu l-​isem u l-​għemejjel taʼ Jehovah żied: “Għannulu u doqqulu, xandru l-​għeġubijiet tiegħu kollha. Ftaħru bl-​isem qaddis tiegħu.” (Salm 105:​2, 3) Ejja nuru kemm aħna interessati fl-​isem kbir taʼ Jehovah u “l-​għeġubijiet” tiegħu billi nżidu l-​isforzi tagħna fil-​ministeru, u b’hekk nagħmlu dan l-​istaġun tal-​Mafkar l-​akbar wieħed li qatt kellna!

[Kaxxa f’paġna 4]

Diversi Modi Kif Tikkalkula 12-il Siegħa fil-​Ġimgħa biex Tkun Pijunier Awżiljarju

Ġurnata Sigħat

It-​Tnejn 1 2 − −

It-​Tlieta 1 − 3 −

L-​Erbgħa 1 2 − 5

Il-​Ħamis 1 − 3 −

Il-​Ġimgħa 1 2 − −

Is-​Sibt 5 4 3 5

Il-​Ħadd 2 2 3 2

Total: 12 12 12 12

Hemm xi waħda minn dawn l-​iskedi li hija tajba għalik? Jekk le, għax ma tagħmilx l-​iskeda persunali tiegħek?