Jehovah taʼ Min Ifaħħru bil-​Bosta

L-​Ikla taʼ fil-​Għaxija tal-​Mulej Se Tiġi Ċelebrata fis-​16 t’April

¹ Iktar ma qiegħed joqrob is-​16 t’April 2003, iktar inħossuna ħerqanin għal dan il-​jum. F’dik il-​lejla se nfakkru l-​mewt taʼ Ġesù flimkien maʼ miljuni taʼ qaddejja sħabna madwar id-​dinja kollha biex nigglorifikaw l-​isem taʼ Jehovah. Jehovah jixraqlu kull tifħir mingħandna għall-​provvediment meraviljuż tal-​fidwa. Permezz taʼ dan, hu se jkun jistaʼ jagħti barkiet sbieħ lill-​bnedmin ubbidjenti kollha. B’qalbna kollha ningħaqdu mas-​salmista u ngħidu: “Kbir il-​Mulej, taʼ min ifaħħru bil-​bosta.”—Salm 145:3.

² Dan huwa żmien li nimmeditaw fuq it-​tjubija t’Alla u fuq id-​dejn taʼ gratitudni li għandna x’nagħtu lil Jehovah talli bagħat “lil Ibnu l-​waħdieni fid-​dinja, biex ngħixu bih.” (1 Ġw. 4:​9, 10) Jekk b’ubbidjenza nosservaw l-​Ikla tal-​Mulej dan se jnaqqxilna f’qalbna li “twajjeb u ħanin il-​Mulej . . . u kollu tjieba.” (Salm 145:8) Tabilħaqq, l-​arranġament tal-​fidwa huwa l-​akbar espressjoni taʼ mħabba lejn il-​bnedmin kollha. (Ġw. 3:16) Meta nirriflettu fuq l-​imħabba t’Alla u naħsbu dwar il-​ħajja taʼ Ġesù taʼ fedeltà u integrità, niġu mqanqlin biex infaħħru lil Jehovah. Matul l-​eternità, se nfaħħruh għall-​imħabba bla tarf li wera lejna meta għamilha possibbli għalina li jkollna ħajja taʼ dejjem.—Salm 145:​1, 2.

³ Għin lil Oħrajn Ifaħħru lil Jehovah: Meta nuru apprezzament għall-​aqwa rigal li tana Alla, dak tal-​fidwa, se nitqanqlu biex nistiednu lil oħrajn ħalli jingħaqdu magħna sabiex infaħħru lkoll flimkien lil Jehovah. Is-​salmista kien imnebbaħ li jikteb: “It-​tjubija tiegħek bla qjies ifakkru, jgħajjtu bil-​ferħ minħabba l-​ġustizzja tiegħek.” (Salm 145:7) Is-​sena l-​oħra x-​Xhieda taʼ Jehovah madwar id-​dinja kollha qattgħu iktar minn biljun siegħa fix-​xogħol taʼ l-​ippridkar. Xi rriżulta mill-​isforzi tagħhom? Kull ġimgħa, medja taʼ iktar minn 5,100 ruħ tgħammdu bħala simbolu tad-​dedikazzjoni tagħhom lil Jehovah. B’total taʼ 15,597,746 li attendew għat-​Tifkira tal-​mewt taʼ Ġesù, inkluż iktar minn 9 miljun ruħ li għadhom ma bdewx ifaħħru lil Jehovah bħala pubblikaturi taʼ l-​aħbar tajba, hemm potenzjal kbir għal iktar żjieda! Bħala proklamaturi tas-​Saltna, aħna ngħożżu l-​privileġġ li għandna taʼ li nxandru l-​aħbar tajba u ngħinu biex il-​qlub t’oħrajn iduru lejn Jehovah, Ibnu, u s-​Saltna.

⁴ Mod tajjeb kif ninkuraġġixxu lil oħrajn biex jonoraw lil Jehovah huwa billi nistidnuhom biex jingħaqdu magħna ħalli niċċelebraw l-​Ikla taʼ fil-​Għaxija tal-​Mulej. Għamilt lista taʼ dawk kollha li tixtieq tistieden kif ukoll taʼ dawk li forsi jkollhom bżonn jiġu mfakkra fil-​ġurnata u l-​ħin? Tajt invit lil dawk kollha li niżżilt fil-​lista? Jekk le, fittex agħtihom wieħed fiż-​żmien li għad fadal. Għinhom japprezzaw l-​iskop taċ-​ċelebrazzjoni. Dakinhar kun lest li tilqaʼ lill-​mistidnin. Ġagħalhom iħossu li l-​preżenza tagħhom hija mixtieqa, introduċihom maʼ l-​oħrajn, u faħħarhom talli jkunu ġew.

⁵ Meta wħud ġodda jattendu t-​Tifkira jistgħu jitqanqlu biex jagħmlu progress spiritwali. Student tal-​Bibbja li jbati minn tip t’ansjetà li tiġi wara xi esperjenza trawmatika, isibha diffiċli ħafna biex imur f’postijiet fejn ikun hemm ħafna nies, però rnexxielu jattendi għat-​Tifkira. Meta ġie mistoqsi x’deherlu mil-​laqgħa, qal: “Kienet lejla tant qaddisa, u jien kont preżenti.” Minn dakinhar, beda jattendi l-​laqgħat.

⁶ Wara t-​Tifkira: X’jistaʼ jsir biex ngħinu lil dawn l-​uħud interessati ħalli jibdew ifaħħru lil Jehovah? L-​anzjani se joqogħdu attenti għal dawk l-​uħud ġodda li jkunu attendew it-​Tifkira u jagħmlu xi arranġamenti maʼ pubblikaturi kwalifikati biex mill-​iktar fis iżuru lil dawn l-​uħud ħalli jirrivedu magħhom l-​affarijiet li tgħallmu u osservaw. Hemm mnejn li xi wħud minnhom ikunu jridu jibdew studju tal-​Bibbja. Dawn l-​uħud għandhom jiġu mistidnin ukoll biex jattendu l-​laqgħat kollha tal-​kongregazzjoni, ladarba attendenza regulari bħal din tistaʼ żżid l-​għarfien tagħhom tal-​Bibbja.

⁷ Qegħdin isiru xi arranġamenti biex ninkuraġġixxu lil dawk kollha li huma irregulari u inattivi ħalli jibdew jattendu l-​laqgħat regolarment. Jekk tiġi mistoqsi mill-​anzjani biex tgħin lil xi ħadd li huwa inattiv ħalli jerġaʼ jibda joħroġ fuq is-​servizz taʼ l-​għalqa, kun lest li taċċetta. Jekk nuru dan l-​interess bi mħabba lejn ħutna se nkunu fi qbil maʼ dak li ħeġġeġ l-​appostlu Pawlu: “Dment li għandna ż-​żmien ħa nagħmlu l-​ġid maʼ kulħadd, l-​iktar maʼ qrabatna fil-​fidi.”—Gal. 6:10.

⁸ Jalla lkoll kemm aħna nagħmlu sforz speċjali biex nattendu għat-​Tifkira fis-​16 t’April. Żgur li ma nixtiqux nitilfu din l-​okkażjoni tant qaddisa biex infaħħru lil Jehovah. Iva, issa u għal dejjem, jalla nfaħħru lil Jehovah għax-​xogħlijiet kbar tiegħu!—Salm 145:21.