Kampanja Speċjali għat-​Tqassim tal-​Browxer il-​Ġdid

¹ Ħafna nies illum huma inkwetati dwar il-​kundizzjonijiet tad-​dinja, imma ftit jifhmu għala d-​dinja tinsab f’dan l-​istat, x’se jġib miegħu l-​futur, u x’għandhom jagħmlu sabiex jibqgħu ħajjin matul il-​ġudizzju li riesaq. (Eżek. 9:4) Sabiex ngħinuhom jagħrfu s-​sinifikat taż-​żminijiet li qed ngħixu fihom, se jkun hemm kampanja speċjali għat-​tqassim tal-​browxer il-​ġdid Ibqaʼ Għassa! li se tibda t-​Tnejn, 18 t’Ottubru, u tibqaʼ sejra sal-​Ħadd, 14 taʼ Novembru.

² Il-​browxer jistaʼ jiġi offrut meta tkun qed tieħu sehem fil-​ministeru minn dar għal dar, fiż-​żjajjar lura, fl-​għoti taʼ xiehda informali, jew meta tkun f’xi territorju pubbliku ieħor. Madankollu, il-​browxer Ibqaʼ Għassa! m’għandux jitqassam bl-​addoċċ. Anzi, il-​browxer għandu jitħalla biss maʼ dawk li verament juru interess f’dak li tgħid il-​Bibbja dwar it-​tifsir tal-​ġrajjiet dinjin. Lil dawk li juru ftit interess fil-​messaġġ tistaʼ toffrilhom fuljett.

³ Forsi tistaʼ tiġbed l-​attenzjoni taʼ l-​individwu billi tgħid:

◼ “Ħafna nies huma konċernati dwar il-​problemi serji u l-​ġrajjiet tal-​biżaʼ li huma komuni llum. [Agħti eżempju magħruf lokalment.] Kont taf li dawn l-​affarijiet kienu mbassrin fil-​Bibbja? [Agħti ċans għal tweġiba. Imbagħad aqra skrittura li taqbel maʼ l-​eżempju li tkun semmejt, bħal Mattew 24:​3, 7, 8; Luqa 21:​7, 10, 11; jew it-​2 Timotju 3:​1-5.] Il-​Bibbja tirrivela t-​tifsir taż-​żminijiet li qed ngħixu fihom u taʼ dak li hemm jistenniena fil-​futur. Tixtieq tkun taf iktar? [Agħti ċans għal tweġiba. Jekk ikun hemm interess sinċier offri l-​browxer.] Il-​browxer jingħata mingħajr ħlas. Jekk tixtieq tagħti donazzjoni żgħira għax-​xogħol tagħna li jsir madwar id-​dinja, aħna naċċettawha mill-​qalb.”

⁴ Jew forsi ssib din il-​preżentazzjoni effettiva:

◼ “Ħafna llum huma ansjużi minħabba l-​ġrajjiet tal-​biżaʼ li qed iseħħu fid-​dinja jew minħabba xi traġedja persunali. Xi wħud jistaqsu għala Alla ma jintervinix biex ma jħallix dawn l-​affarijiet jiġru. Il-​Bibbja tassigurana li Alla dalwaqt se jaġixxi biex ineħħi s-​sofferenza tal-​bnedmin. Innota liema benefiċċji se jġib Alla għall-​umanità. [Aqra Salm 37:​10, 11.] Tixtieq tkun taf iktar?” Ikkonkludi bħal fuq.

⁵ Ipprova ikseb l-​isem u l-​indirizz taʼ kull persuna li taċċetta kopja tal-​browxer, u rranġa biex tmur lura sabiex tikkultiva l-​interess. Suġġerimenti dwar kif dan jistaʼ jsir se jidhru fil-​ħarġa tal-​Ministeru tas-​Saltna taʼ Novemrbu, 2004. Jekk persuna turi interess sinċier fl-​ewwel żjara, forsi jirnexxilek tibda studju tal-​Bibbja dak il-​ħin stess billi tuża l-​browxer Ibqaʼ Għassa! jew inkella xi pubblikazzjoni oħra, bħall-​browxer X’Jirrikjedi.

⁶ Kopji tal-​browxer il-​ġdid se jkunu disponibbli wara lLaqgħa tas-​Servizz tal-​lejla. Huwa suġġerit li għall-​ewwel il-​pubblikaturi u l-​pijunieri jieħdu biss dawk il-​browxers li jkollhom bżonn għall-​ewwel ftit jiem tal-​kampanja. Jalla Ġeħova jbierek din l-​attività speċjali għat-​tifħir tiegħu u għall-​benefiċċju taʼ dawk taʼ qalbhom onesta kullimkien.​—Salm 90:17.