Niftakru fil-Fidwa b’Apprezzament
1, 2. Liema raġunijiet għandna biex niftakru fil-fidwa b’apprezzament?
1 Minħabba li jridu jobdu l-kmand taʼ Ġesù, il-Kristjani madwar id-dinja se jiltaqgħu wara nżul ix-xemx nhar is-Sibt, 22 taʼ Marzu, 2008, biex jikkommemoraw il-mewt taʼ Ġesù Kristu. (Lq. 22:19; 1 Kor. 11:23-26) Aħna niġu mqanqlin biex nagħmlu dan minħabba li għandna apprezzament profond għal dak kollu li twettaq f’din id-data 1,975 sena ilu. Minħabba li żamm l-integrità tiegħu perfettament meta bata mewta taʼ wġigħ fuq zokk tat-tortura, Ġesù qaddes isem Missieru, u b’hekk ipprovda l-aqwa tweġiba għat-tgħajjir taʼ Satana.—Ġob 1:11; Prov. 27:11.
2 Id-demm imxerred taʼ Ġesù għamel validu l-patt il-ġdid, u b’hekk ippermetta lil bnedmin imperfetti biex ikunu wlied adottati t’Alla bil-prospett li jaħkmu maʼ Kristu fis-Saltna tas-sema tiegħu. (Ġer. 31:31-34; Mk. 14:24) Iktar minn hekk, meta Alla ta lill-Iben maħbub u għażiż tiegħu bħala sagrifiċċju, intwera kemm għandu mħabba profonda għall-bnedmin sewwasew bħalma spjega Ġesù nnifsu lil Nikodemu.—Ġw. 3:16.
3. Kif se jibbenefikaw dawk li jattendu t-Tifkira?
3 Stieden lil Oħrajn: Il-ħarġa taʼ Jannar tal-Ministeru tas-Saltna issuġġeriet li nagħmlu lista taʼ wħud li nafuhom biex nistidnuhom personalment. Bdejt int tistieden lil dawk li għandek fuq il-lista tiegħek? Qed tagħmel arranġamenti biex tieħu sehem bis-sħiħ fil-kampanja li se tibda fl-1 taʼ Marzu sabiex jiġu mistidnin in-nies għat-Tifkira? Dawk li se jattendu se jisimgħu informazzjoni Skritturali li tistaʼ tibni l-fidi fil-fidwa li, mill-banda l-oħra, twassal għall-ħajja taʼ dejjem.—Rum. 10:17.
4. Għala għandna naslu kmieni għat-Tifkira?
4 Dawk kollha li jistgħu, għandhom jippjanaw li jaslu kmieni u jagħtu merħba mill-qalb lil dawk li jkunu aċċettaw l-istedina speċjali. L-attendenza kbira għat-Tifkira tagħmilha vitali għalina li nkunu attenti b’mod partikulari għall-uħud ġodda kif ukoll għal oħrajn li jattendu l-laqgħat minn żmien għal żmien.
5. Kif tistaʼ tħejji qalbek għal din l-okkażjoni?
5 Ħejji Qalbek: Il-ktejjeb Neżaminaw l-Iskrittura Kuljum—2008 u t-2008 Calendar fihom skeda għall-qari tal-Bibbja speċjali għat-Tifkira li se jibda mis-17 taʼ Marzu. Meta tikkunsidra l-ġrajjiet importanti li seħħew matul l-aħħar jiem tal-ħajja taʼ Ġesù fuq l-art se tiġi megħjun biex tħejji qalbek għall-osservanza tat-Tifkira. (Esd. 7:10) Jekk timmedita bit-talb dwar dawn ir-rakkonti tal-Bibbja int se tkabbar l-apprezzament tiegħek għall-imħabba li wrew Ġeħova u Ibnu meta pprovdew il-fidwa.—Salm 143:5.
6. Kif se jeffettwana l-fatt li nibnu l-apprezzament għall-fidwa?
6 Hekk kif toqrob it-Tifkira, jalla nħejju lilna nfusna u lil oħrajn bir-reqqa għal din l-okkażjoni importanti. Ir-relazzjoni tagħna maʼ Ġeħova u maʼ Ibnu se tissaħħaħ jekk niftakru fil-fidwa b’apprezzament. (2 Kor. 5:14, 15) Se niġu mqanqlin ukoll biex nimitawhom billi nagħmlu sagrifiċċji persunali bi mħabba għal oħrajn.—1 Ġw. 4:11.