Meta Inkwilin Jitkellem Lingwa Oħra
1. Għala hemm dejjem bżonn għal iktar kooperazzjoni meta jkun qed jinħadem it-territorju?
1 Iktar u iktar spiss, pubblikaturi tas-Saltna madwar id-dinja qed isibu nies interessati li jitkellmu lingwa differenti minn dik tal-kongregazzjoni. Sabiex jgħinu lil dawn l-uħud spiritwalment, ħafna uffiċċji tal-fergħa qed jaraw il-bżonn li jifformaw gruppi u kongregazzjonijiet taʼ lingwi oħrajn. Ladarba għadd taʼ lingwi jistgħu jkunu mitkellma f’post wieħed, diversi kongregazzjonijiet taʼ lingwi differenti għandhom mnejn jippridkaw fl-istess territorju. Il-kongregazzjonijiet kif jistgħu jikkooperaw sabiex ikunu ċerti li x-xogħol taʼ l-ippridkar qed isir bl-ordni?—1 Kor. 14:33.
2. Meta nkunu qed nippridkaw minn bieb għal bieb, kif nistgħu nikkooperaw maʼ grupp jew kongregazzjoni taʼ lingwa differenti fl-inħawi tagħna?
2 Kooperazzjoni Tajba: Meta pubblikatur ikun qed jagħti xiehda fit-toroq jew informali, għandu jħossu liberu javviċina lil kulħadd, inkluż dawk li forsi jitkellmu lingwa differenti, u joffri letteratura bil-lingwa li l-individwu jippreferi jaqra. Madankollu, meta jkun qed jaħdem minn dar għal dar fi nħawi fejn grupp jew kongregazzjoni taʼ lingwa differenti taħdem ukoll, ġeneralment pubblikatur għandu jiffoka fuq id-djar taʼ dawk li jitkellmu l-lingwa tal-kongregazzjoni li hu jattendi. Meta kongregazzjonijiet differenti jippridkaw fl-istess inħawi, huwa importanti ħafna li jinżamm rekord tajjeb. L-indokraturi tas-servizz għandhom jikkomunikaw flimkien u jorganizzaw l-affarijiet sabiex ikun taʼ benefiċċju għal kulħadd. (Prov. 11:14) Madankollu, jekk pubblikatur jiltaqaʼ maʼ xi ħadd li jitkellem lingwa oħra meta jkun qed jaħdem minn bieb għal bieb u m’hemmx kongregazzjonijiet taʼ dik il-lingwa fil-viċinanzi, il-pubblikatur għandu jistinka biex jagħti xiehda u jieħu ħsieb l-interess.
3. X’għandna nagħmlu meta niltaqgħu maʼ pubblikaturi minn grupp jew kongregazzjoni taʼ lingwa differenti li jkunu qed jaħdmu fl-istess territorju?
3 L-Istess Xogħol: X’għandna nagħmlu meta pubblikaturi minn kongregazzjonijiet differenti jinzertaw qed jippridkaw fl-istess inħawi fl-istess ġurnata? M’għandniex xi ngħidu, l-imħabba Kristjana se tegħleb kwalunkwe differenzi fil-lingwa u kulħadd se jkun interessat prinċipalment fil-bżonnijiet tan-nies fit-territorju. (Ġw. 13:34, 35) Għalhekk, dawk li jkunu qed jieħdu t-tmexxija se juru r-raġunevolezza u l-imħabba hekk kif jiddeċiedu jekk grupp wieħed għandux imur f’territorju differenti għal dak il-ħin.—Ġak. 3:17, 18.
4. Liema profezija qed titwettaq illum?
4 Il-Bibbja pprofetizzat li nies taʼ ilsna differenti kellhom jisimgħu l-aħbar tajba. (Riv. 14:6, 7) Permezz taʼ kooperazzjoni sħiħa fost dawk kollha involuti, tistaʼ tiġi evitata sitwazzjoni fejn pubblikaturi minn gruppi jew kongregazzjonijiet taʼ lingwa differenti jħabbtu l-istess bieb. B’hekk, ħafna wħud ġodda se jintlaħqu bl-aħbar tajba, inkluż dawk li jitkellmu lingwa oħra.—Efes. 4:16.