Ir-​Rivisti Tagħna—Disinjati Biex Jolqtu lil Kulħadd

1. Il-​klassi tal-​ilsir leali u għaqli kif timita lill-​appostlu Pawlu?

¹ Sewwasew bħalma l-​appostlu Pawlu adatta l-​mod kif ippreżenta l-​aħbar tajba sabiex jilħaq “nies taʼ kull xorta,” il-​klassi tal-​ilsir leali u għaqli tuża r-​rivisti tagħna biex tilħaq lil nies taʼ sfondi u twemmin differenti. (1 Kor. 9:22, 23) Sabiex inkunu nistgħu nagħmlu użu tajjeb mit-​Torri tal-​Għassa u Stenbaħ! nagħmlu tajjeb jekk inżommu f’moħħna min se jaqra r-​rivisti tagħna.

2. Ir-​rivista Stenbaħ! hi disinjata biex tilħaq lil min?

² Stenbaħ!: Il-​mira taʼ din ir-​rivista hi li tilħaq l-​istess tip taʼ nies li kellem l-​appostlu Pawlu meta indirizza lill-​“irġiel t’Ateni.” (Atti 17:22) Dawn l-​irġiel ma trabbewx f’ambjent Kristjan, u ftit li xejn kellhom fehma tal-​Iskrittura. Bl-​istess mod, in-​nies li għalihom hi disinjata r-​rivista Stenbaħ! jafu ftit jew xejn dwar il-​Bibbja. Għandhom mnejn ma jafu xejn dwar it-​tagħlim Kristjan, forsi jkunu xi ftit xettiċi dwar ir-​reliġjon, jew forsi ma jafux li l-​Bibbja fiha valur prattiku. Oġġettiv ewlieni tar-​rivista Stenbaħ! hu li tikkonvinċi lill-​qarrejja tagħha li l-​Alla l-​veru jeżisti. L-​għan taʼ din ir-​rivista hu wkoll li tibni fidi fil-​Bibbja u li tgħin lill-​qarrej jifhem li x-​Xhieda taʼ Ġeħova huma differenti minn gruppi reliġjużi oħrajn.

3. Għal min jinkitbu ż-​żewġ edizzjonijiet tat-​Torri tal-​Għassa?

³ It-​Torri tal-​Għassa: L-​uħud li għalihom tinkiteb l-​edizzjoni pubblika taʼ din ir-​rivista għandhom ċertu rispett għal Alla u għall-​Iskrittura. Għandhom xi għarfien dwar il-​Bibbja imma ma jifhmux it-​tagħlim tagħha b’eżattezza. Huma simili għall-​udjenza li Pawlu rrefera għalihom bħala dawk li ‘jibżgħu minn Alla.’ (Atti 13:14-​16) L-​edizzjoni għall-​istudju tat-​Torri tal-​Għassa tinkiteb primarjament għax-​Xhieda taʼ Ġeħova. Pawlu assuma li dawk li kienu jaqraw l-​ittri tiegħu kienu familjari mal-​Iskrittura u kellhom għarfien eżatt tal-​verità. (1 Kor. 1:1, 2) Bl-​istess mod, l-​artikli fl-​edizzjoni għall-​istudju huma miktubin għal dawk li jattendu l-​laqgħat tagħna u huma familjari mat-​termini u t-​twemmin tax-​Xhieda.

4. Għala għandna nsiru familjari maʼ kull ħarġa tar-​rivisti li nużaw fl-​għalqa?

⁴ Għalkemm is-​soltu noffru r-​rivisti flimkien, ġeneralment niddiskutu waħda biss fil-​preżentazzjoni tagħna. Għalhekk, agħmilha l-​mira tiegħek li tkun familjari maʼ kull ħarġa. Imbagħad se tkun preparat biex tuża dak li se jolqot lil dawk li tiltaqaʼ magħhom.